Ɨnû 7 - Meta’

Tɨ̀taanɨ njə̀m ɨmbə̀ʼ bə̂d 144,000

¹ Ənɨ rɨ̀taanɨ njə̀m ze nyaʼa chě, mə nyaʼa zə mbɨ̀aŋgɨrə̀ mɨkwè nɨ nyaʼa təm ənɨ rɨbu te rɨ̀kwè ɨgwɨ ə si. Ɨ mbɨə nyaʼə kən ɨfim mbe ɨkwè rɨ ɨgwɨ ə si ɨmbə̀ʼ tɨ əfim ə mɔʼɔ ə chè i ɨgwɨ ə si kɨ ɨgwɨ rɨ̀bàà kɨ̀ chè nun əzed ə mɔʼɔ.

² Mə nyaʼa zə aŋgɨrə̀ cherə nɨ nyaʼə kɔʼ rɨ əbà ze nɨ nyùmə̀ ə jwɨ̀ə̀. Wɨ̀ nyaʼa yim əghɨ ze nɨ Ŋwìə̀ we nɨ yeʼ ɨkǎ ə zɨ̀ ənweenɨ ɨgwɨ mbi bə̂d. Wɨ̀ nyaʼa kyeŋ rɨkǎ əbɔʼ mbɨ̀aŋgɨrə̀ mbe mɨkwè nɨ nyaʼa berɨ ɨka nɨ ghɨ əghəm ənɨ ə si bə̀ ghɨ̀ ənɨ rɨ̀bàà.

³ Wɨ̀ nyaʼə kyeŋə ghàə̀ ni, “Tɨ mbə̀ ghɨ ə əghəm ənɨ ə si kɨ̀ ənɨ rɨ̀bàà kɨ̀ ənɨ ɨzed pè ənɨ tɨ̀ fə zɨ ənweenɨ ənɨ ɨkəŋ ɨsɨ bə̂d mbe nɨə fàʼ əmbɨ a Ŋwiə̀.”

⁴ Mə nyaʼa zu ɨnun bə̂d we nɨ wɨ̀ nyaʼa zɨ ənweenɨ ɨgun mɨ̀mə̌d. Mbɨ yɨə nyaʼə chuʼ ɨkɨ fibɨ̀ mbɨ ɨwum kwè chɔ̀b rɨkwè. Mbɨ yɨə nyaʼa rɨŋga mɨnəbɨ Izre mbe wum chɔ̀b rɨ̀be.

⁵ Wɨ̀ nyaʼa zɨ̀ ənweenɨ ɨgun ə bə̂d chuʼ wum chɔ̀b rɨ̀be ɨŋga ɨnəbɨ Judà, zɨ̀ ɨgun ə bə̂d chuʼ wum chɔ̀b rɨ̀be ɨŋga ɨnəbɨ Rubèn, zɨ̀ ɨgun ə bə̂d chuʼ wum chɔ̀b rɨ̀be ɨŋga ɨnəbɨ Gad,

⁶ zɨ̀ ɨgun ə bə̂d chuʼ wum chɔ̀b rɨ̀be ɨŋga ɨnəbɨ Ashà, zɨ̀ ɨgun ə bə̂d chuʼ wum chɔ̀b rɨ̀be ɨŋga ɨnəbɨ Naftalì, zɨ̀ ɨgun ə bə̂d chuʼ wum chɔ̀b rɨ̀be ɨŋga ɨnəbɨ Mànasè,

⁷ zɨ̀ ɨgun ə bə̂d chuʼ wum chɔ̀b rɨ̀be ɨŋga ɨnəbɨ Simiòn, zɨ ɨgun ə bə̂d chuʼ wum chɔ̀b rɨ̀be ɨŋga ɨnəbɨ Levì, zɨ̀ ɨgun ə bə̂d chuʼ wum chɔ̀b rɨ̀be ɨŋga ɨnəbɨ Isakà

⁸ zɨ̀ ɨgun ə bə̂d chuʼ wum chɔ̀b rɨ̀be ɨŋga ɨnəbɨ Zebulùn, zɨ̀ ɨgun ə bə̂d chuʼ wum chɔ̀b rɨ̀be ɨŋga ɨnəbɨ Jòsêf, zɨ̀ ɨgun ə bə̂d chuʼ wum chɔ̀b rɨ̀be ɨŋga ɨnəbɨ Benjamìn.

Tɨ̀taanɨ njə̀m ɨmbə̀ʼ ɨnɔ̂n bə̂d nɨ nyaʼa ɨkaŋ

⁹ Ənɨ rɨ̀taanɨ njə̀m ze nyaʼa chě, mə nyaʼa nèŋ, əne zə ɨnɔ̂n bə̂d nɨ nyaʼa kwàʼ wɨ kyeŋ, nɨ chəi ənɨ tɨ̀ wə̀d nyaʼa taŋ. Mbɨ yɨə nyaʼə rɨŋga ɨbeŋ jìm, rɨŋga mɨnəbɨ jìm, rɨŋga ɨsɨ jìm bə̀ fɔrɨ rɨŋga mɨŋgam jìm. Mbɨ nyaʼa təm ɨfě ətən ɨfɔ̀n bə̀ təm ɨfě Wan njɨ̀g. Mbɨ nyaʼa zɨ̀ ngywɨ̌ tɨ rɨ̀fɨ bə̀ yim ɨzaŋ.

¹⁰ Ɨ mbɨə nyaʼə kyeŋ ənɨ gɨ̂ kǎ kǎ ghàə̀ ni, “À Ŋwìə̀ we nɨ chub ɨgun ətən ɨfɔ̀n mbɨ ə Wan njɨ̀g fə chɨ əwa rəŋgəʼ!”

¹¹ Mbɨ̀aŋgɨrə̀ mbe mɨ̀jìm nyaʼa təm kad ətən ɨfɔ̀n ze, kad bə̂d kyeŋ mbe bə̀ kad ɨghɨ mbe ɨkwè nɨ yeʼ ɨka. Mbɨ nyaʼa gù nòkɨ̀ ə si rəkubə ɨfě ətən ɨfɔ̀n ze wumnɨ ə Ŋwiə̀,

¹² ghàə̀ ni, “À yɨ əne! Tɨ̀ yiirɨ à Ŋwìə̀, wumnɨ əməd, nàʼ məben-əwe ɨ bɔ, məd ə zeŋ, ɨ wɨə nàʼ əbɔrəbɔd, wɨ̀ berɨ ɨwe bə̀ berɨ ɨka koŋ koŋ! À yɨ əne.”

¹³ Wɨ mɔʼɔ rəbɔʼ bə̂d kyeŋ mbe nyaʼa biirɨ ɨ num ni, “Bə̂d mbɔ̂ nɨ zɨ ngywɨ̌ tɨ rɨ̀fɨ kɨ mɨ̀we ə? Mbɨ kɨ rɨ ə yi ə?”

¹⁴ Mə nyaʼa wììrɨ̀ ɨ bɔ ni, “Chəi mə̀ kyerɨ, kyɨə masà. Àwɔ̀ ə kyerɨ.” Wɨ̀ nyaʼa ghà ɨ num ni, “Mbɔ̂ yɨə bə̂d mbe nɨ fə chè ɨŋga ŋgəʼ ze nɨ chè əbɔ, àyɨə chəi mbɨ kwɨ. Mbɨ fə sò tə ngywɨ̌ ɨŋga ənəm ə Wan njɨ̀g tɨ sɨə fuə.

¹⁵ Əne ɨ mbɨ ɨfě ətən ɨfɔ̀n ə Ŋwiə̀ fàʼ ɨ bɔ əziə mbɨ ɨzimɨ ɨŋga mbàn məd. Məd we nɨ chub ɨgun ətən ɨfɔ̀n bɨrɨ kubrɨ mɨ̀mə̌d.

¹⁶ Chəi njì bɨrɨ nɔ wɨrɨ zaŋ mɨ̀mə̌d. Chəi ədɔʼ ə bɨrɨ nɔ wɨrɨ ne mɨ̀mə̌d. Chəi əchwî kɨ̀ ɨsɨ nomɨ ka ka bɨrɨ nɔ wɨrɨ tɔn mɨ̀mə̌d,

¹⁷ ɨmbə̀ʼ ɨghəm nɨ Wan njɨ̀g we nɨ təm ɨŋga mɨgharə̀ ətən ɨfɔ̀n ze bɨrɨ nəŋgɨ mɨ̀mə̌d ɨghabɨ ənə̂ŋgɨ̀-njɨ̀g; wɨ̀ bɨrɨ kə̀ŋ mɨ̀mə̌d wò ənɨ mɨ̀jwɨ̀-əmboŋ mɨnib nɨə nàʼ ɨ̀tènɨ̀. Ŋwìə̀ bɨrɨ fu mɨsɨ jìm tɨ ənɨ əghə mɨ̀mə̌d.”