Ɨnû 21 - Meta’

Tɨ̀taanɨ njə̀m ɨmbə̀ʼ ɨkaŋ fi mbɨ ə si fi

¹ Mə nyaʼa zə ɨkaŋ fi bə̀ zə si fi. Ɨkaŋ rɨtu mbɨ ə si rɨtu nyaʼa fə nim. Rɨ̀bàà nyaʼa fə bə̀ nim.

² Mə nyaʼa zə əsɨ ə zeŋɨ nɨ nyaʼə swiʼə rɨkaŋ tɨ əmbɨ ə Ŋwiə̀. Əsɨ ə zeŋɨ ze yɨə Jèrusalèm fi. Mbɨ nyaʼa fə tekɨ əməd bə̀ yèʼ ɨchî nɨ mbɨə yèʼ ɨgən nɨ mbɨə wo chà əmbɨ ɨnom məd.

³ Mə nyaʼa zu gɨ̂ rɨ ənɨ ətən ɨfɔ̀n ze. Gɨ̂ ze zɨə nyaʼə ghàə̀ ni, “Mbə̀ zə, tɨ̀nîn əsɨ nɨ Ŋwìə̀ ə chubə ə zɨ əkaʼ ə bə̂d. Wɨ̀ bɨrɨ chubɨ mbɨ mɨ̀mə̌d əne mbɨ bɨrɨ yeʼ bə̂d ɨməd. Ŋwìə̀ ziə, nɨ yeʼ Ŋwìə̀ mɨ̀mə̌d, bɨrɨ chubɨ mbɨ mɨ̀mə̌d.

⁴ Wɨ̀ bɨrɨ fu mɨsɨ jìm tɨ ənɨ əghə mɨ̀mə̌d. Chəi bə̂d bɨrɨ wɨrɨ kwɨ. Chəi bə̂d bɨrɨ wɨrɨ dì kɨ̀ chweŋ mɨsɨ kɨ̀ zu bè rɨbuʼ, ɨmbə̀ʼ ɨghəm nɨ ɨnû mbe nɨ nyaʼa bè əŋgu fə chè i.”

⁵ Məd we nɨ nyaʼa chub ɨgun ətən ɨfɔ̀n ze nyaʼa ghà ni, “Mbə̀ zə, mə wɨə tekɨ ɨghɨjìm ənɨ mbɨ fi!” Wɨ̀ nyaʼa bə̀ ghà ni, “Ŋwaʼnɨ ənû zɔ̂ ɨmbə̀ʼ ɨghəm nɨ mɨŋgam mbɔ̂ yɨ mɨŋgam rəsìʼ nɨ tɨ̀ bə̂d benɨ.”

⁶ Wɨ̀ nyaʼa ghà ɨ num ni, “Ɨnû jìm fə mì i! Mɔ̌ yɨə Alfà mbɨ ə Omegà. Mɔ̌ yɨ ɨkɔ bə̀ yeʼ ɨnwǐ. Mə bɨrɨ naʼ mɨnib rɨ ənɨ jwɨ̀-əmboŋ we nɨ mɨnib məd ə nàʼ ɨ̀tènɨ̀ əmbɨ wə̀d we nɨ ədɔʼ ə ne əməd. Wɨ̀ bɨrɨ nɨŋ əko nɨ chəi wɨ̀ naʼ ɨkab.

⁷ Wə̀d we nɨ baŋ ɨnû rɨbɔ̀ŋ bɨrɨ jɨg ɨghɨ mbɔ̂ jìm. Mə bɨrɨ yeʼ Ŋwìə̀ məd, məd bə̀ yeʼ mɨ wan.

⁸ Àyɨə ɨkwèd, bə̂d nɨ chəi mbɨ wɨrɨ ben ə Kristo, mbe nɨə ghɨ̀ ɨnû rɨbɔ̀ŋ yiirɨ yiirɨ, mbe nɨə zwiirɨə mbɨ cherə, mbe nɨə niirɨə mbaŋə̀ kɨ̀ məyi əbəŋ əbəŋ, mbe nɨə ghɨ̀ mɨ̀sà, mbe nɨə wumnɨ mbɨ̀anèŋ mbɨ ə bə̂d mɨghab mɨ̀jìm, bɨrɨ nwi ɨŋga əsɨ ze nɨ ɨwid kyeŋ we nɨ sɔlfò ə ghɨ̀ ni wɨ berɨə. Wɔ̂ yɨ ɨvɨ we nɨ pe ənɨ wɨ be.”

Tɨ̀taanɨ njə̀m ɨmbə̀ʼ ə Jèrusalèm fi

⁹ Wɨ mɔʼɔ rəbɔʼ mbɨ̀aŋgɨrə̀ mbe sambe nɨ nyaʼa yim ɨŋgupɨ ɨkaŋ mbe sambe nɨ ŋgəʼ kǎ kǎ te sambe nɨ sɨ nwìə̀ nyaʼa swi ɨŋga, nyaʼa yeʼe ghà ɨ num ni, “Yeʼe, mə bɨrɨ chwi ɨgən we nɨ yeʼ ɨwi Wan njɨ̀g ɨ ne.”

¹⁰ Əzwî ə nyaʼa nyɨ ɨŋga num, əne aŋgɨrə̀ we nyaʼa nɨŋ əmɨ tɨ̀ wò ɨkaŋ ɨwum kyeŋ nɨ nyaʼa kaŋ jeŋgɨ sà ɨkaŋ. Wɨ̀ nyaʼa pè əngu, chwi əsɨ ə zeŋɨ, əne yɨə Jèrusalèm, nɨ Ŋwìə̀ nyaʼə swiə rɨkaŋ.

¹¹ Ɨwumnɨ Ŋwiə̀ wɨə nyaʼə te əsɨ ze. Ə zɨə nyaʼə mèŋnɨ̀ ɨghabɨ ndəŋ əka ɨnun bə̀ mèŋnɨ̀ ɨghabɨ ə jaspà. Ə zɨə nyaʼə bə̀ zeŋ ɨghabɨ ə kristal.

¹² Əsɨ ze ə nyaʼa berɨ ə̀gùʼ ɨkam kyeŋ nɨ nyaʼa kaŋ jeŋgɨ sà ɨkaŋ. Zɨə nyaʼa berɨ mɨchû ɨkam wum chɔ̀b rɨ̀be. Mbɨ̀aŋgɨrə̀ wum chɔ̀b rɨ̀be mbɨə nyaʼə nəŋgɨ mɨchû ɨkam mbe. Mbɨ nyaʼa ŋwàʼnɨ̀ rɨkum mɨnəbɨ mɨ̀Izre mbe wum chɔ̀b rɨ̀be ɨgun mɨchû ɨkam mbe.

¹³ Mɨchû ɨkam tad mbɨə nyaʼa əbà ze nɨ nyùmə̀ ə jwɨ̀ə̀, ɨtad əbà ze rɨ ətu, ɨtad əbà ze rɨ əton, ɨtad əbà ze nɨ nyùmə̀ ə nyɨ ɨkòb.

¹⁴ Ə̀gùʼ ɨkam ze rɨ əsɨ ze nyaʼa berɨ əti əchɨ ə nəb wum chɔ̀b rɨ̀be. Mbɨ nyaʼa ŋwàʼnɨ̀ rɨkum bə̂d tom Wan njɨ̀g mbe wum chɔ̀b rɨ̀be ɨgun əti ze.

¹⁵ Aŋgɨrə̀ we nɨ nyaʼa gham ɨ num nyaʼa berɨ mbàŋ gôl nɨ mbɨə mɨ̀g ɨghɨ əŋgu. Wɨ̀ nyaʼa berɨ mɨg əsɨ ze, mɨ̀g mɨchû ɨkam mbe bə̀ mɨ̀g ɨ̀gùʼ ɨkam.

¹⁶ Ɨba kwè mbe rɨ əsɨ ze mbɨə nyaʼə əndəŋ əndəŋ. Ɨsa məd mbɨ ɨfaŋ məd wɨə nyaʼa əndəŋ əndəŋ. Aŋgɨrə̀ we nyaʼa mɨ̀g əsɨ ze ənɨ ə mbàŋ ze, zə ni zɨə nyaʼa sà mɨ̀kilometà chuʼ rɨ̀be mbɨ əkɨ əkwè. Ɨsa məd mbɨ ɨfaŋ məd mbɨ ɨsa ɨkaŋ məd mbɨə nyaʼə əndəŋ əndəŋ.

¹⁷ Wɨ̀ nyaʼa bə̀ mɨ̀g ə̀gùʼ ze rɨ əsɨ ze, əne zə ni zɨə nyaʼa sà ɨkaŋ mɨ̀metà ɨwum rɨ̀fuə chɔ̀b rɨ̀fuə. Wɨ̀ nyaʼa mɨ̀g əne beenɨ əbɔʼ ɨchî nɨ bə̂d mɨ̀sɔŋɨchù ə mɨ̀g ɨghɨ.

¹⁸ Mbɨ nyaʼa bɔm ə̀gùʼ ze ənɨ ə jaspà. Mbɨ nyaʼa bɔm əsɨ ze àmei ənɨ ə gôl. Gôl we wɨə nyaʼə zeŋə ɨghabɨ manèm nɨ tɨ̀ wə̀d zə ɨghɨ ənjìm.

¹⁹ Mbɨ nyaʼa yèʼ ɨchɨ rɨ ənɨ ə̀gùʼ ze ənɨ tɨkwɨrɨ əti ɨka ɨnun jìm. Əti rɨtu yɨə nyaʼə jaspà. Əze nɨ pe ənɨ mbɨ be yɨə nyaʼə safi. Əze nɨ pe ənɨ mbɨ tad yɨə nyaʼə agate. Əze nɨ pe ənɨ mbɨ kwè yɨə nyaʼə emeràl.

²⁰ Əze nɨ pe ənɨ mbɨ tân yɨə nyaʼə oniz. Əze nɨ pe ənɨ mbɨ rɨ̀fuə yɨə nyaʼə kaneliàn. Əze nɨ pe ənɨ mbɨ sambe yɨə nyaʼə Krisolìt. Əze nɨ pe ənɨ mbɨ famɨ yɨə nyaʼə berìl. Əze nɨ pe ənɨ mbɨ ə̀bùə yɨə nyaʼə topàz. Əze nɨ pe ənɨ mbɨ wum yɨə nyaʼə Krisopràs. Əze nɨ pe ənɨ mbɨ wum chɔ̀b mɔʼ yɨə nyaʼə jasìn. Əze nɨ pe ənɨ mbɨ wum chɔ̀b rɨ̀be yɨə nyaʼə ametìst.

²¹ Mɨchû ɨkam mbe wum chɔ̀b rɨ̀be yɨə nyaʼə mɨ̀pə̂l wum chɔ̀b rɨ̀be. Ɨchû ɨkam mɔʼ yɨə nyaʼə pə̂l mɔʼ. Mbɨ nyaʼa tekɨ ɨnə̂njɨ̀ kyeŋ we rɨŋga əsɨ ze àmei ənɨ ə gôl. Gôl we wɨə nyaʼa ɨghabɨ ə manèm nɨ tɨ̀ wə̀d zə ɨghɨ ənjìm.

²² Chə nyaʼa i mbàn Ŋwìə̀ ɨŋga əsɨ ze, ɨmbə̀ʼ ɨghəm nɨ mbàn Ŋwìə̀ məd yɨ Ə̀nùŋɨ̀sɨg Ŋwìə̀kɔʼ mbɨ ə Wan njɨ̀g.

²³ Chəi əsɨ ze ə kəb ə nyùmə̀ kɨ̀ ɨmɨg nɨ te ɨgun, ɨmbə̀ʼ ɨghəm nɨ ɨzeŋɨ zeŋɨ Ŋwìə̀ wɨə te ɨgwɨ əsɨ ze. Wan njɨ̀g yɨə bə̀ ənam əməd.

²⁴ Bə̂d rɨŋga ɨbeŋ jìm bɨrɨ yen ənɨ ɨzeŋɨ zeŋɨ we nɨə te rɨ ənɨ əsɨ ze. Mɨfɔ̂n rɨ ɨgwɨ ə si bɨrɨ wo mbɨ tə mbɔ̂n ɨŋga əsɨ ze.

²⁵ Chəi mbɨ bɨrɨ nɔ wub mɨchû ɨkam mbe rɨ əsɨ ze əziə. Chə bəi ɨzimɨ əsɨ ze.

²⁶ Mbɨ bɨrɨ nɨŋ mbɔ̂n mbɨ ɨghɨ ɨwumnɨ rɨŋga ɨsɨ jìm wò ɨŋga əsɨ ze.

²⁷ Chəi əghɨ ə mɔʼɔ ze nɨ rɨka zeŋ i bɨrɨ nɔ nyɨ ɨŋga əsɨ ze, kɨ̀ à kɨ ə wə̀d nɨə ghɨ̀ ɨnû tɨ̀nìd ətu, kɨ̀ we nɨə ghàə̀ mɨghab. Àmei bə̂d mbe nɨ mbɨ ŋwaʼnɨ rɨkum tɨ mɨ̀mə̌d ɨŋga ə̀ŋwàʼnɨ̀ ə Wan njɨ̀g nɨ bə̂d bɨrɨ jɨg ɨ̀tènɨ̀ bɨrɨ nyɨ ɨŋga əsɨ ze.