Ɨnû 20 - Meta’

Tɨ̀taanɨ njə̀m nɨ aŋgɨrə̀ nyaʼa kod ə Debɨ̀rə̀ ɨghəm ɨwu chuʼ fibɨ̀

¹ Mə nyaʼa zə aŋgɨrə̀ nɨ nyaʼə swiʼə rɨkaŋ. Wɨ̀ nyaʼa yim əfiʼ tɨ ənɨ ɨbɨgɨ we nɨ chəi ɨnwǐ. Wɨ̀ nyaʼa bə̀ yim karə kyeŋ.

² Wɨ̀ nyaʼa gywɨ̀ tɨ̀sɔ̀ʼɔ̀ jɔ ze, nɨ yeʼ jɔ ze nɨ nyaʼa rəŋwe, əne yɨə Debɨ̀rə̀ kɨ ə Satàn, əne kod əməd ɨghəm ɨwu chuʼ fibɨ̀.

³ Wɨ̀ nyaʼa kod əne, màʼ ɨŋga ɨbɨgɨ we, kubrɨ ɨchû ɨbɨgɨ we ɨgwɨ məd bə̀ zɨ̀ ənweenɨ ɨgwɨ ɨchû we ɨmbə̀ʼ tɨ wɨ̀ wɨrɨ tambɨ i ɨbeŋ, pè ənɨ ɨghəm ɨwu mbe chuʼ fibɨ̀ fə mi. Ənɨ ɨghəm ɨwu mbe fə mi, mbɨ berɨ za əməd sàŋ ənɨ ɨkə nyumə̀.

⁴ Mə nyaʼa zə ɨtən ɨfɔ̀n. Mbɨ nyaʼa nàʼ ɨka əmbɨ ə bə̂d mbe nɨ nyaʼa chub ɨgun ɨtən mbe ni mbɨ saʼ ɨsɨg. Mə nyaʼa bə̀ zə ɨ̀tènɨ̀ bə̂d mbe nɨ mbɨ nyaʼa sopɨ ɨtu mɨ̀mə̌d ɨmbə̀ʼ ɨghəm nɨ mbɨ nyaʼə ghà rəsìʼ ɨmbə̀ʼ ə Yeso bə̀ fɔrɨ ɨmbə̀ʼ ɨghəm nɨ mbɨ nyaʼə ghà ɨŋgam Ŋwiə̀. Chəi mbɨ nyaʼa wumnɨ nyam kyeŋ rɨtu ze kɨ̀ bè ə anèŋ məd. Chəi mbɨ nyaʼa zɨ ənweenɨ ə nyam kyeŋ ze ənɨ ɨkəŋ ɨsɨ mɨ̀mə̌d, kɨ̀ ɨgun ɨbɔ mɨ̀mə̌d. Mbɨ nyaʼa zwemə əne tùmbɨ̀ ɨsɨg mbɨ Kristo ɨghəm ɨwu chuʼ fibɨ̀.

⁵ (Chəi ə̀bùʼ ə bə̂d ze nɨ nyaʼa fə kwɨ nyaʼa zwemə pè ənɨ ɨghəm ɨwu mbe chuʼ fibɨ̀ fə mi.) Wɔ̂ yɨ ɨghəm rɨtu nɨ bə̂d bɨrɨ zwemə.

⁶ Ŋwìə̀ bɨrɨ naʼ əbɔrəbɔd əmbɨ ə bə̂d mbe nɨ bɨrɨ zwemə ənɨ ə nyùmə̀ rɨtu wɔ̂. Mbɨ bɨrɨ bɨ chub ɨzeŋɨ zeŋɨ. Chəi ɨvɨ we nɨ pe ənɨ wɨ be berɨ ɨka ɨgwɨ mɨ̀mə̌d. Mbɨ bɨrɨ fàʼ ɨghabɨ ə bə̂d mbàn əmbɨ ə Ŋwiə̀ fɔrɨ əmbɨ Kristo, əne mbɨ bɨrɨ bɨ tumbɨ ɨsɨg mbɨ məd ɨghəm ɨwu chuʼ fibɨ̀.

Tɨ̀taanɨ njə̀m nɨ Ŋwìə̀ baŋ ə Satàn

⁷ Ənɨ ɨghəm ɨwu mbe chuʼ fibɨ̀ fə mi, mbɨ bɨrɨ chɨ ə Satàn rɨŋga ndəŋ məd ze.

⁸ Wɨ̀ bɨrɨ jwɨ̀ wò tambɨ ɨbeŋ jìm mbe nɨ yeʼ ənɨ rɨbu te rɨ̀kwè ɨgwɨ ə si, əne yɨə Gɔ̌g mbɨ ə Magɔ̀g, əne fɔtɨ mɨ̀mə̌d ni mbɨ maʼ bid. Ɨnun mɨ̀mə̌d nyaʼa nɔʼ ɨghabɨ rɨsi ze nɨ yeʼ əŋgo rɨ̀bàà.

⁹ Mbɨ nyaʼa yèn ɨgwɨ ə si jìm wò kad əsɨ ze nɨ bə̂d Ŋwiə̀ nyaʼa fetɨ əŋgu, əne yɨ əsɨ ze nɨ Ŋwìə̀ ghaʼi kwàʼ rɨŋgəʼ. Àyɨə ɨwid nyaʼa swiʼ rɨkaŋ tɔ̀n mɨ̀mə̌d.

¹⁰ Mbɨ nyaʼa màʼ ə Debɨ̀rə̀ we nɨ nyaʼə tambɨ mɨ̀mə̌d ɨŋga əsɨ ze nɨ sɔlfò ə ghɨ̀ ni ɨwid kyeŋ berɨə, nɨ yeʼ əsɨ ze nɨ mbɨ nyaʼa fə be màʼ nyam kyeŋ ze mbɨ ə bə̂d ɨ̀kə̀n mɨghab mbe əŋgu. Mbɨ bɨrɨ sɨə chəə mɨ̀mə̌d əŋgu əziə mbɨ ɨzimɨ koŋ koŋ.

Tɨ̀taanɨ njə̀m nɨ Ŋwìə̀ bɨrɨ sob mɨsaʼi ɨghəm nɨ sɨ nwìə̀

¹¹ Mə nyaʼa zə ətən ɨfɔ̀n ə kyeŋ ə fufu bə̀ zə məd we nɨ nyaʼa chub ɨgun. Ɨkaŋ mbɨ ə si nyaʼa nim rɨ ɨfě məd. Chəi mbɨ nyaʼa wɨrɨ zə mɨ̀mə̌d.

¹² Mə nyaʼa zə ɨvɨ bə̂d, əne yɨ ɨvɨ bə̂d kyeŋ mbɨ ɨvɨ bə̂d kwa. Ɨvɨ bə̂d mbe nyaʼa təmbɨ ɨfě ətən ɨfɔ̀n ze. Mbɨ nyaʼa fìʼ ɨ̀ŋwàʼnɨ̀. Mbɨ nyaʼa bə̀ fìʼ ə̀ŋwàʼnɨ̀ ə cherə. Əze yɨ ə̀ŋwàʼnɨ̀ ze nɨ mbɨ ŋwaʼnɨ tɨkum bə̂d mbe nɨ bɨrɨ jɨg ɨ̀tènɨ̀. Ŋwìə̀ nyaʼa saʼ ɨvɨ bə̂d mbe beenɨ əbɔʼ ɨnû mbe nɨ mbɨ nyaʼa ŋwaʼnɨ ɨŋga ɨ̀ŋwàʼnɨ̀ mbe, əne yɨ əbɔʼ ɨnû mbe nɨ mbɨ nyaʼa ghɨ̌.

¹³ Rɨ̀bàà nyaʼa chɨ̀ ɨvɨ bə̂d mbe nɨ nyaʼa ɨŋga məd. Ɨvɨ mbɨ əbeŋ ɨvɨ bə̂d nyaʼa bə̀ chɨ̀ ɨvɨ bə̂d mbe nɨ nyaʼa ɨŋga mɨ̀mə̌d. Ŋwìə̀ nyaʼa saʼ mɨ̀mə̌d mɨjìm beenɨ əbɔʼ ɨnû mbe nɨ mbɨ nyaʼa ghɨ̌.

¹⁴ Əne mbɨ nyaʼa màʼ Ɨvɨ mbɨ əbeŋ ɨvɨ bə̂d ɨŋga ɨwid kyeŋ. Ɨwid kyeŋ we yɨ ɨvɨ we nɨ pe ənɨ wɨ be.

¹⁵ À mɨ yeʼ nɨ chəi mbɨ nyaʼa zə ɨkum wə̀d mɔʼɔ ɨŋga ə̀ŋwàʼnɨ̀ ze nɨ mbɨ ŋwaʼnɨ rɨkum bə̂d mbe nɨ bɨrɨ jɨg ɨ̀tènɨ̀, mbɨ nyaʼa màʼ əməd ɨŋga ɨwid kyeŋ we.