Ɨnû 2 - Meta’

Ɨkə̂n we nɨ Jɔ̌n nyaʼa ŋwaʼnɨ əmbɨ ɨfetɨ bə̂d Kristo we rɨ ə Efesùs

¹ Ə̀nùŋɨ̀sɨg Yeso nyaʼa gha ɨ num ni, “Ŋwaʼnɨ əmbɨ aŋgɨrə̀ we nɨə nəŋgɨ ɨfetɨ bə̂d Kristo we rɨ ə Efesùs ni: “Wə̀d we nɨ yim rɨtəmɨ te sambe ɨŋga e əbɔ ə jɨgɨ, nɨə yèn əkaʼ ɨghɨ mbe sambe nɨ mbɨə te ɨnam ɨgun, nɨ mbɨ tekɨ ənɨ ə gôl, ə ghà ni,

² Mə kyerɨ ɨnû mbe nɨ àwɔ̀ ə ghɨ̀ə̀. Mə kyerɨ ɨchî nɨ à fə fàʼi rɨkǎ bə̀ kyerɨ ɨchî nɨ à fə nyiʼ əton ə ŋgəʼ. Mə kyerɨ ni chəi à ghaʼ nɨ zə bə̂d mbe nɨə ghɨ̀ ɨnû rɨbɔ̀ŋ bə̀ kyerɨ ni à fə kwàʼnɨ̀ bə̂d mbe nɨə ghàə̀ ni mbə̀ yɨə bə̂d tom àyɨə kaʼi mbɨwən, əne zə ni mbɨ yɨə bə̂d mɨghab.

³ Mə kyerɨ ni à wɨə nyìʼə̀ bə̀ zəə ŋgəʼ əku ɨmbə̀ʼ əmɨ, àyɨə chəi à kɨrɨ bɔd.

⁴ Àyɨə mə berɨ ənû zɔ̂ ɨmbə̀ʼ əwe. Ənû ze yɨ ni chəi àwɔ̀ ə wɨrɨə ghaʼə bə̂d ɨchî nɨ à nyaʼə beə ghaʼə.

⁵ Əne kɔndɨ ɨchî nɨ à nyaʼa beə bɔŋ à nyaʼa sɨə gùə̀! Beŋ e fîŋ sɨə wɨrɨə ghɨ̀ ɨnû mbe nɨ à nyaʼə beə ghɨ̀ə̀. À mɨ ton ghɨ e əne, mə bɨrɨ yeʼe əsɨ ne, pè chɨ̀ əghɨ ze nɨ àwɔ̀ ə te ənam ɨgun rɨ əsɨ ze nɨ zɨə yeʼ əŋgu.

⁶ Àyɨə ənû ə chɔ̀m ze nɨ à ghɨ̌ yɨ ni: à bàn ɨnû mbe nɨ bə̂d mbe nɨə beenɨ əbɔʼ Nikolaùs ə ghɨ̀ə̀, àmei ɨchî nɨ mə̀ bə bàn.

⁷ “Wə̀d we nɨ tɨ̀ wɨ̀ zu ənû, wɨ̀ zu ənû ze nɨ Əzwî ə ghàə̀ əmbɨ rɨfetɨ bə̂d Kristo. Mə bɨrɨ naʼ ɨka əmbɨ ə bə̂d mbe nɨ baŋ ɨnû rɨbɔ̀ŋ ni mbɨ jɨg rɨ ənɨ əzed ze nɨə ghɨ̀ ni bə̂d jɨg ɨ̀tènɨ̀. Əzed ze zɨ ɨŋga paradaìs Ŋwìə̀.”

Ɨkə̂n we nɨ Jɔ̌n nyaʼa ŋwaʼnɨ əmbɨ ɨfetɨ bə̂d Kristo we rɨ ə Smainà

⁸ Ə̀nùŋɨ̀sɨg nyaʼa bə̀ ghà ɨ num ni: “Ŋwaʼnɨ əmbɨ aŋgɨrə̀ we nɨ yeʼ ɨŋga ɨfetɨ bə̂d Kristo we rɨ ə Smainà ni, 'Ɨŋgam wɔ̂ yɨ rɨ əmbɨ wɨ rɨtu nɨ bə̀ yeʼ we nɨ sɨ nwìə̀, nɨ nyaʼa kwɨ wɨrɨ zwemə.

⁹ Mə kyerɨ ɨchî nɨ àwɔ̀ ə zəə ŋgəʼ bə̀ kyerɨ ɨchî nɨ à kwaŋɨ, àyɨə àwɔ̀ yɨə wə̀d ɨkab. Mə kyerɨ ɨnû mbe nɨ bə̂d mbe nɨə ghà ni mbə yɨə mɨ̀Jû, àyɨə kaʼi mbɨwən, ə ghàə̀ ɨmbə̀ʼ chəkɨ e ɨkum. Mbɨ yɨ rɨŋga ɨfetɨ Satàn.

¹⁰ Tɨrə̀ bɔ e ənû ze nɨ à bɨrɨ zə ŋgəʼ ɨmbə̀ʼ əzɨ əwən. Zə, Debɨ̀rə̀ bɨrɨ zɨ mbən mɨmɔʼɔ ə ndəŋ, ɨmbə̀ʼ zweʼrɨ əwən. Mbɨ bɨrɨ nwendɨ tə rɨkyerɨ-ɨwu ɨni wum. Mbə̀ nuŋ fîŋ ɨgun ə Kristo wò pè ənɨ mbɨ zwiirɨ əwən. Mə bɨrɨ neʼ əwən mbɨ ɨ̀tènɨ̀.

¹¹ Wə̀d we nɨ tɨ̀ wɨ̀ zu ənû, wɨ̀ zu ənû ze nɨ Əzwî ə ghàə̀ əmbɨ rɨfetɨ bə̂d Kristo. Kaʼ ɨvɨ we nɨ pe ənɨ wɨ be bɨrɨ betɨ i wə̀d we nɨ baŋ ɨnû rɨbɔ̀ŋ.'”

Ɨkə̂n we nɨ Jɔ̌n nyaʼa ŋwaʼnɨ əmbɨ ɨfetɨ bə̂d Kristo we rɨ ə Pegamùm

¹² Ə̀nùŋɨ̀sɨg nyaʼa bə̀ gha ɨ num ni: “Ŋwaʼnɨ əmbɨ aŋgɨrə̀ we nɨ yeʼ ɨŋga ɨfetɨ bə̂d Kristo we rɨ ə Pegamùm ni, 'Ɨŋgam wɔ̂ yɨ rɨ əmbɨ wə̀d we nɨ berɨ ɨbi bid we nɨə tɔ ɨba jìm.

¹³ Mə kyerɨ əsɨ ze nɨ àwɔ̀ ə chub əŋgu, əne yɨ əsɨ ze nɨ ətən ɨfɔ̀n ə Satàn ə yeʼ əŋgu. Yim mɨ ɨkum wɨ wò ɨmbì. Chəi à nyaʼa sob nɨ nuŋ fîŋ ɨgwɨ num, ka àbei ənɨ ə nyùmə̀ Antipàs we nɨ nyaʼə ghà ɨnû ɨmbə̀ʼ əmɨ ənɨ i fîŋ jìm. Mbɨ nyaʼa zwiirɨ əməd əkaʼ nən əsɨ ze nɨ Satàn ə chubə.

¹⁴ Àyɨə mə berɨ ɨnû mɔʼɔ rɨpiî ɨmbə̀ʼ əwe. Bə̂d mɔʼɔ mbɨ əkaʼ nən nɨə beenɨ əbɔʼ ɨnû mbe nɨ Balàm nyaʼə chwiə. Balàm nyaʼa chwi ɨchî əmbɨ Balàk ni wɨ̀ febrɨ mɨ̀Izre ɨmbə̀ʼ mbɨ jɨg ɨghɨ mbe nɨ mbɨ nyaʼa naʼ ənɨ ɨghɨ ə̀fà əmbɨ mbɨ̀anèŋ. Wɨ̀ nyaʼa bə̀ febrɨ mɨ̀mə̌d ni mbɨ ghɨ̀ ɨfabrɨ ɨnû.

¹⁵ À yɨə bə̀ əndəŋ əndəŋ ni bə̂d mɔʼɔ mbɨ əkaʼ nən nɨə beenɨ əbɔʼ ɨnû mbe nɨ Nikolaùs nyaʼə chwiə.

¹⁶ Əne beŋ e fîŋ! À mɨ ton beŋ e, mə bɨrɨ zambɨ yeʼe əsɨ ne pè màʼ bid mbɨ mɨ̀mə̌d mbɨ ɨbi bid we nɨ yeʼ ɨŋga mɨ ɨchû.

¹⁷ Wə̀d we nɨ tɨ̀ wɨ̀ zu ənû, wɨ̀ zu ənû ze nɨ Əzwî ə ghà əmbɨ rɨfetɨ bə̂d Kristo. Mə bɨrɨ naʼ ə manà mɔʼɔ rəbɔʼ we nɨ yeʼ ənə̀mə əmbɨ wə̀d jìm we nɨ baŋ ɨnû rɨbɔ̀ŋ. Mə bɨrɨ naʼ ɨti rɨ̀fɨ nɨ mbɨ ŋwaʼnɨ ɨkum fi ɨgun ɨ bɔ. Chəi wə̀d mɔʼɔ kyerɨ ɨkum we chè rɨ ənɨ wə̀d we nɨ nɨŋ ɨti we.'”

Ɨkə̂n we nɨ Jɔ̌n nyaʼa ŋwaʼnɨ əmbɨ ɨfetɨ bə̂d Kristo we rɨ ə Tìatirà

¹⁸ Ə̀nùŋɨ̀sɨg nyaʼa bə̀ gha ɨ num ni: “Ŋwaʼnɨ əmbɨ aŋgɨrə̀ we nɨ yeʼ ɨŋga ɨfetɨ bə̂d Kristo we rɨ ə Tìatirà ni, 'Ɨŋgam wɔ̂ yɨ rɨ əmbɨ ə Wan Ŋwìə̀ we nɨ əghə əməd ə berɨ ɨghabɨ ɨnemɨ ɨwid, nɨ tɨkyerɨ-ɨwu məd yeʼ ɨghabɨ ə brɔnz nɨ mbɨ chiʼi.

¹⁹ Mə kyerɨ ɨnû mbe nɨ àwɔ̀ ə ghɨ̀ə̀. Mə kyerɨ ɨchî nɨ à ghaʼ mbe bɔŋgɔb bə̀ kyerɨ ni à fə nùŋ e fîŋ ɨgwɨ num. Mə bə̀ kyerɨ ni à wɨə faʼə fɔrɨ ni à wɨə nyìʼ əton ə ŋgəʼ. Ɨ̀fàʼì mbe nɨ à sɨ nwìə̀ faʼ, mbɨ chè mbɨ rɨtu.

²⁰ Àyɨə mə berɨ ənû ə mɔʼɔ ɨmbə̀ʼ əwe. Ənû ze yɨ ni, chəi à təmnɨ əyi we nɨ mbɨə tɔŋ ənɨ ə Jesebèl. Ɨ wɨə ghàə̀ ni tə yɨə wə̀d ɨ̀kə̀n əyi. Ɨ wɨə chwi ɨnû ɨmbə̀ʼ febrɨ mbɨ bə̂d ə̀fàʼì ni mbɨ ghɨ ɨfabrɨ-ɨnû fɔrɨ ni mbɨ jɨg tɨjɨg te nɨ mbɨ naʼ ənɨ əghɨ ə̀fà əmbɨ mbɨ̀anèŋ.

²¹ Mə nyaʼa nàʼ nyùmə̀ ɨ bɔ ni wɨ̀ beŋ i fîŋ ɨmbə̀ʼ ɨfabrɨ-ɨnû mbe nɨ wɨ̀ nyaʼə ghɨ̀ə̀, àyɨə wɨ nyaʼa ton i.

²² Zə, mə bɨrɨ zɨ əwɔn ɨgwɨ məd, bə̀ zɨ̀ ŋgəʼ kyeŋ ɨgun ə mbaŋə̀ te nɨə ni əməd, kɨrɨ ənɨ mbɨ beŋ tə fîŋ tɨ ɨnû mbe nɨ mbɨə ghɨ̀ə̀ mbɨ məd.

²³ Mə bɨrɨ zwiirɨ bɔn məd. Tɨfetɨ bə̂d Kristo rɨ̀jìm bɨrɨ kyerɨ ni mɔ̌ yɨə wə̀d nɨə kyèʼrɨ̀ə̀ tɨkɔndɨ bə̂d bə̀ kyèʼrɨ̀ə̀ fîŋ tɨ mɨ̀mə̌d. Mə bɨrɨ chwɨ wə̀d mɔʼ mɔʼ rəbɔʼ nən beenɨ əbɔʼ ɨnû mbe nɨ mbə̀ ghɨ̌.

²⁴ Àyɨə əmbɨ ə mbə̀n mbe nɨ buʼ ə Tìatirà, nɨ chəi mbɨə beenɨ əbɔʼ ɨnû mbɔ̂, nɨ chəi mbə̀ kɨrɨ kwembɨ ɨnû mbe nɨ yeʼ ənə̀mə ɨmbə̀ʼ ə Satàn, mə ghà ɨ nən ni chəi mə bɨrɨ zɨ ɨkom cherə ɨgwɨ nən.

²⁵ Ɨkom we nɨ mə̀ bɨrɨ zɨ ɨgwɨ nən mei ni mbə̀ nuŋ fîŋ ɨgwɨ num pè ənɨ mə̀ bɨrɨ wɨrɨ yeʼe.

²⁶ Mə bɨrɨ naʼ ɨka nɨ tumbɨ ɨbeŋ jìm əmbɨ ə wə̀d we nɨ baŋ ɨnû rɨbɔ̀ŋ bə̀ sɨə ghɨ̀ ɨnû mbe nɨ mə̀ kəbɨ wò pè ənɨ ɨnwǐ.

²⁷ Məd bɨrɨ tumbɨ ɨbeŋ mbe ənɨ ɨka jìm àmei ɨchî nɨ wə̀d ə zwiə rɨkyiŋ si ənɨ ə mbàŋ ə̀tə̀nɨ, tɨ sandɨ tɨkə rɨkə.

²⁸ Wɨ̀ bɨrɨ berɨ ɨkwɨ ɨka we nɨ mɨ Mbǎʼ nàʼ ɨ num. Mə bɨrɨ naʼ təbid ɨ bɔ.

²⁹ Wə̀d we nɨ tɨ̀ wɨ̀ zu ənû, wɨ̀ zu ənû ze nɨ Əzwî ə ghà əmbɨ rɨfetɨ bə̂d Kristo.'”