Ɨnû 19 - Meta’

Ɨchî nɨ mbɨə yiirɨ ə Ŋwiə̀ ɨkaŋ

¹ Əze ə nɨə cheə, mə nyaʼa zu əghɨ ə mɔʼɔ ɨkaŋ nɨ nyaʼa ɨghabɨ ə gɨ̂ ɨnɔ̂n bə̂d nɨ nyaʼa kwàʼ wɨ kyeŋ. Gɨ̂ ze zɨə nyaʼə ghàə̀ rɨ̀kǎ ni, “Tɨ̀ yiirɨ ə Ŋwìə̀! Məd wɨə chɨ̀ə̀ bə̂d rəŋgəʼ. Bə̂d mbɨə nàʼ ɨwumnɨ ɨ bɔ. Məd ziə ə berɨ ɨka!

² Tɨ̀ ghɨ̀ əne ɨmbə̀ʼ ɨghəm nɨ ɨchî nɨ məd ə chəə bə̂d ə kaŋ kùʼ. À yɨə bə̀ ɨchî rəsìʼ. Wɨ̀ fə zɨ̀ ɨchə ɨgwɨ ə̀kùnɨ̀ əka ze nɨ nyaʼə chə̀kɨ̀ ɨsɨg ɨchî nɨ wɨ̀ nyaʼə niirɨə mbaŋə̀ əbəŋ əbəŋ. Ŋwìə̀ fə zɨ̀ ɨchə ɨgwɨ məd ɨmbə̀ʼ ɨghəm nɨ wɨ̀ nyaʼa zwiirɨ bə̂d ə̀fàʼì məd.”

³ Mbɨ nyaʼa wɨrɨ yɨ kyeŋ ghà ni, “Tɨ̀ yiirɨ ə Ŋwiə̀! Ndiʼ tɨ ənɨ ɨwid we nɨə tɔ̀n əməd zɨə kɔʼə wò ɨkaŋ koŋ koŋ.”

⁴ Bə̂d kyeŋ mbe ɨwum be chɔ̀b rɨ̀kwè mbɨ ɨghɨ mbe ɨkwè nɨ yeʼ ɨkǎ nyaʼa gundɨ ə si wumnɨ ə Ŋwiə̀ nɨ nyaʼa chubɨ ɨgun ətən ɨfɔ̀n. Ɨ mbɨə nyaʼə wumnɨə ghàə̀ ni, “À yɨ əne! Tɨ yiirɨ ə Ŋwiə̀!”

Tɨ̀taanɨ njə̀m ɨmbə̀ʼ əchwɨ̂ ɨnamɨ Wan njɨ̀g

⁵ Gɨ̂ nyaʼa yeʼe rɨ ənɨ ətən ɨfɔ̀n, ghàə̀ ni, “Mbə̀ yiirɨ a Ŋwiə̀, mbə̀n bə̂d ə̀fàʼì məd mɨjìm. Mbə̀n mbe nɨə wumnɨ əməd, mbə̀ yiirɨ əməd, əne yɨ mbɨ kwa mbɨ mbɨ kyeŋ!”

⁶ Mə nyaʼa zu əghɨ ə mɔʼɔ nɨ nyaʼa ɨghabɨ ə gɨ̂ ɨnɔ̂n bə̂d nɨ nyaʼa kwàʼ wɨ kyeŋ. Gɨ̂ ze zɨə nyaʼa ɨghabɨ ɨchî nɨ mɨgyɨ̂ nɔnɔʼ ə jùʼə̀ bə̀ fɔrɨ ɨghabɨ ɨchî nɨ mbə̀ŋ ə kùmə̀. Zɨ̀ nyaʼə ghàə̀ rɨ̀kǎ ni, “Tɨ̀ yiirɨ ə Ŋwiə̀! Ə̀nùŋɨ̀sɨg a Ŋwìə̀kɔʼ wɨə sɨə tùmbɨ̀ə̀ mbi bə̂d.

⁷ Tɨ̀ ghaʼrɨ əwa bə̀ doʼrɨ əwa yiirɨ ə Ŋwiə̀, ɨmbə̀ʼ ɨghəm nɨ nyùmə̀ fə kùʼi nɨ Wan njɨ̀g bɨrɨ nam. Ɨgən məd fə tekɨ i ɨnyod.

⁸ Ŋwìə̀ fə nàʼ ngywɨ̌ əka ɨnun ɨ bɔ ni wɨ̀ zɨə. Ngywɨ̌ ze zɨə teenɨə bə̀ zeŋə.” (Ngywɨ̌ əka ɨnun ze yɨ ɨnû chɔ̀m mbe nɨ bə̂d Ŋwiə̀ ə ghɨ̀ə̀.)

⁹ Aŋgɨrə̀ we nyaʼa ghà ɨ num ni, “Ŋwaʼnɨ ənû zɔ̂: 'Ŋwìə̀ zɨ əbɔrəbɔd ɨgun ə bə̂d mbe nɨ mbɨ won ənɨ əchwî ɨnamɨ Wan njɨ̀g.'” Aŋgɨrə̀ we nyaʼa yi ghà ni, “Mbɔ̂ yɨ mɨŋgam rəsìʼ nɨ Ŋwiə̀ ghamɨ.”

¹⁰ Mə nyaʼa zu əne gundɨ ə si ɨfě bɔ ɨmbə̀ʼ wumnɨ əməd, àyɨə wɨ̀ nyaʼa ghà ɨ num ni, “Tɨrə̀ ghɨ e əne! Mɔ̌ yɨə wə̀d ə̀fàʼì mbɨ ne bə̀ fɔrɨ mbɨ mbe bɔŋgɔb mbe nɨə ghà rəsìʼ ɨmbə̀ʼ ə Yeso. Wumnɨ ə Ŋwiə̀!” Mə wɨə ghà əne ɨmbə̀ʼ ɨghəm nɨ rəsìʼ ɨmbə̀ʼ ə Yeso yɨ əghɨ ze nɨə ghɨ̀ ni bə̂d ɨ̀kə̀n ghà ɨkə̂n Ŋwiə̀.

Tɨ̀taanɨ njə̀m ɨmbə̀ʼ wə̀d nɨ kɔʼ ngyǐ rɨ̀fɨ

¹¹ Mə nyaʼa zə ɨkaŋ əfìʼə, bə̀ zə ngyǐ rɨ̀fɨ əŋgu. Ɨ mbɨə nyaʼə tɔŋə mbaŋə̀ ze nɨ nyaʼa kɔʼ ngyǐ ze ni Wə̀d nɨə ghà rəsìʼ bə̀ tɔŋə ni Wə̀d nɨə ghɨ̀ ɨnû mbe nɨ wɨ̀ ghǎ. Ɨ wɨə saʼə bə̂d bə̀ màʼə̀ bid ɨchî nɨ kuʼnɨ.

¹² Əghə əməd ə nyaʼa ɨghabɨ ɨnemɨ ɨwid. Tɨdəm fɔ̀n nɔnɔʼ tɨə nyaʼa ɨgun ətu əməd. Ɨkum nyaʼa ɨgwɨ məd, nɨ chəi wə̀d mɔʼɔ kyerɨ ɨkum we chè rɨ ənɨ ə məd ziə.

¹³ Wɨ̀ nyaʼa zɨ̀ ngywɨ̌ nɨ mbɨ nyaʼa chub ɨŋga ənəm. Ɨkum məd yɨ Ɨŋgam Ŋwiə̀.

¹⁴ Mɨnɔ̂n mɨ̀sɔgyɨ̀ mbe nɨ yeʼ ɨkaŋ nɨ nyaʼa zɨ̀ ngywɨ̌ rɨ̀fɨ əka ɨnun nɨ nyaʼa zeŋɨ, mbɨə nyaʼə beenɨ əbɔʼ məd ɨgun ə ngyi tɨ rɨ̀fɨ.

¹⁵ Ɨbi bid nɨə tɔə fɨə jwɨ̀ rɨŋga ɨchû ɨməd. Wɨ̀ bɨrɨ nɨŋ ɨbi we baŋ ɨbeŋ jìm əŋgu. Wɨ̀ bɨrɨ tumbɨ mɨ̀mə̌d ənɨ ɨka jìm. Wɨ̀ bɨrɨ min rɨtam vaìn ɨŋga əsɨ ze nɨ mbɨə mìnə̀ mɨ̀noʼ. Əzɔ̂ ə chwi ɨchî nɨ Ŋwìə̀kɔʼ ə kàŋə̀ sə ɨtəm.

¹⁶ Ɨkum wɨə nyaʼa ɨgun ə ngywɨ̌ məd bə̀ fɔrɨ ɨgun ɨbi ɨwu ɨməd. Ɨkum we yɨ ni: Ɨfɔ̂n ɨgwɨ mɨfɔ̀n mbɨ Ə̀nùŋɨ̀sɨg ɨgwɨ mɨ̀-ə̀nùŋɨ̀sɨg.

¹⁷ Mə nyaʼa zə aŋgɨrə̀ nɨ nyaʼa təm ɨgun ə nyùmə̀. Wɨ̀ nyaʼa kyeŋ rɨkǎ əmbɨ tɨnən rɨjìm te nɨə fìd əton ɨkaŋ ni, “Mbə̀ yeʼe fɔtɨ jɨg əchwɨ̂ ə kyeŋ ze nɨ Ŋwìə̀ kàʼi.

¹⁸ Mbə̀ yeʼe kud nyamnyod mɨ̀fɔ̀n, kud nyamnyod ɨtu ɨgwɨ mɨ̀sɔgyɨ̀, kud nyamnyod mɨ̀sɔgyɨ̀, kud nyamnyod ngyi, kud nyamnyod bə̂d mbe nɨə kɔʼə ngyi te bə̀ kud nyamnyod bə̂d mɨjìm, əne yɨ ɨ̀bòʼò mbɨ ə bə̂d nɨ yeʼ ənɨ ə ɨghəm, əne yɨə bə̂d kyeŋ mbɨ mbɨ kwa!”

¹⁹ Mə nyaʼa zə nyam kyeŋ rɨtu ze bə̀ zə mɨfɔ̂n rɨ ɨgwɨ ə si mbɨ mɨnɔ̂n mɨ̀sɔgyɨ̀ mɨ̀mə̌d. Mbɨ nyaʼa fɔtɨ ɨmbə̀ʼ maʼ bid mbɨ wə̀d we nɨ kɔʼ ngyǐ ze mbɨ mɨ̀sɔgyɨ̀ məd.

²⁰ Mbɨ nyaʼa gywɨ̀ nyam kyeŋ ze bə̀ gywɨ̀ wə̀d ɨ̀kə̀n mɨghab we nɨ nyaʼə ghɨ̀ ɨnû yiirɨ ənɨ ɨkum məd. Wɨ̀ nyaʼa chè ənjìm ɨnû yiirɨ mbe tambɨ bə̂d mbe nɨ mbɨ nyaʼa zɨ ənweenɨ ə nyam kyeŋ ze ɨgun mɨ̀mə̌d bə̀ tambɨ mbe nɨ nyaʼə wumnɨ anèŋ məd. Mbɨ nyaʼa màʼ nyam kyeŋ ze bə̀ màʼ wə̀d ɨ̀kə̀n mɨghab we ɨkǎ ɨŋga əsɨ nɨ sɔlfò ə ghɨ̀ ɨwid kyeŋ berɨə.

²¹ Ənɨ mbɨ nyaʼa ghɨ əne, wə̀d we nɨ kɔʼɔ ngyi ze nyaʼa zwiirɨ mɨfɔ̂n mɨ̀jìm ɨgwɨ ə si bə̀ zwiirɨ mɨ̀sɔgyɨ̀ mɨ̀mə̌d mɨjìm ənɨ ɨbi bid we nɨə jwɨ̀ rɨŋga ɨchû ɨməd. Tɨnən te rɨjìm nyaʼa kud nyamnyod te tɨbum swi.