Ɨnû 13 - Meta’

Tɨ̀taanɨ njə̀m ɨmbə̀ʼ nyam kyeŋ rɨ̀be

¹ Mə nyaʼa zə nyam kyeŋ nɨ zɨ̀ nyaʼə jwɨ̀ rɨŋga rɨ̀bàà. Zɨ̀ nyaʼa berɨ ndɔŋ wum bə̀ berɨ ɨtu sambe. Ndɔŋ te ɨ mɔʼ mɔʼ nyaʼa berɨ rɨdəm mɨfɔ̀n kwa kwa ɨgun. Ɨtu mbe ɨ mɔʼ mɔʼ nyaʼa berɨ tɨkum nɨ zɔm ə Ŋwiə̀ ɨgun.

² Nyam kyeŋ ze nɨ mə nyaʼa zə zɨə nyaʼa ɨghabɨ əfɔn. Ɨwu məd mbɨə nyaʼa ɨghabɨ ɨwu bê. Ɨchû məd wɨə nyaʼa ɨghabɨ ɨchû ŋgwàbaʼ. Tɨ̀sɔ̀ʼɔ̀ jɔ ze nyaʼa nàʼ i ɨka, nàʼ i ətən ɨfɔ̀n bə̀ nàʼ ɨka kyeŋ nɨ tumbɨ bə̂d əmbɨ ə nyam kyeŋ ze.

³ Ə zɨə nyaʼa ɨghabɨ ni nyam kyeŋ ze nyaʼa berɨ əna ənɨ ətu əməd ə fibɨ̀ nɨ tɨ zɨə nyaʼa zwiirɨ əməd. Àyɨə mbɨ nyaʼa fə vɨ̀ əna ze. Bə̂d mɨ̀jìm rɨ ɨgwɨ ə si nyaʼa yiirɨ ɨchî nɨ chəi əna ze ə nyaʼa zwiirɨ nyam kyeŋ ze. Mbɨ nyaʼa yiirɨ əne beenɨ əbɔʼ məd.

⁴ Bə̂d mbɨə nyaʼa wumnɨ tɨ̀sɔ̀ʼɔ̀ jɔ ze ɨmbə̀ʼ ɨghəm nɨ zɨ nyaʼa fə nàʼ ɨka nɨ tumbɨ bə̂d əmbɨ ə nyam kyeŋ ze. Ɨ mbɨə nyaʼə bə̀ wumnɨə nyam kyeŋ ze ghàə̀ ni, “À kɨə we nɨ yeʼ ɨghabɨ ə nyam kyeŋ zɔ̂ ə? À kɨə we nɨ tɨ̀ wɨ̀ zɔ̀ŋ əməd ə?”

⁵ Mbɨ nyaʼa sàŋ ni nyam kyeŋ ze ghàmə̀ goŋ ɨgɔ̂ bə̀ zɔ̀m ə Ŋwiə̀. Mbɨ nyaʼa bə̀ ben ni zɨ chwi ɨka nɨ tumbɨ bə̂d ənɨ əmɨg ɨwum kwè chɔ̀b rɨ̀be.

⁶ Zɨ̀ nyaʼa kɔ ghamɨ zɔ̀m ə Ŋwiə̀, kɔ zɔ̀m ɨkum Ŋwiə̀, kɔ zɔ̀m əsɨ ze nɨ Ŋwìə̀ ə chubə bə̀ kɔ zɔ̀m bə̂d mɨ̀jìm mbe nɨə chub ɨkaŋ.

⁷ Mbɨ nyaʼa sàŋ əməd ni zɨ̀ maʼ bid mbɨ ə bə̂d Ŋwiə̀ bə̀ baŋ mɨ̀mə̌d. Mbɨ nyaʼa nàʼ ɨka ɨ bɔ ni zɨ̀ tumbɨ bə̂d rɨŋga ɨnəbɨ jìm, rɨŋga ɨsɨ jìm, rɨŋga mɨŋgam jìm bə̀ fɔrɨ rɨŋga ɨbeŋ jìm.

⁸ Bə̂d mɨ̀jìm mbe nɨə chub ɨgwɨ ə si bɨrɨ wumnɨ nyam kyeŋ ze. Əne yɨ mbe nɨ chəi mbɨ nyaʼa ŋwaʼnɨ tɨkum tɨ mɨ̀mə̌d ɨŋga ə̀ŋwàʼnɨ̀ ze nɨ mbɨ ŋwaʼnɨ tɨkum bə̂d mbe nɨ bɨrɨ jɨg ɨ̀tènɨ̀. Ŋwìə̀ nyaʼa fə ŋwàʼnɨ̀ rɨkum te bɔŋ wɨ̀ nyaʼa sɨə tekɨ ɨsɨg. Ə̀ŋwàʼnɨ̀ ze yɨ əzɨ ə Wan njɨ̀g we nɨ mbɨ nyaʼa kyemɨ.

⁹ Wə̀d we nɨ tɨ̀ wɨ̀ zu, wɨ̀ zu:

¹⁰ Mbɨ mɨ berɨ gywɨ wə̀d mɔʼ wò mbɨ wɨwən, mbɨ berɨ bɨ gywɨ nɨŋ wò. Mbɨ mɨ berɨ zwiirɨ wə̀d mɔʼɔ ənɨ ɨbi bid, mbɨ berɨ bɨ zwiirɨ. Əne yɨ ni bə̂d Ŋwiə̀ berɨ nyiʼ. Mbɨ bə̀ berɨ kɨrɨ nuŋ fîŋ ɨgwɨ məd.

¹¹ Mə nyaʼa zə nyam kyeŋ cherə nɨ nyaʼə jwɨ̀ rɨŋga si. Zɨ̀ nyaʼa berɨ ndɔŋ rɨ̀be nɨ nyaʼa ɨghabɨ tɨ wan njɨ̀g. Ɨ zɨə nyaʼə ghàmə̀ àmei ɨchî nɨ tɨ̀sɔ̀ʼɔ̀ jɔ ze nyaʼə bə̀ ghàmə̀.

¹² Ɨ zɨə nyaʼə tùmbɨ̀ə̀ bə̂d mbɨ ɨka we nɨ nyam kyeŋ rɨtu ze nyaʼa naʼ ɨ bɔ. Ɨ zɨə nyaʼə ghɨ̀ əne ɨfě nyam kyeŋ rɨtu ze. Ɨ zɨə nyaʼə ghɨ̀ ni si mbɨ ə bə̂d mɨ̀jìm mbe nɨ yeʼ ɨgwɨ ə si wumnɨ nyam kyeŋ rɨtu ze nɨ mbɨ nyaʼa fə vɨ əna əməd.

¹³ Ɨ zɨə nyaʼə ghɨ̀ ɨnû yiirɨ kyeŋ kyeŋ nɨ nyaʼa chè bə̂d. Zɨ̀ nyaʼa ghɨ̀ ɨwid nɔ̀ʼ rɨkaŋ feŋ ə si ɨfě bə̂d mɨ̀jìm.

¹⁴ Mbɨ nyaʼa sàŋ ni zɨ̀ ghɨ ɨnû yiirɨ ɨfě nyam rɨtu ze ɨmbə̀ʼ tambɨ bə̂d mɨ̀jìm mbe nɨ yeʼ ɨgwɨ ə si. Ɨ zɨə nyaʼə ghàə̀ ni mbɨ bɔm anèŋ ɨmbə̀ʼ wumnɨ nyam kyeŋ rɨtu ze nɨ mbɨ nyaʼa wad ənɨ ɨbi bid, àyɨə ɨ zɨə kɨrɨ ɨkǎ.

¹⁵ Mbɨ nyaʼa sàŋ ni zɨ̀ fə əzwî ɨŋga anèŋ nyam kyeŋ rɨtu ze, ɨmbə̀ʼ anèŋ we ghàmə̀ əne ghɨ̀ ni mbɨ zwiirɨ bə̂d mɨ̀jìm mbe nɨ chəi mbɨə wumnɨə anèŋ we.

¹⁶ Ɨ zɨə nyaʼə bə̀ ghɨ̀ ni mbɨ zɨ ənweenɨ ɨgun əbɔ ə jɨgɨ kɨ̀ ənɨ əkəŋ ɨsɨ bə̂d mɨjìm, kɨ̀ à kɨ ə bə̂d kwa kɨ̀ mbɨ kyeŋ, kɨ̀ à kɨ ə bə̂d mbɔ̂n kɨ̀ bə̂d ɨkwaŋ, kɨ̀ à kɨ ə ɨ̀bòʼò kɨ̀ bə̂d nɨ yeʼ ənɨ ə ɨghəm.

¹⁷ ɨmbə̀ʼ tɨ wə̀d mɔʼɔ fen i ɨghɨ kɨ̀ zon ɨghɨ ni chəi wɨ̀ berɨ ənweenɨ ze ɨgwɨ məd. Ənweenɨ ze yɨ ɨkum nyam kyeŋ ze kɨ̀ ə nombà we nɨ təm ənɨ ɨkum məd.

¹⁸ Ənû zɔ̂ ə kəb ɨwe. Wə̀d we nɨ kyerɨ ənû we tɨ̀ wɨ̀ kə̀b ə nombà nyam kyeŋ zɔ̂, ɨmbə̀ʼ ɨghəm nɨ à yɨə nombà wə̀d mɨ̀sɔŋɨchù. Nombà məd we yɨ əkɨ rɨ̀fuə mbɨ ɨwum rɨ̀fuə chɔ̀b rɨ̀fuə.