Ɨnû 12 - Meta’

Tɨ̀taanɨ njə̀m ɨmbə̀ʼ əyi mbɨ rɨ̀sɔ̀ʼɔ̀ jɔ

¹ Ənweenɨ-ənû nɨ chè əbɔ ə nyaʼa jwɨ̀ ɨkaŋ: Əyi mɔʼɔ wɨə nyaʼa əŋgu, nɨ ngywɨ̌ məd yɨə nyaʼə nyùmə̀. Wɨ̀ nyaʼa nùŋ mbi ɨwu ɨgun ɨmɨg, bə̀ zɨ̀ ɨdəm ɨfɔ̀n nɨ berɨ tɨtəmɨ wum chɔ̀b rɨ̀be.

² Əyi we wɨə nyaʼa rɨ̀bùmə̀. Ɨ wɨə nyaʼə nombɨə sɨə wò gywɨ. Tɨbuʼ te nɨ wɨ̀ nyaʼə zuə tɨə nyaʼə ghɨ̀ ni wɨ̀ zə̀ʼə̀ kwàʼ rɨ̀kǎ.

³ Ənweenɨ-ənû ə cherə ə nyaʼa jwɨ̀ ɨkaŋ: Tɨ̀sɔ̀ʼɔ̀ jɔ bagɨ zɨə nyaʼa əŋgu. Zɨ̀ nyaʼa berɨ ɨtu sambe, berɨ ndɔŋ wum bə̀ berɨ tɨdəm ɨfɔ̀n sambe ɨgwɨ ɨtu məd mbe.

⁴ Ɨkon məd nyaʼa sùŋ əbà ə fibɨ̀ ənɨ mbɨ ghapɨ rɨtəmɨ ɨba tad. Wɨ̀ nyaʼa sùŋ əne màʼ ɨgwɨ ə si. Tɨ̀sɔ̀ʼɔ̀ jɔ ze nyaʼa təm ɨfě əyi we nɨ nyaʼə nombɨə, ɨmbə̀ʼ wɨ̀ mɨ gywɨ, zɨ̀ kud wan məd.

⁵ Əyi we nyaʼa gywɨ wan mbaŋə̀. Wan mbaŋə̀ we yɨ we nɨ bɨrɨ tumbɨ ɨbeŋ jìm ənɨ ɨka jìm. Mbɨ nyaʼa zàmbɨ̀ fè wan mbaŋə̀ we wò mbɨ wɨwən əmbɨ ə Ŋwiə̀ fɔrɨ ɨgun ətən ɨfɔ̀n əməd.

⁶ Əyi we nyaʼa nòrə̀ wò ɨŋga ɨbad rɨkwàʼi, əsɨ nɨ Ŋwìə̀ nyaʼa fə tekɨ ɨ bɔ, əsɨ nɨ mbɨ bɨrɨ nəŋgɨ əməd ɨni chuʼ fibɨ̀ mbɨ əkɨ əbe mbɨ ɨwum rɨ̀fuə.

Tɨ̀taanɨ njə̀m nɨ mbɨ̀aŋgɨrə̀ nyaʼa fid tɨ̀sɔ̀ʼɔ̀ jɔ ze rɨkaŋ

⁷ Bid nyaʼa kɔ ɨkaŋ. Maikɨ̀l nɨ yeʼ aŋgɨrə̀ kyeŋ mbɨ mbi mbɨ̀aŋgɨrə̀ nyaʼa zɔ̀ŋ tɨ̀sɔ̀ʼɔ̀ jɔ ze. Tɨ̀sɔ̀ʼɔ̀ jɔ ze mbɨ mbi mbɨ̀aŋgɨrə̀ nyaʼa bə̀ fɔtɨ zɔ̀ŋ ə Maikɨ̀l mbɨ mbi mbɨ̀aŋgɨrə̀.

⁸ Àyɨə Maikɨ̀l mbɨ mbi mbɨ̀aŋgɨrə̀ nyaʼa baŋ mɨ̀mə̌d, əne chəi tɨ̀sɔ̀ʼɔ̀ jɔ ze mbɨ mbi mbɨ̀aŋgɨrə̀ nyaʼa wɨrɨ berɨ tɨmbin ɨkaŋ.

⁹ Mbɨ nyaʼa màʼ tɨ̀sɔ̀ʼɔ̀ jɔ ze ɨgwɨ ə si, nɨ yeʼ jɔ ze nɨ nyaʼa rəŋwe, nɨ mbɨə tɔŋ ənɨ ə Debɨ̀rə̀ kɨ ə Satàn. Jɔ ze zɨə nyaʼə tambɨ ɨsɨg jìm. Mbɨ nyaʼa màʼ əməd mbɨ mbɨ̀aŋgɨrə̀ məd mɨjìm ɨgwɨ ə si.

¹⁰ Mə nyaʼa zu gɨ̂ nɨ kǎ ɨkaŋ. Gɨ̂ ze zɨə nyaʼə ghàə̀ ni, “Tɨ̀nîn Ŋwìə̀ fə chɨ̀ mbi bə̂d rəŋgəʼ, wɨ̀ fə chwi i ɨka. Ɨ wɨə tùmbɨ̀ə̀ bə̂d mɨ̀jìm ɨghabɨ ɨfɔ̀n! Tɨ̀nîn wə̀d we nɨ Ŋwìə̀ zɔʼɔ fə chwi i ɨka, ɨmbə̀ʼ ɨghəm nɨ mbɨ fə chɨ̀ wə̀d we nɨ nyaʼə təm ɨfě a Ŋwiə̀ màʼ ɨgwɨ ə si. Məd wɨə nyaʼə chuʼə mba bɔŋgɔb mbe nɨ nyaʼa ben ə Kristo. Ɨ wɨə nyaʼə chuʼə mɨ̀mə̌d əziə mbɨ ɨzimɨ.

¹¹ Mbɨ fə baŋ əməd ənjìm ɨvɨ Wan njɨ̀g bə̀ fɔrɨ ənjìm ɨkə̂n chɔ̀m we nɨ mbɨ nyaʼə ghàə̀. Chəi mbɨ nyaʼə bɔ ɨvɨ, ka à be yeʼi ni ɨ mbɨə nyaʼə kə̀b zwiirɨ mɨ̀mə̌d.

¹² Əne ɨkaŋ mbɨ wə̀d jìm we nɨ yeʼ ɨkaŋ, mbə̀ ghaʼ əwən! Àyɨə ŋgəʼ kyeŋ bɨrɨ nyɨ ɨgwɨ nən, àwɔ̀ si mbɨ rɨ̀bàà, ɨmbə̀ʼ ɨghəm nɨ Debɨ̀rə̀ we fə swiʼi yeʼe əsɨ nən mbɨ ɨsə ɨtəm kyeŋ. Wɨ̀ kyerɨ ni i nyùmə̀ fə tumnə!”

Tɨ̀sɔ̀ʼɔ̀ jɔ ze nyaʼa nwendɨ tɨkyerɨ-ɨwu bɔn tɨ ənɨ əghaŋ əyi we

¹³ Ənɨ tɨ̀sɔ̀ʼɔ̀ jɔ ze nyaʼa zə ni mbɨ fə màʼ əməd ɨgwɨ ə si, zɨ̀ nyaʼa kɔ fid əyi we nɨ nyaʼa gywɨ wan mbaŋə̀ we.

¹⁴ Àyɨə mbɨ nyaʼa nàʼ tɨbabɨ̀ ɨzam kyeŋ əmbɨ əyi we. Tɨbabɨ̀ te tɨə nyaʼa rɨbe. Mbɨ nyaʼa nàʼ ɨ bɔ ni wɨ̀ firə tɨ ənɨ tɨ̀sɔ̀ʼɔ̀ jɔ ze wò ɨŋga ɨbad rɨkwàʼi, əsɨ nɨ mbɨ bɨrɨ nəŋgɨ əməd ɨghəm ɨwu tad rɨ əbà.

¹⁵ Tɨ̀sɔ̀ʼɔ̀ jɔ ze nyaʼa chwɨ mɨnib rɨŋga i ɨchû ɨmbə̀ʼ mbɨ beʼ əyi we wò. Mɨnib mbe mbɨə nyaʼa ɨghabɨ ɨgyɨ̀ kyeŋ.

¹⁶ Àyɨə si nyaʼa wèèrɨ̀ əyi we. Zɨ̀ nyaʼa fiʼ i ɨchû mèd ɨgyɨ̀ kyeŋ we nɨ tɨ̀sɔ̀ʼɔ̀ jɔ ze nyaʼa chwɨ rɨŋga i ɨchû.

¹⁷ Tɨ̀sɔ̀ʼɔ̀ jɔ ze nyaʼa sə ɨtəm əbɔʼ əyi we. Əne zɨ̀ nyaʼa wò kɔ maʼ bid mbɨ ə bɔn mbe nɨ buʼu tɨ ənɨ bɔn əyi we, əne yɨə bə̂d mbe nɨə nuŋ tɨkə rɨ Ŋwiə̀ mbɨ mbe nɨ nyaʼə ghà rəsìʼ ɨmbə̀ʼ ə Yeso. [

¹⁸ Tɨ̀sɔ̀ʼɔ̀ jɔ ze nyaʼa təm əŋgo rɨ̀bàà.]