Ɨ̀fàʼì 8 - Meta’

¹ Sɔ̂l nyaʼa ben ni mbɨ zwiirɨ ə Stɨfɨ̀n. Àmei əni ze nɨ mbɨ nyaʼa zwiirɨ ə Stɨfɨ̀n, mbɨ nyaʼa kɔ nwèndɨ̀ tɨkyerɨ-ɨwu bə̂d Kristo ə Jèrusalèm kwàʼ ənɨ ɨkǎ. Bə̂d Kristo mbe mɨjìm nyaʼa jàŋ wò ɨŋga ɨba ɨbeŋ mbe rɨ ə Jùdeyà fɔrɨ ə Sàmàriyà. Àmei bə̂d tom nyaʼa ten ə Jèrusalèm.

Sɔ̂l wɨə nyaʼə nwèndɨ̀ tɨkyerɨ-ɨwu bə̂d Kristo

² Bə̂d nɨ nyaʼa nuŋ fîŋ ɨgun ə Ŋwiə̀ nyaʼa nɨŋ əvɨ ə Stɨfɨ̀n wɨ̀ tweŋɨ. Mbɨ nyaʼa dì əməd kwàʼ rɨŋgəʼ.

³ Sɔ̂l nyaʼa kə̀b ni njɨ tə nimnɨ bə̂d Kristo. Əne wɨ̀ nyaʼa kɔ ghanə nyɨrə nəb, yènə̀ sùŋə̀ bə̂d mbe nɨ nyaʼa ben ə Kristo, mbaŋə̀ mbɨ məyi, wò zɨ ə ndəŋ.

Filip nyaʼa gha ɨkə̂n chɔ̀m ə Sàmàriyà

⁴ Bə̂d Kristo mbe nɨ nyaʼa jaŋɨ, mbɨə nyaʼə yènə̀ ghà ɨŋgam Ŋwiə̀ ɨsɨ jìm.

⁵ Filip nyaʼa swiʼi wò ɨŋga əsɨ ə mɔʼɔ əbà əbeŋ ze rɨ ə Sàmàriyà. Wɨ̀ nyaʼa pè kɔ ghà ənû ɨmbə̀ʼ Wə̀d we nɨ Ŋwiə̀ zɔʼɔ əmbɨ ə bə̂d mbe nɨ nyaʼa əsɨ ze.

⁶ Ənɨ mɨnɔ̂n bə̂d nyaʼa zu bə̀ zə ɨnû yiirɨ mbe nɨ Filip nyaʼə ghɨ̀ə̀, mbɨ nyaʼa zɨ̀ ətu nɨ zwetɨ ɨnû mbe nɨ wɨ̀ nyaʼə ghàə̀.

⁷ Ɨzwî rɨbɔ̀ŋ nyaʼa jwɨ̀ rɨŋga bə̂d mɨ̀nɔnɔʼ. Mbɨ nyaʼə jwɨ̀ə̀ kyeŋə rɨ̀kǎ. Ɨbuʼrɨ bə̂d nɔnɔʼ mbɨ ə bə̂d nɨ nyaʼa tèʼ ɨwu nyaʼa bɔtɨ.

⁸ Əze ə nyaʼa ghɨ̀ ni ɨghaʼi swi ɨŋga fîŋ bə̂d mbe rɨŋga əsɨ ze.

Ənû ɨmbə̀ʼ ə Saimòn we nɨ nyaʼə wə̀d mɨ̀sà

⁹ Mbaŋə̀ mɔʼɔ zɨə nyaʼa ə Sàmàriyà nɨ ɨkum məd nyaʼə Saimòn. Saimòn we wɨə nyaʼə ghɨ̀ mɨ̀sà. Bə̂d mɨjìm mbe rɨ ə Sàmàriyà mbɨə nyaʼə yiirɨ ɨnû mbe nɨ wɨ̀ nyaʼə ghɨ̀ə̀. Məd ziə wɨə nyaʼə ghàə̀ ni tə yɨ ədabɨ ə wə̀d.

¹⁰ Bə̂d mɨ̀jìm, kɔ rɨ ənɨ mbɨ kwa wò pè ənɨ mbɨ kyeŋ nyaʼa zɨ̀ ətu ənɨ ɨnû mbe nɨ wɨ̀ nyaʼə ghàə̀, əne mbɨ nyaʼə ghàə̀ ni, “Ŋwìə̀ fə naʼ ɨka əmbɨ ə mbaŋə̀ zɔ̂, nɨ yeʼ ɨka nɨ ghɨ ɨnû nɨ dabə.”

¹¹ Bə̂d mbe nyaʼa zɨ̀ ətu ənɨ ɨnû mbe nɨ wɨ̀ nyaʼə ghàə̀ ɨmbə̀ʼ ɨghəm nɨ wɨ̀ nyaʼa fə ghɨ̀ mɨ̀sà ənɨ əgha ə se, mbɨ zəə yiirɨə.

¹² Àyɨə ənɨ mbɨ nyaʼa ben ənû ze nɨ Filip nyaʼə ghàə̀, nɨ nyaʼa ɨkə̂n chɔ̀m ɨmbə̀ʼ ənû ɨfɔ̀n ə Ŋwiə̀ bə̀ fɔrɨ ɨmbə̀ʼ ə Yeso Kristo, mbɨ nyaʼa nɨŋ mɨnib, mbaŋə̀ mbɨ məyi.

¹³ Saimòn ziə nyaʼa ben ə Kristo. Ənɨ mbɨ nyaʼa fə naʼ mɨnib ɨ bɔ, wɨ̀ nyaʼa kɔ beenɨ əbɔʼ Filip. Wɨ̀ nyaʼa zə ɨnweenɨ-ɨnû mbɨ ɨnû yiirɨ kyeŋ mbe nɨ Filip nyaʼə ghɨ̀ə̀, mbɨ chè əməd.

¹⁴ Ənɨ bə̂d tom mbe rɨ ə Jèrusalèm nyaʼa zu ni bə̂d mbe rɨ ə Sàmàriyà fə ben ɨŋgam Ŋwiə̀, mbɨ nyaʼa tom ə Pità mbɨ Jɔ̌n əsɨ mɨ̀mə̌d.

¹⁵ Ənɨ mbɨ nyaʼa pè əŋgu, mbɨ nyaʼa kɔ̀ŋgɨ̀ ə Ŋwiə̀ ɨgwɨ mɨ̀mə̌d ɨmbə̀ʼ Əzwî ə Zeŋɨ ə yeʼe ɨgwɨ mɨ̀mə̌d.

¹⁶ Chəi Əzwî ə Zeŋɨ ə nyaʼa kɨrɨ yeʼe ɨgun ə wə̀d mɔʼɔ rəbɔʼ mɨ̀mə̌d. Mbɨ nyaʼa kɨrɨ nɨŋ àmei mɨnib ənɨ ɨkum Ə̀nùŋɨ̀sɨg Yeso.

¹⁷ Ənɨ Pità mbɨ Jɔ̌n nyaʼa zab mbə ɨbɔ ɨgwɨ mɨ̀mə̌d, Əzwî ə Zeŋɨ ə nyaʼa yeʼe ɨgwɨ mɨ̀mə̌d.

¹⁸ Ənɨ Saimòn nyaʼa zə ni Əzwî ə Zeŋɨ zɨə nyaʼa yeʼe ɨgwɨ ə bə̂d ɨchî nɨ bə̂d tom mbe nyaʼə zab mbə ɨbɔ ɨgwɨ mɨ̀mə̌d, wɨ̀ nyaʼa naʼ ɨkab əmbɨ Pità mbɨ Jɔ̌n,

¹⁹ ghà ni, “Mbə̀ bə nàʼ ɨka wɔ̂ ɨ num ɨmbə̀ʼ mə mɨ zab mbɨ ɨbɔ ɨgun ə wə̀d mɔʼɔ, Əzwî ə Zeŋɨ ə yeʼe ɨgwɨ məd.”

²⁰ Àyɨə Pità nyaʼa wììrɨ̀ ɨ bɔ ni, “Àwɔ̀ nim mbɨ e ɨkab, ɨmbə̀ʼ ɨghəm nɨ à kɔndɨ ni à we tɨ̀ à zon əghɨ ze nɨ Ŋwiə̀ neʼ bə̂d əŋgu ənɨ ɨkab!

²¹ Chəi à berɨ əba kɨ̀ rɨmbin ɨŋga ə̀fàʼì zɔ̂, ɨmbə̀ʼ ɨghəm nɨ chəi e fîŋ kuʼ ɨfě Ŋwiə̀.

²² Əne beŋ e fîŋ tɨ ənɨ ənû rɨbɔ̀ŋ zɔ̂, kɔ̀ŋgɨ̀ Ə̀nùŋɨ̀sɨg ni, ɨghə̀m ɨ we tɨ̀ wɨ̀ waʼ ɨnû rɨbɔ̀ŋ mbe nɨ àwɔ̀ ə kɔndɨ ɨŋga e fîŋ.

²³ Mə zə ni ə̀dìì ə fə swi ɨŋga e fîŋ. Mə fə bə̀ zə ni àwɔ̀ yɨə wə̀d ndəŋ əmbɨ ɨnû rɨbɔ̀ŋ.”

²⁴ Saimòn nyaʼa wììrɨ̀ ni, “Mbə̀ kɔŋgɨ Ə̀nùŋɨ̀sɨg ɨgwɨ num, ɨmbə̀ʼ tɨ ənû ə mɔʼɔ rəbɔʼ mbɔ̂ nɨ mbə̀ gha ə ghɨ ənɨ ə num.”

²⁵ Ənɨ Pità mbɨ Jɔ̌n nyaʼa fə gha ɨnû mbe nɨ mbɨ nyaʼa kyerɨ, bə̀ ghà ɨŋgam Ŋwiə̀, mbɨ nyaʼa bə̀ndɨ̀ wò ə Jèrusalèm, yènə̀ ghà ɨkə̂n chɔ̀m ɨŋga ɨsɨ nɔnɔʼ ə Sàmàriyà.

Filip mbɨ wə̀d kyeŋ we rɨ ə Ìtìopià

²⁶ Aŋgɨrə̀ Ə̀nùŋɨ̀sɨg nyaʼa ghà əmbɨ Filip ni, “Tekɨ ɨnyod nɔ̀ʼ wò əbà rɨ əton, ɨnə̂njɨ̀ we nɨə swiʼ rɨ ə Jèrusalèm wò ə Gazà.” Wɔ̂ yɨ ɨnə̂njɨ̀ we nɨə che ɨŋga ɨbad rɨkwàʼi.

²⁷ Filip nyaʼa zu əne, nɔ̀ʼ wò pè zə mbaŋə̀ mɔʼɔ rɨ ə Ìtìopià. Mbɨ nyaʼa fə zaʼ mbaŋə̀ ze. Mbaŋə̀ ze yɨə nyaʼə wə̀d kyeŋ nɨə nùŋ ɨkab Kandès nɨ nyaʼa ɨfɔ̂n əyi we rɨ ə Ìtìopià. Mbaŋə̀ ze nyaʼa wò wumnɨ ə Ŋwiə̀ ə Jèrusalèm.

²⁸ Filip nyaʼa zə əməd ənɨ wɨ̀ nyaʼə bə̀ndɨ̀ rɨ ə Jèrusalèm ɨŋga ɨkarɨ nɨ ngyi tɨə sùŋə̀. Ɨ wɨə nyaʼə foŋ ə̀ŋwàʼnɨ̀ ze nɨ wə̀d ɨ̀kə̀n Ŋwìə̀ Aizayà nyaʼa ŋwàʼnɨ̀.

²⁹ Əzwî ə Zeŋɨ ə nyaʼa ghà əmbɨ Filip ni, “Ndə̀ wo yèn ɨban ɨkarɨ we.”

³⁰ Əne Filip nyaʼa nòrə̀ wò ɨban ɨkarɨ we, pè zu ɨchî nɨ mbaŋə̀ ze nyaʼə foŋ ə̀ŋwàʼnɨ̀ ze nɨ wə̀d ɨ̀kə̀n Ŋwìə̀ Aizayà nyaʼa ŋwàʼnɨ̀. Wɨ̀ nyaʼa zu əne biirɨ ni, “À foŋ ɨŋgam we e ətu ə zeŋ ə?”

³¹ Wə̀d kyeŋ we nyaʼa wììrɨ̀ ni, “Mɨ ətu ə kɨə wò zeŋ rɨ ye, nɨ chəi wə̀d mɔʼɔ toʼrɨ ɨŋgam rəŋgu ɨ num ə?” Ənɨ wɨ̀ nyaʼa biirɨ əne, wɨ̀ nyaʼa ghà əmbɨ Filip ni wɨ̀ kɔʼ nyɨ chub ɨŋga ɨkarɨ we mbɨ ni.

³² Əsɨ Ə̀ŋwàʼnɨ̀ ə Ŋwiə̀ ze nɨ wɨ̀ nyaʼə foŋə yɨ ni: “Məd yɨ ɨghabɨ njɨ̀g nɨ mbɨ nɨŋ ɨ wo kyemɨ, bə̀ fɔrɨ ɨghabɨ ə wan njɨ̀g nɨ kəm rəziə ənɨ mbɨə serə nyôŋ rɨ məd, əne chəi wɨ̀ nyaʼa fiʼ i ɨchû.

³³ Mbɨ nyaʼa naʼ tɨ̀nìd ətu ɨ bɔ. Chəi mbɨ nyaʼa saʼ ɨsaʼi məd ɨchî nɨ kuʼnɨ. À kɨə we nɨ tɨ̀ wɨ̀ ghà ənû ɨmbə̀ʼ bə̂d tɨ ənɨ əghaŋ əməd ə? Ɨ̀tènɨ̀ məd ɨgwɨ ə si fə mì i.”

³⁴ Wə̀d kyeŋ we nyaʼa foŋ əne, biirɨ əmbɨ Filip ni, “Mə buʼ ɨbɔ ɨ ne, ghà ɨ num, wə̀d ɨ̀kə̀n wɔ̂ gha ənû zɔ̂ ɨmbə̀ʼ ə we ə? À kɨ ɨmbə̀ʼ məd ziə kɨ̀ ɨmbə̀ʼ wə̀d cherə ə?”

³⁵ Filip nyaʼa kɔ mbɨ əsɨ ə̀ŋwàʼnɨ̀ zɔ̂, ghà ɨkə̂n chɔ̀m ɨmbə̀ʼ ə Yeso ɨ bɔ.

³⁶ Ənɨ mbɨ nyaʼə yènə̀ wò ɨgwɨ ɨnə̂njɨ̀ we, mbɨ nyaʼa pè əsɨ nɨ ətuŋ ə nyaʼa əŋgu, əne wə̀d kyeŋ we nyaʼa ghà ni, “Zə, à yɨ mɨnib mbɔ̂! À kɨə ye nɨ tɨ̀ zɨə kən ni tɨ mə̀ nɨŋ əmɨ mɨnib ə?” [

³⁷ Filip nyaʼa ghà ni, “À mɨ ben ə Yeso Kristo ənɨ e fîŋ jìm, mə we tɨ̀ mə nàʼ mɨnib ɨ ne.” Wə̀d kyeŋ we nyaʼa wììrɨ̀ ni, “Mə ben ni Yeso Kristo yɨə Wan Ŋwìə̀.”]

³⁸ Wə̀d kyeŋ we nyaʼa ghà mbɨ təmnɨ ɨkarɨ we. Mɨ̀mə̌d mbe mɨbe nyaʼa swiʼi wò nyɨ ɨŋga ətuŋ ze. Filip nyaʼa nàʼ mɨnib ɨ bɔ əŋgu.

³⁹ Ənɨ mbɨ nyaʼa kɔʼ jwɨ̀ rɨŋga ətuŋ ze, Əzwî Ə̀nùŋɨ̀sɨg ə nyaʼa nɨŋ ə Filip wo mbɨ məd. Chəi wə̀d kyeŋ we nyaʼa wɨrɨ zə əməd. Əne wɨ̀ nyaʼa kɔ wo i yènə̀ ghaʼə.

⁴⁰ Àyɨə mbɨ nyaʼa zə ə Filip ə Azotùs. Ɨ wɨə nyaʼə yènə̀ ghà ɨkə̂n chɔ̀m ɨŋga ɨsɨ jìm. Ɨ wɨə nyaʼə yènə̀ ghà əne wò pè ə Kàisàriyà.