Ɨ̀fàʼì 23 - Meta’

¹ Pɔ̂l nyaʼa toŋ əghə ɨgwɨ mə̀saʼ əbeŋ mbe ghà ni, “Mbɨ bɔŋgɔb, ɨ pe rəchɔ̀ŋ, mə fə chub ɨfě Ŋwiə̀ mbɨ ə fîŋ nɨ zeŋɨ kwàʼ ɨchî chɔ̀m.”

² Ətu ɨgwɨ ə bə̂d mbàn Ŋwìə̀ nɨ nyaʼə Ànàniàs, nyaʼa ghà əmbɨ ə bə̂d mbe nɨ nyaʼa təm ɨban ə Pɔ̂l ni mbɨ nib ɨchû məd.

³ Pɔ̂l nyaʼa ghà ɨ bɔ ni, “Ŋwìə̀ bɨrɨ nib əwe, àwɔ̀ əbekɨ ə wə̀d. À chub əwɔ ɨ saʼ əmɨ ɨchî nɨ zɨə yeʼ ɨŋga rɨ̀kə̌, àyɨə à wɨrɨ ghà ni mbɨ nib əmɨ nɨ chəi ɨŋga rɨ̀kə̌ əne ə?”

⁴ Mbaŋə̀ te nɨ nyaʼa təmbɨ ɨban ə Pɔ̂l nyaʼa biirɨ ɨ bɔ ni, “À kɨə zɔ̀m ətu ɨgwɨ ə bə̂d mbàn Ŋwìə̀ ə?”

⁵ Pɔ̂l nyaʼa wììrɨ̀ ni, “Mbɨ bɔŋgɔb, chəi mə̀ kəʼ kyerɨ ni məd yɨ ətu ɨgwɨ ə bə̂d mbàn Ŋwìə̀, ɨmbə̀ʼ ɨghəm nɨ ə zɨ ɨŋga Ə̀ŋwàʼnɨ̀ ə Ŋwiə̀ ni, 'Tɨrə̀ ghà e ənû rɨbɔ̀ŋ ɨgun ə wə̀d we nɨə tùmbɨ̀ mbe bə̂d.'”

⁶ Ənɨ Pɔ̂l nyaʼa zə ni əbà ə fibɨ̀ tɨ ənɨ mbaŋə̀ te yɨə nyaʼə mɨ̀Sadusiî bə̀ zə ni əbà ə cherə yɨ nyaʼə mɨ̀Farisiî, wɨ̀ nyaʼa kyeŋ rɨkǎ əkaʼ mə̀saʼ əbeŋ mbe ghà ni, “Mbɨ bɔŋgɔb, mɔ̌ yɨə Farisiî, bə̀ yeʼ wan Farisiî. Mbə mbɨə saʼ əmɨ əgha ɨmbə̀ʼ ɨghəm nɨ mə wɨə nuŋ ɨkɔndɨ wòmə̀ ni bə̂d bɨrɨ zwemə.”

⁷ Ənɨ wɨ̀ nyaʼa ghà əne, mɨ̀Farisiî mbɨ mɨ̀Sadusiî nyaʼa kɔ tàŋɨ, əne ɨfetɨ we nyaʼa ghàbrə̀.

⁸ Mɨ̀Sadusiî mbɨə nyaʼə ghàə̀ ni ka bə̂d bɨrɨ zwemɨ ə fɔrɨ ni chəi mbɨ̀aŋgɨrə̀ kɨ̀ ɨzwî əŋgu. Àyɨə mɨ̀Farisiî nyaʼa ben ɨnû mbɔ̂ jìm.

⁹ Mbaŋə̀ te nyaʼa wɨrɨ kɔ kyeŋ rɨkǎ, əne məchwiə̀ rɨ̀kə̌ mɔʼɔ rɨŋga ɨfɔtɨ mɨ̀Farisiî nyaʼa nɔ̀ʼ təm rətiə ghà ni, “Chəi mbaŋə̀ zɔ̂ ghɨ ənû rɨbɔ̀ŋ ə mɔʼɔ. Ɨghə̀m əzwî kɨ̀ aŋgɨrə̀ fə ghàm ɨ bɔ.”

¹⁰ Ənɨ tàŋ ze nyaʼa beŋ ənɨ əchɔb nɨ ka, ətu ɨgwɨ mɨ̀sɔgyɨ̀ nyaʼa bɔ ni mbaŋə̀ te bɨrɨ təndɨ ə Pɔ̂l tɨkə rɨkə. Əne wɨ̀ nyaʼa ghà əmbɨ mɨ̀sɔgyɨ̀ mbe ni mbɨ swiʼi wò nɨŋ ə Pɔ̂l ənɨ ɨ̀kǎ, wò ɨŋga ɨkam mɨ̀mə̌d.

¹¹ À nyaʼa ɨzimɨ we, Ə̀nùŋɨ̀sɨg nyaʼa təm ɨban ə Pɔ̂l ghà ni, “Yim fîŋ! Ɨchî nɨ à fə gha ənû ɨmbə̀ʼ əmɨ ə Jèrusalèm, à berɨ bɨ gha ə Rom.”

Mɨ̀Jû mɔʼɔ nyaʼa taŋ mɨnaŋ ɨmbə̀ʼ zwiirɨ ə Pɔ̂l

¹² À nyaʼa ɨsɔsɔ əni ze nɨ beenɨ, mɨ̀Jû mɔʼɔ nyaʼa bòmnɨ̀ taŋ mɨnaŋ, kàʼ ni chəi mbə̀ bɨrɨ jɨg kɨ̀ bè nɔ pè ənɨ mbə̀ fə zwiirɨ ə Pɔ̂l.

¹³ Ɨnun mbaŋə̀ te nɨ nyaʼa taŋ ənû zɔ̂ nyaʼa chè rɨ ənɨ ɨwum kwè.

¹⁴ Mbɨ nyaʼa taŋ əne, wò əsɨ bə̂d kyeŋ mbe rɨ ə mbàn Ŋwìə̀ mbɨ ə bə̂d kyeŋ mbe rɨŋga əbeŋ mɨ̀Jû, pè ghà ni, “Tɨ̀ fə kàʼ kàn ni chəi tɨ̀ bɨrɨ jɨg əghɨ ə mɔʼɔ pè ənɨ tɨ̀ fə zwiirɨ ə Pɔ̂l.

¹⁵ Əne mbə̀nə mbɨ mə̀saʼ əbeŋ tom ɨkə̂n tɨ̀nîn əmbɨ ətu ɨgwɨ mɨ̀sɔgyɨ̀ ni wɨ̀ cha ə Pɔ̂l ɨ nən. Mbə̀ ghɨ ɨghabɨ ni mbə mbɨə kəb jeŋgɨ nwendɨ ɨsaʼi məd kwàʼ ɨchî chɔ̀m. Tɨ̀ fə tekɨ ɨnyod nɨ zwiirɨ əməd bɔŋ wɨ̀ sɨə pe əgha.”

¹⁶ Àyɨə wan njàbɨ Pɔ̂l, wɨ mbaŋə̀, nyaʼa zu ɨchî nɨ mbɨ nyaʼə taŋ mɨnaŋ mbe, əne wɨ̀ nyaʼa wò nyɨ ɨŋga ɨkam mɨ̀sɔgyɨ̀ ghà ənû ze əmbɨ Pɔ̂l.

¹⁷ Pɔ̂l nyaʼa zu əne tɔŋ ətu ə mɔʼ ɨgwɨ mɨ̀sɔgyɨ̀ ɨkɨ fibɨ̀ ghà ɨ bɔ ni, “Nɨŋ əjɔŋ zɔ̂ wò mbɨ məd əsɨ ətu ɨgwɨ mɨ̀sɔgyɨ̀. Wɨ̀ berɨ ənû ə mɔʼɔ nɨ gha ɨ bɔ.”

¹⁸ Əne ətu ɨgwɨ mɨ̀sɔgyɨ̀ ɨkɨ fibɨ̀ we nyaʼa nɨŋ əjɔŋ ze mbɨ wò əsɨ ətu ə kyeŋ ɨgwɨ mɨ̀sɔgyɨ̀. Wɨ̀ nyaʼa pè gha ɨ bɔ ni, “Pɔ̂l, wə̀d ndəŋ we, kəʼ tɔŋ əmɨ ghà ni mə nɨŋ əjɔŋ zɔ̂ yeʼe əsɨ ne. Wɨ̀ berɨ ənû ə mɔʼɔ nɨ gha ɨ ne.”

¹⁹ Ətu ə kyeŋ ɨgwɨ mɨ̀sɔgyɨ̀ nyaʼa yim əbɔ əjɔŋ ze mbɨ tindɨ ɨban ɨban, biirɨ ɨ bɔ ni, “À berɨ ənû ə ye nɨ gha ɨ num ə?”

²⁰ Əjɔŋ ze ə nyaʼa wììrɨ̀ ni, “Mɨ̀Jû mɔʼɔ fə ben ni mbɨ bɨrɨ gha ɨ ne ni à nɨŋ ə Pɔ̂l swiʼi wò mbɨ məd ɨŋga ɨ̀chàm mɨ̀mə̌d ɨsɔ. Ɨ mbɨə ghɨ̀ ɨghabɨ ni mbɨ kəb jeŋgɨ nwendɨ ənû ɨmbə̀ʼ əməd kwàʼ ɨchî chɔ̀m.

²¹ Tɨrə̀ ben e ənû ze nɨ mbɨ gha ɨ ne, ɨmbə̀ʼ ɨghəm nɨ mɨ̀mə̌d mɔʼɔ nɨ chè rɨ ənɨ ɨwum kwè fə nə̀mbɨ̀ əsɨ ə mɔʼɔ ɨ wom əməd. Mbɨ fə kàʼ kàn ni chəi mbɨ bɨrɨ jɨg kɨ̀ bè nɔ pè ənɨ mbə fə zwiirɨ ə Pɔ̂l. Tɨ̀nîn mbɨ fə tekɨ ə ɨnyod sɨə wòmə̀ yeʼ ni à ben ənû ze nɨ mbɨ gha ɨ ne.”

²² Əne ətu ə kyeŋ ɨgwɨ mɨ̀sɔgyɨ̀ nyaʼa patɨ əjɔŋ ze ni, “Tɨrə̀ tɔ ghà e əmbɨ wə̀d mɔʼɔ ni à fə gha ənû zɔ̂ ɨ num.” Wɨ̀ nyaʼa ghɨ əne, gha ɨ bɔ ni wɨ̀ wo i.

Ətu ə kyeŋ ɨgwɨ mɨ̀sɔgyɨ̀ nyaʼa cha ə Pɔ̂l əsɨ gɔmnà Felìz

²³ Ətu ə kyeŋ ɨgwɨ mɨ̀sɔgyɨ̀ nyaʼa tɔŋ ɨtu be ɨgwɨ mɨ̀sɔgyɨ̀ ɨkɨ fibɨ̀, ghà əmbɨ mɨ̀mə̌d ni, “Mbə̀ nɨŋ mɨ̀sɔgyɨ̀ əkɨ ə be, nɨŋ mbe nɨə kɔʼə ngyi ɨwum sambe, bə̀ nɨŋ mbe nɨə bèʼ ɨwɔŋ əkɨ ə be. Mbə̀ bɨrɨ nɔ̀ʼ ɨzimɨ ənɨ mɨ̀nyùmə̀ əbuə wò ə Kàisàriyà.

²⁴ Mbə̀ bə tekɨ ngyi rɨ mɔʼɔ nɨ Pɔ̂l bɨrɨ kɔʼ ɨgun. Mbə̀ nəŋgɨ əməd kwàʼ ɨchî chɔ̀m wò nàʼ əmbɨ gɔmnà Felìz.”

²⁵ Ətu ə kyeŋ ɨgwɨ mɨ̀sɔgyɨ̀ nyaʼa ŋwaʼnɨ ɨmbə̀ʼ ənû zɔ̂ ni:

²⁶ “À yɨə mɔ̌ Klodiùs Lisiàs ŋwaʼnɨ ə̀ŋwàʼnɨ̀ zɔ̂. Mə wɨə ŋwaʼnɨ ɨ ne àwɔ̀ Wə̀d kyeŋ, gɔmnà Felìz. Mə chàʼrɨ̀ əwe.

²⁷ Mɨ̀Jû nyaʼa gywɨ̀ mbaŋə̀ zɔ̂, kə̀b zwiirɨ əməd. Ənɨ mɔ̌ mbɨ mbɨ mɨ̀sɔgyɨ̀ nyaʼa wo jwɨ̀ ɨgwɨ məd, mə nyaʼa zu ni à yɨə wə̀d Rom, əne mə nyaʼa chɨ̀ əməd rɨŋga rɨkyerɨ-ɨbɔ mɨ̀mə̌d.

²⁸ Mə nyaʼa kəb kyerɨ ɨsaʼi we nɨ mbɨ zɨ ɨgwɨ məd, əne mə nyaʼa nɨŋ əməd wò ɨŋga ɨ̀chàm mɨ̀mə̌d.

²⁹ Mə nyaʼa pè zə ni mbɨ nyaʼa zɨ̀ ɨsaʼi ɨgwɨ məd ɨmbə̀ʼ ɨnû mɔʼɔ mbe nɨ de tɨkə tɨ mɨ̀mə̌d, àyɨə chəi ənû ə mɔʼɔ nɨ wɨ̀ nyaʼa ghɨ̌ nɨ tɨ̀ mbɨ zwiirɨ əməd kɨ̀ nɨ tɨ̀ mbɨ zɨ̀ əməd ə ndəŋ.

³⁰ Ənɨ mbɨ nyaʼa gha ɨ num ni mbɨ fə taŋ mɨnaŋ ni mbɨ bɨrɨ zwiirɨ əməd, mə nyaʼa chà əməd ɨ ne əwu əwən. Mə fə bə̀ ghà əmbɨ ə bə̂d mbe nɨ zɨ̀ ɨsaʼi ɨgwɨ məd ni mbɨ yeʼe ghà ənû ze nɨ mbɨ berɨ mbɨ məd ɨ ne.”

³¹ Mɨ̀sɔgyɨ̀ mbe nyaʼa ghɨ̀ àmei ɨchî nɨ ətu ə kyeŋ ze ə nyaʼa gha əmbɨ mɨ̀mə̌d. Əne mbɨ nyaʼa nɨŋ ə Pɔ̂l ɨzimɨ wò ə Antipatrìs.

³² À nyaʼa əni ze nɨ beenɨ, mɨ̀sɔgyɨ̀ mbe nɨ nyaʼə yèn ɨwu, nyaʼa wɨrɨ bə̀ndɨ̀ wò ɨkam mɨ̀sɔgyɨ̀. À yɨ mbe nɨ nyaʼa kɔʼ ngyi nyaʼa wò mbɨ Pɔ̂l.

³³ Ənɨ mbɨ nyaʼa pè ə Kàisàriyà, mbɨ nyaʼa nàʼ ə̀ŋwàʼnɨ̀ ze əmbɨ gɔmnà we, bə̀ nàʼ ə Pɔ̂l ɨ bɔ.

³⁴ Ənɨ gɔmnà we nyaʼa foŋ ə̀ŋwàʼnɨ̀ ze, wɨ̀ nyaʼa biirɨ əbà əbeŋ ze nɨ Pɔ̂l nɔʼ rəŋgu. Ənɨ wɨ̀ nyaʼa zu ni Pɔ̂l yɨ rɨ ə Selisià,

³⁵ wɨ̀ nyaʼa ghà ni, “Mə bɨrɨ zu ənû ɨmbə̀ʼ e ɨsaʼi ənɨ bə̂d mbe nɨ zɨ ɨsaʼi ɨgwɨ ne fə yeʼe.” Ənɨ wɨ̀ nyaʼa ghà əne, wɨ̀ nyaʼa ghà ni mbɨ nɨŋ əməd wò nùŋ ɨŋga tɔʼ Herɔ̀d, nəŋgɨ əməd.