Ɨ̀fàʼì 21 - Meta’

Pɔ̂l nyaʼa wo ə Jèrusalèm

¹ Ənɨ tɨ̀ nyaʼa fə saŋ mɨ̀mə̌d, tɨ̀ nyaʼa nyɨ əbaŋ ɨgyɨ̀, baanɨ zɨ rɨ bɨ̀gə̀ wò ə Kôs. À nyaʼa əni ze nɨ beenɨ, tɨ̀ nyaʼa wò ə Rodès. Tɨ̀ nyaʼa nɔ̀ʼ rəŋgu wò ə Patarà.

² Tɨ̀ nyaʼa pè zə əbaŋ ɨgyɨ̀ nɨ nyaʼə baanɨə wò ə Fonesià, əne tɨ̀ nyaʼa nyɨ əbaŋ ɨgyɨ̀ ze kɔ wǒ.

³ Ənɨ tɨ̀ nyaʼa zə ə Saiprùs, tɨ̀ nyaʼa chè əton əton baanɨ wò ə Sirià, pè təm ə Taì. Mbɨ nyaʼa berɨ chɨ ɨghɨ mbe nɨ əbaŋ ze ə nyaʼa beʼe nùŋ əŋgu.

⁴ Tɨ̀ nyaʼa pè kə̀b bə̂d mbe nɨ nyaʼa ben ə Kristo chubɨ mbɨ mɨ̀mə̌d ɨni sambe. Əzwî ə Zeŋɨ ə nyaʼa ghɨ̀ ni bə̂d mbe ghà əmbɨ Pɔ̂l ni tɨ wɨ̀ wo əwi ə Jèrusalèm.

⁵ Ənɨ ɨni mbe nɨ tɨ̀ nyaʼa berɨ chub əŋgu nyaʼa fə mì i, tɨ̀ nyaʼa sàŋ mɨ̀mə̌d, nɔ̀ʼ wò əwa. Bə̂d mɨjìm mbe nɨ nyaʼa ben ə Kristo mbɨ məyi mɨ̀mə̌d fɔrɨ bɔn nyaʼa nɨŋ əwa wò chà. Mbɨ nyaʼa chubɨ mbɨ na pè ənɨ tɨ̀ nyaʼa jwɨ rɨŋga əsɨ ze. Tɨ̀ nyaʼa pè əŋgo rɨ̀bàà, chìndɨ̀ ɨtu ɨnywɨ ə si kɔ̀ŋgɨ̀ ə Ŋwiə̀.

⁶ Ənɨ tɨ̀ nyaʼa maanɨ, tɨ̀ nyaʼa ndàʼnɨ̀ mbɨ mɨ̀mə̌d, sɨ nɔ̀ʼ wò nyɨ əbaŋ. Mbɨ nyaʼa bə̀ndɨ̀ wò əwən ɨnuʼ.

⁷ Tɨ̀ nyaʼa wò ɨmbì mbɨ ɨghanɨ we kɔ rɨ ə Taì wò pè ə Tolemaìs. Tɨ̀ nyaʼa pè chàʼrɨ̀ bɔŋgɔb mbe nɨ nyaʼa əŋgu, àyɨə tɨ̀ nyaʼa chubɨ mbɨ mɨ̀mə̌d àmei əni ə fibɨ̀.

⁸ À nyaʼa əni ze nɨ beenɨ, tɨ̀ nyaʼa nɔ̀ʼ rəŋgu wò ə Kàisàriyà. Tɨ̀ nyaʼa pè chubɨ mbɨ Filip we nɨ nyaʼə ghà Ɨkə̂n chɔ̀m. Məd yɨə nyaʼə rəbɔʼ mbaŋə̀ te sambe nɨ Əzwî ə Zeŋɨ ə nyaʼa chɔʼ ni mbɨ ghapɨ ɨghɨjɨg.

⁹ Wɨ̀ nyaʼa berɨ bɔn məyi mɨkwè nɨ chəi mbɨ nyaʼa kɨrɨ nam. Bɔn məyi mbe mbɨə nyaʼə ghà ɨkə̂n Ŋwiə̀.

¹⁰ Ənɨ tɨ̀ nyaʼa fə chub əŋgu ɨni mɔʼɔ, wə̀d ɨ̀kə̀n Ŋwìə̀ mɔʼɔ nɨ ɨkum məd nyaʼə Agabùs, nyaʼa swiʼi rɨ ə Jùdeyà yeʼe ə Kàisàriyà.

¹¹ Wɨ̀ nyaʼa yeʼe əsɨ na, pè nɨŋ ɨ̀kɔ̀bɨ̀ Pɔ̂l kod mbi ɨwu bə̀ kod mbi ɨbɔ ghà ni, “Əzwî ə Zeŋɨ ə ghà ni, 'À yɨ ɨchî nɨ mɨ̀Jû mbe rɨ ə Jèrusalèm bɨrɨ kod mbaŋə̀ ze nɨ berɨ ɨ̀kɔ̀bɨ̀ wɔ̂, əne zɨ̀ əməd ɨŋga tɨkyerɨ-ɨbɔ bə̂d nɨ kaʼi mɨ̀Jû.'”

¹² Ənɨ tɨ̀ nyaʼa zu ənû zɔ̂, mbǎ mbɨ ə bə̂d mbe nɨ nyaʼa əŋgu nyaʼa buʼ ɨbɔ əmbɨ Pɔ̂l ni tɨ wɨ̀ wò əwi ə Jèrusalèm.

¹³ Àyɨə Pɔ̂l nyaʼa wììrɨ̀ ni, “Mbə̀ kɨ əni ghɨ̀ə̀ ye ə? Mbə̀ kɨə chweŋə mɨsɨ bə̀ wɔ̀ʼrɨ̀ mbɨ ɨwu ə? Mə fə tekɨ mɨ ɨnyod nɨ nyɨ ə ndəŋ bə̀ fɔrɨ nɨ kwɨ ə Jèrusalèm ɨmbə̀ʼ Ə̀nùŋɨ̀sɨg Yeso.”

¹⁴ Ɨchî nɨ chəi ənɨ tɨ̀ rɨ̀ nyaʼa kwepɨ ənû ze nɨ nyaʼa ɨŋga fîŋ məd, tɨ̀ nyaʼa sàŋ, əne ghà ni, “Ə̀nùŋɨ̀sɨg ghɨ̀ ənû ze nɨ wɨ̀ kəbɨ.”

¹⁵ Ənɨ tɨ̀ nyaʼa chub əŋgu ɨni mɔʼɔ, tɨ̀ nyaʼa fetɨ mba ɨghɨ kɔʼ wò ə Jèrusalèm.

¹⁶ Bə̂d mɔʼɔ rəbɔʼ mbe nɨ nyaʼa ben ə Kristo nɨ nyaʼa rɨ ə Kàisàriyà nyaʼa wò mbɨ na. Mbɨ nyaʼa nɨŋ əwa tɨ wò chub əkwɨ Mnasɨ̀n. Mnasɨ̀n yɨə nyaʼə rɨ ə Saiprùs. Məd yɨə nyaʼə wɨ mɔʼɔ rəbɔʼ bə̂d rɨtu mbe nɨ nyaʼa ben ə Kristo.

Pɔ̂l nyaʼa wò kumnɨ bə̂d mbe nɨ nyaʼə chà ɨfetɨ bə̂d Kristo ə Jèrusalèm

¹⁷ Ənɨ tɨ̀ nyaʼa wò pè ə Jèrusalèm, bɔŋgɔb mbe rəŋgu nyaʼa nɨŋ əwa kwàʼ ɨchî chɔ̀m.

¹⁸ À nyaʼa əni ze nɨ beenɨ, mbǎ mbɨ Pɔ̂l nyaʼa wò zə ə Jems. Bə̂d mɨjìm mbe nɨ nyaʼə chà ɨfetɨ bə̂d Kristo mbɨə nyaʼə bə̀ əŋgu.

¹⁹ Pɔ̂l nyaʼa chàʼrɨ̀ mɨ̀mə̌d, əne ghà ɨnû jìm mbe nɨ Ŋwìə̀ nyaʼa chè ənjìm ə̀fàʼì əməd ghɨ̀ əkaʼ bə̂d mbe nɨ kaʼi mɨ̀Jû.

²⁰ Ənɨ mbɨ nyaʼa zu ənû zɔ̂, mbɨ nyaʼa yiirɨ ə Ŋwiə̀, ghà əmbɨ Pɔ̂l ni, “Aŋgɔb, zə ɨchî nɨ mɨ̀Jû, chuʼ mbɨ ə chuʼ fə ben ə Kristo. Mɨ̀mə̌d mɨjìm fə zɨ̀ ətu nɨ nuŋ tɨkə rɨ Mose.

²¹ Bə̂d fə ghà əmbɨ mɨ̀mə̌d ɨmbə̀ʼ əwe, ni à wɨə ghà əmbɨ mɨ̀Jû mbe nɨ yeʼ əkaʼ bə̂d mbe nɨ kaʼi mɨ̀Jû ni tɨ mbɨ nuŋ ə tɨkə rɨ Mose, ni tɨ mbɨ ne ə mbə bɔn mbaŋə̀ fɔrɨ ni tɨ mbɨ beenɨ ə əbɔʼ mɨchî əbeŋ mɨ̀Jû.

²² Tɨ̀ kɨə wò ghɨ ye ə? Mbɨ bɨrɨ kaŋ zu ni à fə yeʼe.

²³ Əne ghɨ ənû ze nɨ tɨ̀ gha ɨ ne. Mbaŋə̀ rɨkwè tɨ mbɨ na nɨ fə kaʼ kàn əmbɨ ə Ŋwiə̀.

²⁴ Nɨŋ mbaŋə̀ tɔ̂ wò zeŋnɨ e ɨnyod bə̀ zeŋnɨ mɨ̀mə̌d, əne nàʼ ɨghɨ ə̀fà mbe nɨ mbɨ berɨ nɨ nàʼ. À mɨ ghɨ̀ əne, mbɨ bɨrɨ serɨ mbə ɨtu. Əne bə̂d mɨjìm bɨrɨ kyerɨ ni chəi rəsìʼ ənɨ ɨnû mbe nɨ mbɨ zu ɨmbə̀ʼ əwe. Mbɨ bɨrɨ kyerɨ ni à wɨə nùŋə̀ tɨkə rɨ Mose.

²⁵ À yeʼ ɨmbə̀ʼ bə̂d mbe ni kaʼi mɨ̀Jû nɨ fə ben ə Kristo, tɨ̀ fə cha ə̀ŋwàʼnɨ̀ əmbɨ mɨ̀mə̌d nɨ gha ni tɨ̀ fə sob ni tɨ mbɨ jɨg ə əghɨ ə mɔʼɔ ze nɨ mbɨ naʼ ənɨ əghɨ ə̀fà əmbɨ mbɨ̀anèŋ, ni tɨ mbɨ jɨg ə ənəm, ni tɨ mbɨ kud ə nyam nɨ mbɨ sweenɨ fɔrɨ ni tɨ mbɨ ghɨ̀ ə ɨfabrɨ-ɨnû.”

²⁶ Pɔ̂l nyaʼa nɨŋ mbaŋə̀ te. À nyaʼa əni ze nɨ beenɨ, wɨ̀ nyaʼa zeŋnɨ i ɨnyod bə̀ zeŋnɨ mɨ̀mə̌d mbɨ wò ɨŋga mbàn Ŋwìə̀, əne nàʼ ɨnun ɨni mbe nɨ mbɨ bɨrɨ chubɨ bɔŋ ɨni nɨ zeŋnɨ ɨnyod mi ə. Mbɨ nyaʼa bə̀ nàʼ əni nɨ naʼ ɨghɨ ə̀fà ɨgwɨ ətu ə wə̀d mɔʼ mɔʼ rəbɔʼ mɨ̀mə̌d.

Mɨ̀Jû nyaʼa gywɨ ə Pɔ̂l ɨŋga mbàn Ŋwìə̀

²⁷ Ənɨ ɨni mbe sambe nyaʼə sɨə wò mì, mɨ̀Jû mɔʼɔ nɨ nyaʼa yeʼe rɨ ə Esià, nyaʼa zə ə Pɔ̂l ɨŋga mbàn Ŋwìə̀, əne mbɨ nyaʼa no ɨnɔ̂n bə̂d we jìm. Mbɨ nyaʼa gywɨ̀ ə Pɔ̂l,

²⁸ kyeŋ rɨkǎ ghà ni, “Mɨ̀Izre, mbə̀ weerɨ əwa! Mbaŋə̀ zɔ̂ zɨə chwiə ɨŋga ɨsɨ jìm ni bə̂d ban mɨ̀Izre, ban tɨkə rɨ Mose bə̀ ban əsɨ zɔ̂. Tɨ̀nîn wɨ̀ fə nɨŋ mbaŋə̀ nɨ kaʼi mɨ̀Jû yeʼe mbɨ rɨwən ɨŋga mbàn Ŋwìə̀. Əne mbɨ fə tìbrɨ̀ əsɨ ə zeŋɨ zɔ̂.”

²⁹ Ɨ mbɨə nyaʼə ghà əne ɨmbə̀ʼ ɨghəm nɨ mbɨ nyaʼa zə ə Trofimùs mbɨ Pɔ̂l ə Jèrusalèm. Trofimùs yɨə nyaʼa rɨ ə Efesùs. Əne mbɨ nyaʼa kɔndɨ ni Pɔ̂l fə nɨŋ əməd mbɨ wò nyɨ ɨŋga mbàn Ŋwìə̀.

³⁰ Ə̀bùùrɨ̀ ə nyaʼa jwɨ̀ əkaʼ ə bə̂d mɨ̀jìm ə Jèrusalèm, əne mbɨ nyaʼa norə wò fetɨ, gywɨ̀ ə Pɔ̂l, sùŋ əməd chɨ̀ rɨŋga mbàn Ŋwìə̀. Mbɨ nyaʼa bə̀ wùpɨ̀ mɨchû ɨkam mbe rɨ ə mbàn Ŋwìə̀ àmei əwu əwən.

³¹ Ənɨ mbɨ nyaʼa kə̀b zwiirɨ ə Pɔ̂l, ɨŋgam nyaʼa wò pè əmbɨ ətu ə kyeŋ ɨgwɨ mɨ̀sɔgyɨ̀ məRom ni əchɔb ə fə gù ɨŋga Jèrusalèm jìm.

³² Ənɨ wɨ̀ nyaʼa zu ənû ze, wɨ̀ nyaʼa nɨŋ ɨtu ɨgwɨ mɨ̀sɔgyɨ̀ ɨkɨ fibɨ̀ bə̀ nɨŋ mɨ̀sɔgyɨ̀ àmei əwu əwən, mbɨ nòrə̀ swiʼi wò əsɨ ɨnɔ̂n bə̂d we. Ənɨ ɨnɔ̂n bə̂d we nyaʼa zə ətu ə kyeŋ ɨgwɨ mɨ̀sɔgyɨ̀ məRom bə̀ zə mɨ̀sɔgyɨ̀ mbe, mbɨ nyaʼa sob nɨ som ə Pɔ̂l.

³³ Ətu ə kyeŋ ɨgwɨ mɨ̀sɔgyɨ̀ nyaʼa wò gywɨ̀ ə Pɔ̂l, ghà mbɨ kod əməd ənɨ mɨ̀kàrə̀ mɨbe. Wɨ̀ nyaʼa biirɨ wə̀d we nɨ Pɔ̂l yeʼ wɨwən bə̀ biirɨ ənû ze nɨ wɨ̀ ghɨ̌.

³⁴ Bə̂d mɔʼɔ rɨŋga ɨnɔ̂n bə̂d we mbɨə nyaʼə kyeŋə rɨ̀kǎ ghà ənû ə fibɨ̀, mbɨ mɔʼɔ kyeŋə ghà ənû ə cherə. Ɨchî nɨ bə̂d nyaʼə rəbə jùʼ ə juʼu, chəi ənɨ tɨ ətu ɨgwɨ mɨ̀sɔgyɨ̀ nyaʼa kyerɨ rəsìʼ ɨmbə̀ʼ ənû ze, əne wɨ̀ nyaʼa ghà ni mbɨ nɨŋ ə Pɔ̂l wò ɨŋga ɨkam mɨ̀sɔgyɨ̀.

³⁵ Ənɨ wɨ̀ nyaʼa pè ənɨ mɨ̀step, mɨ̀sɔgyɨ̀ mbe nyaʼa sɨ bèʼ əməd ɨmbə̀ʼ ɨghəm nɨ ɨnɔ̂n bə̂d we wɨə nyaʼə kə̀b som əməd zwiirɨ.

³⁶ Bə̂d mbe mɨ̀jìm nɨ nyaʼə beenɨ əbɔʼ məd mbɨə nyaʼə yènə̀ kyeŋə rɨ̀kǎ ghàə̀ ni, “Mbə̀ zwiirɨ əməd!”

Pɔ̂l nyaʼa ghàm ɨmbə̀ʼ chɨ ənû rɨ ɨgwɨ ni

³⁷ Ənɨ mbɨ nyaʼə sɨə wò nyɨ ɨŋga ɨkam mɨ̀sɔgyɨ̀ mbɨ Pɔ̂l, wɨ̀ nyaʼa biirɨ əmbɨ ətu ə kyeŋ ɨgwɨ mɨ̀sɔgyɨ̀ ni, “Mə̀ gha ənû ə mɔʼɔ ɨ ne ə?” Ətu ə kyeŋ ze ə nyaʼa biirɨ ɨ bɔ ni, “À wɨə ghàm ə Grik ə?

³⁸ Əne ka àwɔ̀ yɨ e wə̀d Ijìpt we nɨ nyaʼa cherə bù əchɔb, nɨŋ mə̀zwììrɨ̀-bə̂d chuʼ rɨkwè wò mbɨ mbɨwən ɨŋga ɨbad rɨkwàʼi ə?”

³⁹ Pɔ̂l nyaʼa wììrɨ̀ ni, “Mɔ̌ yɨə Jû. Mə yɨ rɨ ə Tasùs ə Selisià. Mə yɨ rɨŋga əsɨ ə kyeŋ. Mə buʼ ɨbɔ ɨ ne ni à saŋ əmɨ mə gham əmbɨ ə bə̂d mbɔ̂.”

⁴⁰ Ənɨ ətu ɨgwɨ mɨ̀sɔgyɨ̀ nyaʼa saŋ əməd ni wɨ̀ ghàmə̀, Pɔ̂l nyaʼa təm ɨgun mɨ̀step, ghɨ̀ ənweenɨ ənɨ mbi ɨbɔ ni mbɨ kəm rəziə. Ənɨ mbɨ nyaʼa kəmɨ, wɨ̀ nyaʼa ghà əmbɨ mɨ̀mə̌d ənɨ ɨŋgam Hibrù ni,