Ɨ̀fàʼì 20 - Meta’

Pɔ̂l nyaʼa wɨrɨ bə̀ndɨ̀ wò ə Màsèdonià bə̀ wò ə Gris

¹ Ənɨ əchɔb ze ə nyaʼa fə mì i, Pɔ̂l nyaʼa chà bə̂d ni mbɨ tɔŋ bə̂d mbe nɨ nyaʼa ben ə Kristo. Ənɨ wɨ̀ nyaʼa fə timbɨ mɨ̀mə̌d bə̀ ndàʼnɨ̀ mbɨ mɨ̀mə̌d, wɨ̀ nyaʼa nɔ̀ʼ wò ə Màsèdonià.

² Ənɨ wɨ̀ nyaʼə chè ɨŋga ɨba ɨbeŋ mbe, wɨ̀ nyaʼə yènə̀ tìmbɨ̀ ə bə̂d rɨŋga ɨsɨ mbe ənɨ mɨŋgam nɔnɔʼ. Ɨ wɨə nyaʼə ghɨ̀ əne wò pè ə Gris.

³ Wɨ̀ nyaʼa chub əŋgu əmɨg ətad. Ənɨ wɨ̀ nyaʼə tekɨ ɨnyod nɨ baanɨ wo ə Sirià, wɨ̀ nyaʼa zu ni mɨ̀Jû mɔʼɔ mbɨə nyaʼə taŋ mɨnaŋ ɨmbə̀ʼ zwiirɨ əwi, əne wɨ̀ nyaʼa nuŋ ɨŋga i fîŋ ni tə bɨrɨ bəndɨ wo che ə Màsèdonià bɔŋ sɨə wò ə Sirià.

⁴ Sopatà nɨ nyaʼə wan Pirùs tɨ ə Berià nyaʼa wò mbɨ məd. Bə̂d mɔʼɔ mbe rɨ ə Tèsàlonikà nɨ nyaʼa wo mbɨ məd yɨə nyaʼə Àristakùs mbɨ Sèkundùs. Gayùs rɨ ə Də̂be nyaʼa bə̀ wò mbɨ məd. Timotì nyaʼa bə̀ wo mbɨ məd fɔrɨ ə Taikikùs mbɨ Trofimùs nɨ nyaʼa rɨ ə Esià.

⁵ Mbaŋə̀ tɔ̂ nyaʼa wò ɨmbì pè wòm əwa ə Troàs.

⁶ Ənɨ əchwɨ̂ ze nɨ mbɨ nyaʼə jɨgə ŋgə̀ŋ nɨ chəi ɨfuʼ we nɨə ghɨ̀ ni ŋgə̀ŋ kɔʼ nyaʼa fə che i, tɨ̀ nyaʼa nyɨ əbaŋ ɨgyɨ̀ rɨ ə Filipì nɨŋ ɨni tân wò kumnɨ mɨ̀mə̌d ə Troàs. Tɨ̀ nyaʼa chub əŋgu ɨni sambe.

Pɔ̂l nyaʼa zwemnɨ əjɔŋ ə mɔʼɔ

⁷ À nyaʼa ɨgwɨ əni rɨtu ɨŋga kàb, tɨ̀ nyaʼa wò fetɨ ɨ jɨg Ɨtarɨ Ə̀nùŋɨ̀sɨg. Ɨchî nɨ Pɔ̂l nyaʼa kəbɨ ni tə bɨrɨ nɔʼ əni ze nɨ beenɨ, ɨ wɨə nyaʼə ghàmbɨ̀ə̀ mbɨ ə bə̂d mbe wò pè ɨzimɨ ka.

⁸ Ɨnam nɔnɔʼ mbɨə nyaʼə berə ɨŋga ətu ə nəb ze rɨkaŋ nɨ tɨ̀ nyaʼa fetɨ əŋgu.

⁹ Əjɔŋ ə mɔʼɔ nɨ ɨkum məd nyaʼə Yutikùs nyaʼa chub ɨchû windò. Ɨchî nɨ Pɔ̂l nyaʼə rəbə gham i ghamɨ, wɨ̀ nyaʼa feŋ əŋgwenɨ kǎ kǎ. Əne wɨ̀ nyaʼa feŋ tɨ ənɨ ə nəb ɨkaŋ ze nɨ pe ənɨ ɨwaŋ tad. Mbɨ nyaʼa wò yim əməd nɔ̀ ənɨ wɨ̀ fə kwɨ i.

¹⁰ Pɔ̂l nyaʼa swiʼi wò ə si pè gundɨ ɨgwɨ məd, nɨŋ əməd yim ənɨ i ɨgɔ̂ ghà ni, “Tɨ mbə̀ bɔ ə. Ɨ wɨə kɨrɨ i ɨkǎ!”

¹¹ Ənɨ Pɔ̂l nyaʼa bə̀ndɨ̀ wò ɨŋga ətu ə nəb ze rɨkaŋ, wɨ̀ nyaʼa jɨg Ɨtarɨ Ə̀nùŋɨ̀sɨg bə̀ jɨg əghɨjɨg mbɨ ə bə̂d mbe. Wɨ̀ nyaʼa ghàmbɨ̀ mbɨ mɨ̀mə̌d wò pè ənɨ ɨtuʼ nyaʼa chɨgɨ. Ənɨ ɨtuʼ nyaʼa chɨgɨ, wɨ̀ nyaʼa nɔ̀ʼ wo i.

¹² Mbɨ nyaʼa nɨŋ əjɔŋ ze wò mbɨ məd ɨŋga nəb ɨkǎ. Ɨghaʼi nyaʼa swi ɨŋga fîŋ rɨ bə̂d mbe.

Pɔ̂l nyaʼa nɔ̀ʼ rɨ ə Troàs wò ə Miletùs

¹³ Tɨ̀ nyaʼa wò ɨmbì nyɨ əbaŋ ɨgyɨ̀ baanɨ wò ə Asòs, nɨ nyaʼa əsɨ ze nɨ tɨ̀ nyaʼa berɨ pe nɨŋ ə Pɔ̂l əŋgu. Pɔ̂l nyaʼa tekɨ ni tɨ̀ nyɨ əbaŋ ɨgyɨ̀ ɨmbə̀ʼ ɨghəm nɨ məd ziə wɨə nyaʼa kəb yen ə si.

¹⁴ Ənɨ wɨ̀ nyaʼa kumnɨ əwa ə Asòs, tɨ̀ nyaʼa nɨŋ əməd ɨŋga əbaŋ ɨgyɨ̀, baanɨ wò ə Mitilenè.

¹⁵ À nyaʼa əni ze nɨ beenɨ, tɨ̀ nyaʼa nyɨ əbaŋ ɨgyɨ̀, nɔ̀ʼ rɨ ə Mitilenè baanɨ wò ɨban ə Kiòs. À nyaʼa əni ze nɨ beenɨ, tɨ̀ nyaʼa baanɨ wò ə Samòs. À sɨ əni ze nɨ nyaʼa yi beenɨ, tɨ̀ nyaʼa wò ə Miletùs.

¹⁶ Ɨ ghɨ ni tɨ wɨ̀ chəkɨ i nyùmə̀ ə Esià, wɨ̀ nyaʼa fə nuŋ ɨŋga i fîŋ ni tə bɨrɨ chè ɨban ə Efesùs. Wɨ̀ nyaʼa kɨə zàmbɨ̀ə̀ wò ɨmbə̀ʼ ɨchî mɨ chwiə, wɨ̀ pè ə Jèrusalèm bɔŋ əni ə Pentekɔ̀s ə sɨə kùʼə̀.

Pɔ̂l nyaʼa ndàʼnɨ̀ mbɨ ə bə̂d mbe nɨ nyaʼə chà ɨfetɨ we rɨ ə Efesùs

¹⁷ Pɔ̂l nyaʼa pè ə Miletùs chà mbɨ tɔŋ bə̂d mbe nɨ nyaʼə chà ɨfetɨ bə̂d Kristo we rɨ ə Efesùs ni mbɨ yeʼe kumnɨ əwi.

¹⁸ Ənɨ mbɨ nyaʼa wo əsɨ məd, wɨ̀ nyaʼa ghà əmbɨ mɨ̀mə̌d ni, “Mbə kàŋ kyerɨ ɨchî nɨ mə̀ nyaʼə chub əkaʼ nən ənɨ mɨ̀nyùmə̀ jìm mbe nɨ mə̀ nyaʼa mbɨ nən, kɔ rɨ əni rɨtu ze nɨ mə̀ nyaʼa pe ə Esià.

¹⁹ Mə nyaʼa kàŋ swi ɨnyod, fàʼ əmbɨ Ə̀nùŋɨ̀sɨg mbɨ mɨsɨ əghə, ka à bè yeʼi ni mə wɨə nyaʼə zə ŋgəʼ ɨchî nɨ mɨ̀Jû mɔʼɔ nyaʼa taŋ mɨnaŋ ɨmbə̀ʼ zwiirɨ əmɨ.

²⁰ Mbə kàŋ kyerɨ ni chəi mə̀ nyaʼa nyiʼnɨ ɨnyod nɨ gha ənû ə mɔʼɔ ze nɨ tɨ̀ zɨə nyaʼa wèèrɨ̀ əwən. Mə wɨə nyaʼə chwi ɨnû ɨ nən ɨfě bə̂d bə̀ chwi ənəb ənəb.

²¹ Mə wɨə nyaʼə ghà əmbɨ mɨ̀Jû bə̀ ghà əmbɨ ə bə̂d mbe nɨ kaʼi mɨ̀Jû ni mbɨ beŋ tə fîŋ wumnɨ ə Ŋwiə̀, bə̀ nùŋ fîŋ ɨgun a Ə̀nùŋɨ̀sɨg Yeso.

²² “Əne tɨ̀nîn, Əzwî ə Ŋwiə̀ ə fə tom əmɨ ni mə wò ə Jèrusalèm. Chəi mə̀ kyerɨ ənû ze nɨ bɨrɨ ghɨ ənɨ ə num əŋgu.

²³ Ənû nɨ mə̀ kyerɨ yɨ ni Əzwî ə Zeŋɨ ə zɨə ghà ɨ num ɨsɨ jìm ni ndəŋ fɔrɨ ŋgəʼ mbɨə wòm əmɨ.

²⁴ Àyɨə chəi mə nɨŋ mɨ ɨ̀tènɨ̀ ni à yɨ əghɨ ə mɔʼɔ ɨ num. Mə wɨə kə̀b àmei ni mə maanɨ ə̀fàʼì ze nɨ Ə̀nùŋɨ̀sɨg Yeso zɨ ɨŋga tum rɨkyerɨ-ɨbɔ. Ə̀fàʼì ze yɨ ni mə̀ gha ɨkə̂n chɔ̀m ɨmbə̀ʼ ɨ̀chɔ̀m we nɨ Ŋwiə̀ ə ghɨ̀ə̀.

²⁵ “Əne tɨ̀nîn mə kyerɨ ni chəi wə̀d mɔʼɔ rəkaʼ mbə̀n mbe nɨ nyaʼə yènə̀ ghà ɨŋgam ɨmbə̀ʼ ənû ɨfɔ̀n ə Ŋwiə̀ bɨrɨ wɨrɨ zə əmɨ.

²⁶ Əne mə wɨə ghà ɨ nən rə̀chɔ̀ŋ ni wə̀d mɔʼɔ rəbɔʼ nən mɨ sam ɨ̀tènɨ̀, kaʼ əze yɨə wɨrɨ i mɨ ɨsaʼi,

²⁷ ɨmbə̀ʼ ɨghəm nɨ chəi mə̀ nyaʼa nuŋ ənû ə mɔʼɔ ze nɨ Ŋwìə̀ nyaʼa taŋ nùŋ ɨmbə̀ʼ əwən nɨ chəi mə̀ gha ɨ nən.

²⁸ Əne mbə̀ nəŋgɨ ə ɨnyod mbənə mbənə, bə̀ nəŋgɨ bə̂d Kristo mɨ̀jìm mbe nɨ Əzwî ə Zeŋɨ ə fə nuŋ əwən ni mbə̀ nəŋgɨ. Mbə̀ nəŋgɨ ɨfetɨ bə̂d Ŋwiə̀ we nɨ wɨ̀ fə ghɨ̌ ənɨ wi ənjìm ənəm ze nɨ Wan məd nyaʼa chəmnɨ.

²⁹ Mə kyerɨ ni mə̀ mɨ nɔ̀ʼ, bə̂d nɨ yeʼ ɨghabɨ ɨfɔn tɔtɔ bɨrɨ yeʼe əkaʼ nən, kəb nimnɨ ɨfetɨ bə̂d Ŋwiə̀.

³⁰ Bə̂d bɨrɨ jwɨ rəkaʼ nən nɨ bɨrɨ gha mɨghab ɨmbə̀ʼ suŋ bə̂d mbe nɨ ben ə Kristo ni mbɨ beenɨ əbɔʼ mɨ̀mə̌d.

³¹ Əne mbə̀ we əwən kɔndɨə ni ənɨ ɨghəm ɨwu ɨtad, chəi mə nyaʼa waʼ nɨ patɨ wə̀d mɔʼ mɔʼ rəbɔʼ nən ɨzimɨ mbɨ əziə mbɨ mɨsɨ əghə.

³² “Tɨ̀nîn mə fə zɨ̀ əwən ɨŋga rɨkyerɨ-ɨbɔ Ŋwiə̀ bə̀ zɨ̀ ɨŋga ɨŋgam məd we nɨə ghɨ̀ə̀ ni wɨ̀ ghɨ̀ ɨ̀chɔ̀m ənɨ nən. Ɨkə̂n chɔ̀m we tɨ̀ wɨ ghɨ̀ mbə kwi kàànɨ̀ bə̀ ghɨ̀ mbə jɨg ɨghɨ mbe nɨ Ŋwiə̀ nuŋ əmbɨ ə bə̂d mɨ̀jìm mbe nɨ wɨ̀ zeŋnɨ.

³³ Chəi mə̀ kweʼ feenɨ ə gôl, kɨ̀ ə sɨrɨvà, kɨ̀ ə ngywɨ̌ wə̀d mɔʼɔ.

³⁴ Mbə̀ kàŋ kyerɨ ə ni ɨbɔ mbɔ̂ mbɨə nyaʼə fàʼə̀ bə̀ nàʼ ɨghɨ mbe nɨ mɔ̌ mbɨ ə bə̂d mbe nɨ nyaʼa mbɨ num nyaʼa kwaŋɨ.

³⁵ Ənɨ ɨnû jìm, mə fə chwi ɨ nən ni zɨə bɔ̀ŋ ni tɨ̀ faʼ rɨkǎ ɨmbə̀ʼ weerɨ bə̂d mbe nɨ kwaŋ ɨghɨ. Mbə̀ kɔndɨ ɨŋgam Ə̀nùŋɨ̀sɨg Yeso ɨchî nɨ wɨ̀ nyaʼa gha ni, 'Wə̀d we nɨə nàʼə̀, wɨə berɨ əbɔrəbɔd chè we nɨə nɨŋə.'”

³⁶ Ənɨ wɨ̀ nyaʼa fə gha ɨnû mbɔ̂, mɨ̀mə̌d mɨjìm nyaʼa chìndɨ̀ ɨtu ɨnywɨ ə si kɔŋgɨ ə Ŋwiə̀.

³⁷ Mɨ̀mə̌d mɨjìm nyaʼa chweŋ mɨsɨ, bomnɨ ɨgɔ̂ mbɨ Pɔ̂l bə̀ sɔɔrɨ ndə̀ʼ rɨ məd.

³⁸ Mbɨ nyaʼa kàŋ kə̀n əku ɨmbə̀ʼ ɨŋgam we nɨ wɨ̀ nyaʼa ghà əmbɨ mɨ̀mə̌d ni chəi mbɨ bɨrɨ nɔ wɨrɨ zə əwi. Mbɨ nyaʼa ghɨ əne, nɨŋ əməd wò chà ɨŋga əbaŋ ɨgyɨ̀.