Ɨ̀fàʼì 17 - Meta’

Mɨ̀Jû mbe rɨ ə Tèsàlonikà nyaʼa nwendɨ tɨkyerɨ-ɨwu Pɔ̂l mbɨ tɨ bɔŋgɔb cherə

¹ Pɔ̂l mbɨ Sailàs nyaʼa chè ə Amfipolìs fɔrɨ ə Àpolonià wò pè ə Tèsàlonikà, nɨ yeʼ əsɨ nɨ nəb ə̀kàtɨ̀ mɨ̀Jû nyaʼa əŋgu.

² Pɔ̂l nyaʼa wò nyɨ ɨŋga nəb ə̀kàtɨ̀ ze, ɨchî nɨ wɨ̀ nyaʼə mɨ̀ə̀ ghɨ̀ə̀. Ɨ wɨə nyaʼə tàŋ ɨŋgam Ŋwiə̀ ɨni ɨkwɨ tad mbɨ mɨ̀Jû mbe nɨ nyaʼa əŋgu.

³ Ɨ wɨə nyaʼə bə̀ tòʼrɨ̀ ɨŋgam Ŋwiə̀ bə̀ chwi rɨŋga Ə̀ŋwàʼnɨ̀ ə Ŋwiə̀ ni Wə̀d we nɨ Ŋwiə̀ zɔʼɔ nyaʼa berɨ zə ŋgəʼ, kwɨ bə̀ wɨrɨ zwemə. Ɨ wɨə nyaʼə ghàə̀ ni, “Yeso wɔ̂ nɨ mɨ̀ə̀ ghà ɨmbə̀ʼ əməd ɨ nən yɨə Wə̀d we nɨ Ŋwìə̀ zɔʼɔ.”

⁴ Bə̂d mɔʼɔ rəbɔʼ mɨ̀Jû mbe nɨ nyaʼa zu ɨŋgam we nyaʼa benɨ, əne fɔtɨ əbɔʼ Pɔ̂l mbɨ Sailàs. MəGris mɨ̀nɔnɔʼ nɨ nyaʼə nùŋə̀ fîŋ ɨgun ə Ŋwiə̀ mbɨ məyi kyeŋ kyeŋ nɔnɔʼ nyaʼa bə̀ fɔtɨ əbɔʼ mɨ̀mə̌d.

⁵ Àyɨə ənɨ mɨ̀Jû mɔʼɔ nyaʼa zə əne, mbɨ nyaʼa kɔ ghɨ̀ ə̀dìì. Mbɨ nyaʼa wò fetɨ mbɨ̀rɨtan rɨ ɨtu ɨzib ənɨ ɨnɔ̂n. Mbɨ̀ritan mbe nyaʼa wò bù əchɔb ɨŋga əsɨ ze, nòrə̀ wò əkwɨ Jasɨ̀n, nɨ nyaʼa əsɨ ze nɨ Pɔ̂l mbɨ Sailàs nyaʼə chub əŋgu. Ɨ mbɨə nyaʼə kə̀b ə Pɔ̂l mbɨ Sailàs ɨmbə̀ʼ mbə mɨ zə mɨ̀mə̌d, mbə chɨ chà ɨsɨg əmbɨ ə bə̂d.

⁶ Àyɨə ənɨ chəi mbɨ nyaʼa zə ə Pɔ̂l mbɨ Sailàs, mbɨ nyaʼa sùŋ ə Jasɨ̀n mbɨ ə bə̂d mɔʼɔ mbe nɨ nyaʼa ben ə Kristo wò ɨfě bə̂d mbe nɨ nyaʼə tùmbɨ̀ əsɨ ze. Mbɨ nyaʼa pè kyeŋ rɨkǎ ghà ni, “Bə̂d mbɔ̂ nɨ fə beŋ ɨsɨg rətuŋə fə bə̀ yeʼe əgha.

⁷ Jasɨ̀n fə nɨŋ mɨ̀mə̌d nuŋ ɨŋga i nəb. Chəi mɨ̀mə̌d mɨjìm ə nùŋ rɨkə Kaisà. Ɨ mbɨə ghàə̀ ni ɨfɔ̂n cherə wɨ əŋgu nɨ mbɨə tɔŋ ənɨ Yeso.”

⁸ Ənɨ bə̂d mbe rɨŋga əsɨ ze mbɨ ə bə̂d mbe nɨ nyaʼə tùmbɨ̀ əsɨ ze nyaʼa zu ənû zɔ̂, zɨə nyaʼa tɔb mɨ̀mə̌d.

⁹ Əne mbɨ nyaʼa ghɨ̀ ni Jasɨ̀n mbɨ ə bə̂d cherə mbe nɨ nyaʼa ben ə Kristo nàʼ ɨkab we nɨ bə̂d ə nàʼə̀ bɔŋ mbɨ chɨ mɨ̀mə̌d rɨ ə ndəŋ. Ənɨ mbɨ nyaʼa naʼ ɨkab we, mbɨ nyaʼa sàŋ mɨ̀mə̌d ni mbɨ wò əwən.

Bə̂d mɨ̀nɔnɔʼ ə Berià nyaʼa ben ənû ze nɨ Pɔ̂l nyaʼə ghàə̀

¹⁰ À nyaʼa sɨ ɨzimɨ, bə̂d mbe rɨ ə Tèsàlonikà nɨ nyaʼa ben ə Kristo nyaʼa chà ə Pɔ̂l mbɨ Sailàs ə Berià. Ənɨ mbɨ nyaʼa pè əŋgu, mbɨ nyaʼa wò nyɨ ɨŋga nəb ə̀kàtɨ̀ mɨ̀Jû.

¹¹ Mɨ̀Jû mbe rɨ ə Berià nyaʼa berɨ fîŋ chɔ̀m chè mbe rɨ ə Tèsàlonikà, ɨmbə̀ʼ ɨghəm nɨ mbɨ nyaʼa nɨŋ ɨŋgam Ŋwiə̀ ənɨ tə fîŋ rɨjìm. Ɨ mbɨə nyaʼə foŋ ɨŋgam Ŋwiə̀ ɨni jìm ɨ zə ni ɨnû mbe nɨ Pɔ̂l nyaʼə ghàə̀ kɨ ɨnû rəsìʼ ə?

¹² Mɨ̀mə̌d nɔnɔʼ nyaʼa ben ə Kristo. Məyi Gris kyeŋ kyeŋ mbɨ ə mbaŋə̀ Gris nɔnɔʼ nyaʼa bə̀ ben ə Kristo.

¹³ Àyɨə ənɨ mɨ̀Jû mbe rɨ ə Tèsàlonikà nyaʼa zu ni Pɔ̂l wɨə ghà ɨŋgam Ŋwiə̀ ə Berià, mbɨ nyaʼa bə̀ wò əŋgu pè kɔ no bə̂d bə̀ tɔbə fîŋ tɨ mɨ̀mə̌d.

¹⁴ Àmei əwu əwən, bə̂d mbe nɨ nyaʼa ben ə Kristo ə Berià nyaʼa tom bə̂d ni mbɨ nɨŋ ə Pɔ̂l wò chà əŋgo rɨ̀bàà. Àyɨə Sailàs mbɨ Timotì nyaʼa tèn ə Berià.

¹⁵ Mbaŋə̀ te nɨ nyaʼa wo nɨŋ ə Pɔ̂l nyaʼa wò mbɨ məd əne əne wò pè ə Atèns. Ənɨ mbɨ nyaʼə wɨrɨə bə̀ndɨ̀ə̀, Pɔ̂l nyaʼa tom mɨ̀mə̌d əsɨ Sailàs mbɨ Timotì ni mbɨ zambɨ yeʼe kumnɨ əwi.

Pɔ̂l nyaʼa gha ɨŋgam Ŋwiə̀ ə Atèns

¹⁶ Ənɨ Pɔ̂l nyaʼə wòm ə Sailàs mbɨ Timotì ə Atèns, fîŋ məd nyaʼa tɔb əməd ɨmbə̀ʼ ɨchî nɨ wɨ̀ nyaʼa zə ni mbɨ̀anèŋ nyaʼa swi ɨŋga əsɨ ze.

¹⁷ Əne wɨ̀ nyaʼa wò kɔ taŋ ɨŋga nəb ə̀kàtɨ̀ ze mbɨ mɨ̀Jû fɔrɨ mbɨ ə bə̂d mbe nɨ kaʼi mɨ̀Jû nɨ nyaʼa nùŋ fîŋ ɨgun ə Ŋwiə̀. Wɨ̀ nyaʼə bə̀ tàŋ əsam ɨwin ɨni jìm mbɨ ə bə̂d mbe nɨ nyaʼə wò əŋgu.

¹⁸ Bə̂d ɨwe mɔʼɔ nɨ mbɨ nyaʼə tɔŋ ənɨ mɨ̀Epikurià mbɨ mbɨ mɔʼɔ mbe nɨ mbɨ nyaʼə tɔŋ ənɨ mɨ̀Stoìk nyaʼa wò kumnɨ əməd kɔ tàŋɨ mbɨ məd. Mbɨ mɔʼɔ rəbɔʼ mɨ̀mə̌d nyaʼa gha ni, “Əkywɨ-ɨchù wɔ̂ kɨə kə̀b gha əzi ni yè ə?” Mbɨ cherə nyaʼa ghà ni, “Zɨə chub ɨghabɨ ni ɨ wɨə ghà ɨnû ɨmbə̀ʼ mɨ̀ŋwìə̀ rɨ̀sɔ̀ʼɔ̀.” Mbɨ nyaʼa ghà əne ɨmbə̀ʼ ɨghəm nɨ Pɔ̂l wɨə nyaʼə ghà ɨŋgam Ŋwiə̀ ɨmbə̀ʼ ə Yeso, bə̀ ghà ɨmbə̀ʼ ɨchî nɨ bə̂d bɨrɨ zwemə.

¹⁹ Əne mbɨ nyaʼa nɨŋ əməd wò ɨŋga ɨfetɨ bə̂d mbe nɨ nyaʼə tùmbɨ̀ əsɨ ze, nɨ mbɨ nyaʼə tɔŋ ənɨ ə Àriopagùs. Mbɨ nyaʼa pè ghà ni, “Tɨ̀ wɨə kəb kyerɨ ənû ə fi zɔ̂ nɨ àwɔ̀ ə chwi.

²⁰ À wɨə ghà ɨnû rɨ̀sɔ̀ʼɔ̀ mɔʼɔ nɨ chəi tɨ̀ kweʼ kɨrɨ zu, əne tɨ̀ wɨə kəb kyerɨ əton tɨ ənɨ ɨnû mbɔ̂.”

²¹ MəAtèns mɨjìm mbɨ ə bə̂d rɨ̀sɔ̀ʼɔ̀ mbe nɨ nyaʼa əŋgu, mbɨə nyaʼə chəkɨə nyùmə̀ jìm nɨ gha ɨnû, kɨ̀ nɨ zu ɨnû fi mbe nɨ nyaʼə jwɨ̀ə̀.

²² Əne Pɔ̂l nyaʼa təm ɨŋga mɨgharə̀ ɨfetɨ Àriopagùs we ghà ni, “Mbaŋə̀ te rɨ ə Atèns, mə kàŋ zə ni mbə mbɨə wumnɨ ə mɨ̀ŋwìə̀ ənɨ mɨnə̂njɨ̀ jìm,

²³ ɨmbə̀ʼ ɨghəm nɨ ənɨ mə nyaʼə chè ɨŋga əsɨ zɔ̂ ɨ nən, mə wɨə nyaʼə yènə̀ nèŋ ɨghɨ mbe nɨ mbə̀ə wumnɨə. Əne mə nyaʼa zə ɨkwi ɨjə̀ŋ ə̀fààrɨ̀ mɔʼɔ nɨ mbɨ ŋwaʼnɨ ɨgun ni, 'Əmbɨ ŋwìə̀ we nɨ chəi tɨ̀ kyerɨ.' Əne Ŋwiə̀ we nɨ mbə̀ə wumnɨə nɨ chəi mbə̀ kyerɨ, yɨ wɨwən we nɨ mə̀ yeʼe ɨ gha ɨnû ɨmbə̀ʼ əməd ɨ nən.

²⁴ Ka Ŋwìə̀ we nɨ nyaʼa tekɨ ɨsɨg bə̀ tekɨ ɨghɨjìm mbe nɨ yeʼ ɨŋga, nɨ yeʼ Ə̀nùŋɨ̀sɨg ɨkaŋ fɔrɨ ɨgwɨ ə si wɨə chub i ɨŋga mbàn te nɨ bə̂d mɨ̀sɔŋɨchù korɨ,

²⁵ kɨ̀ ni à yɨə bə̂d mɨ̀sɔŋɨchù ə nàʼ ɨghɨ ɨ bɔ, ɨghabɨ ni məd ə kwaŋ əghɨ ə mɔʼɔ. Àyɨə məd ziə ə nàʼ ɨ̀tènɨ̀ bə̀ nàʼ əzwî bə̀ nàʼ ɨghɨjìm əmbɨ ə bə̂d mɨ̀jìm.

²⁶ Wɨ̀ nyaʼa tekɨ bə̂d ɨŋga ɨbeŋ jìm mbe nɨ yeʼ ɨŋga ɨsɨg wɔ̂ tɨ ənɨ ə wə̀d mɔʼ. Wɨ̀ nyaʼa nùŋ ə nyùmə̀ we nɨ bə̂d bɨrɨ chub ɨgwɨ ə si bə̀ nùŋ mɨ̀nə̀rɨ̀ əbeŋ mbe nɨ mbɨ bɨrɨ chub ɨŋga.

²⁷ Wɨ̀ nyaʼa ghɨ əne ɨmbə̀ʼ bə̂d kəb əməd, nùŋ ɨkɔndɨ wòm ni ɨghəm mbə̀ mbe tɨ̀ mbə bètɨ̀ ɨsɨ zə əməd. Àyɨə chəi Ŋwiə̀ ə sa əgha tɨ ənɨ ə wə̀d mɔʼ mɔʼ rəbɔʼ na.

²⁸ Wə̀d ɨwe mɔʼɔ nyaʼa ghà ni, 'Tɨ̀ wɨ ɨkǎ, bə̀ yènə̀, bə̀ berɨ a ɨ̀tènɨ̀ ənɨ ɨka nɨ nɔʼ rɨ bɔ.' Mbə bə̂d nɨə ŋwàʼnɨ̀ ɨnû nyaʼa bə̀ ghà ni, 'À yɨ rəsìʼ ni tɨ yɨə bə̀ ə bɔn məd.'

²⁹ “Ɨchî nɨ tɨ̀ yeʼ bɔn Ŋwiə̀, tɨ rɨ kɔndɨ a ni Ŋwiə̀ wɨ ɨghabɨ anèŋ nɨ mbɨ tekɨ ənɨ ə gôl, kɨ ənɨ sɨrɨvà, kɨ ənɨ ɨti. Ka məd yɨ əghɨ nɨ wə̀d nyaʼa kɔndɨ ɨŋga e ətu tekɨ ənɨ ɨbɔ.

³⁰ Chəi Ŋwìə̀ nyaʼa zɨ ətu ənɨ ɨnû mbe nɨ bə̂d nyaʼa ghɨ̌ nɨ chəi mbɨ kyerɨ, àyɨə tɨ̀nîn ɨ wɨə ghà əmbɨ ə bə̂d mɨjìm ɨsɨ jìm ni mbɨ beŋ tə fîŋ.

³¹ Wɨ̀ nyaʼa fə nùŋ əni nɨ wɨ̀ bɨrɨ chè ənjìm ə Wə̀d we nɨ wɨ̀ nyaʼa chɔʼɔ, saʼ wə̀d jìm ɨŋga ɨsɨg wɔ̂ ɨchî nɨ kuʼnɨ. Wɨ̀ fə chwi ənweenɨ əmbɨ ə bə̂d mɨ̀jìm ni ənû zɔ̂ yɨ ənû rəsìʼ. Wɨ̀ nyaʼa ghɨ̀ əne ɨchî nɨ wɨ̀ nyaʼa zwemnɨ wə̀d we.”

³² Ənɨ mbɨ nyaʼa zu ənɨ Pɔ̂l nyaʼa gha ɨmbə̀ʼ ənû nɨ zwemə, mbɨ mɔʼɔ nyaʼa baʼrɨ əməd, àyɨə mbɨ cherə nyaʼa ghà ni, “Tɨ̀ bɨrɨ wɨrɨ zu ənû zɔ̂ ɨghəm cherə.”

³³ Ənɨ mbɨ nyaʼa gha əne, Pɔ̂l nyaʼa nɔ̀ʼ jwɨ̀ rɨŋga ɨfetɨ we.

³⁴ Àyɨə bə̂d mɔʼɔ nyaʼa fɔtɨ əbɔʼ məd ben ə Kristo. Wɨ mɔʼɔ rəbɔʼ mɨ̀mə̌d yɨə nyaʼə Dionisiùs, nɨ nyaʼa mbaŋə̀ rəbɔʼ te nɨ nyaʼa ɨŋga ɨfetɨ Àriopagùs. Əyi mɔʼɔ nɨ mbɨ nyaʼə bə̀ tɔŋ ənɨ Damaris mbɨ ə bə̂d cherə nyaʼa bə̀ fɔtɨ əbɔʼ məd ben ə Kristo.