Ɨ̀fàʼì 13 - Meta’

Bə̂d Kristo nyaʼa chɔʼ ə Banabàs mbɨ Sɔ̂l, tom mɨ̀mə̌d

¹ Bə̂d ɨ̀kə̀n Ŋwiə̀ mbɨ məchwiə̀-ɨnû nyaʼa ɨŋga ɨfetɨ bə̂d Kristo we rɨ ə Antiɔ̀k. Mbɨ yɨə nyaʼə Banabàs, mbɨ Simiòn nɨ mbɨ nyaʼə bə̀ tɔŋ ənɨ Naijà, mbɨ Lusiùs nɨ nyaʼa rɨ ə Sìrin, mbɨ Maniàn nɨ nyaʼa kwi mbɨ Herɔ̀d nɨ nyaʼə gɔmnà, mbɨ Sɔ̂l.

² Ənɨ mbɨ nyaʼə wumnɨ ə Ə̀nùŋɨ̀sɨg bə̀ chubə rɨ jɨg, Əzwî ə Zeŋɨ ə nyaʼa ghà əmbɨ mɨ̀mə̌d ni, “Mbə̀ sweŋ ə Banabàs mbɨ Sɔ̂l ɨ num ɨmbə̀ʼ mbɨ faʼ ə̀fàʼì ze nɨ mə chɔʼ mɨ̀mə̌d ni mbɨ faʼa.”

³ Ənɨ mbɨ nyaʼa fə chub rɨ jɨg bə̀ kɔ̀ŋgɨ̀ ə Ŋwiə̀ màànɨ̀, mbɨ nyaʼa zab mbə ɨbɔ ɨgwɨ mɨ̀mə̌d, chà mɨ̀mə̌d ni mbɨ wò ə.

Banabàs mbɨ Sɔ̂l nyaʼa fàʼ ə Saiprùs

⁴ Əzwî ə Zeŋɨ ə nyaʼa tom ə Banabàs mbɨ Sɔ̂l, əne mbɨ nyaʼa swiʼi wò ə Selusià. Mbɨ nyaʼa nɔ̀ʼ rəŋgu nyɨ əbaŋ ɨgyɨ̀ baanɨ wò əkəm əsɨ ze rɨŋga ɨgyɨ̀ nɨ mbɨ nyaʼə tɔŋ ənɨ Saiprùs.

⁵ Ənɨ mbɨ nyaʼa pe ə Salamìs, mbɨ nyaʼa ghà ɨŋgam Ŋwiə̀ ɨŋga nəb tɨ ə̀kàtɨ̀ tɨ mɨ̀Jû. Ɨ mbɨə nyaʼə əngu mbɨ Jɔ̌n Mak nɨ nyaʼə wèèrɨ̀ə̀ mɨ̀mə̌d.

⁶ Ənɨ mbɨ nyaʼa fə yen ɨŋga əkəm əsɨ ze əjìm, mbɨ nyaʼa wò pè ə Pafɔ̀s. Mbɨ nyaʼa pè əŋgu jwɨ̀ ɨgwɨ ə wə̀d mɨ̀sà mɔʼɔ nɨ nyaʼə bə̀ ə wə̀d ɨ̀kə̀n mɨghab. Ɨ mbɨə nyaʼə bə̀ tɔŋ əməd ənɨ Ba-Yeso.

⁷ Ba-Yeso we yɨə nyaʼə sə̀ʼ gɔmnà we nɨ mbɨ nyaʼə tɔŋ ənɨ Sejiùs Paulùs. Gɔmnà we yɨə nɨ nyaʼə wə̀d ɨwe. Wɨ̀ nyaʼa tɔŋ ə Banabàs mbɨ Sɔ̂l ni mbɨ yeʼe əsɨ ni ɨmbə̀ʼ ɨghəm nɨ ɨ wɨ̀ nyaʼə kə̀bə̀ ni mbɨ gha ɨŋgam Ŋwiə̀ ɨ ni.

⁸ Àyɨə wə̀d mɨ̀sà we, nɨ ɨkum məd nyaʼə Elimàs, (à yɨ ɨkum məd we ənɨ ɨŋgam Gris), nyaʼa ton i. Ɨ wɨə nyaʼə kə̀bə̀ ni tɨ gɔmnà we ben i ɨŋgam Ŋwiə̀.

⁹ Əzwî ə Zeŋɨ ə nyaʼa swi ɨŋga Sɔ̂l we nɨ mbɨ nyaʼə bə̀ tɔŋ ənɨ Pɔ̂l. Əne wɨ̀ nyaʼa toŋ əghə ɨgwɨ Elimàs ghà ni,

¹⁰ “Àwɔ̀, wan Debɨ̀rə̀! À bàn ɨnû jìm mbe nɨ kùʼnɨ̀. À berɨ mɨnə̂njɨ̀ jìm nɨ tambɨ bə̂d. Ɨnû rɨbɔ̀ŋ bə̀ swi ɨŋga e fîŋ. Ka à wa bɨrɨ sob e nɨ beŋ ɨnû chɔ̀m mbe nɨ Ə̀nùŋɨ̀sɨg ə ghɨ̀ə̀ ə?

¹¹ Tɨ̀nîn zə, Ə̀nùŋɨ̀sɨg bɨrɨ zɨ ŋgəʼ ɨgwɨ ne. À bɨrɨ fɨg ə. Ka à bɨrɨ zə e ɨsɨ ənɨ ɨkə nyumə̀.” Àmei əwu əwən, əghə əməd ə nyaʼa fin, əne wɨ̀ nyaʼa kɔ kə̀b bə̂d ni mbɨ yim əbɔ chà əməd.

¹² Ənɨ gɔmnà we nyaʼa zə ənû ze nɨ nyaʼa ghɨ̌, wɨ̀ nyaʼa ben ɨŋgam Ŋwiə̀, ɨmbə̀ʼ ɨghəm nɨ ɨnû mbe nɨ mbɨ nyaʼə chwi ɨmbə̀ʼ Ə̀nùŋɨ̀sɨg nyaʼa chè əməd.

Banabàs mbɨ Pɔ̂l nyaʼa fàʼ ə Antiɔ̀k we rɨ əba əbeŋ ze rɨ ə Pisidià

¹³ Pɔ̂l mbɨ ə bə̂d mbe nɨ nyaʼa mbɨ məd nyaʼa nyɨ əbaŋ ɨgyɨ̀, nɔ̀ʼ rɨ ə Pafɔ̀s wò ə Pegà nɨ nyaʼa ɨŋga əbà əbeŋ ze rɨ ə Pamfilià. Ənɨ mbɨ nyaʼa pè əŋgu, Jɔ̌n nyaʼa sàŋ mɨ̀mə̌d bə̀ndɨ̀ wò ə Jèrusalèm.

¹⁴ Mbɨ nyaʼa nɔ̀ʼ rɨ ə Pegà wò ə Antiɔ̀k we nɨ nyaʼa ɨŋga əbà əbeŋ ze rɨ ə Pisidià. À nyaʼa sɨ əni əkwɨ mɨ̀Jû, mbɨ nyaʼa wò nyɨ ɨŋga nəb ə̀kàtɨ̀ mɨ̀Jû pè chub ə si.

¹⁵ Ənɨ bə̂d mbe rəŋgu nyaʼa fə foŋ ɨŋgam Ŋwiə̀ rɨŋga ə̀ŋwàʼnɨ̀ ə tɨkə rɨ Mose, bə̀ foŋ rɨŋga ə̀ŋwàʼnɨ̀ ə bə̂d ɨ̀kə̀n Ŋwiə̀, bə̂d mbe nɨ nyaʼə chà nəb ə̀kàtɨ̀ ze nyaʼa cha ɨkə̂n əmbɨ Pɔ̂l mbɨ Banabàs ni, “Bɔŋgɔb, mbə mɨ berɨ ɨŋgam mɔʼɔ nɨ timbɨ əwa, mbə̀ gha ɨ na.”

¹⁶ Pɔ̂l nyaʼa zu əne nɔ̀ʼ təm, mə̀ ənɨ e əbɔ ni mbɨ kəm rəziə. Ənɨ mbɨ nyaʼa kəmɨ, wɨ̀ nyaʼa ghà ni: “Mbɨ bɔŋgɔb, mɨ̀Izre fɔrɨ mbə̀n mbe nɨə wumnɨ ə Ŋwiə̀, mbə̀ zu.

¹⁷ Ŋwìə̀ mɨ̀Izre nyaʼa chɔʼ mba mɨ̀mbǎʼ rəŋwe, əne ghɨ̀ mɨ̀mə̌d ənɨ əbeŋ ə kyeŋ ənɨ ə nyùmə̀ we nɨ mbɨ nyaʼə chub ə Ijìpt. Wɨ̀ nyaʼa nɨŋ ɨka kyeŋ chɨ̀ mɨ̀mə̌d rɨŋga əbeŋ ze.

¹⁸ Wɨ̀ nyaʼa nyìʼ mbɨ mɨ̀mə̌d ɨŋga ɨbad rɨkwàʼi ɨghəm ɨwu ɨwum kwè.

¹⁹ Wɨ̀ nyaʼa nimnɨ ɨbeŋ sambe ə Kanàan, əne wèd mɨ̀Izre ənɨ ə si tɨ mɨ̀mə̌d.

²⁰ Ɨnû mbɔ̂ jìm nyaʼa nɨŋ ɨghabɨ ɨghəm ɨwu əkɨ əkwè mbɨ ɨwum tân. “Wɨ̀ nyaʼa nɔ̀ʼ rɨ əwɔ nàʼ bə̂d nɨə saʼ əbeŋ əmbɨ mɨ̀mə̌d wò pè ənɨ ə wə̀d ɨ̀kə̀n Ŋwiə̀, Samwèl.

²¹ À nyaʼa ənɨ ə nyùmə̀ we, mbɨ nyaʼa ghà əmbɨ ə Ŋwiə̀ ni wɨ̀ naʼ ɨfɔ̂n ɨ nən. Əne Ŋwìə̀ nyaʼa nàʼ ə Sɔ̂l əmbɨ mɨ̀mə̌d. Sɔ̂l yɨə nyaʼə wan Kish, nɨ nyaʼa rɨŋga ɨnəbɨ Benjamìn. Sɔ̂l nyaʼa tumbɨ mɨ̀mə̌d ɨghəm ɨwu ɨwum kwè.

²² Ənɨ Ŋwiə̀ nyaʼa swi əməd rɨ ɨgwɨ ətən, wɨ̀ nyaʼa nùŋ Dèvîd ənɨ ɨfɔ̀n. Wɨ̀ nyaʼa ghà ɨmbə̀ʼ ə Dèvîd ni, 'Mə fə zə ni Dèvîd, wan Jesè, yɨ ɨkwɨ wə̀d we nɨ mə̀ ghaʼi. Wɨ̀ bɨrɨ ghɨ ɨnû jìm mbe nɨ mə̀ kəbɨ.'

²³ Tɨ əbɔʼ ə bɔn tɨ ənɨ əghaŋ ə Dèvîd, Ŋwìə̀ fə chɔʼ ə Yeso ənɨ wə̀d nɨ bɨrɨ chɨ mɨ̀Izre rəŋgəʼ, ɨchî nɨ wɨ̀ nyaʼa fə kaʼi.

²⁴ Bɔŋ Yeso nyaʼa sɨə yeʼe, Jɔ̌n we nɨ nyaʼə nàʼ mɨnib, wɨə nyaʼə ghà əmbɨ mɨ̀Izre mɨ̀jìm ni mbɨ beŋ tə fîŋ nɨŋ mɨnib.

²⁵ Ənɨ Jɔ̌n nyaʼə sɨə wò maanɨ ə̀fàʼì ze nɨ Ŋwìə̀ nyaʼa cha əməd ni wɨ̀ yeʼe fàʼ, wɨ̀ nyaʼa ghà ni, 'Mbə kɔn əzən ni mɔ̌ yɨə we ə? Ka mɔ̌ yɨ əmɨ wə̀d we nɨ mbə̀ə wòmə̀. Chə̂, àyɨə mbə̀ zə ni wə̀d mɔʼɔ wɨə yeʼe ənɨ mɨ njìm, nɨ chəi mə̀ kuʼ nɨ chɨ ɨtabɨ tɨ ənɨ ɨwu ɨməd.'

²⁶ “Mbɨ bɔŋgɔb, nɨ yeʼ bɔn tɨ ənɨ əghaŋ ə Abràham, mbɨ mbə̀n mbe nɨ kaʼi mɨ̀Jû nɨə wumnɨ ə Ŋwiə̀, ɨkə̂n we ni Ŋwìə̀ fə chɨ̀ əwa rəŋgəʼ fə yeʼe ɨ na.

²⁷ Bə̂d mbe nɨə chub ə Jèrusalèm mbɨ mbe nɨə tùmbɨ̀ə̀ mɨ̀mə̌d nyaʼa ghɨ̀ ni ɨnû mbɔ̂ jwɨ ənɨ rəsìʼ ɨchî nɨ mbɨ nyaʼa sob ni mbɨ zwiirɨ əməd. Mbɨ nyaʼa ghɨ əne, ɨmbə̀ʼ ɨghəm nɨ chəi mbɨ nyaʼa kyerɨ ni Yeso yɨə wə̀d we nɨ Ŋwìə̀ zɔʼɔ, kɨ̀ be kyerɨ mɨŋgam bə̂d ɨ̀kə̀n Ŋwiə̀ mbe nɨ mbɨə foŋ ɨni ɨkwɨ mɨ̀Jû jìm.

²⁸ Ka à bè yeʼi ni chəi mbɨ nyaʼa zə əton nɨ tɨ̀ mbɨ zwiirɨ əməd, àyɨə mbɨ nyaʼa ghà əmbɨ Pailèt ni wɨ̀ ghɨ mɨ̀sɔgyɨ̀ zwiirɨ əməd.

²⁹ Ənɨ mbɨ nyaʼa ghɨ ni ɨnû jìm mbe nɨ bə̂d ɨ̀kə̀n Ŋwiə̀ nyaʼa ŋwàʼnɨ̀ ɨmbə̀ʼ əməd jwɨ ənɨ rəsìʼ, mbɨ nyaʼa swi əməd rɨ əzed ə baʼnɨ, wò boŋ ɨŋga ɨ̀sì.

³⁰ Àyɨə Ŋwiə̀ nyaʼa zwemnɨ əməd.

³¹ Ɨ wɨə nyaʼa jwɨ̀ ɨni nɔnɔʼ ɨfě bə̂d mbe nɨ nyaʼə yènə̀ mbɨ məd kɔ rɨ ə Galiliî wò pè ə Jèrusalèm. Bə̂d mbe nɨ wɨ̀ nyaʼa jwɨ ɨfě mɨ̀mə̌d yɨ mɨ̀zərɨmbin mbe nɨə sɨə ghà ɨnû ɨmbə̀ʼ əməd əmbɨ mɨ̀Izre tɨ̀nîn.

³² Əne tɨ̀ fə yeʼe mbɨ ɨkə̂n chɔ̀m ɨ nən ni ənû ze nɨ Ŋwìə̀ nyaʼa kaʼ əmbɨ mba mɨ̀mbǎʼ rəŋwe,

³³ wɨ̀ fə ghɨ̀ zɨə jwɨ̀ ənɨ rəsìʼ ɨ na mbà mbe nɨ yeʼ bɔn tɨ ənɨ əghaŋ mɨ̀mə̌d. Wɨ̀ fə ghɨ̀ əne ɨchî nɨ wɨ̀ nyaʼa zwemnɨ ə Yeso. Ə zɨə bə̀ ɨŋga mɨ̀Sâm mbe nɨ pe be ni, 'Àwɔ̀ yɨ mɨ Wan, tə̀chɔ̀ŋ mə fə sɨ e Mbǎʼ.'

³⁴ Ŋwìə̀ nyaʼa ghà ɨmbə̀ʼ ɨchî nɨ wɨ̀ nyaʼa zwemnɨ əməd, nɨ ka wɨ̀ bɨrɨ nɔ bɔb i ni: 'Mə bɨrɨ zɨ əbɔrəbɔd zeŋɨ ze nɨ mə̀ nyaʼa kaʼ əmbɨ Dèvîd ɨgwɨ ne.'

³⁵ Ə zɨə bə ɨŋga ə̀ŋwàʼnɨ̀ ə mɨ̀Sâm ə cherə ni, 'Ka à bɨrɨ saŋ e ni e Wə̀d Zeŋɨ bɔb.'

³⁶ Ənɨ Dèvîd nyaʼa kɨrɨ ɨkǎ, wɨ̀ nyaʼa ghɨ̀ ɨnû mbe nɨ Ŋwìə̀ nyaʼa kəbɨ ni wɨ̀ ghɨ ə. Wɨ̀ nyaʼa kwɨ mbɨ tweŋ əbɔʼ mɨ̀mbǎʼ məd rəŋwe, əne wɨ̀ nyaʼa bɔb.

³⁷ Àyɨə chəi məd we nɨ Ŋwìə̀ nyaʼa zwemnɨ nyaʼa bɔbɨ.

³⁸ Əne kyɨə bɔŋgɔb, mbə̀ kyerɨ ni tɨ̀ wɨə chè ənjìm wə̀d wɔ̂ ghà ɨnû ɨ nən ɨmbə̀ʼ ɨchî nɨ Ŋwìə̀ ə waʼ ɨnû rɨbɔ̀ŋ bə̂d.

³⁹ Əne Ŋwìə̀ fə waʼ ɨnû rɨbɔ̀ŋ wə̀d mɔʼ mɔʼ we nɨ ben ə Kristo, nɨ chəi tɨkə rɨ Mose te tɨ̀ rɨ nyaʼa waʼ.

⁴⁰ Əne mbə̀ we ə, njɨ ənû ze nɨ bə̂d ɨ̀kə̀n Ŋwiə̀ nyaʼa ghǎ ə bɨrɨ ghɨ ənɨ ə nən. Ənû ze yɨ ni,

⁴¹ 'Mbə̀n mbe nɨə chəʼnɨ ɨŋgam Ŋwiə̀, mbə̀ neŋ ənû ze nɨ Ŋwìə̀ ə ghɨ̀ə̀ yiirɨ, kwɨ, ɨmbə̀ʼ ɨghəm nɨ mə bɨrɨ ghɨ ənû ə mɔʼɔ ɨŋga ɨni mbe nɨ mbə̀ yeʼ ɨkǎ, nɨ wə̀d mɔʼɔ mɨ gha ɨ nən, chəi mbə̀ bɨrɨ nɔ benɨ.'”

⁴² Ənɨ Pɔ̂l mbɨ Banabàs nyaʼə jwɨ̀ rɨŋga nəb ə̀kàtɨ̀ ze, bə̂d mbe nyaʼa buʼ ɨbɔ əmbɨ mɨ̀mə̌d ni mbɨ wɨrɨ bə̀ndɨ̀ yeʼe əni əkwɨ ze nɨ beenɨ, ɨmbə̀ʼ ghà ɨnû cherə ɨghabɨ mbɔ̂ əmbɨ mɨ̀mə̌d.

⁴³ Ənɨ mbɨ nyaʼa jaŋ rɨŋga nəb ə̀kàtɨ̀ ze, mɨ̀Jû nɔnɔʼ mbɨ ə bə̂d cherə mbe nɨ nyaʼa beŋ tə fîŋ ben ənû ə Ŋwiə̀ mɨ̀Jû nyaʼa beenɨ əbɔʼ Pɔ̂l mbɨ Banabàs. Əne Pɔ̂l mbɨ Banabàs nyaʼa ghàm bə̀ tìmbɨ̀ mɨ̀mə̌d ni mbɨ wo ɨmbì nuŋ fîŋ ɨgun ə Ŋwiə̀ we nɨə ghɨ̀ ɨ̀chɔ̀m ənɨ mɨ̀mə̌d.

⁴⁴ À nyaʼa əni əkwɨ ze nɨ beenɨ, bə̂d mɨ̀nɔnɔʼ rɨŋga əsɨ ze nyaʼa wò fetɨ ɨŋga nəb ə̀kàtɨ̀ ɨ zu ɨŋgam Ŋwiə̀.

⁴⁵ Àyɨə ənɨ mɨ̀Jû nyaʼa zə mɨnɔ̂n bə̂d mbe, ə̀dìì ə nyaʼa swi ɨŋga fîŋ tɨ mɨ̀mə̌d, əne mbɨ nyaʼa kɔ zɔm ə Pɔ̂l ghàə̀ ni ənû ze nɨ wɨə ghàə̀ yɨ mɨghab.

⁴⁶ Ənɨ mbɨ nyaʼa gha əne, Pɔ̂l mbɨ Banabàs nyaʼa ghà mbɨ ə fîŋ nɨ kǎ ni, “Zɨə nyaʼa kùʼ ni tɨ̀ be ghà ɨŋgam Ŋwiə̀ ɨ nən. Àyɨə ɨchî nɨ mbə̀ ton ɨŋgam we, əne zə ni chəi mbə̀ kuʼ nɨ jɨg ɨ̀tènɨ̀ rɨ mì, tɨ̀ fə sàŋ əwən wò əbɔʼ bə̂d mbe nɨ kaʼi mɨ̀Jû,

⁴⁷ ɨmbə̀ʼ ɨghəm nɨ Ə̀nùŋɨ̀sɨg nyaʼa fə ghà ɨ na ni, 'Mə fə nùŋ e ni à yeʼ ɨzeŋɨ zeŋɨ əmbɨ bə̂d mbe nɨ kaʼi mɨ̀Jû, ɨmbə̀ʼ bə̂d mɨjìm rɨ ɨbu ɨsɨg jìm jwɨ rəŋgəʼ.'”

⁴⁸ Ənɨ bə̂d mbe nɨ kaʼi mɨ̀Jû nyaʼa zu ənû zɔ̂, mbɨ nyaʼa ghaʼ əne yiirɨ ə Ŋwiə̀ ɨmbə̀ʼ ɨŋgam məd we nɨ wɨ̀ ghamɨ dè əwən. Bə̂d mɨjìm mbe nɨ Ŋwìə̀ nyaʼa fə chɔʼɔ ni mbɨ bɨrɨ jɨg ɨ̀tènɨ̀ rɨ mì nyaʼa ben ənû ze nɨ mbɨ nyaʼə ghà ɨmbə̀ʼ ə Kristo.

⁴⁹ Ɨŋgam Ə̀nùŋɨ̀sɨg nyaʼa jàŋ ɨŋga əbà əbeŋ ze əjìm.

⁵⁰ Àyɨə mɨ̀Jû mbe nyaʼa no məyi kyeŋ kyeŋ mbe nɨ nyaʼa nuŋ fîŋ ɨgun ə Ŋwiə̀ bə̀ no bə̂d kyeŋ mbe rɨŋga əsɨ ze. Əne mbɨ nyaʼa kɔ nwendɨ tɨkyerɨ-ɨwu Pɔ̂l mbɨ Banabàs, əne fid mɨ̀mə̌d rɨŋga əbà əbeŋ ze.

⁵¹ Àyɨə Pɔ̂l mbɨ Banabàs nyaʼa kùd əgywɨ tɨ ənɨ mbə ɨwu ɨmbə̀ʼ patɨ mɨ̀mə̌d ni mbɨ beŋ tə fîŋ. Ənɨ mbɨ nyaʼa ghɨ əne, mbɨ nyaʼa nɔ̀ʼ wò ə Ikoniùm.

⁵² Ɨghaʼi mbɨ Əzwî ə Zeŋɨ nyaʼa swi ɨŋga bə̂d mbe nɨ nyaʼa ben ə Kristo ə Antiɔ̀k.