Ɨ̀fàʼì 11 - Meta’

Pità nyaʼa tòʼrɨ̀ ənû ə Kɔneliùs

¹ Bə̂d tom Kristo mbɨ ə bə̂d mbe rɨ ə Jùdeyà nɨ nyaʼa ben ə Kristo nyaʼa zu ni bə̂d mbe nɨ kaʼi mɨ̀Jû fə bə̀ ben ɨŋgam Ŋwiə̀.

² Əne ənɨ Pità nyaʼa kɔʼ wò ə Jèrusalèm, mɨ̀Jû mbe nɨ nyaʼə kə̀bə̀ ni mbɨ ne bə̂d mbe nɨ kaʼi mɨ̀Jû nyaʼa chuʼ əməd

³ ghà ni, “À kəʼ wò əkwɨ bə̂d mbe nɨ kaʼi mɨ̀Jû bə̀ jɨg mbɨ mɨ̀mə̌d ɨmbə̀ʼ ə ye ə?”

⁴ Pità nyaʼa sɨ kɔ toʼrɨ ɨnû mbe nɨ nyaʼa che əmbɨ mɨ̀mə̌d ɨchî nɨ mbɨ nyaʼa kɔ.

⁵ Wɨ̀ nyaʼa ghà ni, “Ənɨ mə nyaʼə kɔ̀ŋgɨ̀ ə Ŋwiə̀ ə Jopà, tɨ̀taanɨ njə̀m mɔʼɔ nyaʼa chè əmɨ. Ɨŋga tɨ̀taanɨ njə̀m ze, mə nyaʼa zə əghɨ ə mɔʼɔ nɨ nyaʼə swiʼə rɨkaŋ ɨghabɨ əbapɨ ə ngywɨ̌ ə kyeŋ. Ɨ mbɨə nyaʼə swi əghɨ ze rɨkaŋ ənɨ rɨbu rɨ̀kwè. Zɨə nyaʼa swiʼi yeʼe ɨban num.

⁶ Mə nyaʼa nèŋ ɨŋga kwàʼ ɨchî chɔ̀m, əne zə nyam te nɨ bə̂d ə zɨ̀ə̀, zə te rɨ əgyeŋ, zə te nɨə kɔ ɨbum ə si bə̀ zə rɨnən.

⁷ Əne mə nyaʼa zu gɨ̂ mɔʼɔ nɨ nyaʼa gha ɨ num ni, 'Pità, nɔʼɔ zwiirɨ kud.'

⁸ Àyɨə mə nyaʼa wììrɨ̀ ni, 'Ɨndèʼ əmɨ, kyɨ Ə̀nùŋɨ̀sɨg. Chəi əghɨ ə mɔʼɔ ze nɨ rɨka zeŋ i, kɨ əze nɨ chəi bə̂d ə kurə, ə kweʼ nyɨ ɨŋga mɨ ɨchû.'

⁹ Gɨ̂ ze nyaʼa ghàm rɨkaŋ ənɨ ɨghəm nɨ pe be ni, 'Tɨrə̀ tɔŋ e əghɨ ze nɨ Ŋwìə̀ fə zeŋnɨ ni à yɨ əghɨ nɨ rɨka zeŋ i.'

¹⁰ Ənû zɔ̂ ə nyaʼa ghɨ̀ ɨghəm tad, əne mbɨ nyaʼa wɨrɨ sùŋ əghɨ ze əjìm ɨkaŋ.

¹¹ Àmei əwu əwən, bə̂d mɨ̀tad nɨ mbɨ nyaʼa tom əsɨ num rɨ ə Kàisàriyà, nyaʼa yeʼe nyɨ ɨŋga nəb ze nɨ mə̀ nyaʼə chubə.

¹² Əzwî ə Zeŋɨ ə nyaʼa ghà ɨ num ni mə wo mbɨ mɨ̀mə̌d, zɨ rɨ nyiʼnɨ ɨnyod. Mbɨ bɔŋgɔb mbɔ̂ rɨ̀fuə nyaʼa bə̀ wò mbɨ num, əne tɨ̀ nyaʼa wò nyɨ ɨŋga nəb mbaŋə̀ ze.

¹³ Mbaŋə̀ ze nyaʼa ghà ɨchî nɨ wɨ̀ kəʼ zə aŋgɨrə̀ nɨ təm ɨŋga nəb məd ghà ɨ bɔ ni, 'Tom bə̂d ə Jopà ni mbɨ wo nɨŋ ə Saimòn we nɨ mbɨə bə̀ tɔŋ ənɨ Pità yeʼe mbɨ məd.

¹⁴ Məd bɨrɨ gha ɨkə̂n mɔʼɔ ɨ ne nɨ bɨrɨ ghɨ ni àwɔ̀ mbɨ ə bə̂d mɨjìm mbe nɨ yeʼ ɨŋga e nəb jwɨ rəŋgəʼ.'

¹⁵ Ənɨ mə̀ nyaʼa kɔ ghamɨ, Əzwî ə Zeŋɨ ə nyaʼa yeʼe ɨgwɨ mɨ̀mə̌d àmei ɨchî nɨ zɨə nyaʼa yeʼe ɨgwɨ na ənɨ ɨkɔ.

¹⁶ Əne mə nyaʼa kɔndɨ ɨŋgam Ə̀nùŋɨ̀sɨg, ɨchî nɨ wɨ̀ nyaʼa gha ni, 'Jɔ̌n wɨə nyaʼə nàʼə̀ mɨnib, àyɨə Ŋwìə̀ bɨrɨ naʼ Əzwî ə Zeŋɨ ɨ nən.'

¹⁷ Əne ɨchî nɨ Ŋwìə̀ fə naʼ ɨneʼe əmbɨ mɨ̀mə̌d àmei ɨchî nɨ wɨ̀ nyaʼa naʼ ɨ na ənɨ ə nyùmə̀ we nɨ tɨ̀ nyaʼa ben Ə̀nùŋɨ̀sɨg Yeso Kristo, njɨ mɔ̌ kɨə we nɨ tɨ̀ mə ton ni tɨ Ŋwìə̀ ghɨ i ənû ze nɨ wɨ̀ kəbɨ ə?”

¹⁸ Ənɨ mbɨ nyaʼa zu ənû zɔ̂, chəi mbɨ nyaʼa wɨrɨ berɨ ənû ə cherə nɨ ghà. Əne mbɨ yiirɨ ə Ŋwiə̀, ghà ni, “Ŋwìə̀ fə bə̀ nàʼ əpan əmbɨ bə̂d mbe nɨ kaʼi mɨ̀Jû ni mbɨ beŋ tə fîŋ jɨg ɨ̀tènɨ̀.”

Ɨchî nɨ ɨfetɨ bə̂d Kristo we rɨ ə Antiɔ̀k nyaʼə kwiə

¹⁹ Mə̀saʼ əbeŋ nyaʼa zwiirɨ ə Stɨfɨ̀n, əne kɔ nwendɨ tɨkyerɨ-ɨwu bə̂d mbe nɨ nyaʼa ben ə Kristo. Bə̂d mbe nɨ nyaʼa ben ə Kristo nyaʼa jàŋ wò ə Fonesià, wò ə Saiprùs bə̀ wò ə Antiɔ̀k. Ənɨ mbɨ nyaʼə wòə̀, ɨ mbɨə nyaʼə yènə̀ ghà ɨŋgam Ŋwiə̀ àmei əmbɨ mɨ̀Jû.

²⁰ Àyɨə bə̂d cherə nɨ nyaʼa rɨ ə Saiprùs bə̀ fɔrɨ rɨ ə Sìrin, nyaʼa wò ə Antiɔ̀k kɔ ghà ɨkə̂n chɔ̀m ɨmbə̀ʼ Ə̀nùŋɨ̀sɨg Yeso əmbɨ ə bə̂d mbe nɨ kaʼi mɨ̀Jû.

²¹ Ɨka Ə̀nùŋɨ̀sɨg wɨə nyaʼa ɨgwɨ mɨ̀mə̌d, əne wɨ̀ nyaʼa ghɨ̀ ni ɨnɔ̂n bə̂d, kwàʼ wɨ kyeŋ, ben ɨnû mbe nɨ mbɨ nyaʼə ghàə̀, əne zɨ̀ tə fîŋ ɨgwɨ Ə̀nùŋɨ̀sɨg.

²² Ɨfetɨ bə̂d Kristo we rɨ ə Jèrusalèm nyaʼa zu ənû ze, əne mbɨ nyaʼa tom ə Banabàs ə Antiɔ̀k.

²³ Ənɨ wɨ̀ nyaʼa wò pè zə ɨchî nɨ Ŋwìə̀ nyaʼa ghɨ ɨ̀chɔ̀m ənɨ ə bə̂d mbe, wɨ̀ nyaʼa ghaʼ, əne tìmbɨ̀ mɨ̀mə̌d mɨjìm ni mbɨ təm kàànɨ̀ ɨŋga ənû ə Ŋwiə̀, bə̀ fàʼ əmbɨ Ə̀nùŋɨ̀sɨg ənɨ tə fîŋ rɨjìm.

²⁴ Banabàs yɨə nyaʼə wə̀d chɔ̀m. Əzwî ə Zeŋɨ ə nyaʼa swi ɨŋga məd. Wɨ̀ nyaʼa bə̀ berɨ ɨbenɨ nɨ kaanɨ. Ɨchî nɨ wɨ̀ nyaʼə ghà ɨŋgam Ŋwiə̀ nyaʼa ghɨ̀ ni bə̂d mɨ̀nɔnɔʼ beŋ tə fîŋ ben Ə̀nùŋɨ̀sɨg.

²⁵ Əne Banabàs nyaʼa wò kəb ə Sɔ̂l ə Tasùs.

²⁶ Ənɨ wɨ̀ nyaʼa zə əməd, wɨ̀ nyaʼa nɨŋ əməd mbɨ wò ə Antiɔ̀k. Ɨ mbɨə nyaʼə bòmnɨ̀ə̀ mbɨ ə bə̂d mbe nɨ nyaʼa ben ə Kristo. Ɨ mbɨə nyaʼə bòmnɨ̀ əne ənɨ əghəm əwu ə fibɨ̀. Mbɨ nyaʼə bòmnɨ̀ə̀ chwi ɨnû ɨmbə̀ʼ ə Yeso əmbɨ ə bə̂d mɨ̀nɔnɔʼ. À yɨ ə Antiɔ̀k nɨ mbɨ nyaʼa be kɔ tɔŋ bə̂d mbe nɨ nyaʼa ben ə Kristo ənɨ ə Bə̂d Kristo.

²⁷ À nyaʼa ənɨ ə nyùmə̀ we, bə̂d ɨ̀kə̀n Ŋwiə̀ mɔʼɔ nyaʼa nɔ̀ʼ rɨ ə Jèrusalèm swiʼi wò ə Antiɔ̀k.

²⁸ Əzwî ə Zeŋɨ ə nyaʼa ghɨ̀ ni wɨ mɔʼɔ rəbɔʼ mɨ̀mə̌d, nɨ ɨkum məd nyaʼə Agabùs, nɔʼ təm rətiə ghà ni njì kǎ kǎ bɨrɨ nyɨ ɨŋga ɨsɨg jìm. (Ənû zɔ̂ ə nyaʼa ghɨ̀ ənɨ ə nyùmə̀ we nɨ Klodiùs nyaʼə tùmbɨ̀ ɨbeŋ jìm mbe nɨ məRom nyaʼa maʼ bid baŋ ə).

²⁹ Əne bə̂d Kristo mbe rɨ ə Antiɔ̀k nyaʼa ben ni wə̀d mɔʼ mɔʼ rəbɔʼ nən cha əghɨ ze nɨ tɨ̀ wɨ̀ chà, ɨmbə̀ʼ weerɨ bɔŋgɔb mbe nɨ nyaʼə chub ə Jèrusalèm.

³⁰ Mbɨ nyaʼa ghɨ̀ ənû ze, əne tom ə Banabàs mbɨ Sɔ̂l mbɨ ɨkab we nɨ mbɨ nyaʼa fetɨ ni mbɨ wo nàʼ əmbɨ ə bə̂d mbe nɨ nyaʼə chà ɨfetɨ bə̂d Kristo we rɨ ə Jèrusalèm.