Gàlesìyà 5 - Meta’

Kristo fə chɨ̀ əwa rɨ əton ə̀bòʼò

¹ Kristo fə chɨ̀ əwa rɨ əton ə̀bòʼò, ɨmbə̀ʼ tɨ rɨ̀ wɨrɨ chub a əton ə̀bòʼò. Mbə̀ təm kàànɨ̀, ɨmbə̀ʼ tɨ wə̀d mɔʼɔ ghɨ̀ i ni mbə̀ wɨrɨ ben ə̀bòʼò əmbɨ rɨkə.

² Mbə̀ zwetɨ! Mɔ̌ Pɔ̂l wɨə ghà ɨ nən ni mbə mɨ tɔ ben ni mbɨ ne əwən, njɨ ənû ze nɨ Kristo ghɨ̌ ɨmbə̀ʼ əwən ə chè ətu ə̀kǒ.

³ Mə yì ghà əmbɨ wə̀d jìm we nɨ ben ni mbɨ ne əməd ni wɨ̀ berɨ nuŋ rɨkə jìm.

⁴ Mbə̀n mbe nɨə kə̀b təm kùʼnɨ̀ ɨchî nɨ mbə̀ə nùŋ rɨkə, fə sùŋgɨ̀ rɨ ənɨ ə Kristo. Mbə̀ fə ton ɨ̀chɔ̀m we nɨ Ŋwìə̀ ghɨ̌ ənɨ nən.

⁵ Tɨ̀ wɨə kàŋə̀ wòmə̀ nɨ Ŋwìə̀ ghɨ tɨ̀ təm kùʼnɨ̀ ənjìm ɨchî nɨ tɨ̀ nuŋ fîŋ ɨgwɨ məd. Ɨ wɨə ghɨ̀ əne ənjìm Əzwî əməd.

⁶ Ɨchî nɨ tɨ̀ yeʼ ənɨ ɨfɔtɨ mbɨ Kristo, əne chəi ənû nɨ mbɨ ne wə̀d kɨ̀ ənû nɨ chəi mbɨ ne wə̀d ə berɨ ənû ə mɔʼɔ nɨ ghɨ̀. Ənû ə kyeŋ yɨ nɨ chwi ni tɨ̀ fə nuŋ fîŋ ɨgun ə Kristo ɨchî nɨ tɨə ghaʼə bə̂d.

⁷ Mbə mbɨə kə̀ʼə̀ ghɨ̀ mbə ɨnû ɨchî chɔ̀m. À kɨə we təmnɨ əwən ni tɨ mbə̀ beenɨ ə əbɔʼ rəsìʼ ə?

⁸ Kaʼi Ŋwìə̀ we nɨ nyaʼa tɔŋ əwən ni mbə̀ yeʼ mbi bə̂d ghɨ ni tɨ mbə̀ beenɨ əwən əbɔʼ rəsìʼ.

⁹ Bə̂d mbɨə ghàə̀ ni, “Àmei akə ɨfuʼ we nɨə ghɨ̀ ni ŋgə̀ŋ kɔʼ we ə ghɨ̀ə̀ ni ŋgə̀ŋ jìm kɔʼ.”

¹⁰ Mə wɨə nùŋ mɨ fîŋ ɨgwɨ nən ɨchî nɨ tɨ̀ yeʼ ənɨ ɨfɔtɨ mbɨ Ə̀nùŋɨ̀sɨg ni chəi mbə̀ bɨrɨ nɨŋ ɨkɔndɨ cherə chè rɨ ənɨ we nɨ mə̀ naʼ ɨ nən. Ŋwìə̀ bɨrɨ saʼ wə̀d we nɨə chə əwən, kɨ̀ à kɨə we njiʼ.

¹¹ Mbɨ bɔŋgɔb, mə mɨ yeʼə ghàə̀ ni mbɨ ne bə̂d, njɨ əton nɨ bə̂d ə kɨrɨ nwendɨ tum rɨkyerɨ-ɨwu kɨ ɨmbə̀ʼ ə yè ə? À mɨ yeʼ nɨ mə̀ kaŋ gha əne, njɨ chəi ənû ze nɨ mɨə ghà ɨmbə̀ʼ ɨchî nɨ Kristo nyaʼa kwɨ əzed ə baʼnɨ ə wɨrɨ berɨ ənû ə mɔʼɔ nɨ ghɨ̀.

¹² À yeʼ ɨmbə̀ʼ bə̂d mbe nɨə tɔb əwən, mə kə̀b ni mbɨ wo ɨmbì zaʼ ə ɨnyod mbənə mbənə!

¹³ Mbɨ bɔŋgɔb, Ŋwìə̀ nyaʼa tɔŋ əwən ni mbə̀ yeʼ mbi bə̂d, ɨmbə̀ʼ tɨ mbə̀ wɨrɨ ben ə ɨ̀bòʼò əmbɨ rɨkə. Tɨ ənû zɔ̂ ni chəi mbə̀ wɨrɨ ben ɨ̀bòʼò ə chwi ni mbə̀ ghɨ ɨnû mbe nɨ tə nyamnyod ə feenɨə. Mə kə̀b yeʼ ni ɨghaʼi ghɨ ni mbə̀ faʼ əmbɨ mbə bɔŋgɔb,

¹⁴ ɨmbə̀ʼ ɨghəm nɨ tɨkə rɨjìm fə fɔtɨ əton ɨkə mɔʼ. Ɨkə we mɔʼ yɨ ni, “À berɨ ghaʼ wə̀d nɨ tindɨ ɨban ne ɨchî nɨ à ghaʼ e nyamnyod.”

¹⁵ Tɨ mbə̀ yeʼ əwən ɨghabɨ ə nyam rɨ tɔtɔ nɨ nombɨə bə̀ kurə tɨ cherə. Mbə̀ we əwən ɨmbə̀ʼ mbə nɨə nimnɨ əwən mbənə mbənə.

Mbə̀ beenɨ əbɔʼ Əzwî ə Ŋwìə̀ chè ɨchî nɨ beenɨ əbɔʼ ɨghɨ mbe nɨ nyamnyod ə feenɨə

¹⁶ Ənû nɨ mɨ ghà yɨ ni: mbə̀ chub ɨchî nɨ Əzwî ə kəbɨ. Tɨ mbə̀ ghɨ ə ɨnû mbe nɨ tə nyamnyod ə feenɨə,

¹⁷ ɨmbə̀ʼ ɨghəm nɨ ɨnû mbe nɨ nyamnyod ə feenɨə yɨ mbe nɨ chəi Əzwî ə kəbɨ, mbe nɨ Əzwî ə kəbɨ yɨ mbe nɨ chəi nyamnyod kə̀bɨ. Mɨ̀mə̌d mbɔ̂ mɨ̀be mbɨə zɔ̀ŋə̀ ɨmbə̀ʼ tɨ mbə̀ ghɨ ə ɨnû mbe nɨ mbə̀ kəbɨ.

¹⁸ Àyɨə mbə mɨ yeʼə ghɨ̀ àmei ɨnû mbe nɨ Əzwî ə kəbɨ, njɨ chəi rɨkə wɨrɨ berɨ ɨka ɨgwɨ nən.

¹⁹ Ɨnû mbe nɨ nyamnyod ə feenɨə mbɨ zeŋ. Mbɨ yɨ ənû nɨ ni mbaŋə̀ kɨ̀ məyi əbeŋ əbəŋ, ənû nɨ ghɨ ɨnyɔɔnɨ-ɨnû, ənû nɨ ghɨ ɨnyamnɨ-ɨnû,

²⁰ ənû nɨ wumnɨ mbɨ̀anèŋ, ənû nɨ ghɨ mɨ̀sà, ənû nɨ ghɨ pə̀n, ənû nɨ chɔb, ənû nɨ ghɨ ə̀dìì, ənû nɨ sə ɨtəm, ənû nɨ ghɨ ɨghabɨ ni àmei mbə̀nə berɨ ɨghɨ, ənû nɨ ghabrɨ bə̂d, ənû nɨ ghɨ tɨfɔtɨ kwa kwa,

²¹ ənû nɨ feenɨ ɨghɨ bə̂d, ənû nɨ nɔ be, ənû nɨ nɔ bùùrɨ̀ mbɨ ɨnû cherə ɨghabɨ mbe. Mə wɨə patɨ əwən rɨ̀nîn, ɨchî nɨ mə̀ nyaʼa be patɨ ni, chəi bə̂d mbe nɨə ghɨ̀ tɨkwɨrɨ ɨnû tɔ̂ bɨrɨ jɨg ənû ɨfɔ̀n ə Ŋwiə̀.

²² Àyɨə ɨnû mbe nɨ Əzwî ə kə̀bə̀ yɨ ənû nɨ ghaʼ bə̂d, ənû nɨ chub ənɨ ɨghaʼi, ənû nɨ chub ənɨ əbɔrəbɔd, ənû nɨ yim fîŋ, ənû nɨ berɨ ɨbɔŋ fîŋ, ənû nɨ ghɨ ɨ̀chɔ̀m, ənû nɨ nuŋ fîŋ ɨgun ə bə̂d,

²³ ənû nɨ swi ɨnyod mbɨ ənû nɨ yimbɨ ɨnyod. Chəi ɨkə mɔʼɔ nɨ ton ɨnû mbɔ̂.

²⁴ Bə̂d Kristo Yeso fə kòmbɨ̀ tə nyamnyod bə̀ kòmbɨ̀ ɨnû mbe nɨ nyamnyod ə kə̀bə̀ bə̀ feenɨ əzed ə baʼnɨ.

²⁵ À yɨ Əzwî ə ghɨ̀ ni tɨ̀ yeʼ ɨkǎ, əne tɨ̀ ghɨ ɨnû mbe nɨ Əzwî ə kə̀bə̀.

²⁶ Tɨ rɨ̀ nɔ a ɨnyod. Tɨ rɨ̀ ghɨ a ni bə̂d cherə sə ɨtəm. Tɨ rɨ̀ ghɨ a ə̀dìì.