Gàlesìyà 1 - Meta’

Ə̀chàʼrɨ̀

¹ À yɨə mɔ̌ Pɔ̂l, nɨ mə yeʼ wə̀d tom Kristo, ŋwaʼnɨ ə̀ŋwàʼnɨ̀ zɔ̂. Kaʼi bə̂d nyaʼa chɔʼ əmɨ tom. Ka ɨka we nɨ chɔʼ əmɨ yɨ i rɨ əmbɨ ə bə̂d. Ɨka we yɨ rɨ əmbɨ Yeso Kristo bə̀ fɔrɨ rɨ əmbɨ Ŋwìə̀ Mbǎʼ we nɨ nyaʼa zwemnɨ əməd.

² Bə̂d Kristo mɨ̀jìm mbe nɨ yeʼ əgha fə fɔtɨ mbɨ num chà ə̀chàʼrɨ̀ əmbɨ mbə̀n mbe nɨ yeʼ ɨŋga rɨfetɨ bə̂d Kristo te rɨ ə Gàlesià.

³ Ŋwìə̀ Mbǎʼ mbɨ a Ə̀nùŋɨ̀sɨg Yeso Kristo ghɨ ɨ̀chɔ̀m ənɨ ə nən bə̀ nàʼ əbɔrəbɔd ɨ nən.

⁴ Yeso Kristo nyaʼa nàʼ i ɨnyod ənɨ əghɨ ə̀fà ɨmbə̀ʼ mba ɨnû rɨbɔ̀ŋ. Wɨ̀ nyaʼa ghɨ̀ əne ɨmbə̀ʼ chɨ əwa rɨŋga ɨsɨg wɔ̂ nɨ ɨnû rɨbɔ̀ŋ swi ɨŋga. Wɨ̀ nyaʼa ghɨ̀ əne ɨchî nɨ Ŋwìə̀ a Mbǎʼ nyaʼa kə̀bɨ.

⁵ Tɨ̀ wumnɨ Ŋwiə̀ koŋ koŋ. À yɨ əne.

Chəi ɨkə̂n chɔ̀m cherə

⁶ Zɨə chè əmɨ ni mbə mbɨə kɨə zàmbɨ̀ə̀ waʼ əməd we nɨ nyaʼa tɔŋ əwən ni mbə̀ yeʼ mbi bə̂d ənjìm ɨ̀chɔ̀m we nɨ Kristo ə ghɨ̀ə̀, sɨə beenɨə yeʼ əbɔʼ ɨkə̂n chɔ̀m cherə.

⁷ Kaʼi ni ɨkə̂n chɔ̀m cherə wɨ əŋgu, àyɨə bə̂d mɔʼɔ mbɨə bùùrɨ̀ mbə ɨtu. Ɨ mbɨə bə̀ kə̀b beŋ ɨkə̂n chɔ̀m ɨmbə̀ʼ ə Kristo.

⁸ Àyɨə ka àbei mbǎ kɨ̀ aŋgɨrə̀ nɨ yeʼe rɨkaŋ, wə̀d mɔʼɔ rəbɔʼ na mɨ ghà ɨkə̂n chɔ̀m nɨ kwepɨ rɨ ənɨ we nɨ tɨ̀ nyaʼa ghà ɨ nən, Ŋwìə̀ zɨ ndɔ̀n ɨgwɨ məd!

⁹ Ɨchî nɨ tɨ̀ nyaʼa fə gha rɨmbì, mə yɨ əni yɨə ghàə̀ tɨ̀nîn ni: Wə̀d mɔʼɔ mɨ yeʼə ghà ɨkə̂n chɔ̀m ɨ nən nɨ kwepɨ rɨ ənɨ we nɨ mbə̀ nyaʼa fə be zu benɨ, Ŋwìə̀ zɨ ndɔ̀n ɨgwɨ məd.

¹⁰ Mə̀ kɨə kə̀bə̀ ni bə̂d gha ni mə bɔ̀ŋ, kɨ̀ ni Ŋwìə̀ gha ni mə bɔ̀ŋ ə? Kɨ̀ mə̀ kɨə kə̀b ghɨ ni fîŋ rɨ bə̂d bɔŋ ə? Mə mɨ yeʼə kɨrɨ kəb nɨ ghɨ ni bə̂d gha ni mə bɔ̀ŋ, njɨ ka mɔ̌ yɨ əmɨ wə̀d ə̀fàʼì Kristo.

Ɨchî nɨ Pɔ̂l nyaʼa beŋ sɨə wə̀d tom Kristo

¹¹ Mbɨ bɔŋgɔb, mə kə̀b ni mbə kyerɨ ni ka ɨkə̂n chɔ̀m wɔ̂ nɨ mɨə ghàə̀ yɨ i rɨ əmbɨ ə bə̂d mɨ̀sɔŋɨchù.

¹² Kaʼi wə̀d mɨ̀sɔŋɨchù mɔʼɔ nyaʼa gha ɨkə̂n chɔ̀m wɔ̂ ɨ num, kɨ̀ ni à yɨə wə̀d mɔʼɔ nyaʼa chwi ɨ num. À yɨə Yeso Kristo ziə nyaʼa chwi ɨ num.

¹³ Mbə nyaʼa fə zu ɨchî nɨ mə nyaʼə ghɨ̀ ɨnû ənɨ mə nyaʼa kɨrɨ ɨŋga ənû ə Ŋwiə̀ mɨ̀Jû. Mbə nyaʼa zu ɨchî nɨ mə̀ nyaʼə nwèndɨ̀ rɨkyerɨ-ɨwu bə̂d mbe nɨ nyaʼa ɨŋga ɨfetɨ bə̂d Ŋwiə̀ kwàʼ ənɨ ɨkǎ. Mbə nyaʼa bə̀ zu ɨchî nɨ mə̀ nyaʼə bə̀ kə̀b nimnɨ ɨfetɨ we.

¹⁴ Mə wɨə nyaʼə wò ɨmbì ənɨ ənû ə Ŋwiə̀ mɨ̀Jû chè mɨ̀Jû nɔnɔʼ nɨ nyaʼa tum rɨ̀ghə̀m. Mə nyaʼa kàŋ jeŋgɨ zɨ̀ ətu nɨ ghɨ ɨnû mbe nɨ mba mɨ̀mbǎʼ rəŋwe nyaʼə ghɨ̀ə̀.

¹⁵ Bɔŋ mbɨ nyaʼa sɨə gywɨ əmɨ, Ŋwìə̀ nyaʼa ghɨ̀ ɨ̀chɔ̀m ənɨ ə num chɔʼ əmɨ bə̀ tɔŋ əmɨ ni mə̀ yeʼ wə̀d məd. Wɨ̀ nyaʼa kàŋ ghaʼ əku

¹⁶ nɨ chwi i Wan ɨ num, ɨmbə̀ʼ mə̀ gha ɨkə̂n chɔ̀m ɨmbə̀ʼ əməd əmbɨ ə bə̂d mbe nɨ kaʼi mɨ̀Jû. Ənɨ wɨ̀ nyaʼa ghɨ ɨ̀chɔ̀m we ənɨ ə num əne, chəi mə̀ nyaʼa ghambɨ mbɨ wə̀d mɔʼɔ.

¹⁷ Chəi mə̀ nyaʼa be wò ə Jèrusalèm ɨ zə bə̂d mbe nɨ nyaʼa ə bə̂d tom Kristo ɨmbì num. Mə nyaʼa wò əwu əwən yeʼ ə Àrebìà bɔŋ mə̀ nyaʼa sɨ wɨrɨ bə̀ndɨ̀ wò ə Dàmaskɔ̀s.

¹⁸ Ənɨ ɨghəm ɨwu nyaʼa chè ɨtad, mə nyaʼa kɔʼ wò ə Jèrusalèm ɨ wò zə ə Pità. Mə nyaʼa pè chubɨ mbɨ məd ɨni wum chɔ̀b rɨ̀tân.

¹⁹ Chəi mə nyaʼa zə wə̀d tom cherə chè rɨ ənɨ ə Jems we nɨ yeʼ aŋgɔb Ə̀nùŋɨ̀sɨg Yeso.

²⁰ Ŋwìə̀ ə kyerɨ ni ənû ze nɨ mɨə ŋwàʼnɨ̀ ɨ nən yɨ ənû rəsìʼ.

²¹ Mə nyaʼa nɔ̀ʼ rəŋgu wo ɨŋga ɨba ɨbeŋ mbe rɨ ə Sirià mbɨ ə Silisià.

²² Chəi bə̂d rɨŋga rɨfetɨ bə̂d Kristo te rɨ ə Jùdeyà nyaʼa be kɨrɨ zə əmɨ.

²³ Mbɨ nyaʼa zu àmei ənɨ nɨ bə̂d nyaʼə ghàə̀ ni, “Mbaŋə̀ ze nɨ nyaʼə nwèndɨ̀ ta rɨkyerɨ-ɨwu wɨə sɨə ghà ɨnû ɨmbə̀ʼ ɨbenɨ we nɨ wɨ̀ nyaʼə kəb nimnɨ.”

²⁴ Əne mbɨ nyaʼa wumnɨ ə Ŋwiə̀ ɨmbə̀ʼ əmɨ.