Fìlipì 4 - Meta’

Pɔ̂l nyaʼa kəərɨ bə̂d Kristo mbe rɨ ə Filipì

¹ Mbɨ bɔŋgɔb, mə ghaʼ əwən bə̀ kàŋ kə̀b nɨ zə əwən. Mbə mbɨə ghɨ̀ ni mɨ fîŋ bɔŋ ə. Mbə yɨə bə̀ ɨchɔʼ ə̀fàʼì ənɨ ə̀fàʼì ze nɨ mə faʼi. Əne kyɨə bɔŋgɔb nɨ mə̀ ghaʼi kwàʼ rɨŋgəʼ, mbə̀ təm kàànɨ ɨchî nɨ mbə̀ yeʼ ənɨ ɨfɔtɨ mbɨ Ə̀nùŋɨ̀sɨg.

² Mə wɨə buʼ ɨ bɔ ɨ ne àwɔ̀ Euodìà bə̀ buʼ ɨ ne àwɔ̀ Sintikè ni mbə chub ənɨ ənû ə mɔʼ ɨchî nɨ mbə̀ yeʼ bə̂d Ə̀nùŋɨ̀sɨg.

³ Mə wɨə bə̀ gha ɨ ne, àwɔ̀ nɨə fàʼə̀ mbɨ num ənɨ e fîŋ jìm, ni à weerɨ məyi mbɔ̂ ghɨ̀ mbɨ chub ənɨ əbɔrəbɔd, ɨmbə̀ʼ ɨghəm nɨ mɨ̀mə̌d, Klemèn mbɨ ə bə̂d cherə fə fàʼ rɨkǎ mbɨ num nɨ ghà ɨkə̂n chɔ̀m. Tɨkum tɨ mɨ̀mə̌d tɨ ɨŋga ə̀ŋwàʼnɨ̀ ze nɨ mbɨ ŋwaʼnɨ rɨkum bə̂d mbe nɨ bɨrɨ jɨg ɨ̀tènɨ̀.

⁴ Mbə̀ ghaʼrɨ ɨghəm jìm ɨchî nɨ mbə̀ yeʼ ənɨ ɨfɔtɨ mbɨ Kristo. Mə yì ghà ɨ nən ni: Mbə ghaʼrɨ!

⁵ Mbə̀ chwi əmbɨ wə̀d jìm ni mbə berɨ ɨbɔtɨ fîŋ. Ə̀nùŋɨ̀sɨg bɨrɨ zambɨ yeʼe.

⁶ Tɨ mbə̀ nwìʼ ə ɨnyod ɨmbə̀ʼ ənû ə mɔʼɔ, àyɨə mbə kɔŋgɨ ə Ŋwiə̀ ɨmbə̀ʼ ɨnû jìm, nɔn ɨnû jìm mbe nɨ mbə kwaŋɨ bə̀ nàʼ məben-əwe ɨ bɔ.

⁷ Mbə mɨ ghɨ̀ əne, njɨ əbɔrəbɔd ə Ŋwiə̀, nɨ chəi ənɨ tɨ ɨwe bə̂d mɨ̀sɔŋɨchù kyerɨ màànɨ̀, bɨrɨ ghɨ ni tɨ tə fîŋ bɔrɨ i, bə̀ ghɨ̀ ni tɨ tə rɨkɔndɨ tɔb i əwən ɨchî nɨ mbə̀ yeʼ ənɨ ɨfɔtɨ mbɨ Kristo.

⁸ Mbɨ bɔŋgɔb, ənû nɨ sɨ nwìə̀ yɨ ni, ənû ə mɔʼɔ mɨ bɔ̀ŋ, ənû ə mɔʼɔ mɨ yeʼ əŋgu nɨ bə̂d ə yiirɨə, mbə nuŋ tə rɨkɔndɨ ɨgun ɨnû mbe. Ənû nɨ yeʼ əzɨ rəsìʼ, ənû nɨ tɨ bə̂d wumnɨ, ənû nɨ kuʼnɨ, ənû nɨ zeŋɨ, ənû nɨ bə̂d ə ghaʼə mbɨ ənû nɨ tɨ bə̂d feenɨ, yɨ mbe nɨ tɨ̀ mbə nùŋ tə rɨkɔndɨ ɨgun.

⁹ Mbə̀ ghɨ ɨnû mbe nɨ mə̀ nyaʼa chwi ɨ nən mbə benɨ. Mbə̀ ghɨ̀ mbe nɨ mbə nyaʼa zu rɨ num bə̀ zə ənɨ mɨə ghɨ̀ə̀. Əne Ŋwìə̀ nɨə nàʼ əbɔrəbɔd bɨrɨ chubɨ mbɨ nən.

Pɔ̂l nàʼ məben-əwe ɨmbə̀ʼ bə̂d Kristo mbe rɨ ə Filipì

¹⁰ Ɨghaʼi kyeŋ wɨ ɨŋga mɨ fîŋ ɨchî nɨ mə yeʼ ənɨ ɨfɔtɨ mbɨ Ə̀nùŋɨ̀sɨg, ɨmbə̀ʼ ɨghəm nɨ əgha ə fə kàŋ sà nɨ chəi mbə̀ weerɨ əmɨ. Mbə nyaʼa kàŋ ghaʼ nɨ weerɨ, àyɨə chəi mbə̀ nyaʼa berɨ əpan.

¹¹ Chəi mə̀ gha əne ɨmbə̀ʼ ɨghəm nɨ mə̀ nyaʼa kwaŋ əghɨ ə mɔʼɔ. Mə wɨə ghà yeʼ ɨmbə̀ʼ ɨghəm nɨ mə fə kwembɨ ni kɨ̀ à kɨ ənû ə ye ə, ɨghɨ mbe nɨ mə berɨ mbɨ kùʼ.

¹² Mə kyerɨ ɨchî nɨ chub ənɨ mə kwaŋɨ fɔrɨ ənɨ mə berɨ ɨghɨ nɨ nɔʼɔ, ɨmbə̀ʼ ɨsɨ jìm bə̀ fɔrɨ ənɨ mɨ̀nyùmə̀ jìm, mə fə mə̀d mbɨ ɨghɨ mbe nɨ mə berɨ, kɨ̀ mə jɨg kod kɨ̀ mə chubɨ njì, kɨ̀ mə berɨ ɨghɨ mbɨ nɔʼ kɨ̀ mə berɨ mbɨ kə.

¹³ Mə we tɨ̀ mə ghɨ̀ ɨnû jìm ənjìm ɨka we nɨ Kristo naʼ ɨ num.

¹⁴ Àyɨə mbə nyaʼa ghɨ̀ ɨ̀chɔ̀m ɨchî nɨ mbə weerɨ əmɨ ənɨ mə̀ nyaʼa ə ŋgəʼ.

¹⁵ Mbə̀n məFilipì kàŋ kyerɨ ə kwàʼ ɨchî chɔ̀m ni ənɨ mə̀ nyaʼa nɔʼ rɨ ə Màsèdonià kɔ gha ɨkə̂n chɔ̀m, chəi ɨfetɨ cherə nyaʼa weerɨ əmɨ. Àmei mbənə nyaʼa weerɨ əmɨ.

¹⁶ Ka àbei ənɨ mə nyaʼa ə Tèsàlonikà, mbə nyaʼa chà ə̀wèèrɨ̀ ɨ num chè rɨ ənɨ ɨghəm mɔʼ.

¹⁷ Chəi mə̀ gha əne ɨmbə̀ʼ ɨghəm nɨ mə̀ kəb ni mbə naʼ ɨghɨ ɨ num. Mə kə̀b yeʼ ni Ŋwìə̀ chwɨ əwən ɨchî nɨ mbə̀ weerɨ əmɨ.

¹⁸ Mə fə berɨ ɨghɨjìm mbe nɨ mə nyaʼa kwaŋɨ mbɨ nɔʼ chè. Mə fə berɨ ɨghɨjìm mbe nɨ mə̀ kwaŋɨ tɨ̀nîn nɨ Èpàfroditùs fə naʼ ɨkab we nɨ mbə̀ tom ɨ num. Ɨkab we yɨ ɨghabɨ ɨghɨ ə̀fà nɨə nyùʼrɨ ɨfɔ chɔ̀m əne ghɨ̀ə̀ ni fîŋ Ŋwìə̀ bɔŋ ə.

¹⁹ Mɨ Ŋwìə̀ bɨrɨ naʼ ɨghɨjìm mbe nɨ mbə̀ kəbɨ. Wɨ̀ bɨrɨ che ənjìm ə Kristo Yeso naʼ ɨ nən rɨŋga mbɔ̂n nɔnɔʼ ze nɨ wɨ̀ berɨ.

²⁰ Bə̂d wumnɨ Ŋwìə̀ a Mbǎʼ koŋ koŋ. À yɨ əne.

Ə̀chàʼrɨ̀ nɨ sɨ nwìə̀

²¹ Mbə̀ chaʼrɨ bə̂d Kristo mɨ̀jìm əwɔ. Mba mɨjìm mbɨ ənɨ ɨfɔtɨ mbɨ Kristo ɨchî nɨ tɨ̀ nùŋ fîŋ ɨgwɨ məd.

²² Bə̂d Kristo mɨjìm chàʼrɨ̀ əwən, màànɨ̀ mbe nɨə fàʼ ɨŋga tɔʼ Kaisà.

²³ Ə̀nùŋɨ̀sɨg Yeso Kristo ghɨ ɨ̀chɔ̀m ənɨ ə nən.