Fìlipì 3 - Meta’

Ɨchî nɨ tɨ̀ ɨbenɨ ghɨ̀ ni bə̂d təm kùʼnɨ̀

¹ Mbɨ bɔŋgɔb, bɔŋ mə sɨə màànɨ̀ə̀, mə wɨə ghà ɨ nən ni mbə̀ ghaʼ ɨchî nɨ mbə̀ yeʼ ənɨ ɨfɔtɨ mbɨ Ə̀nùŋɨ̀sɨg. Kaʼi ŋgəʼ mɔʼɔ ɨ num nɨ wɨrɨ ŋwaʼnɨ ɨnû mbe nɨ mə̀ nyaʼa be ŋwàʼnɨ̀ ɨ nən. Mə wɨə ghɨ̀ əne ɨmbə̀ʼ tɨ ŋgəʼ nyɨ i ɨgwɨ nən.

² Mbə̀ we ə mbɨ ə bə̂d mbe nɨə ghɨ̀ ɨnû rɨbɔ̀ŋ. Mbɨ yɨ ɨghabɨ ə bu. Ɨ mbɨə yènə̀ ghàə̀ ni mbɨ berɨ ne bə̂d.

³ À yɨə mbǎ nɨ mbɨ ne ɨchî rəsìʼ. Əzwî ə zɨə wèèrɨ̀ əwa ni tɨ wumnɨ ə Ŋwiə̀. Tɨ̀ wɨə ghaʼ ɨchî nɨ tɨ̀ yeʼ ənɨ ɨfɔtɨ mbɨ Kristo Yeso əne chəi tɨə zɨ̀ ta fîŋ ənɨ ɨnû mbe nɨ bə̂d mɨ̀sɔŋɨchù ə ghɨ̀ə̀,

⁴ ka à bè yeʼi ni mə berɨ əton nɨ zɨ fîŋ ənɨ ɨnû mbe nɨ bə̂d mɨ̀sɔŋɨchù ə ghɨ̀ə̀. Wə̀d mɔʼɔ mɨ kɔndɨ ni tə berɨ əton nɨ zɨ fîŋ ənɨ ɨnû mbe nɨ bə̂d mɨ̀sɔŋɨchù ə ghɨ̀ə̀, njɨ mə berɨ chè əməd.

⁵ Mbɨ nyaʼa nè əmɨ ənɨ mə̀ nyaʼa ɨni famɨ. Mɨ mbǎʼ mbɨ mɨ nɨŋ yɨə nyaʼə mɨ̀Izre rɨŋga ɨnəbɨ Benjamìn, əne mɔ̌ yɨə kàŋə̀ wə̀d Hibrù rəsìʼ. Ɨ beenɨ əbɔʼ rɨkə, mə yɨ rɨŋga ɨfɔtɨ mɨ̀Farisiî.

⁶ Ɨ zɨ ətu ənɨ ənû ə mɔʼɔ, mə wɨə nyaʼə nwèndɨ̀ rɨkyerɨ-ɨwu bə̂d Kristo. Ɨ təm kùʼnɨ̀ ɨchî nɨ rɨkə chwiə, chəi bə̂d kweʼ ghà ənû rɨbɔ̀ŋ ɨmbə̀ʼ əmɨ.

⁷ Mə nyaʼa kɔndɨ ni mə we tɨ̀ mə jɨg njìm rɨ nɨ ɨnû mbɔ̂, àyɨə tɨ̀nîn mə fə zə ni mbɨ yɨ ɨnimɨ. Mbɨ yɨ ɨnimɨ ɨmbə̀ʼ ɨ̀chɔ̀m we nɨ Kristo ghɨ ənɨ ə num.

⁸ Təsìʼ nɨ yeʼ əŋgu yɨ ni ɨnû jìm yɨ ɨnimɨ ənɨ mə mɨg mbɨ ənû ə kyeŋ ze nɨ bɔŋɨ chè. Ənû ə kyeŋ ze yɨ nɨ kyerɨ ə Kristo Yeso wum Ə̀nùŋɨ̀sɨg. Mə fə nim ɨnû mbe jìm ɨmbə̀ʼ ə Kristo Yeso. Mə fə zə ni ɨnû mbe jìm yɨ ɨnyɔrɨ, ɨmbə̀ʼ mə chubɨ mbɨ Kristo

⁹ əne fɔtɨ sɨ ənû ə mɔʼ mbɨ məd. Chəi mə̀ təm kùʼnɨ̀ ɨmbə̀ʼ ɨghəm nɨ mɨə ghɨ̀ ɨnû mbe nɨ yeʼ ɨŋga rɨkə. Mə təm kuʼnɨ ənjìm ɨchî nɨ mə̀ nuŋ fîŋ ɨgun ə Kristo. Ŋwìə̀ fə ghɨ̀ ni mə təm kùʼnɨ̀ ənjìm ɨchî nɨ mə̀ nuŋ fîŋ ɨgun ə Kristo.

¹⁰ Mə wɨə kəb kyerɨ ə Kristo. Mə wɨə bə̀ kəb kyerɨ ɨka we nɨ Kristo nyaʼa berɨ ənɨ wɨ̀ nyaʼa zwemə. Mə wɨə kə̀b zə ŋgəʼ ɨchî nɨ wɨ̀ nyaʼa zə, bə̀ kə̀b kwɨ ɨchî nɨ wɨ̀ nyaʼa bə kwɨ

¹¹ ɨmbə̀ʼ ɨchî mɨ chwiə, mə bə̀ zwemə.

Ənû nɨ kywɨ ənywɨ ɨmbə̀ʼ berɨ ɨneʼe

¹² Chəi mə̀ gha ni mə fə berɨ ɨnû mbɔ̂ jìm, kɨ̀ ni mə fə bɔ̀ŋ màànɨ̀, àyɨə mə wɨə kywɨ ənywɨ ɨmbə̀ʼ berɨ mbɨwən. Kristo Yeso nyaʼa ghɨ ni mə̀ yeʼ wə̀d məd ɨmbə̀ʼ berɨ ɨnû mbɔ̂ jìm.

¹³ Mbɨ bɔŋgɔb, chəi mə̀ gha ni mə fə berɨ mbɨwən, àyɨə ənû ə mɔʼ nɨ mə ghɨ yɨ ni: mə fə neb ɨnû mbe nɨ fə che, əne mə wɨə kywɨ ənywɨ ɨmbə̀ʼ beenɨ əbɔʼ mbe nɨ yeʼ ɨmbì.

¹⁴ Mə wɨə kywɨ ənywɨ wò pe ənɨ ɨnwǐ ɨmbə̀ʼ berɨ ɨneʼe we nɨ Ŋwìə̀ che ənjìm ə Kristo Yeso nuŋ ɨ num ɨkaŋ.

¹⁵ Mba mɨjìm mbe nɨ yeʼ bə̂d Kristo nɨ fə kaanɨ berɨ nuŋ ta rɨkɔndɨ ənɨ wɨ mɔʼ ɨmbə̀ʼ ɨnû mbɔ̂. Àyɨə mbə mɨ berɨ tɨkɔndɨ cherə, Ŋwìə̀ bɨrɨ ghɨ ni zɨə zeŋ ɨ nən.

¹⁶ Àmei ni tɨ̀ yim ɨnû mbe nɨ tɨ̀ nyaʼa fə be kyerɨ.

¹⁷ Mbɨ bɔŋgɔb, mbə̀ mɨg əmɨ ənɨ ɨnû mbe nɨ mɨə ghɨ̀ə̀. Mbə nɨŋ ənweenɨ rɨ ənɨ bə̂d mbe nɨə ghɨ̀ ɨnû mbe nɨ tɨ̀ nyaʼə ghɨ̀ə̀.

¹⁸ Mə nyaʼa fə ghà ɨ nən ɨghəm nɔnɔʼ, əne mə wɨə bə̀ yɨə ghà ɨ nən tɨ̀nîn mbɨ mɨsɨ əghə ni bə̂d mɨ̀nɔnɔʼ mbɨ əŋgu nɨə chub ɨghabɨ ə bə̂d pə̀n Kristo ɨchî nɨ chəi mbɨə ben nɨ zu əton nɨ wɨ̀ nyaʼa kwɨ əzed ə baʼnɨ.

¹⁹ Bə̂d mbɔ̂ bɨrɨ nwì ɨŋga ɨwid rɨ nìmə, əne ŋwìə̀ mɨ̀mə̌d yɨ ɨghɨ mbe nɨ nyamnyod tɨ mɨ̀mə̌d ə feenɨə. Ɨ mbɨə ghaʼə ɨmbə̀ʼ ɨnû mbe nɨ njɨ ɨtu mɨ̀mə̌d kəʼ nìd ɨmbə̀ʼ mbɨwən. Ɨ mbɨə kɔndɨə àmei ɨnû rɨŋga ɨsɨg.

²⁰ À yeʼ ɨmbə̀ʼ əwa, a əbeŋ yɨ ɨkaŋ. Tɨ̀ wɨə wòmə̀ ni Ə̀nùŋɨ̀sɨg Yeso Kristo, nɨ bɨrɨ chɨ̀ əwa rəŋgəʼ, bɨrɨ yeʼe rəŋgu.

²¹ Məd bɨrɨ kwepɨ ta nyamnyod tɔ̂ nɨə kwɨə, əne ghɨ̀ tɨ̀ berɨ nyamnyod ɨghabɨ zɨ məd ze nɨ wɨ̀ nyaʼa zwemə mbɨ zɨwən. Wɨ̀ bɨrɨ ghɨ əne ənjìm ɨka we nɨə ghɨ̀ ni wɨ̀ tumbɨ ɨghɨjìm.