Efesùs 6 - Meta’

Ənû nɨ de bɔn, dè mɨ̀mbǎʼ mbɨ mɨ̀nɨ̌ŋ

¹ Bɔn, mbə zuunɨ mbə mɨ̀mbǎʼ mbɨ mbə mɨ̀nɨ̌ŋ ɨmbə̀ʼ ɨghəm nɨ mbə̀ yeʼ ənɨ ɨfɔtɨ mbɨ Ə̀nùŋɨ̀sɨg. Ə ze yɨ ənû nɨ kuʼ ni mbə̀ ghɨ ə.

² Ə zɨ ɨŋga Ə̀ŋwàʼnɨ̀ ə Ŋwiə̀ ni, “Wumnɨ e mbǎʼ mbɨ e nɨ̌ŋ.” Wɔ̂ yɨ ɨkə rɨtu nɨ nwi mbɨ ənû nɨ Ŋwìə̀ kàʼi.

³ “Wumnɨ mɨ̀mə̌d ɨmbə̀ʼ mbe ɨnû yen ɨchî chɔ̀m, à chubɨ tàndɨ̀ ɨgwɨ ə si.”

⁴ Mɨ̀mbǎʼ, tɨ mbə̀ ghɨ ə ənû nɨ bɨrɨ ghɨ̀ ni mbə bɔn sə ɨtəm, àyɨə mbə dandɨ mɨ̀mə̌d bə̀ ghɨ ni mbɨ kwi əton rɨkə Ə̀nùŋɨ̀sɨg.

Ənû nɨ de ɨ̀bòʼò mbɨ mɨ̀mbǎʼ ə̀fàʼì

⁵ Ɨ̀bòʼò, mbə̀ zuunɨ mbə mɨ̀mbǎʼ ə̀fàʼì mbe rɨ ɨgwɨ ə si. Mbə̀ gundɨ ə si əmbɨ mɨ̀mə̌d bə̀ wumnɨ mɨ̀mə̌d. Mbə̀ ghɨ əne ənɨ ə fîŋ nɨ zeŋɨ ɨghabɨ ni mbə mbɨə wumnɨ ə yeʼ ə Kristo.

⁶ Mbə ghɨ əne, kaʼ àmei ənɨ mbɨə nèŋ əwən, kɨ̀ ni mbɨ ghaʼ ə̀fàʼì ze nɨ mbə̀ə fàʼə̀. Mbə̀ faʼ ənɨ tə fîŋ rɨjìm ɨghabɨ ni mbə̀ yɨ ɨ̀bòʼò Kristo, nɨə ghɨ̀ ɨnû mbe nɨ Ŋwiə̀ kəbɨ.

⁷ Mbə faʼ ənɨ ə fîŋ chɔ̀m ɨghabɨ ni mbə mbɨə fàʼ yeʼ əmbɨ Ə̀nùŋɨ̀sɨg, kaʼi əmbɨ ə bə̂d.

⁸ Mbə kyerɨ ni tɨ mɨ ghɨ̀ ɨ̀chɔ̀m mɔʼɔ, Ə̀nùŋɨ̀sɨg bɨrɨ chɔʼ a ə̀fàʼì, kɨ̀ tɨ kɨ ɨ̀bòʼò kɨ̀ bə̂d nɨ yeʼ ənɨ ə ɨghəm.

⁹ Mɨ̀mbǎʼ ə̀fàʼì, mbə bə ghɨ̀ əndəŋ əndəŋ mbɨ mbə ɨ̀bòʼò. Tɨ mbə̀ kaʼ ə ni mbə bɨrɨ chə mɨ̀mə̌d. Mbə kyerɨ ni mbə̀n mɨjìm berɨ Mbǎʼ ə̀fàʼì mɔʼ nɨ yeʼ ɨkaŋ. Chəi məd ə ghɨ̀ ɨghə.

Ɨghɨ bid Ŋwiə̀ jìm

¹⁰ Ənû ze nɨ mə bɨrɨ sɨ nwìə̀ gha ɨ nən yɨ ni: Mbə̀ chub ənɨ ɨfɔtɨ mbɨ Ə̀nùŋɨ̀sɨg ɨmbə̀ʼ ɨkǎ məd we nɨ che ɨka jìm we tɨ̀ wɨ ghɨ̀ tə fîŋ kàànɨ̀.

¹¹ Mbə̀ zɨ ɨghɨ bid Ŋwiə̀ ɨmbə̀ʼ mbə berɨ ɨkǎ təm kən ə ɨnyod tɨ ənɨ mɨnaŋ Debɨ̀rə̀,

¹² ɨmbə̀ʼ ɨghəm nɨ chəi tɨə zɔ̀ŋə̀ mbɨə bə̂d pə̀n nɨ yeʼ bə̂d mɨ̀sɔŋɨchù. Tɨ̀ wɨə zɔ̀ŋə̀ yeʼ ɨzwî ka ka mbe nɨ yeʼ ɨkaŋ mbɨ mɨfɔ̂n mɨ̀mə̌d. Tɨ̀ wɨə zɔ̀ŋ ɨzwî ka ka mbe nɨ yeʼ ɨŋga ɨsɨ firɨ mbɔ̂ nɨ yeʼ ɨŋga ɨsɨg tɨ̀nîn. Tɨ̀ wɨə bə̀ zɔ̀ŋ ɨzwî rɨbɔ̀ŋ mbe nɨ yeʼ ɨŋga ɨfə.

¹³ Əne mbə̀ zɨ ɨghɨ bid Ŋwiə̀ jìm ɨmbə̀ʼ əni rɨbɔ̀ŋ ze ə mɨ yeʼe, mbə təm kàànɨ̀. Mbə̀ nɨə fə ghɨ ɨnû jìm, mbə kɨrɨ təm kàànɨ̀.

¹⁴ Əne mbə̀ təm kàànɨ̀, kod ɨnû rəsìʼ ənɨ ə ɨkyerɨ ɨghabɨ ni à yɨ ɨ̀kɔ̀bɨ̀. Mbə̀ zɨ ənû nɨ təm kùʼnɨ̀ ɨfě Ŋwiə̀ ɨgwɨ nən ɨghabɨ ni à yɨə parɨwa ətənɨ.

¹⁵ Mbə̀ tekɨ ɨnyod gha ɨkə̂n chɔ̀m we nɨə ghɨ̀ ni bə̂d chub ənɨ əbɔrəbɔd àmei ɨchî nɨ bə̂d mbe nɨə tekɨ ɨnyod ɨ wo zɔ̀ŋ ə zɨ ɨtabɨ ənɨ mbə ɨwu.

¹⁶ Ɨ yi əbɔʼ ɨnû mbɔ̂ jìm, mbə̀ nɨŋ ɨchî nɨ mbə̀ nuŋ fîŋ ɨgun ə Kristo ɨghabɨ ni à yɨ ə̀gùʼ ə bid ni mbə mbe tɨ̀ mbə nɨŋ nimnɨ ɨwid we nɨə berɨə tɨ ənɨ ə kyed te nɨ wə̀d rɨ̀bɔ̀ŋ tumɨ.

¹⁷ Mbə̀ nɨŋ ɨchî nɨ Ŋwiə̀ fə chɨ̀ əwən rəŋgəʼ ɨghabɨ ni à yɨ ɨdəm ətənɨ nɨ kən ətu. Mbə̀ bə̀ nɨŋ ɨŋgam Ŋwìə̀ ɨghabɨ ni à yɨ ɨbi bid nɨ Əzwî ə nàʼə̀.

¹⁸ Mbə̀ kɔŋgɨ ə Ŋwiə̀ ənɨ mɨ̀nyùmə̀ jìm bə̀ fɔrɨ ənɨ mbə̀ə ghɨ̀ ɨnû jìm. Mbə̀ ghɨ əne ɨchî nɨ Əzwî ə naʼ ɨka ɨ nən. Əne mbə̀ chub ɨkyèʼe. Tɨ mbə̀ bɔd ə nɨ kɔŋgɨ ə Ŋwiə̀ ɨgwɨ ə bə̂d məd mɨjìm.

¹⁹ Mbə̀ kɔŋgɨ ə Ŋwiə̀ ɨgwɨ num bə, ni Ŋwìə̀ naʼ ɨŋgam ɨ num ənɨ mɨə ghàmə̀, ɨmbə̀ʼ mə̀ ghàm mbɨ fîŋ nɨ kaanɨ əne ghɨ̀ bə̂d kyerɨ ənû ze nɨ yeʼ ənə̀mə ɨmbə̀ʼ ɨkə̂n chɔ̀m.

²⁰ Mə wɨ ə nəb ndəŋ ɨmbə̀ʼ ɨghəm nɨ mə̀ təm ənɨ ɨkum Yeso Kristo. Mbə̀ kɔŋgɨ ə Ŋwiə̀ ni mə̀ gha ɨkə̂n we mbɨ fîŋ nɨ kǎ, ɨchî nɨ mə̀ kaŋ berɨ nɨ ghàm.

Ə̀chàʼrɨ̀ nɨ sɨ nwìə̀

²¹ Taikikùs, nɨ yeʼ aŋgɔb nɨ mə̀ ghaʼi kwàʼ rɨŋgəʼ, nɨ bə yeʼ wə̀d nɨə fàʼ əmbɨ Ə̀nùŋɨ̀sɨg ənɨ i fîŋ jìm, bɨrɨ gha ɨnû jìm ɨmbə̀ʼ əmɨ ɨ nən ɨmbə̀ʼ mbə̀ kyerɨ ɨchî nɨ mə yeʼə bə̀ kyerɨ əghɨ ze nɨ mɨə ghɨ̀ə̀.

²² Mə wɨə tom əməd əsɨ nən ɨmbə̀ʼ ənû zɔ̂ ni mbə̀ kyerɨ ɨchî nɨ tɨ̀ yeʼə. Mə wɨə bə̀ tom əməd ni wɨ̀ timbɨ əwən.

²³ Ŋwiə̀ Mbǎʼ, mbɨ Ə̀nùŋɨ̀sɨg Yeso Kristo naʼ əbɔrəbɔd, nàʼ ɨghaʼi bə̀ nàʼ ɨbenɨ əmbɨ ə bɔŋgɔb mɨjìm.

²⁴ Ŋwìə̀ ghɨ ɨ̀chɔ̀m ənɨ ə bə̂d mɨjìm mbe nɨ ghaʼ a Ə̀nùŋɨ̀sɨg Yeso Kristo mbɨ ɨkwɨ ɨghaʼi we nɨ ka wɨ bɨrɨ nɔ mi i.