Efesùs 4 - Meta’

Bə̂d Kristo yɨə nyamnyod mɔʼ

¹ Mɔ̌, nɨ mə̀ yeʼ wə̀d ndəŋ ɨmbə̀ʼ ɨchî nɨ mɨə fàʼ əmbɨ Ə̀nùŋɨ̀sɨg, wɨə buʼ ɨbɔ ɨ nən ni mbə̀ chub ɨchî nɨ kuʼnɨ, nɨ yeʼ ɨchî we nɨ Ŋwiə̀ tɔŋ əwən ni mbə̀ chubɨ.

² Mbə̀ swi ɨnyod bə̀ bɔtɨ ɨnyod. Mbə̀ yim fîŋ bə̀ chwiə ni mbə ghaʼ mbə bɔŋgɔb ɨchî nɨ mbə̀ə chì ɨnû mɔʼɔ mbe nɨ mbɨ ghɨ ənɨ ə nən.

³ Mbə ghɨ ɨnû jìm ɨmbə̀ʼ nuŋ ɨfɔtɨ we nɨ Əzwî ə nàʼ ənjìm əbɔrəbɔd ze nɨ kod əwən fɔtɨ.

⁴ Nyamnyod ze mɔʼ, Əzwî ə bə̀ ə mɔʼ. Ənû ze nɨ Ŋwiə̀ nyaʼa tɔŋ əwən ni mbə̀ nuŋ ɨkɔndɨ ɨ wòm mɨə bə̀ mei ə mɔʼ.

⁵ Ə̀nùŋɨ̀sɨg we mɔʼ, ɨbenɨ we mɔʼ, ənû nɨ nɨŋ mɨnib ze ə mɔʼ.

⁶ Ŋwiə̀ mei we mɔʼ nɨ yeʼ Mbǎʼ ɨgwɨ mbi bə̂d mɨjìm. Məd wɨə tùmbɨ̀ə̀ mbi bə̂d mɨjìm. Məd wɨə fàʼə̀ mbi ɨ̀fàʼì ənjìm mbi bə̂d mɨjìm. Məd wɨ ɨŋga mbi bə̂d mɨjìm ənɨ Əzwî.

⁷ Àyɨə Kristo fə ghɨ̀ ɨ̀chɔ̀m ənɨ ə na, nàʼ ɨneʼe əmbɨ wə̀d mɔʼ mɔʼ ni wɨ̀ faʼ əŋgu àmei ɨchî nɨ wɨ̀ kəbɨ.

⁸ À yɨ əton nɨ mbɨ ŋwàʼnɨ̀ ɨŋga Ə̀ŋwàʼnɨ̀ ə Ŋwiə̀ ni, “Ənɨ wɨ̀ nyaʼa wo ɨkaŋ, wɨ̀ nyaʼa nɨŋ bə̂d mbe nɨ wɨ̀ nyaʼa gywɨ̀ wò mbɨ mɨ̀mə̌d. Wɨ̀ nyaʼa bə̀ nàʼ mɨneʼe əmbɨ ə bə̂d.”

⁹ Mbɨ kɨ mɨ ŋwàʼnɨ̀ ni, “Wɨ̀ nyaʼa wo ɨkaŋ,” əne yɨ mbɨ gha ni ye ə? Əne yɨ mbɨ gha ni wɨ̀ nyaʼa bə̀ swiʼi wò ɨŋga ɨsɨ mbe rɨ əton.

¹⁰ We nɨ nyaʼa swiʼi yɨə bə we nɨ nyaʼa wo chè rɨkaŋ jìm. Wɨ̀ nyaʼa wò ɨmbə̀ʼ ghɨ ni ɨghɨjìm bɔŋ ə màànɨ̀.

¹¹ À yɨə məd nyaʼa naʼ mɨneʼe əmbɨ ə bə̂d; wɨ̀ nyaʼa ghɨ̀ mbɨ mɔʼɔ ənɨ ə bə̂d tom, ghɨ̀ mbɨ mɔʼɔ ənɨ ə bə̂d ɨ̀kə̀n, ghɨ̀ mbɨ mɔʼɔ ənɨ ə bə̂d mbe nɨə jàŋ ɨkə̂n chɔ̀m, ghɨ̀ mbɨ mɔʼɔ ənɨ ə bə̂d nɨə nəŋgɨə bə̀ chwi ɨnû əmbɨ ə bə̂d Ŋwiə̀.

¹² Wɨ̀ nyaʼa ghɨ əne, ɨ tekɨ bə̂d Ŋwiə̀ ni mbɨ faʼ ɨ bɔ, ɨmbə̀ʼ nyamnyod Kristo kwi

¹³ wò pè ənɨ mba mɨjìm bɨrɨ fɔtɨ sɨ wə̀d mɔʼ ənɨ a ɨbenɨ, bə jeŋgɨ kyerɨ Wan Ŋwìə̀, bə̀ kwi kuʼ sɨ ɨghabɨ ə Kristo.

¹⁴ Əne tɨ rɨ̀ yeʼ a ɨghabɨ ə bɔn kwa nɨə ben ɨnû jìm mbe nɨ bə̂d mɨghab ə chwi əmbɨ mɨ̀mə̌d. Bə̂d mɨghab mbɔ̂ mbɨə tiə mɨghab tambɨə bə̂d ɨmbə̀ʼ mbɨ febə.

¹⁵ Àyɨə ənɨ tɨə ghà rəsìʼ mbɨ ɨghaʼi, tɨ̀ berɨ kwi ənɨ mɨnə̂njɨ̀ jìm sɨ ɨghabɨ ə Kristo, nɨ yeʼ ətu.

¹⁶ À yɨ əton məd nɨ ɨsɨ ɨnyod jìm fɔtɨ ghɨ̀ nyamnyod mɔʼ. Tɨnyê tɨə ghɨ̀ ni ɨsɨ ɨnyod jìm fɔtɨ. Əsɨ ɨnyod ə mɔʼ ə mɨ yeʼə fàʼ ɨchî chɔ̀m, ɨghaʼi bɨrɨ ghɨ ni ɨnyod jìm sɨə kwiə wò ɨmbì.

Bə̂d mɨ yeʼ ənɨ ɨfɔtɨ mbɨ Kristo, mbɨ bɨrɨ jɨg ɨ̀tènɨ̀ fi

¹⁷ Mə wɨə ghà ɨ nən kwàʼ rɨkǎ ənɨ ɨkum Ə̀nùŋɨ̀sɨg ni tɨ mbɨ rəbə chub ə ɨchî nɨ bə̂d mbe nɨ kaʼi mɨ̀Jû ə chubə. Tɨkɔndɨ tɨ mɨ̀mə̌d yɨ ətu ə̀kǒ.

¹⁸ Ɨ mbɨə kɨrɨ ɨŋga ɨzimɨ. Chəi mbɨ berɨ ənû ə mɔʼɔ ɨŋga ɨ̀tènɨ̀ we nɨ Ŋwìə̀ ə nàʼə̀, ɨmbə̀ʼ ɨghəm nɨ chəi ɨtu fîŋ mɨ̀mə̌d ben mbɨ kyerɨ ənû.

¹⁹ Chəi ətu mɨ̀mə̌d ə wɨrɨə nìrə̀. Mbɨ fə naʼ ə ɨnyod əmbɨ ɨnû rɨbɔ̀ŋ. Ɨ mbɨə bə̀ kə̀b nɨ ghɨ tɨkwɨrɨ ɨfabrɨ-ɨnû jìm.

²⁰ Kaʼi ənû ze nɨ mbə̀ nyaʼa kwembɨ ɨmbə̀ʼ ə Kristo ə ze!

²¹ Mə kyerɨ ni mbə nyaʼa fə zu ɨmbə̀ʼ əməd. Mə bə̀ kyerɨ ni mbɨ nyaʼa bə̀ chwi ɨnû ɨ nən ɨmbə̀ʼ əməd nɨ yeʼ ɨnû rəsìʼ ɨmbə̀ʼ ə Yeso.

²² Mbɨ nyaʼa chwi ɨ nən ni mbə̀ waʼ nyamnyod ənun, əne yɨ ɨnû ənun mbe nɨ mbə̀ nyaʼə ghɨ̀ə̀. Ɨnû ənun mbe yɨ tɨfeenɨ rɨbɔ̀ŋ te nɨ nyaʼə tambɨ əwən bə̀ chəkɨ əwən.

²³ Mbə saŋə ni Ŋwìə̀ ghɨ tə fîŋ bə̀ ghɨ̀ tə rɨkɔndɨ beŋ ənɨ rɨ fi,

²⁴ bə̀ ghɨ̀ ni mbə̀ zɨ ɨnyod fi we nɨ mbɨ nyaʼa tekɨ ni wɨ̀ yeʼ ɨghabɨ ə Ŋwiə̀, ɨchî nɨ wɨə ghɨ̀ ɨnû rəsìʼ mbe nɨ kùʼnɨ̀, bə yeʼ mbe nɨ zeŋɨ.

²⁵ Əne tɨ mbə ghàə̀ mɨghab: Wə̀d mɔʼ mɔʼ rəbɔʼ na gha àmei wi rəsìʼ əmbɨ mbi bɔŋgɔb, ɨmbə̀ʼ ɨghəm nɨ mba mɨ̀jìm yɨə sɨ ɨsɨ ɨnyod rɨ ənɨ ə nyamnyod mɔʼ.

²⁶ Mbə mɨ sə ɨtəm, tɨ mbə ben ə ni ɨsə ɨtəm we ghɨ ni mbə̀ ghɨ ənû rɨbɔ̀ŋ. Tɨ mbə̀ ben ə ni nyùmə̀ nyɨ ɨkòb nɨ mbə̀ə kɨrɨ sə ɨtəm.

²⁷ Tɨ mbə̀ tɔ naʼ ə əpan əmbɨ Debɨ̀rə̀.

²⁸ Tɨ wə̀d we nɨə jɨə rəbə jɨ i. Wɨ̀ kɔ faʼ ənɨ mbi ɨbɔ, berɨ ɨghɨ ɨchî nɨ kuʼnɨ, ɨmbə̀ʼ bɨ weerɨ bə̂d ɨkwaŋ.

²⁹ Tɨ ɨŋgam rɨbɔ̀ŋ mɔʼɔ jwɨ i rɨŋga mbə mɨchû. Mbə̀ gha àmei ɨnû mbe nɨ bɔŋɨ, nɨ tɨ̀ mbɨ weerɨ bə̂d ɨchî nɨ mbɨ kəbɨ. Ənû mbe nɨ mbə̀ə ghàə̀ berɨ ghɨ ni bə̂d mbe nɨə zuə zə ɨ̀chɔ̀m.

³⁰ Tɨ mbə̀ ghɨ ə ni Əzwî ə Ŋwiə̀ ə Zeŋɨ ə kənə. Əzwî ə Zeŋɨ ze yɨ ənweenɨ nɨ chwi ni mbə yɨə bə̂d Ŋwiə̀ wò pè əni ze nɨ Ŋwìə̀ bɨrɨ choʼ mbə ɨtu.

³¹ Mbə̀ waʼ mɨŋgam jìm mbe nɨə tɔbə fîŋ rɨ bə̂d, waʼ ənû nɨ chɔb, waʼ ənû nɨ sə ɨtəm, waʼ ənû nɨ taŋ, waʼ ənû nɨ ghambɨ wə̀d, bə̀ waʼ ənû nɨ ghɨ tɨkwɨrɨ ɨbə jìm.

³² Àyɨə mbə ghɨ ɨ̀chɔ̀m ənɨ mbə bɔŋgɔb, berɨ ɨbɔtɨ fîŋ bə̀ waʼ ɨnû rɨbɔ̀ŋ mbə bɔŋgɔb, ɨchî nɨ Ŋwiə̀ fə che ənjìm ə Kristo waʼ mba ɨnû rɨbɔ̀ŋ.