Efesùs 2 - Meta’

Ɨ nɔʼ rɨ ənɨ ɨvɨ nyɨ ɨŋga ɨ̀tènɨ̀

¹ Mbə nyaʼa fə kwɨ ɨmbə̀ʼ tə rɨ̀gùrɨ-ɨnû. Mbə fə bə̀ kwɨ ɨmbə̀ʼ mbə ɨnû rɨbɔ̀ŋ.

² Mbə mbɨə nyaʼə ghɨ̀ ɨnû rɨbɔ̀ŋ mbe ɨchî nɨ mbə̀ nyaʼə beenɨ əbɔʼ ɨnû rɨŋga ɨsɨg, bə̀ beenɨ əbɔʼ wə̀d we nɨə tùmbɨ̀ ɨzwî mbe nɨ yeʼ ɨŋga ɨfə, nɨ yeʼ ɨzwî mbe nɨə fàʼ rɨ̀nîn ɨŋga bə̂d mbe nɨ ghɨ̀ rɨ̀zuə̀ əmbɨ ə Ŋwiə̀.

³ Mba mɨjìm kweʼ yeʼ ɨghabɨ mɨ̀mə̌d ɨchî nɨ tɨ̀ nyaʼə feenɨ ɨghɨ mbe nɨ ta nyamnyod nyaʼə kə̀bə̀. Tɨ̀ wɨə nyaʼə bə̀ beenɨ əbɔʼ ɨghɨ mbe nɨ ta nyamnyod fɔrɨ ta rɨkɔndɨ nyaʼə bə̀ kə̀bə̀. Ɨ beenɨ əbɔʼ mba mɨchî, Ŋwìə̀ nyaʼa sə ɨtəm əbɔʼ na ɨchî nɨ wɨ̀ nyaʼa sə əbɔʼ wə̀d jìm.

⁴ Àyɨə Ŋwìə̀ we nɨə dììrɨ̀ bə̂d kwàʼ ɨchî chɔ̀m, nɨə bə̀ ghaʼ əwa kwàʼ rɨŋgəʼ ghɨ ni,

⁵ ka àbei yeʼi ni ta rɨ̀gùrɨ-ɨnû nyaʼa fə zwiirɨ əwa, wɨ̀ nyaʼa ghɨ ni tɨ̀ chub ɨkǎ ɨchî nɨ tɨ̀ yeʼ ənɨ ɨfɔtɨ mbɨ Kristo. À yɨ ənjìm ɨ̀chɔ̀m Ŋwiə̀ nɨ mbə̀ fə jwɨ̀ rəŋgəʼ.

⁶ Ŋwiə̀ nyaʼa zwemnɨ əwa mbɨ Kristo, ɨmbə̀ʼ tɨ̀ chubɨ mbɨ məd ɨŋga ɨsɨ mbe rɨkaŋ ɨchî nɨ tɨ̀ yeʼ ənɨ ɨfɔtɨ mbɨ Kristo Yeso.

⁷ Wɨ̀ nyaʼa ghɨ̀ əne, ɨmbə̀ʼ ənɨ nyùmə̀ we nɨə yeʼe, məd we tɨ wɨ̀ chwiə ni chəi ənɨ tɨ mbɨ mɨg ɨ̀chɔ̀m məd we nɨ kaŋ nɔʼ, ɨchî nɨ wɨə ghɨ̀ ɨ̀chɔ̀m we ənɨ ə na ənjìm ə Kristo Yeso.

⁸ Ɨchî nɨ mbə̀ benɨ, Ŋwìə̀ fə ghɨ̀ ɨ̀chɔ̀m ənɨ nən chɨ̀ əwən rəŋgəʼ. Kaʼi mbə̀nə ghɨ ənû zɔ̂. À yɨ ɨneʼe nɨ nɔʼ rɨ əmbɨ ə Ŋwiə̀.

⁹ Chəi Ŋwìə̀ nyaʼa chɨ əwən rəŋgəʼ ɨmbə̀ʼ ɨchî nɨ mbə̀ nyaʼa ghɨ ənû ə mɔʼɔ, əne tɨ wə̀d mɔʼɔ goŋ i ɨgɔ̂.

¹⁰ Tɨ̀ yɨ əbɔ ə̀fàʼì ə Ŋwiə̀ nɨ wɨ̀ nyaʼa tekɨ ɨmbə̀ʼ tɨ chubɨ ənɨ ɨfɔtɨ mbɨ Kristo Yeso sɨə ghɨ̀ ɨnû chɔ̀m mbe nɨ Ŋwìə̀ nyaʼa fə be tekɨ rɨmbì ni tɨ̀ sɨə ghɨ̀ə̀.

Yeso Kristo fə ghɨ̀ bə̂d mɨjìm sɨə wə̀d mɔʼ

¹¹ Mbə̀ kɔndɨ ni à nyaʼa ənɨ ə nyùmə̀ mɔʼɔ, “Bə̂d mbe nɨ mbɨ nyaʼa ne mɨ̀mə̌d” mbɨə nyaʼə tɔŋə mbə̀n bə̂d mbe nɨ kaʼi bɔn tɔb si mɨ̀Jû ni, “Bə̂d nɨ chəi mbɨ ne mɨ̀mə̌d,” nɨ yeʼ ɨkwɨ we nɨ bə̂d ə ghɨ̀ ənɨ ɨbɔ.

¹² À nyaʼa ənɨ ə nyùmə̀ we, chəi mbə̀ nyaʼa ənɨ ənû ə mɔʼ mbɨ Kristo, chəi mbə̀ nyaʼa əbɔʼ ɨnəbɨ mɨ̀Izre we nɨ Ŋwìə̀ nyaʼa chɔʼɔ, chəi mbə̀ nyaʼa kyerɨ ɨnû mbe nɨ Ŋwìə̀ nyaʼa san tɨso kàʼ əmbɨ mɨ̀mə̌d. Mbə mbɨə nyaʼa ɨŋga ɨsɨg, àyɨə chəi mbə̀ nyaʼa nuŋ rɨkɔndɨ ɨgwɨ ɨghɨ mbe nɨ mbɨ nyaʼə wòmə̀, chəi mbə̀ nyaʼa be kyerɨ ə Ŋwiə̀.

¹³ Àyɨə tɨ̀nîn, ənjìm ənəm ze nɨ Kristo nyaʼa chəmnɨ, mbɨ fə nɨŋ mbə̀n mbe nɨ nyaʼa kweʼ əsa əgha rɨ ənɨ ə Ŋwiə̀, mbə tiinɨ ɨban məd ɨchî nɨ mbə̀ fə sɨ ənɨ ɨfɔtɨ mbɨ Kristo Yeso.

¹⁴ Məd ziə nyaʼa ghɨ̀ əbɔrəbɔd ə nyɨ əkaʼ mɨ̀Jû mbɨ ə bə̂d mbe nɨ kaʼi mɨ̀Jû ɨchî nɨ wɨ̀ nyaʼa fɔtɨ əwa ənɨ mbɨ mɔʼ. Əne wɨ̀ fə swe əkən ze nɨ nyaʼə ghabrɨ əwa, əne yɨə pə̀n ze nɨ nyaʼa əkaʼ na.

¹⁵ Ənɨ wɨ̀ nyaʼa kwɨ əzed ə baʼnɨ, wɨ̀ nyaʼa nimnɨ tɨkə rɨ Mose bə̀ nimnɨ ɨnû mbe nɨ tɨkə nyaʼə kə̀bə̀ ni bə̂d ghɨ ə. Wɨ̀ nyaʼa ghɨ əne ɨmbə̀ʼ nɨŋ tɨnəbɨ tɔ rɨ̀be tekɨ ɨnəbɨ fi mɔʼ. Əze ə nyaʼa ghɨ̀ ni əbɔrəbɔd ə nyɨ əkaʼ tɨnəbɨ tɔ̂ rɨ̀be.

¹⁶ Kristo nyaʼa kwɨ əzed ə baʼnɨ fɔtɨ tɨnəbɨ tɔ̂ rɨ̀be ənɨ nyamnyod mɔʼ. Əze ə nyaʼa maanɨ taŋ mɨ̀mə̌d əne ghɨ̀ mbɨ wò əmbɨ ə Ŋwiə̀. Zɨə nyaʼa ghɨ̀ ni ənû ze nɨ mbɨ nyaʼə chɔb ɨmbə̀ʼ əzɨ əwən ə mi ə.

¹⁷ Wɨ̀ nyaʼa yeʼe pè ghà ɨkə̂n chɔ̀m ɨmbə̀ʼ əbɔrəbɔd əmbɨ mbə̀n mbe nɨ nyaʼa əsa əgha rɨ ənɨ ə Ŋwiə̀. Wɨ̀ nyaʼa bə̀ ghà əmbɨ mɨ̀Jû mbe nɨ nyaʼa tiinɨ ɨban ə Ŋwiə̀.

¹⁸ À yɨə Kristo ghɨ ni mba mɨjìm, əne yɨ mɨ̀Jû mbɨ ə bə̂d nɨ kaʼi mɨ̀Jû, tɨ̀ berɨ ɨnə̂njɨ̀ nɨ wò əmbɨ ə Mbǎʼ ənjìm Əzwî ə Zeŋɨ.

¹⁹ Əne ka mbə yɨə wɨrɨ əwən bə̂d rɨ̀sɔ̀ʼɔ̀ mbɨ ɨ̀nɔ̀ʼɔ̀. Mbə yɨə sɨə bə̂d əbeŋ ə mɔʼ mbɨ ə bə̂d Ŋwiə̀. Mbə yɨə bə̀ ə bə̂d ɨŋga ɨnəbɨ Ŋwiə̀,

²⁰ nɨ mbɨ bɔm ɨgun əchɨ ze nɨ bə̂d tom Kristo mbɨ ə bə̂d ɨ̀kə̀n Ŋwiə̀ nyaʼa bɔmɨ. À yɨə Kristo Yeso ziə nɨ yeʼ ɨti rɨ ɨbu nəb.

²¹ Ənɨ ɨfɔtɨ mbɨ məd, nəb ze jìm fə sɨ ənɨ zɨ mɔʼ. Bə̂d mɨ̀nɔnɔʼ bɨrɨ yeʼe nyɨ ɨŋga zɨ kwi sɨə mbàn Ŋwìə̀ zeŋɨ.

²² Ənɨ ɨfɔtɨ mbɨ məd, ɨ mbɨə bə̀ bɔmə mbə̀n mbe nɨ kaʼi mɨ̀Jû ənɨ əsɨ ze nɨ Ŋwiə̀ nɨ yeʼ əzwî ə chub əŋgu.