3 Jɔn 1 - Meta’

Ə̀chàʼrɨ̀

¹ À yɨə mɔ̌, nɨ mə̀ yeʼ wə̀d nɨə cha ɨfetɨ bə̂d Kristo, ŋwaʼnɨ ə̀ŋwàʼnɨ̀ zɔ̂. Mə wɨə ŋwàʼnɨ̀ ɨ ne, àwɔ̀ Gayùs nɨ mə̀ ghaʼi kwàʼ rɨŋgəʼ. Mə kaŋ ghaʼ əwe ənɨ rəsìʼ.

² Wum aŋgɔb nɨ mə̀ ghaʼi kwàʼ rɨŋgəʼ, mə wɨə kɔ̀ŋgɨ̀ ə Ŋwiə̀ ni ɨnû jìm yen mbɨ ne kwàʼ ɨchî chɔ̀m. Mə wɨə bə̀ kɔ̀ŋgɨ̀ə̀ ni e ɨnyod kaanə ɨchî nɨ e fîŋ bə̀ kàànɨ̀.

³ Mə nyaʼa kàŋ ghaʼ əku ənɨ bɔŋgɔb mɔʼɔ nyaʼa yeʼe pè ghà ɨ num ɨmbə̀ʼ ɨchî nɨ àwɔ̀ ə beenɨ əbɔʼ rəsìʼ. Mə kyerɨ ni àwɔ̀ wɨə kàŋə̀ beenɨ əbɔʼ rəsìʼ we ɨghəm jìm.

⁴ Chəi ɨghaʼi cherə ɨŋga mɨ fîŋ nɨ che rɨ ənɨ ɨchî nɨ mə̀ zu ni mbɨ bɔn mbɨə beenɨ əbɔʼ rəsìʼ.

⁵ Wum aŋgɔb nɨ mə̀ ghaʼi kwàʼ rɨŋgəʼ, à wɨə kàŋə̀ fàʼ ənɨ e fîŋ jìm ənɨ àwɔ̀ ə ghɨ̀ ɨnû əmbɨ ə bə̂d Kristo, màànɨ̀ əmbɨ mbe nɨ yeʼ bə̂d rɨ̀sɔ̀ʼɔ̀.

⁶ Mbɨ fə ghà əmbɨ ɨfetɨ wɨ rɨ əgha ɨmbə̀ʼ ɨchî nɨ àwɔ̀ ə ghaʼə bə̂d. À bɨrɨ fə kàŋ ghɨ̀ ənû ə chɔ̀m əwù ze nɨ à naʼ ɨghɨ mbe nɨ mbɨ kəbɨ ənɨ mbɨə sɨə wɨrɨə wò ə. Əze ə bɨrɨ kaŋ bɔ̀ŋ əmbɨ ə Ŋwìə̀,

⁷ ɨmbə̀ʼ ɨghəm nɨ mbɨ fə jwɨ̀ ɨ wo fàʼ əmbɨ Kristo nɨ chəi mbɨ ben nɨ nɨŋ əghɨ ə mɔʼɔ rɨ əmbɨ ə bə̂d mbe nɨ chəi mbɨ kɨrɨ ben ə Kristo.

⁸ Əne tɨ̀ berɨ kəŋgɨ bə̂d ɨghabɨ mbɔ̂, ɨmbə̀ʼ tɨ̀ faʼ ɨnɔ̂n mbɨ mɨ̀mə̌d ɨchî nɨ tɨə ghà rəsìʼ ɨmbə̀ʼ Kristo.

Ɨnû Dìotrefès mbɨ əzɨ ə Dèmetriùs

⁹ Mə fə ŋwàʼnɨ̀ ənû ə mɔʼɔ əmbɨ ɨfetɨ bə̂d Kristo. Àyɨə chəi Dìotrefès, nɨə kɨə ghaʼ ənû nɨ che ɨmbì ənɨ ɨnû jìm, ben ni mə berɨ ɨka nɨ gha ənû ə mɔʼɔ.

¹⁰ Ənɨ mə̀ yeʼe, mə bɨrɨ ghɨ mbə̀ kyerɨ ɨnû jìm mbe nɨ wɨ̀ fə ghɨ̌, əne yɨ ɨnû rɨbɔ̀ŋ mbe nɨ wɨə ghà ɨmbə̀ʼ əwa. Ɨghabɨ ni chəi əze ə kɨrɨ kuʼ, chəi məd ə nɨŋə bɔŋgɔb əkwɨ ni əwù ze nɨ mbɨ yeʼe. Ɨ wɨə bə̀ təmnɨə bə̂d mbe nɨə kəb nɨŋ bɔŋgɔb mbɔ̂ əkwɨ nən. Mbɨ mɨ tɔ nɨŋ, wɨ̀ chɨ̀ mɨ̀mə̌d rɨŋga ɨfetɨ bə̂d Kristo.

¹¹ Wum aŋgɔb nɨ mə̀ ghaʼi kwàʼ rɨŋgəʼ, tɨrə̀ mɨ̀g e ənû rɨbɔ̀ŋ. Mɨg yeʼ ənû ə chɔ̀m. Wə̀d we nɨə ghɨ̀ ɨ̀chɔ̀m yɨə wə̀d Ŋwiə̀. Chəi wə̀d we nɨə ghɨ̀ ɨnû rɨbɔ̀ŋ kweʼ zə ə Ŋwiə̀.

¹² Wə̀d jìm wɨə ghà ɨnû chɔ̀m ɨmbə̀ʼ ə Dèmetriùs. Məd wɨə chub àmei ɨchî nɨ rəsìʼ we nɨ yeʼ ɨŋga Ə̀ŋwàʼnɨ̀ ə Ŋwiə̀ kəbɨ. Mba bə tɨ̀ bə̀ ben ni məd wɨə chub ɨchî nɨ rəsìʼ chwiə. Əne mbə̀ kyerɨ ni ənû ze nɨ tɨ̀ gha yɨ ənû rəsìʼ.

Ə̀chàʼrɨ̀ nɨ sɨ nwìə̀

¹³ Mə berɨ ɨnû nɔnɔʼ nɨ gha ɨ nən, àyɨə chəi mə kəb nɨ ŋwaʼnɨ ɨŋga ə̀ŋwàʼnɨ̀.

¹⁴ Mə kɔndɨ ni mə bɨrɨ zambɨ yeʼe zə əwe. Ənɨ mə̀ yeʼe, tɨ̀ bɨrɨ ghambɨ ɨnɔ̂n.

¹⁵ Ŋwìə̀ naʼ əbɔrəbɔd ɨ ne. Mbe mɨ̀sə̀ʼ mbe nɨ yeʼ əgha mbɨ chàʼrɨ̀ əwe. Bə chaʼrɨ mba mɨ̀sə̀ʼ ɨ mɔʼ mɔʼ.