2 Timotì 4 - Meta’

¹ Mə wɨə ghà ɨ ne ɨfě Ŋwiə̀ bə̀ fɔrɨ ɨfě Kristo Yeso we nɨ bɨrɨ saʼ bə̂d mbe nɨ yeʼ ɨka mbɨ mbe nɨ fə kwɨ, bə̀ gha ɨmbə̀ʼ ɨchî nɨ wɨ̀ bɨrɨ wɨrɨ yeʼe ɨ tumbɨ ɨsɨg ni:

² gha ɨŋgam Ŋwiə̀. Kɨ̀ bə̂d ghaʼ nɨ zu kɨ̀ chəi mbɨ ghaʼ nɨ zu, gha e gha. Mbɨ mɨ ghɨ ənû rɨbɔ̀ŋ, à gha əmbɨ mɨ̀mə̌d. Gham əbɔʼ mbe nɨə ghɨ̀ ɨnû rɨbɔ̀ŋ. Mbɨ mɨ ghɨ̀ ɨnû nɨ kuʼnɨ, à tìmbɨ̀ mɨ̀mə̌d. À berɨ yim fîŋ ənɨ à ghɨ̀ ɨnû mbɔ̂.

³ Nyùmə̀ wɨə yeʼe nɨ chəi bə̂d bɨrɨ ghaʼ nɨ zu ɨŋgam rəsìʼ. Mbɨ bɨrɨ fetɨ məchwiə̀-ɨnû ɨban mɨ̀mə̌d nɨ bɨrɨ gha ɨnû mbe nɨ ɨ̀tǒŋ mɨ̀mə̌d ə zòə̀ nɨ zu.

⁴ Mbɨ bɨrɨ zindɨ mbə ɨ̀tǒŋ nɨ zu ɨnû rəsìʼ. Əne mbɨ bɨrɨ bèŋ sɨə zwetɨə yeʼ tɨpoʼ əko.

⁵ À yeʼ ɨmbə̀ʼ əwe, àwɔ̀ Timotì, yimbɨ e ɨnyod ənɨ ənû jìm. Nyiʼ fîŋ ənɨ à zəə ŋgəʼ. À berɨ fàʼ ɨmbə̀ʼ zə ni bə̂d yeʼe əsɨ Kristo. Ghɨ ɨnû jìm mbe nɨ Ŋwìə̀ zɨ ɨŋga te rɨkyerɨ-ɨbɔ.

⁶ À yeʼ ɨmbə̀ʼ əmɨ, nyùmə̀ fə kuʼi nɨ mbɨ bɨrɨ naʼ əmɨ ənɨ əghɨ ə̀fà. Nyùmə̀ fə kùʼi nɨ mə̀ bɨrɨ saŋ ɨsɨg.

⁷ Mə fə kàŋ zɔ̀ŋ ɨchî chɔ̀m ɨchî nɨ mɨə fàʼ əmbɨ Kristo. Mə fə nòtɨ̀ wò pè ənɨ ɨnwǐ. Mə fə nùŋ mɨ fîŋ ɨgun ə Kristo wò pè ənɨ ɨnwǐ.

⁸ Əne Ə̀nùŋɨ̀sɨg we nɨə saʼə bə̂d ɨchî nɨ kuʼnɨ bɨrɨ naʼ əjwɨ-əgu ɨ num əni ze nɨ wɨ̀ bɨrɨ yeʼe ɨ saʼ ɨsɨg. Wɨ̀ bɨrɨ naʼ ɨmbə̀ʼ ɨghəm nɨ mə wɨə ghɨ̀ ɨnû nɨ kuʼnɨ. Chəi wɨ̀ bɨrɨ naʼ àmei ɨ num. Wɨ̀ bɨrɨ bɨ naʼ əmbɨ ə bə̂d mbe nɨə wòmə̀ ni wɨ̀ wɨrɨ yeʼe.

Ɨnû mbe nɨ Pɔ̂l kəbɨ ni Timotì ghɨ ɨ bɔ

⁹ Kywɨ ənywɨ zambɨ yeʼe əsɨ num,

¹⁰ ɨmbə̀ʼ ɨghəm nɨ Demàs fə waʼ əmɨ wo əwi ə Tèsàlonikà. Wɨ̀ fə wò əŋgu ɨmbə̀ʼ ɨghəm nɨ wɨ̀ ghaʼ ɨnû rɨŋga ɨsɨg wɔ̂. Kresèn fə wò ə Gàlesià. Taitùs fə bə̀ wò ə Dalmatià.

¹¹ Àmei Luk yeʼ əgha mbɨ num. Ənɨ àwɔ̀ ə yeʼe, nɨŋ ə Mak yeʼe mbɨ məd, ɨmbə̀ʼ ɨghəm nɨ wɨ̀ bɨrɨ weerɨ əmɨ ənɨ mɨ ə̀fàʼì.

¹² Mə fə tom ə Taikikùs ə Efesùs.

¹³ Ənɨ àwɔ̀ ə yeʼe, bə nɨŋ mɨ ngywɨ̌ maʼi ze nɨ mə nyaʼa nuŋ mbɨ Kapùs yeʼe mbɨ zɨwən. Mə nyaʼa nùŋ ngywɨ̌ ze ənɨ mə̀ nyaʼa ə Troàs. Bə nɨŋ mbɨ ɨ̀ŋwàʼnɨ̀ mbe nɨ mbɨ karɨ yeʼe mbɨ mbɨwən, màànɨ̀ mbe nɨ mbɨ tekɨ ənɨ ə gôb rɨ njɨ̀g.

¹⁴ Àlèzandà we nɨə kywɨ ɨghɨ ənɨ ə kopà nyaʼa zɨ̀ ŋgəʼ nɔnɔʼ ɨgwɨ num. Ə̀nùŋɨ̀sɨg bɨrɨ chwɨ əməd ɨmbə̀ʼ ɨnû mbe nɨ wɨ̀ nyaʼa ghɨ̌.

¹⁵ Àwɔ̀ we əwe ɨmbə̀ʼ əməd, ɨmbə̀ʼ ɨghəm nɨ wɨ̀ fə ton ɨnû mbe nɨ tɨ̀ nyaʼə ghàə̀. Wɨ̀ nyaʼa ton kwàʼ rɨ̀kǎ.

¹⁶ Ənɨ ə nyùmə̀ rɨtu we nɨ mə nyaʼa təm ni mbɨ saʼ əmɨ, chəi wə̀d mɔʼɔ nyaʼa yeʼe ɨ kəŋgɨ əmɨ. Wə̀d jìm nyaʼa waʼ əmɨ. Tɨ Ŋwìə̀ ŋwaʼnɨ i ɨnû mbe nɨ mbɨ ghɨ ənɨ rɨkum tɨ mɨ̀mə̌d.

¹⁷ Mbɨ nyaʼa ghɨ̀ əne, àyɨə Ə̀nùŋɨ̀sɨg nyaʼa təm ɨban num, naʼ ɨka ɨ num ni mə gha ɨŋgam Ŋwiə̀ jìm, ɨmbə̀ʼ ə bə̂d mɨ̀jìm mbe nɨ kaʼi mɨ̀Jû zu. Ənɨ mə̀ nyaʼa gha əne, Ə̀nùŋɨ̀sɨg nyaʼa chɨ̀ əmɨ rɨ ɨchû ɨvɨ, ɨchî nɨ mbɨ nyaʼa nɨrə sobə ni mbɨ zwiirɨ əmɨ.

¹⁸ Ə̀nùŋɨ̀sɨg bɨrɨ chɨ̀ əmɨ rɨŋga tɨkwɨrɨ ŋgəʼ jìm, əne nɨŋ əmɨ kwàʼ ənɨ əbɔrəbɔd wò zɨ̀ ɨŋga ənû ɨfɔ̀n əməd ze nɨ yeʼ ɨkaŋ. Ɨwumnɨ yeʼ wɨ məd koŋ koŋ. À yɨ əne.

Ə̀chàʼrɨ̀ nɨ sɨ nwìə̀

¹⁹ Chaʼrɨ ə Priskà mbɨ Àkwilà, bə̀ chàʼrɨ̀ bə̂d mbe nɨ yeʼ ɨŋga nəb Ònèsiforùs.

²⁰ Erastùs nyaʼa tèn əwi ə Kɔrèn. Mə nyaʼa bə̀ sàŋ ə Trofimùs ə Miletùs, ɨmbə̀ʼ ɨghəm nɨ ɨ wɨə nyaʼə wɔ̀nə̀.

²¹ Kywɨ ənywɨ yeʼe bɔŋ ə nyùmə̀ we nɨ ɨfə ə kɔ əku sɨə kùʼə̀. Eubulùs bə̀ chàʼrɨ̀ əwe. Pudèns mbɨ Lainùs mbɨ Klaudià mbɨ ə bə̂d Kristo mɨ̀jìm chàʼrɨ̀ əwe.

²² Ə̀nùŋɨ̀sɨg chubɨ mbɨ e əzwî. Ŋwìə̀ ghɨ ɨ̀chɔ̀m ənɨ mbə̀n mɨjìm.