2 Timotì 2 - Meta’

Sɔgyɨ̀ Kristo Yeso chɔ̀m

¹ À yeʼ ɨmbə̀ʼ əwe, àwɔ̀ Timotì mɨ wan, à berɨ təm kaanɨ ɨŋga ɨ̀chɔ̀m we nɨ Ŋwiə̀ ghɨ ənɨ ə na ənjìm ɨchî nɨ tɨ̀ yeʼ ənɨ ɨfɔtɨ mbɨ Kristo Yeso.

² Nɨŋ ɨnû mbe nɨ à nyaʼa zu ənɨ mə̀ nyaʼə gha ɨfě mɨ̀zərɨmbin nɔnɔʼ, əne zɨ̀ ɨŋga rɨkyerɨ-ɨbɔ bə̂d mbe nɨ tɨ̀ wə̀d zɨ fîŋ ɨgwɨ mɨ̀mə̌d, ɨmbə̀ʼ mbɨ bə̀ chwi əmbɨ ə bə̂d cherə.

³ À berɨ zə ŋgəʼ mbɨ na ɨghabɨ ə sɔgyɨ̀ chɔ̀m nɨə fàʼ əmbɨ Kristo Yeso.

⁴ Chəi sɔgyɨ̀ mɔʼɔ nɨ kɨrɨ ənɨ ə̀fàʼì nɨ tɨ̀ wɨ̀ zɨ mbi ɨbɔ ɨŋga ɨnû rɨŋga əbeŋ, ɨmbə̀ʼ ɨghəm nɨ wɨ̀ berɨ fàʼ ɨmbə̀ʼ ghɨ ni wə̀d kyeŋ məd ghaʼ əməd.

⁵ Chəi mbɨə nàʼ ɨneʼe əmbɨ wə̀d we nɨ notɨ, kɨrɨ ənɨ wɨ̀ beenɨ əbɔʼ tɨkə ə̀nòtɨ̀.

⁶ Wə̀d mbeŋ we nɨə fàʼ rɨ̀kǎ berɨ berɨ əbà rɨtu rɨ ənɨ mbɨ kwəŋ ɨghɨ.

⁷ Kwaʼnɨ ɨnû mbɔ̂ nɨ mɨə gha ɨ ne ɨŋga e ətu, ɨmbə̀ʼ ɨghəm nɨ Ə̀nùŋɨ̀sɨg bɨrɨ ghɨ ni à kyerɨ ɨnû rəŋgu ɨjìm e ətu ə zeŋ.

⁸ Kɔndɨ ə Yeso Kristo, nɨ nyaʼə wan tɨ ənɨ əghaŋ ə Dèvîd. Ŋwìə̀ nyaʼa zwemnɨ məd. Wɔ̂ yɨ ɨkə̂n chɔ̀m we nɨ mɨə ghàə̀.

⁹ À yɨ ɨmbə̀ʼ ɨkə̂n chɔ̀m wɔ̂ nɨ mɨə zəə ŋgəʼ pè ənɨ mbɨ fə kod əmɨ ənɨ mɨ̀kàrə̀ mbɔ̂ ɨghabɨ ni mə fə gù ɨkə. Ɨ mbe tɨ̀ mbɨ kod əmɨ, àyɨə chəi ənɨ tɨ̀ mbɨ kod ɨŋgam Ŋwiə̀ ənɨ mɨ̀kàrə̀.

¹⁰ Əne mə wɨə nyìʼ əton ɨnû jìm ɨmbə̀ʼ bə̂d mbe nɨ Ŋwiə̀ chɔʼɔ jwɨ rəŋgəʼ bə̀ berɨ ɨwumnɨ we nɨ ten i koŋ ɨchî nɨ mbɨ yeʼ ənɨ ɨfɔtɨ mbɨ Kristo Yeso.

¹¹ Ɨŋgam wɔ̂ yɨ ɨŋgam rəsìʼ ni: Tɨ̀ mɨ fə kwɨ mbɨ Kristo, tɨ̀ bɨrɨ bɨ chub ɨkǎ mbɨ məd.

¹² Tɨ̀ mɨ nyiʼ, tɨ̀ bɨrɨ bɨ tumbɨ ɨsɨg mbɨ məd. Tɨ̀ mɨ ton əməd, wɨ̀ bɨrɨ bɨ ton əwa.

¹³ Tɨ̀ mɨ ton nuŋ a ɨbenɨ ɨgwɨ məd, wɨ̀ bɨrɨ kɨrɨ ghaʼ əwa, ɨmbə̀ʼ ɨghəm nɨ chəi ənɨ tɨ̀ wɨ̀ wɨrɨ ton ənû ze nɨ wɨ̀ nyaʼa fə be benɨ.

Timotì yɨə wə̀d ə̀fàʼì nɨ Ŋwìə̀ chɔʼɔ

¹⁴ Kɨə nɔ̀ɔ̀rɨ̀ ɨtu bə̂d Kristo ɨmbə̀ʼ ɨnû mbɔ̂. Patɨ mɨ̀mə̌d ɨfě Ŋwiə̀ ni tɨ mbɨ taŋ ə ɨmbə̀ʼ əton ənɨ mɨŋgam əko mɔʼɔ, ɨmbə̀ʼ ɨghəm nɨ chəi taŋ ə weerɨə wə̀d. Ɨ zɨə chə̀kɨ̀ə̀ fîŋ rɨ bə̂d mbe nɨə zwetɨə.

¹⁵ Kywɨ ənywɨ ghɨ̀ ni Ŋwìə̀ ben ə̀fàʼì ze nɨ àwɔ̀ ə fàʼə̀, ɨmbə̀ʼ à yeʼ wə̀d ə̀fàʼì nɨ chəi e ətu ə nìrə̀, bə yeʼ we nɨə chwi ɨŋgam we nɨ yeʼ wɨ rəsìʼ ənɨ ɨnə̂njɨ̀ nɨ kuʼnɨ.

¹⁶ Ton mɨŋgam mɔʼɔ mbe nɨ chəi mbɨə ghɨ̀ ni bə̂d kyerɨ ə Ŋwiə̀, ɨmbə̀ʼ ɨghəm nɨ ənɨ mbɨə ghàmə̀, mbɨ bɨrɨ gha ɨnû nɔnɔʼ nɨ chwiə ni chəi mbɨə wumnɨ ə Ŋwiə̀.

¹⁷ Ɨnû mbe nɨ mbɨə ghàə̀ bɨrɨ jaŋ àmei ɨchî nɨ mɨchɔʼɔ ə jàŋ ɨgwɨ ɨnyod wə̀d. Bə̂d mɔʼɔ rəbɔʼ mbe nɨə ghà ɨnû mbɔ̂ yɨə Haimenaùs mbɨ Filetùs.

¹⁸ Mbɨ fə kàŋ waʼ ɨnû rəsìʼ. Ɨ mbɨə ghàə̀ ni ənû nɨ zwemə ə nyaʼa fə che i. Ɨ mbɨə bə̀ chə̀kɨ̀ ɨbenɨ bə̂d mɔʼɔ.

¹⁹ Àyɨə əchɨ ə nəb ə ka ka ze nɨ Ŋwìə̀ fə zi ə kàŋ təm kàànɨ̀. Mbɨ ŋwàʼnɨ̀ ɨgun ni, “Ə̀nùŋɨ̀sɨg ə kyerɨ bə̂d mbe nɨ yeʼ mbɨ məd,” mbɨ ni, “Wə̀d jìm we nɨə ghà ni tə yɨə wə̀d Ə̀nùŋɨ̀sɨg berɨ waʼ ɨnû rɨbɔ̀ŋ.”

²⁰ Ɨkwɨ ɨkaŋ ə nɔʼ ɨŋga nəb kyeŋ. Mbɨ tekɨ mbɨ mɔʼɔ ənɨ ə gôl bə̀ tekɨ mbɨ cherə ənɨ ə sɨrɨvà. Mbɨ tɔ mbɨ mɔʼɔ ənɨ əzed bə̀ tekɨ mbɨ cherə ənɨ əbɔmɨ. Mbɨ mɔʼɔ yɨ mbɨ əni ənû. Mbɨ cherə yɨ mbe nɨ mbɨə fàʼə̀ mbɨ mbɨwən ɨni jìm.

²¹ Wə̀d mɔʼɔ mɨ zeŋnɨ i ɨnyod waʼ mbi ɨnû rɨbɔ̀ŋ, wɨ̀ bɨrɨ yeʼ ɨghabɨ əkaŋ ze nɨ Ŋwìə̀ bɨrɨ nɨŋ fàʼ mbɨ əzɨ əwən əni ənû. Wɨ̀ bɨrɨ fə zeŋ màànɨ̀. Əne Mbǎʼ ə̀fàʼì məd bɨrɨ nɨŋ əməd fàʼ mbɨ məd ɨchî nɨ wɨ̀ fə tekɨ i ɨnyod nɨ ghɨ ɨnû chɔ̀m jìm.

²² Ton ɨnû rɨbɔ̀ŋ mbe nɨ ŋgwàʼ bə̂d ə feenɨə. Beenɨ yeʼ əbɔʼ ɨnû jìm mbe nɨə ghɨ̀ ni à ghɨ ɨnû nɨ kuʼnɨ. Əne yɨ ənû nɨ nuŋ fîŋ ɨgun ə Kristo, ənû nɨ ghaʼ bə̂d cherə mbɨ ənû nɨ chub ənɨ əbɔrəbɔd. Ghɨ ɨnû mbɔ̂ fɔtɨ mbɨ ə bə̂d mbe nɨə kɔ̀ŋgɨ̀ Ə̀nùŋɨ̀sɨg ənɨ ə fîŋ nɨ zeŋɨ.

²³ Tɨrə̀ berɨ e ənû ə mɔʼɔ nɨ ghɨ mbɨ ɨnû əneŋ mbe nɨ bə̂d ə tàŋ ɨmbə̀ʼ mbɨwən, nɨ chəi ɨwe ɨŋga. À fə bè kyerɨ e ni taŋ te tɨə yeʼe mbɨ əchɔb.

²⁴ Tɨ wə̀d ə̀fàʼì Ə̀nùŋɨ̀sɨg yeʼi wə̀d nɨə tàŋə̀. Wɨ̀ berɨ yeʼ wə̀d nɨə ghɨ̀ ɨ̀chɔ̀m ənɨ ə wə̀d jìm. Wɨ̀ berɨ yeʼ wə̀d nɨ kyerɨ ɨchî nɨ chwi ɨnû. Wɨ̀ berɨ bɨ yeʼ wə̀d nɨə yimə fîŋ.

²⁵ Wɨ̀ chwi ɨnû ənɨ ɨbɔtɨ fîŋ əmbɨ ə mbe nɨə ton ɨnû mbe nɨ wɨə chwiə. Ɨghəm Ŋwìə̀ bɨrɨ ben ni mbɨ beŋ tə fîŋ kyerɨ rəsìʼ ɨmbə̀ʼ ə Kristo.

²⁶ Mbɨ bɨrɨ wɨrɨ berɨ ɨwe, əne vɨ rɨŋga ətam ze nɨ Debɨ̀rə̀ kəʼ zɨ̀ əmbɨ mɨ̀mə̌d. Wɨ̀ kəʼ fə gywɨ mɨ̀mə̌d ɨmbə̀ʼ mbɨ ghɨ ɨnû mbe nɨ wɨ̀ kəbɨ.