2 Timotì 1 - Meta’

¹ À yɨə mɔ̌ Pɔ̂l, nɨ mə yeʼ wə̀d tom Kristo Yeso ɨchî nɨ Ŋwìə̀ nyaʼa kəbɨ, ŋwaʼnɨ ə̀ŋwàʼnɨ̀ zɔ̂. Ŋwìə̀ nyaʼa tom əmɨ ni mə̀ gha ɨmbə̀ʼ ɨ̀tènɨ̀ we nɨ wɨ̀ nyaʼa kaʼi ɨchî nɨ tɨ̀ yeʼ ənɨ ɨfɔtɨ mbɨ Kristo Yeso.

² Mə wɨə ŋwàʼnɨ̀ ɨ ne, àwɔ̀ Timotì, nɨ yeʼ mɨ wan nɨ mə̀ ghaʼi kwàʼ rɨŋgəʼ. Ŋwìə̀ Mbǎʼ mbɨ ə Kristo Yeso a Ə̀nùŋɨ̀sɨg ghɨ ɨ̀chɔ̀m ənɨ ə ne, dììrɨ̀ əwe bə̀ nàʼ əbɔrəbɔd ɨ ne.

Pɔ̂l naʼ məben-əwe əmbɨ ə Ŋwìə̀ bə̀ tìmbɨ̀ ə Timotì

³ Mə wɨə nàʼə̀ məben-əwe əmbɨ ə Ŋwìə̀ we nɨ mɨə fàʼ ɨ bɔ mbɨ mɨ fîŋ nɨ zeŋɨ. Mə wɨə ghɨ̀ əne ɨchî nɨ mbɨ mɨ̀mbǎʼ rəŋwe nyaʼə bə̀ ghɨ̀ə̀. Mə wɨə kɔndɨ əwe ənɨ mɨ̀nyùmə̀ jìm mbe nɨ mɨə kɔ̀ŋgɨ̀ ə Ŋwiə̀ ɨzimɨ mbɨ əziə.

⁴ Mə wɨə kɔndɨ mɨsɨ mbe nɨ à nyaʼa chweŋɨ, əne mə wɨə kàŋə̀ kəb ni njɨ mə wɨrɨ zə əwe, ɨmbə̀ʼ ɨghaʼi swi ɨŋga mɨ fîŋ.

⁵ Mə fə bə̀ wɨrɨ kɔndɨ ɨbenɨ rəsìʼ we nɨ à berɨ, nɨ yeʼ ɨkwɨ ɨbenɨ we nɨ Lɔis avɨ we kyeŋ mbɨ Yunis avɨ we nyaʼa berɨ. À berɨ ɨbenɨ rɨ̀nîn ɨchî nɨ mə̀ kyerɨ.

⁶ Ɨchî nɨ à ben ə Kristo əni, mə wɨə kə̀bə̀ ni à nɔɔrɨ ɨneʼe we nɨ yeʼ ɨŋga ne, nɨ Ŋwìə̀ nyaʼa naʼ ɨ ne ənɨ ə nyùmə̀ we nɨ mə nyaʼa zab mbɨ ɨbɔ ɨgwɨ ne.

⁷ Chəi Əzwî ze nɨ Ŋwìə̀ naʼ ɨ na ə ghɨ̀ ni tɨ̀ beŋ ənɨ ɨkwèd. Ə zɨə ghɨ̀ yeʼ ni tɨ̀ berɨ ɨka, ghaʼ bə̂d bə̀ yimbɨ ɨnyod.

⁸ Əne tɨ e ətu ə nid i nɨ gha ɨmbə̀ʼ a Ə̀nùŋɨ̀sɨg, kɨ̀ nɨ gha ɨmbə̀ʼ ɨchî nɨ mə̀ yeʼ wə̀d ndəŋ ɨmbə̀ʼ əməd. Àyɨə tekɨ ɨnyod nɨ zə ɨkwɨ ŋgəʼ we nɨ mɨə zə ɨmbə̀ʼ ɨkə̂n chɔ̀m. À bɨrɨ ghɨ əne ənjìm ɨka we nɨ Ŋwìə̀ naʼ ɨ ne.

⁹ Ŋwìə̀ nyaʼa chɨ əwa rəŋgəʼ, əne tɔŋ əwa ni tɨ̀ yeʼ mbi bə̂d ɨmbə̀ʼ chub ɨzeŋɨ zeŋɨ. Chəi tɨ̀ nyaʼa ghɨ ənû ə mɔʼɔ bɔŋ wɨ̀ nyaʼa sɨə tɔŋ əwa. Wɨ̀ nyaʼa tɔŋ əwa ɨmbə̀ʼ ɨghəm nɨ wɨ̀ nyaʼa fə nuŋ əne. Wɨ̀ nyaʼa bə̀ tɔŋ ɨmbə̀ʼ ɨ̀chɔ̀m məd we nɨ wɨ̀ nyaʼa fə ghɨ ənɨ ə na rəŋwe rəŋwe ənjìm ə Kristo Yeso.

¹⁰ Àyɨə rɨ̀nîn, ɨnû mbɔ̂ jìm fə jwɨ̀ zeŋ ɨ na ənjìm ɨchî nɨ Kristo Yeso we nɨə chɨ̀ əwa rəŋgəʼ nyaʼa yeʼe. Wɨ̀ fə nimnɨ ɨka we nɨ ɨvɨ berɨ ɨgwɨ na, əne chè ənjìm ɨkə̂n chɔ̀m chwi ɨchî nɨ bə̂d bɨrɨ chub ɨkǎ bə̀ chwi ɨchî nɨ chəi bə̂d bɨrɨ nɔ kwɨ.

¹¹ À yɨ ɨmbə̀ʼ ɨkə̂n chɔ̀m wɔ̂ nɨ Kristo nyaʼa chɔʼ əmɨ ni mə̀ gha ɨŋgam Ŋwiə̀, ni mə̀ yeʼ wə̀d tom məd, mbɨ ni mə̀ chwi ɨnû ɨmbə̀ʼ əməd.

¹² À yɨ əton nɨ mɨə zəə ŋgəʼ ɨchî nɨ mɨə zəə. Àyɨə chəi mɨ ətu ə nìd ɨmbə̀ʼ ɨghəm nɨ mə kyerɨ wə̀d we nɨ mə nuŋ mɨ fîŋ ɨgwɨ məd. Mə bə̀ kàŋ kyerɨ ni ɨ we tɨ̀ wɨ̀ nəŋgɨ ənû ze nɨ wɨ̀ zɨ ɨŋga tum rɨkyerɨ-ɨbɔ pè əni ze nɨ Ŋwiə̀ bɨrɨ saʼ ɨsɨg.

¹³ Yim ɨŋgam rəsìʼ we nɨ mə̀ gha ɨ ne ɨghabɨ ənweenɨ nɨ à bɨrɨ beenɨ əbɔʼ. Yim ɨbenɨ we nɨ à berɨ bə̀ ghaʼ bə̂d. Ghɨ əne ɨchî nɨ tɨ̀ yeʼ ənɨ ɨfɔtɨ mbɨ Kristo Yeso.

¹⁴ Nəŋgɨ rəsìʼ we nɨ Əzwî ə Zeŋɨ ze nɨ yeʼ ɨŋga na ə zɨ ɨŋga te rɨkyerɨ-ɨbɔ.

¹⁵ Kyerɨ ni bə̂d Kristo nɔnɔʼ rɨ əbà əbeŋ ze rɨ ə Esià fə fìd njìm ənɨ ə num. Ka àbei Faigelùs mbɨ Hemogenès, mbɨ fə bə̀ fìd njìm ənɨ num.

¹⁶ Mə wɨə kɔ̀ŋgɨ̀ Ə̀nùŋɨ̀sɨg ni wɨ̀ diirɨ bə̂d mbe rɨŋga nəb Ònèsiforùs, ɨmbə̀ʼ ɨghəm nɨ məd wɨə nyaʼa kɨə zùtɨ̀ mɨ fîŋ. Chəi ətu əməd ə nyaʼa nid ɨmbə̀ʼ əmɨ ɨchî nɨ mə nyaʼa ə nəb ndəŋ.

¹⁷ Ənɨ wɨ̀ nyaʼa yeʼe ə Rom, wɨ̀ nyaʼa kəb əmɨ kwàʼ rɨŋgəʼ pè ənɨ wɨ̀ nyaʼa zə əmɨ.

¹⁸ Mə wɨə kɔ̀ŋgɨ̀ Ə̀nùŋɨ̀sɨg Yeso ni wɨ̀ diirɨ əməd əni ze nɨ wɨ̀ bɨrɨ saʼ ɨsɨg! À kyerɨ e ɨchî nɨ wɨ̀ nyaʼa weerɨ əmɨ ə Efesùs.