2 Pità 2 - Meta’

Pità nyaʼa patɨ bə̂d mbe nɨ nyaʼa ben ə Kristo ɨmbə̀ʼ məchwiə̀-ɨnû mɨghab

¹ Bə̂d ɨ̀kə̀n mɨghab mbɨə nyaʼa əkaʼ bə̂d mbɨ rəŋwe àmei ɨchî nɨ məchwiə̀-ɨnû mɨghab bɨrɨ bɨ yeʼ əkaʼ nən. Mbɨ bɨrɨ nyaʼrɨ yeʼe mbɨ mɨŋgam mɨghab ɨmbə̀ʼ ə Ŋwiə̀. Mɨŋgam mɨghab mbe yɨ mɨŋgam nɨ bɨrɨ nimnɨ bə̂d. Mbɨ bɨrɨ bɨ ton Mbǎʼ ə̀fàʼì mɨ̀mə̌d we nɨ nyaʼa choʼ ɨtu mɨ̀mə̌d. Mbɨ mɨ ghɨ̀ əne, Ŋwìə̀ bɨrɨ zambɨ nimnɨ mɨ̀mə̌d.

² Bə̂d mɨ̀nɔnɔʼ bɨrɨ kɨrɨ beenɨ əbɔʼ ɨnyamnɨ-ɨnû məchwiə̀-ɨnû mɨ̀ghab mbe. À yɨ ɨmbə̀ʼ ɨnû mbe nɨ mbɨə ghɨ̀ə̀ nɨ bə̂d bɨrɨ gha ɨnû rɨbɔ̀ŋ ɨmbə̀ʼ ɨchî rəsìʼ we nɨ bə̂d berɨ chubɨ.

³ Ɨchî nɨ mbɨ ghaʼ ənû nɨ ghɨ əjə, mbɨ bɨrɨ gha tɨpoʼ əko ɨ nən ɨmbə̀ʼ jɨg əwən. Əgha ə fə kàŋ sà nɨ Ŋwìə̀ nyaʼa fə zɨ ɨsaʼi ɨgwɨ mɨ̀mə̌d. Ŋwìə̀ we nɨ bɨrɨ nimnɨ mɨ̀mə̌d wɨ i ɨkyèʼe.

⁴ Wɨ̀ bɨrɨ ghɨ əne ɨmbə̀ʼ ɨghəm nɨ wɨ̀ nyaʼa bə̀ chə mbɨ̀aŋgɨrə̀ mbe nɨ nyaʼa ghɨ ɨnû rɨbɔ̀ŋ. Wɨ̀ nyaʼa màʼ mɨ̀mə̌d ɨŋga əsɨ ɨchə, nɨ yeʼ əsɨ nɨ wɨ̀ kod mɨ̀mə̌d ənɨ mɨ̀kàrə̀ ɨŋga ɨsɨ mbe nɨə finə kììm, ɨmbə̀ʼ mbɨ chub əŋgu pè əni ze nɨ wɨ̀ bɨrɨ saʼ ɨsɨg.

⁵ Wɨ̀ nyaʼa chə ɨsɨg rəŋwe, àyɨə wɨ̀ nyaʼa chɨ̀ ə Noà mbɨ ə bə̂d cherə sambe rəŋgəʼ. Wɨ̀ nyaʼa ghɨ̀ əne ənɨ ə nyùmə̀ we nɨ mɨnib nyaʼa kubrɨ ɨsɨg bə̂d mbe nɨ chəi mbɨ nyaʼə wumnɨ ə Ŋwiə̀. Noà wɨə nyaʼə saʼə ni bə̂d ghɨ ɨnû nɨ kuʼnɨ.

⁶ Ŋwìə̀ nyaʼa bə̀ zɨ̀ ɨchə ɨgwɨ ɨsɨ mbe nɨ mbɨ nyaʼə tɔŋ ənɨ ə Sodòm mbɨ Gòmorà. Wɨ̀ nyaʼa nimnɨ ɨsɨ mbe ənɨ ɨwid. Wɨ̀ nyaʼa ghɨ̀ ni mbɨ yeʼ ənweenɨ əmbɨ ə bə̂d mbe nɨ chəi mbɨə wumnɨ əməd.

⁷ Wɨ̀ nyaʼa bə̀ chɨ ə Lɔ̂t rəŋgəʼ. Lɔ̂t yɨə nyaʼə wə̀d chɔ̀m. Ɨ wɨə nyaʼə kàŋə̀ kə̀n ɨmbə̀ʼ ɨnyamnɨ-ɨnû mbe nɨ bə̂d mbe nɨ chəi mbɨ nyaʼə wumnɨ ə Ŋwiə̀ nyaʼə ghɨ̀ə̀.

⁸ Fîŋ mbaŋə̀ zɔ̂ nɨ nyaʼə ghɨ̀ ɨnû nɨ kuʼnɨ zɨə nyaʼə tɔb əməd ɨni jìm ɨmbə̀ʼ ɨchî nɨ ɨ wɨ̀ nyaʼə zəə bə̀ zuə ɨnû mbe nɨ bə̂d mbe nɨ chəi mbɨ nyaʼə wumnɨ ə Ŋwiə̀ nyaʼə ghɨ̀ə̀ bə̀ ghàə̀.

⁹ Əne yɨ ni Ə̀nùŋɨ̀sɨg ə kyerɨ ɨchî nɨ chɨ bə̂d mbe nɨə wumnɨ əməd tɨ ənɨ ɨ̀kwàʼnɨ̀. Wɨ̀ bə̀ kyerɨ ɨchî nɨ chə mbe nɨ chəi mbɨə ghɨ̀ ɨnû nɨ kuʼnɨ. Wɨ̀ bɨrɨ nuŋ mɨ̀mə̌d wò pè əni ze nɨ wɨ̀ bɨrɨ nwìə̀ saʼ ɨsɨg,

¹⁰ màànɨ̀ mbe nɨə beenɨ əbɔʼ ɨnû rɨbɔ̀ŋ mbe nɨ nyamnyod tɨ mɨ̀mə̌d ə feenɨə. Ɨ mbɨə bə̀ tonə ni chəi Ŋwìə̀ berɨ ɨka nɨ tumbɨ əwən. Məchwiə̀-ɨnû mɨghab mbɔ̂ mbɨə seenɨə bə̀ berɨ ɨka fîŋ. Chəi mbɨə bɔə nɨ zɔm ɨghɨ mbe nɨ mbɨə wumnɨ ɨkaŋ.

¹¹ Ka àbei mbɨ̀aŋgɨrə̀ nɨ berɨ ɨka bə̀ berɨ əzîŋ chè məchwiə̀-ɨnû mɨghab mbɔ̂, chəi mbɨ kweʼ zɨ̀ ɨsaʼi ɨgwɨ ɨghɨ mbe nɨ mbɨə wumnɨ ɨkaŋ ɨmbə̀ʼ chəkɨ mɨ̀mə̌d ɨfě Ŋwiə̀.

¹² Bə̂d mbɔ̂ mbɨə ghɨ̀ yeʼ ɨnû mbe nɨə kɔʼ ɨŋga fîŋ tɨ mɨ̀mə̌d. Chəi mbɨə kɔndɨ ɨnû bɔŋ ghɨ̀. Mbɨ yɨ ɨghabɨ ə nyam rɨ tɔtɔ nɨ mbɨ nyaʼa gywɨ mɨ̀mə̌d ni bə̂d gywɨ ə zwiirɨ. Ɨ mbɨə chəkɨ ɨnû mbe nɨ chəi mbɨ kyerɨ, əne mbɨ bɨrɨ bɨ zwiirɨ mɨ̀mə̌d ɨchî nɨ mbɨə zwiirɨə nyam rɨ tɔtɔ.

¹³ Mbɨ bɨrɨ chwɨ mɨ̀mə̌d ənɨ ə ŋgəʼ ɨmbə̀ʼ ɨghəm nɨ ɨ mbɨə zɨ̀ə̀ ŋgəʼ ɨgun ə bə̂d cherə. À yɨ ɨghaʼi əmbɨ mɨ̀mə̌d nɨ ghɨ̀ ɨnû mbe nɨ nyamnyod tɨ mɨ̀mə̌d ə kə̀bə̀ əziə. Mbɨ yɨ ɨghabɨ tɨfiŋɨ bə̀ fɔrɨ ɨghabɨ ɨnyɔɔrɨ. Ənɨ mbɨə jɨgə mbɨ nən, ɨ mbɨə tambɨ əwən.

¹⁴ Ɨ mbɨə kɨə nèŋə̀ məyi mbe nɨə niirɨə mbaŋə̀ ɨmbə̀ʼ ni mɨ̀mə̌d. Chəi mbɨə bɔrə nɨ ghɨ ɨnû rɨbɔ̀ŋ. Ɨ mbɨə tambɨ ə bə̂d mbe nɨ chəi fîŋ tɨ mɨ̀mə̌d kɨrɨ kaanɨ. Mbɨ fə kwembɨ ənû nɨ kɨə ghɨ̀ əjə. Ŋwìə̀ bɨrɨ zɨ ndɔ̀n ɨgwɨ mɨ̀mə̌d.

¹⁵ Chəi mbɨə wɨrɨə ghɨ̀ ɨnû nɨ kuʼnɨ. Ɨ mbɨə sɨə ghɨ̀ àmei ɨnû rɨbɔ̀ŋ. Ɨ mbɨə ghɨ̀ yeʼ ɨnû mbe nɨ Balàm nɨ nyaʼə wan Beò nyaʼə ghɨ̀ə̀. Balàm nyaʼa ghaʼ ɨkab we nɨ wɨ̀ nyaʼa wo berɨ tɨ ənɨ ɨnû rɨbɔ̀ŋ mbe nɨ wɨ̀ nyaʼə ghɨ̀ə̀.

¹⁶ Ənɨ wə̀d ɨ̀kə̀n wɔ̂ nyaʼə ghɨ̀ ɨnû rɨbɔ̀ŋ məd mbe, jàkas, nɨ chəi wɨə ghàmə̀, nyaʼa ghàm əbɔʼ əməd. Jàkas we nyaʼa ghàm əbɔʼ əməd ənɨ ə gɨ̂ wə̀d. Əze ə nyaʼa təmnɨ ətəd əməd ze.

¹⁷ Məchwiə̀-ɨnû mɨghab mbɔ̂ yɨ ɨghabɨ mɨ̀jwɨ̀-əmboŋ nɨ fə zomɨ. Mbɨ yɨ ɨghabɨ ə pàʼ nɨ əfim ə bèʼè chè i che, nɨ chəi zɨə ghɨ̀ ni mbə̀ŋ nɔ. Ŋwìə̀ fə nùŋ rɨmbin əmbɨ mɨ̀mə̌d ɨŋga əsɨ ze nɨə finə kììm.

¹⁸ Ɨ mbɨə ghàm mɨŋgam əneŋ goŋ ɨgɔ̂. Ɨ mbɨə nɨŋə ɨnyamnɨ-ɨnû mbe nɨ nyamnyod ə feenɨə tambɨə bə̂d mbe nɨ fə cherə jwɨ̀ rəbɔʼ mbe nɨə chub ɨŋga ɨfebrɨ-ɨnû.

¹⁹ Ɨ mbɨə kàʼə̀ ni mbə bɨrɨ chɨ̀ bə̂d mbɔ̂ rəŋgəʼ, àyɨə ənɨ ə ɨghəm, mbɨ yɨ ɨ̀bòʼò əmbɨ ɨnû rɨbɔ̀ŋ, ɨmbə̀ʼ ɨghəm nɨ wə̀d yɨ ə̀bòʼò əmbɨ əghɨ ze nɨ baŋ əməd.

²⁰ Bə̂d mɨ fə kyerɨ a Ə̀nùŋɨ̀sɨg Yeso Kristo nɨə chɨ̀ əwa rəŋgəʼ, əne nòrɨ̀ tɨ ənɨ ɨnû rɨbɔ̀ŋ mbe nɨ yeʼ ɨŋga ɨsɨg, àyɨə ɨnû rɨbɔ̀ŋ mbe wɨrɨ gywɨ̀ mɨ̀mə̌d baŋə, njɨ ŋgəʼ ze nɨ bɨrɨ nyɨ ɨgwɨ mɨ̀mə̌d bɨrɨ bə chè ze nɨ mbɨ nyaʼə be ɨŋga.

²¹ Zɨə nyaʼa kàŋ bɔ̀ŋ ni tɨ mbɨ be kyerɨ ə ɨnû nɨ kuʼnɨ, chè ɨchî nɨ mbɨ kyerɨ, əne wɨrɨ firɨ njìm ənɨ rɨkə zeŋɨ te nɨ mbɨ nyaʼa naʼ əmbɨ mɨ̀mə̌d.

²² Ənû ze nɨ nyaʼa ghɨ̀ ənɨ mɨ̀mə̌d ə chwiə ni ɨŋgam maʼi mbɔ̂ be fə jwɨ̀ ənɨ rəsìʼ. Mɨŋgam rəŋgu yɨ ni, “Bu mɨ zèŋ, zɨ̀ wɨrɨ bèŋ wò jɨg mbi mɨzeŋ,” mbɨ ni, “Mbɨ mɨ fə sò ə kuŋə, wɨ̀ bɨrɨ wɨrɨ bə̀ndɨ̀ wò biŋgɨ ɨŋga rɨchaʼ.”