2 Kɔrèn 9 - Meta’

Ə̀wèèrɨ̀ ze nɨ mbɨ nyaʼa wo naʼ əmbɨ ə bə̂d Kristo mbe nɨ yeʼ ə Jèrusalèm

¹ Chəi əton ɨ num nɨ ŋwaʼnɨ ɨ nən ɨmbə̀ʼ ə̀wèèrɨ̀ ze nɨ mbə̀ə kəb cha əmbɨ ə bə̂d Ŋwiə̀ mbe nɨ yeʼ ə Jèrusalèm.

² Mə kyerɨ ni mbə kàŋ ghaʼ nɨ wèèrɨ̀, əne mə wɨə goŋ ɨgɔ̂ ɨmbə̀ʼ əwən əmbɨ ə bə̂d Kristo mbe nɨ yeʼ ə Màsèdonià. Mə wɨə ghà əmbɨ mɨ̀mə̌d ni bə̂d Kristo mbe nɨ yeʼ ə Àkàiyà nyaʼa fə tekɨ ə ɨnyod nɨ naʼ ə̀wèèrɨ̀ ze nɔʼ tɨ rɨ əghəm əwu. Ɨchî nɨ mbə̀ ghaʼ nɨ naʼ ə̀wèèrɨ̀ ze ə fə ŋwè bə̂d mɨ̀nɔnɔʼ əkaʼ mɨ̀mə̌d ni mbɨ bə wèèrɨ̀.

³ Mə wɨə tom ə bɔŋgɔb mbɔ̂ ɨmbə̀ʼ tɨ zɨə chwi ni ɨchî nɨ tɨə goŋ ɨgɔ̂ ɨmbə̀ʼ ənû ze nɨ mbə̀ fə ghɨ yɨ ətu ə̀kǒ. Mə wɨə tom mɨ̀mə̌d ɨmbə̀ʼ mbə̀ tekɨ ɨnyod, ɨchî nɨ mə̀ nyaʼa fə gha əmbɨ ə bə̂d cherə ni mbə fə tekɨ.

⁴ À mɨ yeʼ nɨ chəi mbə̀ kɨrɨ tekɨ ɨnyod, njɨ bə̂d mɔʼɔ rɨ ə Màsèdonià mɨ yeʼe mbɨ num pè zə ni chəi mbə̀ kɨrɨ tekɨ ɨnyod, mba ɨtu bɨrɨ nìd. Mba ɨtu mɨ nìd, njɨ zɨə kɨə wo yeʼ rɨ ye mbɨ mbə̀n mbe nɨ tɨ̀ nuŋ ta fîŋ ɨgwɨ nən ə?

⁵ Əne mə kàŋ kə̀ʼ kɔndɨ ni zɨə kùʼ ni mə̀ buʼ ɨbɔ əmbɨ ə bɔŋgɔb mbɔ̂ ni mbɨ be yeʼe əsɨ nən ɨmbə̀ʼ mbə̀ tekɨ ɨneʼe kyeŋ we nɨ mbə̀ kəʼ kàʼ. Əze ə bɨrɨ chwi ni mbə nàʼ ɨneʼe we ɨchî nɨ mbə̀ ghaʼ, kaʼi ni à yɨ mbɨ nyeŋ əwən nyeŋɨ.

⁶ Ənû ze nɨ mɨə ghàə̀ yɨ ni: Wə̀d we nɨ kon ɨghɨ rɨpiî, bɨrɨ bɨ kwəŋ ɨghɨ rɨpiî. We nɨ kon ɨghɨ nɔnɔʼ, bɨrɨ bɨ kwəŋ ɨghɨ nɔnɔʼ.

⁷ Wə̀d mɔʼ mɔʼ berɨ nàʼ àmei ɨchî nɨ wɨ̀ fə tekɨ ɨŋga i fîŋ ni tə bɨrɨ nàʼ. Tɨ wɨ̀ naʼ i yènə̀ dùmbɨ̀ə̀. Tɨ wɨ̀ bɨ naʼ i ɨghabɨ ni à yɨ mbɨ nyeŋ əməd nyeŋɨ, ɨmbə̀ʼ ɨghəm nɨ Ŋwiə̀ wɨə ghaʼə wə̀d we nɨə nàʼ ɨghɨ mbɨ ɨghaʼi ɨŋga i fîŋ.

⁸ Ŋwiə̀ we tɨ̀ wɨ̀ nàʼ ɨghɨjìm ɨ nən chè mbe nɨ mbə̀ kəbɨ, ɨmbə̀ʼ mbə̀ berɨ ɨghɨjìm ənɨ mɨ̀nyùmə̀ jìm ɨmbə̀ʼ mbə̀ bɨ nàʼ ni mbɨ ghɨ̀ ɨnû chɔ̀m əŋgu.

⁹ Ə zɨ ɨŋga Ə̀ŋwàʼnɨ̀ ə Ŋwiə̀ ni: “Ɨ wɨə sàŋnə, ɨ wɨə nàʼ ɨghɨ əmbɨ ə bə̂d ɨkwaŋ. Ɨchî nɨ wɨə ghɨ̀ ɨnû nɨ kuʼnɨ ə ten i koŋ.”

¹⁰ Ŋwiə̀ we nɨə nàʼ ɨghɨ ŋgwèd əmbɨ wə̀d we nɨə fàʼə̀ mbeŋ, bə̀ nàʼə̀ ŋgə̀ŋ ni bə̂d jɨg, bɨrɨ naʼ ɨghɨjìm mbe nɨ mbə̀ kəbɨ mbɨ nɔʼ. Əne bə̂d mɨ̀nɔnɔʼ bɨrɨ jɨg tɨ ənɨ ɨchî nɨ mbə̀n ə sàŋnə.

¹¹ Mbə mɨ yeʼə sàŋnə, njɨ Ŋwìə̀ bɨrɨ ghɨ ni mbə̀ berɨ ɨghɨ nɔnɔʼ ənɨ ɨkwɨ ɨnə̂njɨ̀ jìm. Ɨsaŋnɨ we bɨrɨ ghɨ ni bə̂d mɨ̀nɔnɔʼ che ənjìm na nàʼ məben-əwe əmbɨ ə Ŋwiə̀.

¹² Əne ka ənû zɔ̂ nɨ mbə̀ ghɨ bɨrɨ naʼ àmei ɨghɨ mbe nɨ bə̂d Ŋwiə̀ kəbɨ, zɨə bɨrɨ bɨ ghɨ ni bə̂d mɨ̀nɔnɔʼ naʼ məben-əwe əmbɨ ə Ŋwiə̀.

¹³ Mbə mɨ yeʼə ghɨ̀ ɨnû ɨghabɨ mbɔ̂, njɨ mbə fə chwi ɨkwɨ bə̂d mbe nɨ mbə̀ yeʼ mbɨwən. Əne bə̂d mɨ̀nɔnɔʼ bɨrɨ yiirɨ ə Ŋwiə̀ ɨmbə̀ʼ ɨchî nɨ mbə̀ beenɨ əbɔʼ ɨkə̂n chɔ̀m we nɨ mbə̀ nyaʼa ben ɨmbə̀ʼ ə Kristo. Mbɨ bɨrɨ bɨ naʼ məben-əwe əmbɨ ə Ŋwiə̀ ɨmbə̀ʼ ɨghɨ mbe nɨ mbə̀ naʼ əmbɨ mɨ̀mə̌d fɔrɨ ɨmbə̀ʼ mbe nɨ mbə̀ naʼ əmbɨ ə bə̂d cherə.

¹⁴ Mbɨ bɨrɨ kɔŋgɨ ə Ŋwiə̀ ɨgwɨ nən mbɨ ɨghaʼi ɨŋga tə fîŋ ɨmbə̀ʼ chɔ̀m kyeŋ we nɨ Ŋwiə̀ ghɨ ənɨ ə nən.

¹⁵ Tɨ̀ nàʼ məben-əwe əmbɨ ə Ŋwiə̀ ɨmbə̀ʼ ɨneʼe məd we nɨ wɨ̀ nyaʼa naʼ ɨ na, nɨ yeʼ ɨneʼe we nɨ chəi ənɨ tɨ̀ bə̂d mə̀!