2 Kɔrèn 6 - Meta’

¹ Ɨchî nɨ tɨə fàʼ ɨnɔ̂n mbɨ ə Ŋwiə̀, əne tɨ̀ wɨə buʼ ɨbɔ ɨ nən ni tɨ mbə̀ ben ə ni ɨ̀chɔ̀m we nɨ Ŋwiə̀ ghɨ ənɨ ə nən che ətu ə̀kǒ.

² Ŋwìə̀ ə ghà ni, “Ənɨ nyùmə̀ nyaʼa kuʼ ənɨ mɨə ghɨ̀ ɨ̀chɔ̀m, mə nyaʼa zu ənû ze nɨ à nyaʼa ghǎ; mə nyaʼa weerɨ əwe əni ze nɨ mə nyaʼə chɨ̀ə̀ bə̂d rəŋgəʼ.” Mə ghà ɨ nən ni tɨ̀nîn yɨə nyùmə̀ we nɨ Ŋwìə̀ ə ghɨ̀ ɨ̀chɔ̀m, tɨ̀nîn yɨə nyùmə̀ we nɨ Ŋwìə̀ ə chɨ̀ə̀ bə̂d rəŋgəʼ!

³ Chəi tɨə kən ɨnə̂njɨ̀ əmbɨ wə̀d mɔʼɔ, ɨmbə̀ʼ tɨ mbɨ gha ə ənû rɨbɔ̀ŋ ɨmbə̀ʼ ə̀fàʼì ze nɨ tɨə fàʼə̀.

⁴ Àyɨə ɨghabɨ ə bə̂d ə̀fàʼì Ŋwiə̀, tɨ wɨə chwiə ni tɨ yɨə bə̂d ə̀fàʼì chɔ̀m ənɨ tɨkwɨrɨ ɨnə̂njɨ̀ jìm. Tɨ̀ wɨə nyìʼ əton ə ŋgəʼ, tɨ wɨə zə tɨkwɨrɨ ŋgəʼ jìm, ɨnû mbɨə nyèm əwa, ɨnû rɨbɔ̀ŋ nɔnɔʼ mbɨə nyɨ ɨgwɨ na.

⁵ Ɨ mbɨə som əwa. Ɨ mbɨ zɨə əwa ə ndəŋ. Ɨ mbɨə bù əchɔb kəb zwiirɨ əwa. Tɨ̀ wɨə nwìʼ ɨnyod mbɨ ɨ̀fàʼì. Tɨ̀ wɨə ni ɨzimɨ mɔʼɔ zɨ rɨ gwenɨ. Tɨ̀ wɨə chubə njì.

⁶ Tɨ̀ wɨə chwiə ni tɨ yɨə bə̂d nɨ zeŋɨ. Tɨ̀ wɨə chwiə ni tɨə kyerɨ ənû. Tɨ̀ wɨə yimə fîŋ. Tɨ̀ wɨə ghɨ̀ ɨ̀chɔ̀m. Əzwî ə Zeŋɨ ə zɨ ɨŋga na. Tɨ̀ wɨə ghaʼə bə̂d ənɨ ta fîŋ rɨ̀jìm.

⁷ Tɨ̀ wɨə ghà ɨŋgam rəsìʼ. Tɨ̀ wɨə ghɨ̀ ɨnû ənɨ ɨka we nɨ Ŋwìə̀ naʼ ɨ na. Mba ɨnû mbe nɨ təm kùʼnɨ̀ yɨ ɨghɨ bid nɨ tɨ̀ yim əbɔ ə jɨgɨ, ɨ zɔ̀ŋ, bə̀ yim əbɔ ə tweŋ, ɨ kən ɨnyod.

⁸ Bə̂d mɔʼɔ mbɨə wumnɨ əwa, mbɨ mɔʼɔ tìbrɨ̀ əwa. Bə̂d mɔʼɔ mbɨə ghà ɨnû rɨbɔ̀ŋ ɨmbə̀ʼ əwa, mbɨ mɔʼɔ gha ɨnû chɔ̀m ɨmbə̀ʼ əwa. Bə̂d mɔʼɔ mbɨə ghàə̀ ni ka tɨ̀ yɨ a bə̂d mbe nɨ tɨ̀ yeʼ mbɨwən, àyɨə tɨ̀ yɨə kaŋ mbɨwən.

⁹ Bə̂d mɔʼɔ mbɨə ghɨ̀ mbɨ na ɨghabɨ ni chəi mbɨ kyerɨ əwa, àyɨə mbɨ kàŋ jeŋgɨ kyerɨ. Bə̂d mɔʼɔ mbɨə som əwa, àyɨə chəi mbɨ kɨrɨ zwiirɨ əwa.

¹⁰ Bə̂d mɔʼɔ mbɨə ghɨ̀ mbɨ na ɨghabɨ ni tɨ̀ yɨə bə̂d nɨə kə̀nə̀, àyɨə tɨ̀ wɨə ghaʼrɨ əwa ɨghəm jìm. Bə̂d mɔʼɔ mbɨə ghɨ̀ mbɨ na ɨghabɨ ni tɨ yɨə bə̂d ɨkwaŋ, àyɨə tɨ wɨə ghɨ̀ ni bə̂d mɨ̀nɔnɔʼ fuʼ əwən. Bə̂d mɔʼɔ mbɨə neŋ əwa ni tɨ̀ yɨə bə̂d nɨ chəi əghɨ, àyɨə tɨ̀ berɨ ɨghɨjìm.

¹¹ Mba mɨ̀sə̀ʼ ə Kɔrèn! Tɨ̀ fə ghàm ɨ nən əsaŋ əsaŋ. Tɨ̀ fə fìʼ ta fîŋ ɨ nən.

¹² Chəi ɨnwǐ ənɨ ɨchî nɨ tɨ̀ ghaʼ əwən, àyɨə chəi mbə ghaʼ əwa ɨchî nɨ tɨ̀ ghaʼ əwən.

¹³ Mə wɨə ghàm ɨ nən tɨ̀nîn ɨghabɨ ni mbə yɨ mbɨ bɔn. Əne, ɨchî nɨ tɨ̀ fiʼ ta fîŋ ɨ nən, mbə̀ bə fìʼ tən ɨ na.

Ɨpatɨ ɨmbə̀ʼ ənû nɨ fɔtɨ mbɨ ə bə̂d nɨ chəi mbɨ kyerɨ ə Ŋwiə̀

¹⁴ Tɨ̀ mbə faʼ ə ɨnɔ̂n mbɨ ə bə̂d mbe nɨ chəi mbɨ kyerɨ ə Ŋwiə̀. À kɨ ɨfɔtɨ wi nɨ ənû nɨ təm kùʼnɨ̀ ə berɨ mbɨ ənû nɨ ghɨ ɨnû rɨbɔ̀ŋ ə? Kɨ̀ à kɨ ɨfɔtɨ wi nɨ ɨzeŋɨ zeŋɨ berɨ mbɨ ɨsɨ firɨ ə?

¹⁵ Tɨ̀ Kristo mbɨ Belià zɨ̀ ɨnû ənɨ mbɨ mɔʼ ə? À kɨ ənû ə ye nɨ wə̀d we nɨ ben ə Ŋwiə̀ berɨ mbɨ we nɨ chəi wɨ̀ ben əməd ə?

¹⁶ À kɨ ənû ə ye nɨ mbàn Ŋwìə̀ berɨ mbɨ mbɨ̀anèŋ ə? Tɨ̀ yɨə mbàn Ŋwìə̀ we nɨ yeʼ ɨkǎ. Ŋwìə̀ ziə ə ghà ni: “Mə bɨrɨ chubɨ mbɨ mɨ̀mə̌d bə̀ yèn əkaʼ mɨ̀mə̌d. Mə bɨrɨ yeʼ Ŋwiə̀ mɨ̀mə̌d, mɨ̀mə̌d bə̀ yeʼ mbɨ bə̂d.”

¹⁷ Ə̀nùŋɨ̀sɨg ə ghà ni, “Mbə̀ jwɨ rəkaʼ mɨ̀mə̌d əne ghàbrɨ̀ mbɨ mɨ̀mə̌d. Tɨ mbə̀ betɨ ə əghɨ ə mɔʼɔ ze nɨ rɨka zeŋ i, əne mə bɨrɨ wɨrɨ nɨŋ əwən.

¹⁸ Mə bɨrɨ yeʼ Mbǎʼ ɨ nən, əne mbə bɨrɨ yeʼ mbɨ bɔn mbaŋə̀ mbɨ mbɨ bɔn məyi. Əzɔ̂ yɨ ənû nɨ Ə̀nùŋɨ̀sɨg Ŋwìə̀kɔʼ ghǎ.”