2 Kɔrèn 5 - Meta’

¹ Tɨ̀ kyerɨ ni mbɨ mɨ sàʼ ɨŋwenɨ we nɨ tɨə chub ɨŋga ɨgwɨ ə si, əne yɨ a nyamnyod, njɨ tɨ̀ berɨ nəb ɨkaŋ nɨ à yɨə Ŋwiə̀ ziə korɨ, nɨ kaʼi bə̂d mɨ̀sɔŋɨchù korɨ. Nəb ze bɨrɨ ten i koŋ.

² Tɨ̀ wɨə sɔ ɨchû ɨŋga nyamnyod zɔ̂, əne tɨ̀ wɨə kə̀bə̀ ni Ŋwìə̀ naʼ nyamnyod fi ze rɨkaŋ ɨ na.

³ Tɨ̀ mɨ yeʼ ɨŋga nyamnyod fi ze, njɨ chəi əwa rɨ̀sɔ̀ʼ ɨkyerɨ.

⁴ Ənɨ tɨ̀ kɨrɨ ɨŋga nyamnyod zɔ̂, tɨ̀ wɨə sɔ ɨchû əton ɨghɨ mbe nɨə nìd əwa. Chəi tɨ̀ kəb nimnɨ nyamnyod ənun. Tɨ̀ wɨə kə̀bə̀ yeʼ ni Ŋwiə̀ zɨ nyamnyod fi ɨgwɨ na, ɨmbə̀ʼ nyamnyod ze nɨ bɨrɨ ten i koŋ nɨŋ rɨmbin ze nɨə kwɨə.

⁵ Ŋwiə̀ nyaʼa fə tekɨ əwa ni tɨ̀ bɨrɨ berɨ nyamnyod fi. Əne wɨ̀ fə nàʼ e Əzwî ɨ na. Əzwî ze yɨ əghɨ rəbɔʼ mbe nɨ wɨ̀ nyaʼa kaʼ ni tə bɨrɨ naʼ ɨ na.

⁶ Əne tɨ̀ wɨə ben ənɨ mɨ̀nyùmə̀ jìm ni ɨnû mbɔ̂ yɨ ɨnû rəsìʼ. Tɨ̀ bə̀ kyerɨ ni tɨ̀ mɨ yeʼ ɨŋga nyamnyod zɔ̂, njɨ tɨ̀ wɨ əsa əgha rɨ əmbɨ Ə̀nùŋɨ̀sɨg.

⁷ Tɨ̀ wɨ ɨkǎ ɨmbə̀ʼ ɨbenɨ, kaʼi ɨmbə̀ʼ ɨghɨ mbe nɨ tɨə zəə.

⁸ Ee, ɨnû mbe nɨ tɨ̀ benɨ yɨ mbɨ rəsìʼ, əne tɨ̀ bɨrɨ kə̀b saŋ nyamnyod zɔ̂, ɨmbə̀ʼ chub ɨŋga nyamnyod fi mbɨ Ə̀nùŋɨ̀sɨg.

⁹ Əne, kɨ̀ tɨ kɨ ɨŋga nyamnyod zɔ̂, kɨ̀ ənɨ tɨ fə saŋ nyamnyod zɔ̂, ənû nɨ tɨ̀ kə̀bɨ yɨ ni fîŋ Ə̀nùŋɨ̀sɨg bɔŋ ə.

¹⁰ Mba mɨjìm berɨ təm ɨfě Kristo ni wɨ̀ saʼ əwa, ɨmbə̀ʼ wə̀d mɔʼ mɔʼ nɨŋ əghɨ ze nɨ kuʼ ɨ bɔ. Wɨ̀ bɨrɨ nɨŋ ɨ̀chɔ̀m kɨ̀ wɨ̀ nɨŋ ɨbə beenɨ əbɔʼ ɨchî nɨ wɨ̀ nyaʼa faʼ ənɨ wɨ̀ nyaʼa kɨrɨ ɨŋga nyamnyod.

Ŋwìə̀ wɨə ghɨ̀ ə̀sə̀ʼ mbɨ ə bə̂d ənjìm ə Kristo

¹¹ Tɨ̀ kyerɨ əton ɨmbə̀ʼ ənû nɨ wumnɨ Ə̀nùŋɨ̀sɨg, əne tɨ̀ wɨə kywɨ ənywɨ ɨ ghɨ ni bə̂d cherə bə kyerɨ. Ŋwiə̀ fə kyerɨ əwa màànɨ̀, əne mə kyerɨ ni mbə fə bə̀ kyerɨ ənû zɔ̂ tə fîŋ zeŋ.

¹² Chəi tɨ̀ kəb nɨ wɨrɨ gha ɨ nən ni tɨ̀ yɨə bə̂d ə̀fàʼì chɔ̀m, àyɨə tɨ̀ wɨə nàʼ əpan ɨ nən ni mbə̀ goŋ ɨgɔ̂ ɨmbə̀ʼ əwa, ɨmbə̀ʼ mbə mbe tɨ̀ mbə wììrɨ̀ ɨŋgam əmbɨ ə bə̂d mbe nɨə goŋ ɨgɔ̂ ɨmbə̀ʼ ɨnû mbe nɨ bə̂d ə zəə, nɨ kaʼi mbe nɨ yeʼ ɨŋga fîŋ.

¹³ Tɨ̀ mɨ yeʼə beə, njɨ tɨ̀ wɨə be ɨmbə̀ʼ ə Ŋwiə̀. Mba ɨtu mɨ kùʼnɨ̀, njɨ mbɨ kùʼnɨ̀ ɨmbə̀ʼ əwən.

¹⁴ Əghɨ ze nɨə tin əwa yɨ ɨghaʼi we nɨ Kristo ghaʼ əwa. Tɨ̀ kyerɨ əne ɨmbə̀ʼ ɨghəm nɨ wə̀d mɔʼ nyaʼa kwɨ ɨgwɨ ətu ə bə̂d mɨjìm, əne bə̂d mɨjìm fə bə̀ kwɨ.

¹⁵ Wɨ̀ nyaʼa kwɨ ɨgwɨ ətu ə bə̂d mɨ̀jìm. Wɨ̀ nyaʼa kwɨ ɨmbə̀ʼ tɨ bə̂d mbe nɨ yeʼ ɨkǎ wɨrɨ chub ənɨ ə ɨghəm, àyɨə ni mbɨ chub yeʼ ɨmbə̀ʼ məd we nɨ nyaʼa kwɨ Ŋwìə̀ zwemnɨ əməd.

¹⁶ Əne, ɨ kɔ rɨ̀nîn chəi tɨə wɨrɨə neŋə wə̀d ɨchî nɨ wə̀d mɨ̀sɔŋɨchù ə nèŋə̀. Ka à bè yeʼi ni tɨ̀ nyaʼa kweʼ nèŋ ə Kristo ɨchî nɨ bə̂d mɨ̀sɔŋɨchù ə nèŋə̀, àyɨə chəi tɨə wɨrɨə nèŋ əməd əne.

¹⁷ Əze ə chwiə ni wə̀d mɔʼɔ mɨ yeʼ ənɨ ɨfɔtɨ mbɨ Kristo, məd yɨə sɨə wə̀d fi. Ɨnû ənun fə chè, mbɨ fi fə yeʼe.

¹⁸ Ɨnû mbɔ̂ jìm yɨ rɨ əmbɨ ə Ŋwiə̀. Wɨ̀ nyaʼa chè ənjìm ə Kristo màànɨ̀ taŋ mbɨ na. Wɨ̀ fə nàʼ ə̀fàʼì ze nɨ maanɨ taŋ ɨ na ni tɨ̀ sɨə fàʼə̀.

¹⁹ Əne yɨ ni, Ŋwiə̀ nyaʼa chè ənjìm ə Kristo màànɨ̀ taŋ mbɨ ə bə̂d ɨmbə̀ʼ mbɨ yeʼ bə̂d ɨməd. Chəi wɨ̀ nyaʼa taŋ tɨ̀gurɨ-ɨnû bə̂d ɨgwɨ mɨ̀mə̌d. Wɨ̀ nyaʼa zɨ̀ ɨkə̂n ɨmbə̀ʼ ənû nɨ maanɨ taŋ ɨŋga ta rɨkyerɨ-ɨbɔ ni tɨ sɨə ghà əmbɨ ə bə̂d.

²⁰ Tɨ̀ yɨə bə̂d nɨ təm ənɨ ɨkum Kristo. Ŋwiə̀ wɨə che ənjìm na buʼ ɨbɔ əmbɨ ə bə̂d. Əne tɨ̀ wɨə buʼ ɨbɔ ɨ nən ənɨ ɨkum Kristo ni mbə maanɨ taŋ mbɨ ə Ŋwiə̀.

²¹ Ŋwiə̀ nyaʼa ghɨ̀ ni Kristo yeʼ wə̀d ɨnû rɨbɔ̀ŋ nɨ chə nyaʼa i ənû rɨbɔ̀ŋ ɨgwɨ məd, ɨmbə̀ʼ ənɨ ɨfɔtɨ mbɨ məd, tɨ̀ we tɨ̀ rɨ təm kùʼnɨ̀ ɨfě Ŋwiə̀.