2 Kɔrèn 4 - Meta’

Mbɔ̂n ze nɨ yeʼ ɨŋga tɨkyiŋ si

¹ Ŋwìə̀ fə diirɨ əwa nàʼ ə̀fàʼì zɔ̂ ɨ na, əne chəi ta fîŋ bɨrɨ bɔd.

² Tɨ̀ fə ton ɨnû mbe nɨ bə̂d ə ghɨ̀ ənə̀mə, nɨ yeʼ ɨnû mbe nɨə nàʼ tɨ̀nìd ətu. Tɨ̀ fə ton nɨ ghɨ ɨbèkɨ̀ ɨnû, kɨ̀ nɨ nyam ɨŋgam Ŋwiə̀ mbɨ mɨghab. Àyɨə ɨchî nɨ tɨə ghà rəsìʼ əsaŋ əsaŋ, tɨ̀ wɨə chwiə ni bə̂d kyerɨ ni ɨnû mbe nɨ tɨə ghɨ̀ə̀ yɨ ɨnû nɨ bɔŋ ɨfě Ŋwiə̀.

³ À mɨ yeʼ nɨ ngywɨ̌ kən ɨkə̂n chɔ̀m, njɨ zɨə kən àmei əmbɨ ə bə̂d mbe nɨə nimə.

⁴ Mbə̀ zə ni ŋwìə̀ we rɨŋga ɨsɨg wɔ̂ fə kən fîŋ bə̂d mbe nɨ chəi mbɨ ben ə Kristo, ɨmbə̀ʼ tɨ mbɨ zə ə ɨzeŋɨ zeŋɨ rɨ ənɨ ɨkə̂n chɔ̀m ɨmbə̀ʼ Kristo. Kristo wɨ ɨghabɨ ə Ŋwiə̀.

⁵ Chəi tɨə ghà ɨmbə̀ʼ a ɨnyod. Tɨ̀ wɨə ghàə̀ yeʼ ni Yeso Kristo yɨ Ə̀nùŋɨ̀sɨg. Tɨ̀ wɨə bə̀ ghàə̀ ni tɨ̀ yɨ ɨ̀bòʼò ɨ nən ɨmbə̀ʼ ə Yeso.

⁶ Ŋwiə̀ we nɨ nyaʼa gha ni, “Ɨzeŋɨ zeŋɨ te ɨŋga ɨsɨ firɨ,” fə te ɨŋga ta fîŋ ɨmbə̀ʼ naʼ ɨzeŋɨ zeŋɨ ɨ na, ɨmbə̀ʼ tɨ̀ kyerɨ ɨzeŋɨ zeŋɨ Ŋwiə̀ we nɨə te ənɨ ɨfě Kristo.

⁷ Àyɨə tɨ̀ berɨ mbɔ̂n zɔ̂ ɨŋga rɨkyiŋ si, ɨmbə̀ʼ zɨə zeŋ ni ɨka kyeŋ wɔ̂ yɨ wɨ Ŋwiə̀, kaʼi wa.

⁸ Ŋgəʼ zɨə nyɨ ɨgwɨ na ənɨ mɨnə̂njɨ̀ jìm, àyɨə chəi zɨə zwiirɨ əwa. Mba ɨtu mbɨə bùùrɨ̀ə̀, àyɨə chəi tɨ̀ kɨrɨ bɔd.

⁹ Bə̂d mbɨə nwèndɨ̀ ta rɨkyerɨ-ɨwu, àyɨə chəi Ŋwìə̀ waʼ əwa. Bə̂d mbɨə gywɨ̀ əwa tum ə si, àyɨə chəi ənɨ tɨ mbɨ zwiirɨ əwa.

¹⁰ Bə̂d mbɨə kə̀b zwiirɨ əwa, əne yɨ ni tɨ̀ wɨə bèʼ ɨkwɨ ɨvɨ we nɨ Yeso nyaʼa kwɨ ɨŋga ta nyamnyod, ɨmbə̀ʼ bə̂d bə zə ɨ̀tènɨ̀ məd ɨŋga na.

¹¹ Ənɨ tɨ̀ yeʼ ɨka, tɨ̀ wɨ ɨchû ɨvɨ ənɨ mɨ̀nyùmə̀ jìm ɨmbə̀ʼ ə Yeso, ɨmbə̀ʼ bə̂d zə ɨ̀tènɨ̀ məd ɨŋga ta nyamnyod te nɨə kwɨə.

¹² Əne tɨ̀ wɨ ɨchû ɨvɨ ɨghəm jìm, ɨmbə̀ʼ mbə̀ jɨg ɨ̀tènɨ̀.

¹³ Tɨ̀ berɨ ɨkwɨ ɨbenɨ mɔʼ mbɨ məd we nɨ nyaʼa ŋwaʼnɨ ni, “Mə nyaʼa benɨ, əne mə fə ghàm.” Mba bə̂ tɨ bə̀ benɨ, əne tɨ̀ wɨə ghàmə̀.

¹⁴ Tɨ̀ kyerɨ ni Ŋwìə̀ we nɨ nyaʼa zwemnɨ Ə̀nùŋɨ̀sɨg Yeso bɨrɨ bɨ zwemnɨ əwa mbɨ Yeso. Wɨ̀ bɨrɨ nɨŋ əwa mbɨ nən wò ɨfě məd.

¹⁵ Ɨnû mbɔ̂ jìm yɨ ɨmbə̀ʼ weerɨ əwən, ɨmbə̀ʼ ɨ̀chɔ̀m we nɨə jàŋə̀ wò əmbɨ ə bə̂d mɨ̀nɔnɔʼ, ɨ we tɨ̀ wɨ ghɨ̀ ni bə̂d naʼ məben-əwe əmbɨ ə Ŋwiə̀, ɨmbə̀ʼ wumnɨ əməd.

Tɨ̀ mɨ benɨ, tɨ bɨrɨ chub ɨchî chɔ̀m

¹⁶ Chəi ta fîŋ ə bɔrə. Ka à bè yeʼi ni ta nyamnyod tɨə chə̀ə̀rɨ̀ə̀ wòə̀, àyɨə Ŋwìə̀ wɨə nàʼ ɨ̀tènɨ̀ fi ɨ na ɨni jìm.

¹⁷ Ka ŋgəʼ kwa kwa zɔ̂ nɨ tɨə zəə bɨrɨ tandɨ i. Ɨ zɨə tekɨ əwa ni mbɨ naʼ ɨwumnɨ we nɨ ten i koŋ ɨ na. Ɨwumnɨ we ə chè ŋgəʼ zɔ̂ jìm.

¹⁸ Əne yɨ ni chəi tɨə nèŋ ɨghɨ mbe nɨ bə̂d ə zəə. Tɨ̀ wɨə nèŋə̀ yeʼ mbe nɨ chəi ənɨ tɨ̀ bə̂d zə, ɨmbə̀ʼ ɨghəm nɨ ka ɨghɨ mbe nɨ bə̂d ə zəə bɨrɨ tandɨ i, àyɨə mbe nɨ chəi ənɨ tɨ̀ bə̂d zə bɨrɨ ten i koŋ.