2 Kɔrèn 13 - Meta’

Tɨpatɨ nɨ sɨ nwìə̀

¹ Tɨ̀nîn yɨ ɨghəm nɨ pe tad nɨ mɨə yeʼe əsɨ nən. Ə zɨ ɨŋga Ə̀ŋwàʼnɨ̀ ə Ŋwiə̀ ni, “Mbɨ mɨ zɨ̀ ɨsaʼi ɨgun ə wə̀d mɔʼɔ, mɨ̀zərɨmbin mɨbe kɨ̀ mɨtad berɨ təm ben ni mbɨ kə̀ʼ zə ənû ze.”

² Mə nyaʼa fə patɨ bə̂d mbe nɨ nyaʼa ghɨ ɨnû rɨbɔ̀ŋ bə̀ patɨ bə̂d cherə ənɨ mə nyaʼa yeʼe ənɨ ɨghəm nɨ pe be. Mə yɨ əni wɨrɨə patɨ mɨ̀mə̌d tɨ̀nîn nɨ chəi əmɨ mbɨ nən, ni ənɨ mə wɨrɨ yeʼe, chəi mə bɨrɨ diirɨ mɨ̀mə̌d.

³ Ɨchî nɨ mbə̀ kəb ənweenɨ ni ɨŋgam we nɨ mɨə ghàə̀ yɨ rɨ əmbɨ ə Kristo, mə bɨrɨ chwi ɨ nən. Chəi Kristo bɔd nɨ ghɨ ənû ɨ nən, àyɨə məd wɨə fàʼə̀ kwàʼ rɨ̀kǎ əkaʼ nən.

⁴ Mbɨ nyaʼa kombɨ əməd əzed ə baʼnɨ ənɨ ə nyùmə̀ we nɨ wɨ̀ nyaʼa bɔrɨ, àyɨə ɨ wɨ ɨkǎ ənɨ ɨka Ŋwiə̀. Ɨchî nɨ tɨ̀ yeʼ ənɨ ɨfɔtɨ mbɨ məd, tɨ̀ bə̀ bɔd, àyɨə ɨchî nɨ tɨə fàʼ ɨ nən, tɨ̀ bɨrɨ chubɨ mbɨ məd ənjìm ɨka Ŋwiə̀.

⁵ Mbə̀ kwaʼnɨ ə ɨnyod mbənə mbənə zə ni mbə kɨrɨ nuŋ fîŋ ɨgun ə Kristo ə. Mbə̀ kwaʼnɨ ə ɨnyod. Chəi mbə̀ zə ni əzwî ə Yeso Kristo ə zɨ ɨŋga nən ə? Kɨrɨ ənɨ mbə fə gù ə̀kwàʼnɨ̀ ze!

⁶ Mə kaŋ kyerɨ ni mbə bɨrɨ zə ni chəi tɨ̀ kɨrɨ gu ə̀kwàʼnɨ̀ ze.

⁷ Tɨ̀nîn, tɨ̀ wɨə kɔ̀ŋgɨ̀ ə Ŋwiə̀ ni tɨ̀ mbə tɔ ghɨ ə ənû rɨbɔ̀ŋ. Tɨ̀ wɨə kɔ̀ŋgɨ̀ əne, kaʼi nɨ chwi ni tɨ̀ fə chè ə̀kwàʼnɨ̀ ze. Tɨ̀ wɨə kɔ̀ŋgɨ̀ ɨmbə̀ʼ mbə ghɨ ɨnû mbe nɨ kuʼnɨ, ka à be yeʼi ni zɨə chub ɨghabɨ ni tɨ̀ fə gù ə̀kwàʼnɨ̀ ze.

⁸ Chəi ənɨ tɨ̀ rɨ̀ ghɨ ənû ə mɔʼɔ ze nɨ chwi ni chəi tɨ̀ ghaʼ rəsìʼ, ɨmbə̀ʼ ɨghəm nɨ tɨ̀ fə təm àmei ɨgun rəsìʼ.

⁹ Tɨ̀ wɨə ghaʼə ni ənɨ tɨ̀ bɔd, mbə̀ mbɨə kàə̀. Tɨ̀ wɨə kɔ̀ŋgɨ̀ ə Ŋwiə̀ ni mbə̀ bɔŋə màànɨ̀.

¹⁰ Mə wɨə ŋwaʼnɨ ɨnû mbɔ̂ nɨ chəi əmɨ mbɨ nən, ɨmbə̀ʼ ənɨ mə̀ yeʼe, chəi mə bɨrɨ nɨŋ ɨka we nɨ Ə̀nùŋɨ̀sɨg naʼ ɨ num nya əbɔʼ nən. Ɨka we yɨ nɨ ghɨ ni mbə̀ təm kàànɨ̀, kaʼi nɨ ghɨ ni mbə̀ bɔd.

Ə̀chàʼrɨ̀ ze nɨ sɨ nwìə̀

¹¹ Mbɨ bɔŋgɔb, ɨ màànɨ̀, tɨ̀ bɨrɨ wɨrɨ zəənɨ. Mbə̀ kywɨ ənywɨ zə ni mbə̀ ghɨ mbə mɨchî bɔŋ ə. Mbə̀ zu ɨnû mbe nɨ mə buʼ ɨbɔ gha ɨ nən. Mbə̀ fɔtɨ mbə mɨchû ənɨ wɨ mɔʼ bə̀ chub ənɨ əbɔrəbɔd. Mbə mɨ ghɨ̀ əne Ŋwìə̀ we nɨ ɨghaʼi mbɨ əbɔrəbɔd yeʼ rɨ bɔ bɨrɨ yeʼ mbɨ nən.

¹² Mbə̀ chaʼrɨ wə̀d mɔʼ mɔʼ kwàʼ ɨchî chɔ̀m. Mbə̀ chaʼrɨ əne chwi ɨghaʼi we nɨ yeʼ əkaʼ bə̂d Kristo.

¹³ Bə̂d Ŋwiə̀ mɨjìm mbɨə chàʼrɨ̀ əwən.

¹⁴ Ɨ̀chɔ̀m Ə̀nùŋɨ̀sɨg Yeso Kristo, ɨghaʼi Ŋwiə̀ mbɨ ɨfɔtɨ we nɨ tɨ̀ berɨ mbɨ Əzwî ə Zeŋɨ yeʼ mbɨ mbə̀n mɨjìm.