2 Kɔrèn 12 - Meta’

Pɔ̂l nyaʼa zə tɨ̀taanɨ njə̀m bə̀ zə ɨghɨ mbe nɨ Ŋwìə̀ nyaʼa chwi ɨ bɔ

¹ Mə berɨ goŋ ɨgɔ̂. Ka à bè yeʼi ni chəi njìm əŋgu, àyɨə mə bɨrɨ wo ɨmbì ghà ɨghɨ mbe nɨ mə nyaʼa zə ɨŋga tɨ̀taanɨ njə̀m bə̀ ghà mbe nɨ Ə̀nùŋɨ̀sɨg nyaʼa chwi ɨ num.

² Mə kyerɨ mbaŋə̀ Kristo mɔʼɔ, nɨ ɨghəm ɨwu fə che wum chɔ̀b rɨkwè, nɨ Ŋwìə̀ nyaʼa ghɨ̌ wɨ̀ wò ɨkaŋ we nɨ che rɨkaŋ jìm. Kɨ̀ wɨ̀ nyaʼa wo ənɨ i nyamnyod kɨ̀ ənɨ əzwî, chəi mə kyerɨ, à yɨə Ŋwìə̀ kyerɨ.

³ Mə kyerɨ ni Ŋwiə̀ nyaʼa ghɨ mbaŋə̀ zɔ̂ wo ə Paradaìs, kɨ̀ à kɨ ənɨ i nyamnyod, kɨ̀ à kɨ ənɨ əzwî, chəi mə kyerɨ, à yɨə Ŋwìə̀ kyerɨ.

⁴ Mə kyerɨ ni wɨ̀ nyaʼa wò ə Paradaìs pè zu ɨnû nɨ chəi ənɨ tɨ wə̀d ghà, nɨ yeʼ ɨnû nɨ chəi mbɨ ben ni wə̀d mɨ̀sɔŋɨchù wɨrɨ ghà.

⁵ Mə bɨrɨ goŋ ɨgɔ̂ ɨmbə̀ʼ ə mbaŋə̀ ɨghabɨ zɔ̂, àyɨə chəi mə bɨrɨ goŋ ɨgɔ̂ ɨmbə̀ʼ mɨ ɨghəm. Mə bɨrɨ goŋ àmei ɨmbə̀ʼ ɨnû mbe nɨ chwiə ni mə bɔd.

⁶ Mə mɨ kəb goŋ ɨgɔ̂, chəi mə bɨrɨ yeʼ əneŋ, ɨmbə̀ʼ ɨghəm nɨ mə bɨrɨ gha rəsìʼ. Àyɨə chəi mə bɨrɨ goŋ ɨgɔ̂, ɨmbə̀ʼ tɨ wə̀d mɔʼɔ kɔndɨ i ni mə chè wə̀d we nɨ mə̀ yeʼ wɨwən. Wɨ̀ neŋ yeʼ ɨnû mbe nɨ mɨə ghɨ̀ə̀ kɨ̀ mbe nɨ mɨə ghàə̀.

⁷ Ɨ ghɨ ni tɨ mə nɔ əmɨ ɨnyod ɨmbə̀ʼ ɨnû yiirɨ kyeŋ mbe nɨ Ŋwìə̀ nyaʼa chwi ɨ num, wɨ̀ nyaʼa zɨ əwɔn ɨŋga mɨ nyamnyod, nɨ yeʼ əghɨ nɨ Satàn nyaʼa tom ni zɨə chə əmɨ, ɨmbə̀ʼ tɨ mə nɔ əmɨ ɨnyod.

⁸ Mə nyaʼa buʼ ɨbɔ əmbɨ Ə̀nùŋɨ̀sɨg ɨghəm tad ni wɨ̀ chɨ əwɔn zɔ̂.

⁹ Àyɨə wɨ̀ nyaʼa wììrɨ̀ ɨ num ni, “Ɨ̀chɔ̀m we nɨ mɨə ghɨ̀ə̀ ə kuʼ ɨ ne, ɨmbə̀ʼ ɨghəm nɨ wə̀d bɨrɨ zə mɨ ɨka jìm ənɨ wɨ̀ fə bɔrɨ.” Əne mə bɨrɨ jeŋgɨ ghaʼ ɨmbə̀ʼ ɨchî nɨ mə bɔrɨ, ɨmbə̀ʼ ɨka Kristo we tɨ̀ wɨ chub ɨŋga num.

¹⁰ À yɨ əton nɨ ɨmbə̀ʼ ə Kristo, mɨ fîŋ zɨ i ɨchî chɔ̀m mbɨ ɨghɨ mbe nɨə ghɨ̀ ni mə bɔd, mbɨ mɨzɔ̂m, mbɨ ɨnû mbe nɨə nyèm əmɨ, mbɨ ɨchî nɨ bə̂d ə nwèndɨ̀ tum rɨkyerɨ-ɨwu fɔrɨ mbɨ ɨchî nɨ ŋgəʼ nɔnɔʼ ə nyɨ ə ɨgwɨ num, ɨmbə̀ʼ ɨghəm nɨ ənɨ mə bɔrɨ, mə wɨ ɨkǎ.

Pɔ̂l nyaʼa zɨ̀ fîŋ ɨgwɨ ə bə̂d Kristo mbe nɨ yeʼ ə Kɔrèn

¹¹ Mə fə bèŋ ənɨ əneŋ! À yɨə mbə̀nə nyem əmɨ ni mə̀ ghɨ əne. Njɨ à yɨə mbə̀nə nyaʼa berɨ gha ni mə wɨə fàʼ ɨchî nɨ kuʼnɨ. Ka à bè yeʼi ni mə yɨ əghɨ əko, àyɨə chəi mə kə chè “bə̂d tom Kristo mbe nɨə ghàə̀ ni mbə chè mbɨ mɨjìm.”

¹² Mə nyaʼa nɨŋ ɨyim fîŋ nɨ kaanɨ ghɨ̀ ɨnweenɨ-ɨnû, ghɨ̀ ɨnû yiirɨ bə̀ ghɨ̀ ɨnû kyeŋ kyeŋ əkaʼ nən ɨ chwi ni mə yɨə wə̀d tom Kristo rəsìʼ.

¹³ Mə wa nyaʼa ghɨ ənû ə mɔʼɔ ɨŋga rɨfetɨ bə̂d Kristo cherə nɨ chəi mə nyaʼa ghɨ ɨ nən ə? Ɨmbə̀ʼ àmei ni chəi mə nyaʼa chə əwən ə? Əze ə mɨ bə, mbə̀ waʼ mbɨ ɨnû rɨbɔ̀ŋ!

¹⁴ Mə wɨə tekɨ mɨ ɨnyod nɨ yeʼe əsɨ nən ənɨ ɨghəm nɨ pe tad. Chəi mə bɨrɨ chə əwən ɨmbə̀ʼ ɨghəm nɨ chəi mə kəb ɨkab. Mə kə̀b yeʼ əwən. Kaʼi bɔn berɨ nuŋ ɨghɨ əmbɨ mbə mɨ̀mbǎʼ fɔrɨ əmbɨ mbə mɨ̀nɨ̌ŋ. À yɨə mɨ̀mbǎʼ mbɨ mɨ̀nɨ̌ŋ berɨ nuŋ ɨghɨ əmbɨ mbə bɔn.

¹⁵ Mə bɨrɨ kaŋ ghaʼ nɨ naʼ ɨghɨjìm mbe nɨ mə berɨ bə̀ nàʼ mɨ ɨnyod ɨ nən. Mə mɨ ghaʼ əwən əku, mbə wa bɨrɨ ghaʼ əmɨ àmei rɨpiî ə?

¹⁶ Mbə bɨrɨ kaŋ ben ni chəi mə nyaʼa chə əwən. Àyɨə bə̂d mɔʼɔ rəbɔʼ nən nyaʼa ghà ni mə wɨə nyaʼə ghɨ̀ kòb tambɨ əwən.

¹⁷ Mə wa nyaʼa chè ənjìm wə̀d mɔʼɔ rəbɔʼ mbe nɨ mə nyaʼa tom ɨ nən nyèm əwən ɨmbə̀ʼ jɨg mbə ɨghɨ ə?

¹⁸ Mə nyaʼa buʼ ɨbɔ əmbɨ Taitùs ni wɨ̀ yeʼe əsɨ nən. Mə nyaʼa bə̀ tom ə wə̀d Kristo cherə mbɨ məd. Taitùs wa nyaʼa nyèm əwən ɨmbə̀ʼ jɨg əwən ə? Tɨ̀ rɨ wa nyaʼa faʼ a ənɨ əzwî ə mɔʼ ə? Tɨ̀ rɨ wa nyaʼa ghɨ a ɨnû ənɨ ɨnə̂njɨ̀ mɔʼ ə?

¹⁹ Mbə mbɨə wa kə̀ʼə̀ kɔndɨə ni ənɨ ə nyùmə̀ wɔ̂ jìm, tɨ̀ wɨə kə̀ʼə̀ chɨ̀ ɨnû rɨ ɨgwɨ na ɨfě nən ə? Tɨ wɨə kə̀ʼə̀ ghàm ɨfě Ŋwiə̀ ɨghabɨ ə bə̂d nɨ yeʼ ənɨ ɨfɔtɨ mbɨ Kristo. Mbɨ bɔŋgɔb nɨ mə̀ ghaʼi kwàʼ rɨŋgəʼ, ɨghɨjìm mbe nɨ tɨə ghɨ̀ə̀ yɨ nɨ ghɨ ni mbə̀ təm kàànɨ̀.

²⁰ Mə wɨə bɔə ni mə mɨ yeʼe, chəi mə bɨrɨ zə əwən ɨchî nɨ mə̀ kəb ni mbə̀ yeʼ ə. Mə wɨə bə̀ bɔə ni chəi mbə bɨrɨ zə əmɨ ɨchî nɨ mbə̀ kəb ni mə yeʼ ə. Mə wɨə bɔə ni ɨghə̀m mə bɨrɨ zə bə̂d nɨə tàŋə̀, zə mbe nɨə ghɨ̀ ə̀dìì, zə mbe nɨə sə ɨtəm, zə mbe nɨə siə, zə mbe nɨə chəkɨ rɨkum mbɨ cherə, zə mbe nɨə ghɨ̀ mɨniə, zə mbe nɨə tərə bə̀ zə mbe nɨə bùùrɨ̀ ɨsɨ.

²¹ Mə wɨə bɔə ni ənɨ mə̀ wɨrɨ yeʼe, Ŋwìə̀ we nɨ mɨə wumnɨə bɨrɨ swi əmɨ ɨfě nən. Mə wɨə bə̀ bɔə ni mə bɨrɨ dì ɨmbə̀ʼ bə̂d mɨ̀nɔnɔʼ mbe nɨ nyaʼa kweʼ ghɨ̀ ɨnû rɨbɔ̀ŋ àyɨə chəi mbɨ kɨrɨ beŋ tə fîŋ tɨ ənɨ ɨnyɔɔnɨ-ɨnû, tɨ ənɨ ɨfabrɨ-ɨnû bə̀ fɔrɨ tɨ ənɨ ɨnyamnɨ-ɨnû mbe nɨ mbɨ nyaʼə ghɨ̀ə̀.