2 Kɔrèn 1 - Meta’

Ə̀chàʼrɨ̀

¹ À yɨə mɔ̌ Pɔ̂l, nɨ mə̀ yeʼ wə̀d tom Kristo Yeso ɨchî nɨ Ŋwìə̀ kəbɨ, ŋwaʼnɨ ə̀ŋwàʼnɨ̀ zɔ̂. Mə wɨə ŋwàʼnɨ̀ əmbɨ ɨfetɨ bə̂d Ŋwiə̀ we nɨ yeʼ ə Kɔrèn. Mə wɨə bə̀ ŋwàʼnɨ̀ əmbɨ ə bə̂d Ŋwiə̀ mɨjìm mbe nɨ yeʼ əbà əbeŋ ze rɨ ə Àkàiyà. Mɔ̌ mbɨ Timotì nɨ yeʼ wa aŋgɔb chàʼrɨ̀ əwən.

² Ŋwiə̀ a Mbǎʼ mbɨ Ə̀nùŋɨ̀sɨg Yeso Kristo ghɨ ɨ̀chɔ̀m ənɨ ə nən bə̀ nàʼ əbɔrəbɔd ɨ nən.

Pɔ̂l nàʼ məben-əwe əmbɨ ə Ŋwiə̀

³ Tɨ̀ yiirɨ ə Ŋwiə̀ nɨ yeʼ Mbǎʼ a Ə̀nùŋɨ̀sɨg Yeso Kristo. Məd yɨə Mbǎʼ nɨə dììrɨ̀ə̀ bə̂d. Məd yɨə bə̀ ə Ŋwìə̀ we nɨə nəərɨə bə̂d ənɨ mɨ̀nyùmə̀ jìm.

⁴ Məd wɨə nəərɨ əwa ənɨ mɨ̀nyùmə̀ jìm mbe nɨ tɨ̀ yeʼ əŋgəʼ, ɨmbə̀ʼ mbǎ mbe tɨ̀ rɨ bə̀ nəərɨ bə̂d mbe nɨ yeʼ ɨŋga tɨkwɨrɨ ŋgəʼ jìm. Tɨ̀ nəərɨ mɨ̀mə̌d ɨchî nɨ Ŋwìə̀ ə bə̀ nəərɨ əwa.

⁵ Tɨ̀ wɨə zəə ŋgəʼ ənɨ ɨnû nɔnɔʼ ɨchî nɨ Kristo nyaʼə bə̀ zəə, əne ənjìm ə Kristo, Ŋwìə̀ wɨə nəərɨ əwa ənɨ mɨnə̂njɨ̀ nɔnɔʼ.

⁶ Tɨ̀ mɨ yeʼə zəə ŋgəʼ, njɨ tɨ̀ wɨə zə ɨmbə̀ʼ əwən, ɨmbə̀ʼ Ŋwìə̀ nəərɨ əwən bə̀ chɨ̀ əwən rəŋgəʼ. Ŋwìə̀ mɨ yeʼə nəərɨ əwa, njɨ wɨ̀ bɨrɨ bɨ nəərɨ əwən, ɨmbə̀ʼ mbə nyiʼə bə̀ yim fîŋ əton ɨkwɨ ŋgəʼ we nɨ mbǎ ə bə̀ zəə.

⁷ Chəi əghɨ ə mɔʼɔ nɨ tɨ̀ zɨə chìʼ ɨkɔndɨ we tɨ̀ nùŋ ɨgwɨ nən, ɨmbə̀ʼ ɨghəm nɨ tɨ̀ kyerɨ ni ɨchî nɨ mbə̀ə zə ɨkwɨ ŋgəʼ ze nɨ mbǎ ə bə̀ zəə, yɨə bə̀ ɨchî nɨ Ŋwìə̀ ə nəərɨ əwən ɨchî nɨ wɨə bə̀ nəərɨ əwa.

⁸ Mba bɔŋgɔb, tɨ̀ kə̀b ni mbə kyerɨ ŋgəʼ ze nɨ tɨ̀ nyaʼə zə ɨŋga əbà əbeŋ ze rɨ ə Esià. Ɨkom we nɨ mbɨ nyaʼa zɨ ɨgwɨ na nyaʼa kaŋ faŋ bə̀ nìd kəb nyem əwa. Wɨ̀ nyaʼa ghɨ̀ tɨ̀ kɔndɨ ni chəi tɨ̀ bɨrɨ wɨrɨ chub ɨkǎ.

⁹ À yɨ rəsìʼ ni ə zɨə nyaʼa ɨghabɨ ni mbɨ nyaʼa fə sob ni mbɨ zwiirɨ əwa. Ənû zɔ̂ ə nyaʼa ghɨ̀ ɨmbə̀ʼ tɨ̀ rɨ zɨ a mba ɨnû ɨŋga ta rɨkyerɨ-ɨbɔ. Zɨə nyaʼa ghɨ̀ ɨmbə̀ʼ tɨ̀ zɨ mba ɨnû yeʼ ɨŋga rɨkyerɨ-ɨbɔ Ŋwìə̀ we nɨə zwemnɨə bə̂d.

¹⁰ Məd we nɨ nyaʼa chɨ əwa rɨŋga ŋgəʼ rɨbɔ̀ŋ ze nɨ nyaʼa nɨrə zwiirɨ əwa, bɨrɨ kɨrɨ wo ɨmbì chɨ əwa. Tɨ̀ fə nuŋ ta rɨkɔndɨ ɨgwɨ məd ni wɨ̀ bɨrɨ kɨrɨ yi chɨ əwa rəŋgəʼ

¹¹ ɨchî nɨ mbə̀ə kɔ̀ŋgɨ̀ ə Ŋwiə̀ ɨgwɨ na. Mbə mɨ ghɨ̀ əne, bə̂d mɨ̀nɔnɔʼ bɨrɨ naʼ məben-əwe əmbɨ ə Ŋwiə̀ ɨmbə̀ʼ əwa, ɨmbə̀ʼ ɨghəm nɨ wɨ̀ bɨrɨ wiirɨ ə̀kɔ̀ŋgɨ̀ ə bə̂d mɨ̀nɔnɔʼ, əne nàʼ əghɨ ze nɨ mbɨ kɔŋgɨ əməd nɔn.

Pɔ̂l nyaʼa kwepɨ ɨnû mbe nɨ wɨ̀ nyaʼa taŋɨ

¹² Tɨ̀nîn, ənû ze nɨ tɨə goŋ ɨgɔ̂ ɨgun yɨ ni, ta fîŋ ə zeŋ ni tɨ̀ wɨə ghɨ̀ ɨnû nɨ zeŋɨ mbɨ ni tɨ̀ wɨə bə̀ ghɨ̀ ɨnû mbe nɨ yeʼ mbɨ rəsìʼ ɨchî nɨ tɨ̀ yeʼ ɨŋga ɨsɨg, màànɨ̀ ɨchî nɨ tɨ̀ yeʼ əkaʼ nən. À yɨ ɨ̀chɔ̀m we nɨ Ŋwìə̀ nyaʼa ghɨ ənɨ ə num nyaʼa ghɨ ni mə̀ ghɨ əne, kaʼi ɨwe bə̂d mɨ̀sɔŋɨchù.

¹³ Tɨ̀ nyaʼa ŋwàʼnɨ̀ àmei ɨnû mbe nɨ mbə mɨ foŋ, mbə ɨtu bɨrɨ zeŋ. Mɨ ɨkɔndɨ yɨ ni mbə bɨrɨ jeŋgɨ kyerɨ ɨnû mbe ɨjìm.

¹⁴ Chəi mbə̀ kɨrɨ jeŋgɨ kyerɨ əwa. Mbə bɨrɨ jeŋgɨ kyerɨ mbə ɨtu zeŋ əni ze nɨ Ə̀nùŋɨ̀sɨg Yeso bɨrɨ wɨrɨ yeʼe, ɨmbə̀ʼ mbə̀ goŋ ɨgɔ̂ ɨmbə̀ʼ əwa ɨchî nɨ tɨə bə̀ goŋ ɨmbə̀ʼ əwən.

¹⁵ Ənɨ mə̀ nyaʼa kyerɨ əne, mə nyaʼa kə̀b ni mə bɨrɨ be yeʼe əsɨ nən ɨmbə̀ʼ mbə̀ berɨ əbɔrəbɔd ɨghəm be.

¹⁶ Mə wɨə nyaʼə kə̀bə̀ ni mə bɨrɨ chè mo əwən ənɨ mɨə wò ə Màsèdonià bə̀ fɔrɨ ənɨ mɨə wɨ̀rə̀ bə̀ndɨ̀ə̀, ɨmbə̀ʼ mbə̀ weerɨ chà əmɨ ənɨ mɨə wò ə Jùdeyà.

¹⁷ Mə wa nyaʼa taŋ ənû zɔ̂ mbɨə fîŋ rɨ̀be ɨghabɨ ə wə̀d nɨə ferɨ ferɨ ə? Mə wɨə wa taŋ ɨnû ɨchî nɨ bə̂d mɨ̀sɔŋɨchù ə taŋ ə, nɨ tɨ̀ mə ghà ni, “Ee, ee,” bə̀ wɨrɨ beŋ ghà ni, “Chə̂, chə̂” àmei əwu əwən ə?

¹⁸ Ŋwìə̀ wɨə kàʼ ɨnû bə ghɨ̀ə̀, əne ka ɨŋgam we nɨ tɨə ghà ɨ nən yɨ i ənû nɨ gha ni “Ee” kɨ̀ ənû nɨ gha ni “Chə̂,”

¹⁹ ɨmbə̀ʼ ɨghəm nɨ ka Yeso Kristo nɨ yeʼ Wan Ŋwìə̀ we nɨ mɔ̌, Sɨlvanùs mbɨ Timotì nyaʼə ghà ɨmbə̀ʼ əməd əkaʼ nən wɨə ghà i ni “Ee” bə̀ wɨrɨ beŋ ghà ni “Chə̂” àmei əwu əwən. Məd wɨə ghà àmei ni “Ee.”

²⁰ Məd yɨ we nɨə ghɨ̀ ni ɨnû jìm mbe nɨ Ŋwìə̀ kaʼi mbɨ jwɨ ənɨ rəsìʼ. À yɨ əton nɨ tɨə che ənjìm məd ghàə̀ ni, “À yɨ əne” ɨmbə̀ʼ yiirɨ ə Ŋwiə̀.

²¹ À yɨə Ŋwiə̀ ghɨ ni mbǎ mbɨ nən təm kàànɨ ɨchî nɨ tɨ̀ yeʼ ənɨ ɨfɔtɨ mbɨ Kristo. Wɨ̀ fə chɔʼ əwa ənɨ mbi bə̂d,

²² zɨ̀ ənweenɨ əməd ɨgwɨ na, bə̀ zɨ̀ e Əzwî ɨŋga ta fîŋ. Əzwî ze yɨ əghɨ rəbɔʼ mbe nɨ wɨ̀ kaʼ ni tə bɨrɨ naʼ ɨ na.

²³ Mə wɨə tɔŋ ə Ŋwiə̀ ni wɨ̀ yeʼ zərɨmbin ɨ num ni əton nɨ chəi mə nyaʼa wɨrɨ yeʼe ə Kɔrèn yɨ ni, chəi mə̀ nyaʼa kəb chəkɨ tə fîŋ.

²⁴ Chəi tɨə nyèm əwən ni mbə̀ ben ɨnû mbe nɨ tɨə ghàə̀. Tɨ̀ kyerɨ ni mbə fə nùŋ fîŋ zɨ̀ kàànɨ ɨgun ə Kristo. Àyɨə tɨ̀ wɨə fàʼə̀ mbɨ nən ɨmbə̀ʼ ɨghaʼi swi ɨŋga tə fîŋ.