1 Timotì 6 - Meta’

¹ Bə̂d Kristo mɨ̀jìm mbe nɨ yeʼ ɨ̀bòʼò berɨ naʼ ɨwumnɨ əmbɨ mbə mɨ̀mbǎʼ ə̀fàʼì ənɨ rɨkwɨ ɨnə̂njɨ̀ jìm, ɨmbə̀ʼ tɨ bə̂d mbe nɨ chəi mbɨ ben ə Kristo gha ə ɨnû rɨbɔ̀ŋ mɔʼɔ ɨmbə̀ʼ ə Ŋwiə̀ fɔrɨ ɨmbə̀ʼ ɨkə̂n chɔ̀m we nɨ tɨə ghàə̀.

² Tɨ ɨ̀bòʼò mbe nɨ berɨ mɨ̀mbǎʼ ə̀fàʼì nɨ ben ə Kristo təənɨ ə mɨ̀mbǎʼ ə̀fàʼì mbe ɨmbə̀ʼ ɨghəm nɨ mɨ̀mə̌d mɨjìm yeʼ bə̂d Kristo. Àyɨə mbɨ berɨ faʼ əmbɨ mɨ̀mə̌d kwàʼ ɨchî chɔ̀m, chè ɨchî nɨ tɨ mbɨ faʼ əmbɨ mɨ̀mbǎʼ mbe nɨ chəi mbɨ ben ə Kristo. Mbɨ berɨ ghɨ əne ɨmbə̀ʼ ɨghəm nɨ bə̂d mbe nɨ bɨrɨ jɨg njìm tɨ ənɨ ə̀fàʼì ze yɨə bə̂d nɨ ben ə Kristo nɨ bə̀ yeʼ mbe nɨ mbɨ ghaʼi kwàʼ rɨŋgəʼ. À berɨ chwi ɨnû mbɔ̂ bə̀ zə ni bə̂d Kristo beenɨ əbɔʼ.

Ɨpatɨ əmbɨ ə bə̂d mbe nɨə chwi ɨnû mɨghab

³ Wə̀d mɔʼɔ mɨ yeʼə chwi ɨnû nɨ kwepɨ rɨ ənɨ mbɔ̂, nɨ chəi wɨ̀ ben ɨŋgam rəsìʼ we nɨ a Ə̀nùŋɨ̀sɨg Yeso Kristo ghǎ, nɨ chəi wɨ̀ bə̀ ben ɨnû mbe nɨ tɨə chwi ɨmbə̀ʼ ɨchî nɨ tɨ̀ bə̂d Kristo chubɨ,

⁴ wɨə nɔ̀ ɨnyod. Chəi wɨ̀ kyerɨ ənû ə mɔʼɔ. Wɨ̀ berɨ fîŋ rɨbɔ̀ŋ. Fîŋ ze zɨə ghɨ̀ ni wɨ̀ ghanə chɔbə bə̀ tàŋ ɨmbə̀ʼ əton ənɨ mɨŋgam əko mɔʼɔ. Əchɔb mbɨ ə tàŋ mbɨə yeʼe mbɨ ə̀dìì, mbɨə yeʼe mbɨ ɨnû nɨ ghabrɨ bə̂d, mbɨə yeʼe mbɨ ənû nɨ gham ɨnû rɨbɔ̀ŋ ɨmbə̀ʼ bə̂d cherə, mbɨə yeʼe mbɨ ɨnû nɨ kɔndɨ ɨnû rɨbɔ̀ŋ ɨmbə̀ʼ bə̂d cherə,

⁵ bə̀ yeʼe mbɨ ənû nɨ ghɨ ni əchɔb ə kɨə gùə̀ əkaʼ bə̂d mbe nɨ chəi ənû ə chɔ̀m ɨŋga fîŋ tɨ mɨ̀mə̌d fɔrɨ əkaʼ mbe nɨ chəi mbɨə ghà rəsìʼ. Ɨ mbɨə kɔndɨə ni ənû ə Ŋwiə̀ yɨ ɨnə̂njɨ̀ nɨ tɨ̀ mbɨ chè berɨ ɨkab.

⁶ Ənû ə Ŋwiə̀ ze tɨ̀ zɨə ghɨ̀ ni wə̀d berɨ ɨkab. Wɨ̀ bɨrɨ berɨ ɨkab əwù ze nɨ wə̀d ben ni ɨghɨ mbe nɨ tə berɨ ə kùʼ.

⁷ Əton yɨ ni chəi tɨ̀ nyaʼa yeʼe ɨŋga ɨsɨg mbɨ əghɨ ə mɔʼɔ. Chəi tɨ̀ bɨrɨ bɨ nɨŋ əghɨ ə mɔʼɔ jwɨ̀ rɨŋga ɨsɨg mbɨ əzɨ əwən.

⁸ Əne tɨ̀ mɨ berɨ ɨghɨjɨg bə̀ berɨ ngywɨ̌, mbe ə kùʼ ɨ na.

⁹ Àyɨə bə̂d mbe nɨə kəb berɨ ɨkab bɨrɨ nyɨ ɨŋga ə̀kwàʼnɨ̀ əne feŋ ɨŋga ətam ze nɨ bɨrɨ ghɨ ni mbɨ ghɨ ɨnû ɨneŋ nɔnɔʼ bə̀ ghɨ̀ ɨnû rɨbɔ̀ŋ mbe nɨ nyamnyod tɨ mɨ̀mə̌d ə feenɨə. Ɨnû rɨbɔ̀ŋ rəŋgu mbe tɨ mbɨ chəkɨ mɨ̀mə̌d bə̀ nimnɨ mɨ̀mə̌d,

¹⁰ ɨmbə̀ʼ ɨghəm nɨ ənû nɨ ghaʼ ɨkab yɨ əsɨ nɨ tɨkwɨ ɨnû rɨbɔ̀ŋ jìm ə jwɨ̀ rəŋgu. À yɨ ənû nɨ beenɨ əbɔʼ ɨkab ze ə ghɨ̀ ni bə̂d mɨ̀nɔnɔʼ waʼ ɨbenɨ, əne ghɨ̀ ə̀kə̀nɨ̀ ə swi ɨŋga fîŋ tɨ mɨ̀mə̌d ɨmbə̀ʼ ɨchî nɨ mbɨə zəə ŋgəʼ.

Pɔ̂l nyaʼa kəərɨ ə Timotì

¹¹ À yeʼ ɨmbə̀ʼ əwe, àwɔ̀ wə̀d Ŋwìə̀, fə ton ɨnû mbɔ̂ jìm. Ghɨ yeʼ ənû mbe nɨ kuʼnɨ bə̀ ghɨ̀ yeʼ mbe nɨ Ŋwìə̀ kəbɨ. Nuŋ fîŋ ɨgun ə Kristo, ghaʼ bə̂d, chi ɨnû bə̀ berɨ ɨbɔtɨ fîŋ.

¹² Kaŋ zɔ̀ŋ ɨchî chɔ̀m ɨmbə̀ʼ ɨbenɨ we nɨ à nuŋ ɨgun ə Kristo. À berɨ kywɨ ənywɨ kwàʼ rɨkǎ ɨmbə̀ʼ jɨg ɨ̀tènɨ̀ rɨ mì. Ŋwìə̀ nyaʼa tɔŋ əwe ni à jɨg ɨ̀tènɨ̀ we ənɨ à nyaʼa ben ɨfě mɨ̀zərɨmbin nɔnɔʼ ni àwɔ̀ yɨə wə̀d Kristo.

¹³ Ɨfě Ŋwìə̀ we nɨə nàʼ ɨ̀tènɨ̀ əmbɨ ɨghɨjìm fɔrɨ ɨfě Kristo Yeso we nɨ nyaʼa gha rəsìʼ ɨfě Pontiùs Pailèt, mə ghà ɨ ne ni,

¹⁴ ghɨ ɨnû jìm mbe nɨ Ŋwìə̀ kəbɨ pè əni ze nɨ Ə̀nùŋɨ̀sɨg Yeso Kristo bɨrɨ wɨrɨ yeʼe. À mɨ ghɨ̀ əne, chəi wə̀d mɔʼɔ bɨrɨ gha rɨbɔ̀ŋ ɨmbə̀ʼ əwe, kɨ̀ bè zɨ̀ ənû ɨgwɨ ne.

¹⁵ Ənɨ nyùmə̀ kuʼu, Ŋwìə̀ bɨrɨ ghɨ ni Kristo wɨrɨ yeʼe. Ŋwìə̀ yɨ we nɨ bə̂d məd ə wumnɨə. Àmei məd yeʼ Ə̀tùmbɨ̀ ɨsɨg nɨ yeʼ Ɨfɔ̂n ɨgwɨ mɨfɔ̀n mbɨ Ə̀nùŋɨ̀sɨg ɨgwɨ mɨ̀-ə̀nùŋɨ̀sɨg.

¹⁶ Àmei məd we mɔʼ nɨ chəi wɨ̀ bɨrɨ nɔ kwɨ. Məd wɨə chub ɨŋga ɨzeŋɨ zeŋɨ we nɨ chəi ənɨ tɨ wə̀d tindɨ ɨban. Chəi wə̀d mɔʼɔ kweʼ zə əməd. Chəi wə̀d mɔʼɔ bɨrɨ nɔ zə əməd. Ɨsɨg jìm wumnɨ əməd, məd bə̀ tumbɨ ɨsɨg mbɨ ɨka we nɨ ten i koŋ. À yɨ əne.

¹⁷ À yeʼ ɨmbə̀ʼ bə̂d mbɔ̂n mbe nɨ yeʼ ɨŋga ɨsɨg wɔ̂, gha əmbɨ mɨ̀mə̌d ni tɨ mbɨ nɔ ə ɨnyod, kɨ̀ bè nùŋ tə rɨkɔndɨ ɨgun mbɔ̂n ze nɨə che i che. Mbɨ nuŋ rɨkɔndɨ yeʼ ɨgun ə Ŋwìə̀ we nɨə nàʼ ɨghɨ ɨ na ə̀bù-ə̀bù. Ɨ wɨə nàʼ ɨmbə̀ʼ tɨ chub ɨchî chɔ̀m.

¹⁸ Gha əmbɨ mɨ̀mə̌d ni mbɨ ghɨ̀ tɨkwɨrɨ chɔ̀m jìm bə̀ ghà ni mbɨ saŋnɨ mbɨ ni mbɨ naʼ ɨghɨ əmbɨ ə bə̂d mbe nɨ kwaŋ ɨghɨ.

¹⁹ Mbɨ mɨ yeʼə ghɨ̀ ɨnû mbɔ̂, njɨ mbɨ fə zì əchɨ nɨ kaanɨ ɨmbə̀ʼ ɨghɨ mbe nɨ mbɨ bɨrɨ berɨ əwu rənjìm. Mbɨ bɨrɨ bɨ jɨg ɨ̀tènɨ̀ we nɨ yeʼ wɨ rəsìʼ.

²⁰ Àwɔ̀ Timotì, jeŋgɨ yim ɨnû mbe nɨ Ŋwiə̀ zɨ ɨŋga te rɨkyerɨ-ɨbɔ. Tɨrə̀ zɨ e ətu ənɨ mɨŋgam mbe nɨ chəi mbɨ berɨ ənû nɨ ghɨ̀ mbɨ ə Ŋwiə̀. Tɨrə̀ zɨ e ətu ənɨ mɨŋgam əko mɔʼɔ mbe nɨ bə̂d ə taŋ ɨgun, nɨ mbɨə ghà ni à yɨ ɨwe, àyɨə kaʼ à yɨ i ɨwe.

²¹ Bə̂d mɔʼɔ mbɨə ghàə̀ ni mbə berɨ ɨwe, əze ə fə ghɨ ni mbɨ waʼ ɨbenɨ we nɨ mbe nyaʼa be berɨ. Ŋwìə̀ ghɨ ɨ̀chɔ̀m ənɨ mbə̀n mɨjìm.