1 Timotì 3 - Meta’

Ə̀fàʼì ɨtu mbe nɨə chà ɨfetɨ bə̂d Kristo

¹ Ɨŋgam wɔ̂ yɨ ɨŋgam rəsìʼ ni: mbaŋə̀ mɨ kaŋ nùŋ ɨŋga i fîŋ ni tə kəb yeʼ ətu ɨgwɨ ə bə̂d Kristo, əne yɨ ni wɨ̀ fə nuŋ i fîŋ ni tə bɨrɨ faʼ ə̀fàʼì ɨwumnɨ.

² Əne ətu nɨə chà ɨfetɨ bə̂d Kristo berɨ yeʼ wə̀d nɨ chəi bə̂d ə ghàmbɨ̀ əməd. Wɨ̀ berɨ berɨ àmei əyi mɔʼ. Wɨ̀ berɨ yeʼ əbɔtɨ ə wə̀d. Wɨ̀ berɨ kyerɨ ɨchî nɨ yimbɨ i ɨnyod. Wɨ̀ berɨ yeʼ wə̀d nɨə wumnɨ i ɨnyod. Wɨ̀ berɨ nɨŋ bə̂d rɨ̀sɔ̀ʼɔ̀ ɨŋga i nəb. Wɨ̀ berɨ kyerɨ ɨchî nɨ chwi ɨnû.

³ Tɨ wɨ̀ yeʼi wə̀d nɨə nɔə mɨnoʼ beə. Tɨ wɨ̀ yeʼi wə̀d nɨ ghaʼ ənû nɨ zɔ̀ŋ. Wɨ̀ berɨ yeʼ wə̀d nɨə bɔtɨə, kaʼi wə̀d nɨə tàŋə̀ mbɨ ə bə̂d. Tɨ wɨ̀ yeʼi wə̀d nɨ ghaʼ ɨkab.

⁴ Wɨ̀ berɨ kyerɨ ɨchî nɨ yim bə̂d mɨ̀jìm mbe nɨə chub ɨŋga nəb məd. Wɨ̀ berɨ ghɨ̀ ni bɔn məd zuunɨ əməd bə naʼ ɨwumnɨ ɨ bɔ ənɨ mɨnə̂njɨ̀ jìm.

⁵ Mbaŋə̀ mɨ ton kyerɨ i ɨchî nɨ yim bə̂d mbe nɨ yeʼ ɨŋga nəb məd, njɨ wɨ̀ kɨə wò chè rɨ ye bɔŋ nəŋgɨ ɨfetɨ bə̂d Ŋwiə̀ ə?

⁶ Tɨ wɨ̀ yeʼi wə̀d nɨ cherə ben ənû ə Kristo, ɨmbə̀ʼ tɨ wɨ̀ nɔ i ɨnyod, Ŋwìə̀ chə əməd ɨchî nɨ wɨ̀ nyaʼa chə ə Debɨ̀rə̀.

⁷ Bə̂d mbe nɨ kaʼi bə̂d Kristo berɨ gha ɨnû chɔ̀m ɨmbə̀ʼ əməd, ɨmbə̀ʼ tɨ wɨ̀ berɨ i tɨ̀nìd ətu əne feŋ ɨŋga ətam ə Debɨ̀rə̀.

Ə̀fàʼì bə̂d mbe nɨə weerɨ ɨŋga ɨfetɨ bə̂d Kristo

⁸ Bə̂d mbe nɨə weerɨ ɨŋga ɨfetɨ bə̂d Kristo berɨ bɨ yeʼ bə̂d nɨ bə̂d cherə ə wumnɨ ə. Mbɨ berɨ yeʼ bə̂d nɨ təm ɨgun rəsìʼ. Tɨ mbɨ yeʼ ə bə̂d nɨə ghàm ɨŋgam be be. Tɨ mbɨ yeʼ ə bə̂d nɨə zɨ ətu ənɨ mɨnoʼ. Tɨ mbɨ yeʼ ə bə̂d mbe nɨə ghɨ̀ ədɔʼ ənɨ ɨkab.

⁹ Mbɨ berɨ yim rəsìʼ we nɨ Ŋwìə̀ ghɨ ni bə̂d kyerɨ. Mbɨ berɨ ghɨ əne mbɨ ə fîŋ nɨ zeŋɨ.

¹⁰ Bə̂d mbe nɨ fə ben ə Kristo berɨ be zweʼrɨ mɨ̀mə̌d. Mbɨ mɨ zweʼrɨ zə ni chəi ɨgu ənû mɔʼɔ ɨgwɨ mɨ̀mə̌d, mbɨ sàŋ ni mbɨ fàʼ ɨghabɨ ə bə̂d nɨə weerɨ ɨŋga ɨfetɨ bə̂d Kristo.

¹¹ Əndəŋ əndəŋ, məyi mɨ̀mə̌d berɨ yeʼ mbe nɨ bə̂d ə bə̀ wumnɨ mɨ̀mə̌d. Tɨ mbɨ yeʼ məyi nɨə chəkɨ rɨkum bə̂d. Mbɨ berɨ yeʼ ɨbɔtɨ məyi bə̀ yeʼ məyi nɨ bə̂d nuŋ tə fîŋ ɨgwɨ mɨ̀mə̌d ənɨ ɨnû jìm.

¹² Mbaŋə̀ ze nɨə weerɨ ɨŋga ɨfetɨ bə̂d Kristo berɨ berɨ i ɨwi àmei mɔʼ. Wɨ̀ berɨ yim mbi bɔn bə̀ yim bə̂d mbe nɨə chub ɨŋga nəb məd ɨchî chɔ̀m.

¹³ Bə̂d mbe nɨə weerɨ ɨŋga ɨfetɨ bə̂d Kristo mɨ faʼ ɨchî chɔ̀m, bə̂d bɨrɨ wumnɨ mɨ̀mə̌d. Ɨ mbe tɨ̀ mbɨ ghàm mbɨ ɨka fîŋ ɨmbə̀ʼ ɨbenɨ we nɨ mbɨ berɨ ɨgun ə Kristo Yeso.

Ənû ə kyeŋ ze nɨ yeʼ ənə̀mə

¹⁴ Ə zɨ ɨŋga mɨ ɨkɔndɨ ni mə bɨrɨ zambɨ yeʼe əsɨ ne. Àyɨə mə wɨə ŋwàʼnɨ̀ ɨnû mbɔ̂ ɨ ne ɨmbə̀ʼ

¹⁵ à mɨ yeʼ nɨ mə̀ tanɨ, à we tɨ à kyerɨ ɨchî nɨ tɨ̀ bə̂d ghɨ̀ ɨnû ɨŋga ɨfetɨ bə̂d Ŋwiə̀, nɨ yeʼ ɨfetɨ Ŋwìə̀ we nɨ yeʼ ɨkǎ. Bə̂d Ŋwiə̀ mbɔ̂ mbɨə yimə rəsìʼ we nɨ yeʼ ɨŋga ɨkə̂n chɔ̀m àmei ɨchî nɨ təʼ mbɨ əchɨ ə yimə nəb.

¹⁶ Ənû ze nɨ yeʼ ənə̀mə nɨ Ŋwìə̀ ghɨ tɨ kyerɨ ɨchî nɨ tɨ̀ ben ə Kristo yɨ ni: Kristo nyaʼa nɨŋ nyamnyod wə̀d mɨ̀sɔŋɨchù yeʼe ɨŋga ɨsɨg, Əzwî ə Zeŋɨ ə nyaʼa chwi ni məd wɨə ghɨ̀ ɨnû nɨ kuʼnɨ, mbɨ̀aŋgɨrə̀ nyaʼa zə əməd, mbɨ nyaʼa gha ɨmbə̀ʼ əməd ɨŋga ɨbeŋ jìm, bə̂d rɨŋga ɨsɨg jìm fə nuŋ tə fîŋ ɨgwɨ məd, Ŋwiə̀ nyaʼa nɨŋ əməd ɨkaŋ əne nàʼ ɨwumnɨ ɨ bɔ.