1 Tèsàlonikà 5 - Meta’

Mbə̀ tekɨ ɨnyod wòm nyùmə̀ we nɨ Ə̀nùŋɨ̀sɨg bɨrɨ wɨrɨ yeʼe

¹ Mba bɔŋgɔb, chəi əton nɨ ŋwaʼnɨ ɨ nən ɨmbə̀ʼ nyùmə̀ kɨ̀ ɨmbə̀ʼ ɨni mbe nɨ Ə̀nùŋɨ̀sɨg bɨrɨ wɨrɨ yeʼe,

² ɨmbə̀ʼ ɨghəm nɨ mbə̀ fə kyerɨ ə kwàʼ ɨchî chɔ̀m ni əni ze nɨ Ə̀nùŋɨ̀sɨg bɨrɨ wɨrɨ yeʼe bɨrɨ yeʼ àmei ɨghabɨ ɨchî nɨ ɨjɨ ə yeʼe ɨzimɨ.

³ Ənɨ bə̂d ə ghàə̀ ni, “Tɨ̀ wɨ a ənɨ əbɔrəbɔd, chəi əton nɨ bɔ ənû ə mɔʼɔ,” ŋgəʼ rɨbɔ̀ŋ bɨrɨ saʼ nyɨ ɨgwɨ mɨ̀mə̌d àmei ɨghabɨ ɨchî nɨ əyi ə zu rɨbuʼ ənɨ wɨə nombɨə. Chəi bə̂d bɨrɨ vɨ rɨŋga ŋgəʼ ze.

⁴ Àyɨə mba bɔŋgɔb, chəi mbən ə ghɨ̀ ɨnû rɨbɔ̀ŋ ɨghabɨ ə bə̂d mbe nɨ yeʼ ɨŋga ɨsɨ firɨ, nɨ əni ze ə bɨrɨ saʼ yeʼe ɨgwɨ nən ɨchî nɨ ɨjɨ ə yeʼe.

⁵ Mbə̀n mɨjìm mbɨə ghɨ̀ ɨnû nɨ kuʼnɨ àmei ɨchî nɨ bə̂d ə ghɨ̀ əziə ənɨ ɨsɨ ə zeŋə. Ka tɨ yɨ a bə̂d nɨ chəi tɨə ghɨ̀ ɨnû nɨ kuʼnɨ ɨghabɨ mbe nɨə ghɨ̀ ɨnû ɨzimɨ kɨ̀ ɨŋga ɨsɨ firɨ.

⁶ Əne tɨ rɨ̀ gwenɨ a ɨchî nɨ bə̂d cherə ə gwenə nɨ chəi mbɨ kyerɨ ɨnû nɨə chèə̀, àyɨə tɨ chub ɨkyèʼe kyerɨ ɨnû nɨə cheə bə̀ yimbɨ a ɨnyod.

⁷ Bə̂d mbe nɨə gwenə, mbɨə gwen ɨzimɨ, mbe nɨə nɔə beə, mbɨə nɔə beə ɨzimɨ.

⁸ Àyɨə ɨchî nɨ tɨə ghɨ̀ ɨnû nɨ kuʼnɨ, tɨ̀ yimbɨ a ɨnyod, zɨ̀ fîŋ ɨgun ə Kristo bə̀ ghaʼ mbə bɔŋgɔb àmei ɨghabɨ ɨchî nɨ sɔgyɨ̀ zɨ ə parɨwa ətənɨ nɨ kən ɨgɔ̂. Mbə̀ nùŋ ɨkɔndɨ wòm ɨchî nɨ Ə̀nùŋɨ̀sɨg bɨrɨ chɨ əwa rəŋgəʼ àmei ɨghabɨ ɨchî nɨ sɔgyɨ̀ zɨ ɨdəm ətənɨ nɨ kən ətu.

⁹ Chəi Ŋwiə̀ nyaʼa chɔʼ əwa ɨmbə̀ʼ zɨ ŋgəʼ ɨgwɨ na. Wɨ̀ nyaʼa chɔʼ əwa yeʼ ni tɨ̀ bɨrɨ jwɨ rəŋgəʼ ənjìm a Ə̀nùŋɨ̀sɨg Yeso Kristo,

¹⁰ nɨ nyaʼa kwɨ ɨgwɨ mba ɨtu ɨmbə̀ʼ kɨ̀ tɨ wɨ ɨkǎ kɨ̀ tɨ fə kwɨ, tɨ̀ we tɨ rɨ chubɨ mbɨ məd.

¹¹ Əne mbə̀ timbɨ mbə bɔŋgɔb, ghɨ̀ ni ɨbenɨ wə̀d mɔʼ mɔʼ təm kàànɨ. Mbə̀ ghɨ əne àmei ɨchî nɨ mbə̀ə ghɨ̀ rɨ̀nîn.

Tɨkə te nɨ sɨ nwìə̀

¹² Mba bɔŋgɔb, tɨ̀ wɨə buʼ ɨbɔ ɨ nən ni mbə naʼ ɨwumnɨ əmbɨ ə bə̂d mbe nɨə fàʼ rɨ̀kǎ ɨ nən, chà əwən bə̀ kəərɨ əwən.

¹³ Mbə̀ wumnɨ mɨ̀mə̌d bə̀ chwiə ni mbə ghaʼ mɨ̀mə̌d ɨmbə̀ʼ ɨnû jìm mbe nɨ mbɨə ghɨ̀ ɨ nən. Mbə̀ chub ənɨ əbɔrəbɔd mbɨ mbə bɔŋgɔb.

¹⁴ Mba bɔŋgɔb, tɨ̀ wɨə buʼ ɨ bɔ ɨ nən ni mbə̀ patɨ mɨgwed, nɔɔrɨ ɨka mbe nɨə bɔ ɨnû, weerɨ mbe nɨə kəb ə̀wèèrɨ̀, bə nyiʼə ghàm əmbɨ ə wə̀d jìm.

¹⁵ Mbə̀ zə ni tɨ wə̀d mɔʼɔ rəbɔʼ nən wi i ɨbə ɨgwɨ ɨbə, àyɨə mbə kywɨ ənywɨ ghɨ̀ ɨ̀chɔ̀m ənɨ wə̀d mɔʼ mɔʼ bə̀ ghɨ̀ ənɨ ə wə̀d jìm.

¹⁶ Mbə̀ chub ənɨ ɨghaʼi ənɨ mɨ̀nyùmə̀ jìm,

¹⁷ kɔŋgɨ ə Ŋwiə̀ ənɨ mɨ̀nyùmə̀ jìm,

¹⁸ bə̀ nàʼ məben-əwe əmbɨ ə Ŋwiə̀ ɨmbə̀ʼ ɨnû jìm. Mbɔ̂ yɨ ɨnû mbe nɨ Ŋwiə̀ kəbɨ rɨ nən ɨchî nɨ mbə̀ yeʼ ənɨ fɔtɨ mbɨ Kristo Yeso.

¹⁹ Tɨ̀ mbə̀ kən ə ə̀fàʼì ze nɨ Əzwî ə Zeŋɨ ə fàʼ ɨŋga nən.

²⁰ Tɨ mbə̀ təənɨ ə mɨkə̂n mbe nɨ bə̂d ə ghàə̀,

²¹ àyɨə mbə̀ zweʼrɨ mɨkə̂n mbe jìm, yim mbe nɨ bɔŋɨ,

²² ton tɨkwɨrɨ ɨnû jìm mbe nɨ rɨka bɔŋ i.

²³ Ŋwìə̀ ziə we nɨə nàʼ əbɔrəbɔd ghɨ ni mbə̀ zeŋ màànɨ̀. Ŋwìə̀ ghɨ ni Əzwî mbɨ tə fîŋ fɔrɨ tə nyamnyod ghɨ ɨnû nɨ kuʼnɨ ɨmbə̀ʼ tɨ wə̀d mɔʼɔ zə i ənû rɨbɔ̀ŋ ɨgwɨ nən ənɨ ə nyùmə̀ we nɨ a Ə̀nùŋɨ̀sɨg Yeso Kristo bɨrɨ wɨrɨ yeʼe.

²⁴ Məd we nɨ tɔŋ əwən wɨə ghɨ̀ ɨnû mbe nɨ wɨ̀ kaʼi. Wɨ̀ bɨrɨ ghɨ̀ ɨnû mbɔ̂.

²⁵ Mba bɔŋgɔb, mbə̀ kɔŋgɨ ə Ŋwiə̀ ɨgwɨ na.

²⁶ Mbə̀ chaʼrɨ bə̂d Kristo mɨjìm kwàʼ ɨchî chɔ̀m. Mbə̀ chaʼrɨ əne chwi ɨghaʼi we nɨ yeʼ əkaʼ bə̂d Kristo.

²⁷ Mə wɨə ghà ɨ nən ɨfě Ə̀nùŋɨ̀sɨg ni wə̀d mɔʼɔ foŋ ə̀ŋwàʼnɨ̀ zɔ̂ əmbɨ ə bə̂d Kristo mɨ̀jìm.

²⁸ A Ə̀nùŋɨ̀sɨg Yeso Kristo ghɨ ɨ̀chɔ̀m ənɨ ə nən.