1 Tèsàlonikà 1 - Meta’

Ə̀chàʼrɨ̀

¹ À yɨə mɔ̌ Pɔ̂l mbɨ Sailàs fɔrɨ ə Timotì ŋwaʼnɨ ə̀ŋwàʼnɨ̀ zɔ̂. Tɨ̀ wɨə ŋwàʼnɨ̀ ɨ nən mbə̀n bə̂d Kristo mbe nɨ yeʼ ɨŋga ɨfetɨ we rɨ ə Tèsàlonikà, nɨ mbə̀ yeʼ bə̂d Ŋwiə̀ Mbǎʼ fɔrɨ bə̂d Ə̀nùŋɨ̀sɨg Yeso Kristo. Ŋwìə̀ ghɨ ɨ̀chɔ̀m ənɨ ə nən bə̀ nàʼ əbɔrəbɔd ɨ nən.

Pɔ̂l nàʼ məben-əwe əmbɨ ə Ŋwiə̀ ɨmbə̀ʼ ɨchî nɨ bə̂d mbe rɨ ə Tèsàlonikà nyaʼa ben ə Kristo

² Tɨ̀ wɨə nàʼə̀ məben-əwe əmbɨ ə Ŋwiə̀ ɨmbə̀ʼ mbə̀n mɨjìm. Tɨ̀ wɨə ghɨ̀ əne ənɨ mɨ̀nyùmə̀ jìm mbe nɨ tɨə kɔ̀ŋgɨ̀ ə Ŋwiə̀ kɔndɨ əwən.

³ Ənɨ tɨə kɔŋgɨ Ŋwiə̀ a Mbǎʼ, tɨ̀ wɨə kɔndɨ ɨnû mbe nɨ mbə̀ə ghɨ̀ə̀ ɨchî nɨ mbə̀ nuŋ fîŋ ɨgun ə Yeso. Tɨ̀ wɨə bə̀ kɔndɨ ɨchî nɨ mbə̀ə fàʼə̀ rɨ̀kǎ ɨmbə̀ʼ weerɨ bə̂d ɨmbə̀ʼ ɨghəm nɨ mbə ghaʼ mɨ̀mə̌d. Tɨ̀ wɨə bə̀ kɔndɨ ɨchî nɨ mbə̀ə nyìʼə̀ fîŋ wòm ɨchî nɨ a Ə̀nùŋɨ̀sɨg Yeso Kristo bɨrɨ chɨ əwən rəŋgəʼ.

⁴ Mba bɔŋgɔb, tɨ̀ kyerɨ ni Ŋwìə̀ ə ghaʼ əwən kwàʼ rɨŋgəʼ əne wɨ̀ nyaʼa chɔʼ əwən ni mbə̀ yeʼ mbi bə̂d.

⁵ Tɨ̀ kyerɨ əne ɨmbə̀ʼ ɨghəm nɨ tɨ̀ nyaʼa yeʼe əsɨ nən mbɨ ɨkə̂n chɔ̀m. Chəi tɨ̀ nyaʼa yeʼe mbɨ ɨkə̂n chɔ̀m àmei ənɨ ɨŋgam. Tɨ̀ nyaʼa bə̀ ghà ɨkə̂n chɔ̀m ənɨ ɨka we nɨ Əzwî ə Zeŋɨ ə nàʼə̀. Tɨ̀ nyaʼa bə̀ kàŋ chwi ɨchî nɨ tɨ̀ ben ni ɨnû mbe nɨ yeʼ ɨŋga ɨkə̂n chɔ̀m yɨ ɨnû rəsìʼ. Mbə kyerɨ ɨnû mbe nɨ tɨ̀ nyaʼa ghɨ̌ ənɨ tɨ̀ nyaʼa əkaʼ nən. Tɨ̀ wɨə nyaʼa ghɨ ɨnû mbɔ̂ jìm ɨmbə̀ʼ weerɨ əwən.

⁶ Mbə mbɨə nyaʼə ghɨ̀ ɨnû mbe nɨ tɨ̀ nyaʼə ghɨ̀ə̀ bə̀ ghɨ̀ə̀ mbe nɨ Ə̀nùŋɨ̀sɨg nyaʼə ghɨ̀ə̀. Ka à bè yeʼi ni mbə mbɨə nyaʼə zəə ŋgəʼ, Əzwî ə Zeŋɨ ə nyaʼa ghɨ̀ mbə̀ nɨŋ ɨŋgam we mbɨ ɨghaʼi.

⁷ Əze ə nyaʼa ghɨ̀ ni bə̂d mɨjìm mbe nɨ nyaʼa ben ə Kristo ə Màsèdonià fɔrɨ ə Àkàiyà mbɨ beenɨ əbɔʼ tə rɨkyerɨ-ɨwu.

⁸ Kaʼ àmei ni ɨŋgam Ŋwiə̀ fə jàŋ rɨ nən wò ɨŋga ɨbeŋ mbe rɨ ə Màsèdonià fɔrɨ ə Àkàiyà, ənû ɨmbə̀ʼ ɨbenɨ we nɨ mbə̀ nuŋ ɨgun ə Ŋwiə̀ fə bə̀ jàŋ ɨsɨ jìm. Chəi ənû ə mɔʼɔ nɨ tɨ rɨ wɨrɨ ghà ɨmbə̀ʼ əzɨ əwən,

⁹ ɨmbə̀ʼ ɨghəm nɨ bə̂d mbe nɨ yeʼ ɨŋga ɨba ɨbeŋ mbe fə ghà mbənə mbənə ɨmbə̀ʼ ɨkwɨ ɨchî nɨ mbə̀ nyaʼa nɨŋ əwa əkaʼ nən. Mbɨ fə bə̀ ghà ɨmbə̀ʼ ɨchî nɨ mbə̀ nyaʼa ton ənû nɨ wumnɨ mbɨ̀anèŋ sɨ bèŋ kɔ wumnɨ ə Ŋwiə̀ we nɨ yeʼ ɨka bə̀ yeʼ wɨ rəsìʼ.

¹⁰ Mbɨ nyaʼa bə̀ ghà ni mbə mbɨə wòmə̀ ni Wan Ŋwìə̀ we nɨ wɨ̀ nyaʼa zwemnɨ wɨrɨ yeʼe rɨkaŋ. Wan we yɨə Yeso we nɨə chɨ̀ əwa rɨŋga ŋgəʼ ze nɨ Ŋwìə̀ bɨrɨ sə ɨtəm chə bə̂d ɨnû rɨbɔ̀ŋ.