1 Pità 5 - Meta’

Tɨkə əmbɨ bə̂d nɨə chà ɨfetɨ fɔrɨ əmbɨ ə ŋgwàʼ bə̂d

¹ Mə yɨə wə̀d nɨə chà ɨfetɨ bə̂d Kristo. Mə yɨə zərɨmbin ɨchî nɨ Kristo nyaʼa zə ŋgəʼ. Mə yɨə bə̀ wɨ mɔʼɔ rəbɔʼ bə̂d mbe nɨ bɨrɨ zə ɨzeŋɨ zeŋɨ we nɨ Ŋwiə̀ bɨrɨ chwi ənɨ Kristo wɨrɨ yeʼe. Əne mə wɨə buʼ ɨbɔ əmbɨ mbə̀n mbe nɨə chà ɨfetɨ bə̂d Kristo ni,

² mbə nəŋgɨ njɨ̀g rɨ Ŋwiə̀ te nɨ wɨ̀ zɨ ɨŋga tə rɨkyerɨ-ɨbɔ. Tɨ mbə̀ ghɨ̀ ə əne ɨghabɨ ni ɨ mbɨə nyeŋ əwən nyeŋɨ. Mbə̀ ghɨ əne ɨchî nɨ mbə̀ benɨ fɔrɨ ɨchî nɨ Ŋwiə̀ kəbɨ. Tɨ mbə̀ ghɨ̀ ə əne ɨmbə̀ʼ ədɔʼ ɨkab. Mbə̀ ghɨ yeʼ ɨmbə̀ʼ ɨchî nɨ mbə̀ ghaʼ nɨ fàʼ.

³ Tɨ mbə̀ nyem ə bə̂d mbe nɨ mbɨ zɨ ɨŋga tə rɨkyerɨ-ɨbɔ, àyɨə mbə̀ yeʼ əmbɨ mɨ̀mə̌d ɨghabɨ əmɨg.

⁴ Ənɨ Ənə̂ŋgɨ̀-njɨ̀g kyeŋ yeʼe, mbə bɨrɨ nɨŋ əchwɨ̂ əgu ə zeŋɨ ze nɨ chəi zɨə bɨrɨ nɔ chɔʼrɨ.

⁵ Ŋgwàʼ bə̂d, mbə̀ zuunɨ bə̂d mbe nɨ fə kaanɨ chè əwən. Mbə̀n mɨjìm swi ə ɨnyod fàʼ əmbɨ mbə bɔŋgɔb ɨmbə̀ʼ ɨghəm nɨ, “Ŋwìə̀ wɨə bànə̀ bə̂d mbe nɨə nɔ ɨnyod, àyɨə ɨ wɨə ghɨ̀ ɨ̀chɔ̀m ənɨ mbe nɨə swi ɨnyod.”

⁶ Əne mbə swi ə ɨnyod əton ɨka Ŋwiə̀, ɨmbə̀ʼ nyùmə̀ mɨ nɨə kuʼə wɨ̀ nɔ̀ɔ̀rɨ̀ əwən.

⁷ Mbə saŋ ɨghɨjìm mbe nɨə chə əwən ɨ bɔ, ɨmbə̀ʼ ɨghəm nɨ à yɨə məd ə nəŋgɨ əwən.

⁸ Mbə̀ yimbɨ ɨnyod bə̀ chub ɨkyèʼe. Ə wə̀d pə̀n, əne yɨə Debɨ̀rə̀ wɨə yènə̀ zùʼə̀ ɨghabɨ ə ŋgwàbaʼ. Ɨ wɨə kə̀bə̀ wə̀d mɔʼɔ we nɨ wɨ̀ bɨrɨ nimnɨ.

⁹ Tɨ mbə̀ benə ni ə ɨbenɨ bɔd. Mbə̀ fe ə ɨnyod rɨ bɔ. Mbə̀ kyerɨ ni mbə bɔŋgɔb ɨŋga ɨsɨg jìm mbɨə zə ɨkwɨ ŋgəʼ we nɨ mbə̀n ə zəə.

¹⁰ Mbə̀ nɨə fə zə ŋgəʼ ənɨ ɨkə nyùmə̀, Ŋwìə̀ we nɨə ghɨ̀ ɨ̀chɔ̀m ənɨ ə wə̀d jìm bɨrɨ wɨrɨ tekɨ ɨghɨjìm ɨ nən. Wɨ̀ bɨrɨ ghɨ ni ə ɨbenɨ wɨrɨ kàànɨ̀ bə̀ ghɨ ni mbə təm kàànɨ̀. À yɨə məd nyaʼa chè ənjìm ə Kristo tɔŋ əwən ni mbə yeʼe nyɨ ɨŋga ɨzeŋɨ zeŋɨ məd we nɨ chəi wɨ bɨrɨ nɔʼ mì.

¹¹ Məd tumbɨ ɨsɨg koŋ koŋ. À yɨ əne.

Ə̀chàʼrɨ̀ nɨ sɨ nwìə̀

¹² À yɨə Sailàs weerɨ əmɨ ni mə ŋwaʼnɨ akə ə̀ŋwàʼnɨ̀ wɔ̂ ɨ nən. Məd yɨ aŋgɔb nɨ mə̀ kyerɨ ni wɨ̀ nuŋ fîŋ ɨgun ə Kristo. Mə ŋwàʼnɨ̀ ə̀ŋwàʼnɨ̀ zɔ̂ ɨmbə̀ʼ timbɨ əwən fɔrɨ nɨ ghɨ mbə̀ kyerɨ ni Ŋwìə̀ wɨə kàŋə̀ ghɨ̀ ɨ̀chɔ̀m ənɨ ə nən. Mbə təm kàànɨ ɨŋga ɨ̀chɔ̀m we.

¹³ Mbə bɔŋgɔb mbe rɨŋga ɨfetɨ bə̂d Kristo we rɨ ə Babilɔ̀n cha ə̀chàʼrɨ̀ ɨ nən. À yɨə Ŋwiə̀ nyaʼa bə chɔʼ mɨ̀mə̌d. Mɨ wan, Mak, ə bə̀ chàʼrɨ̀ əwən.

¹⁴ Mbə̀ chaʼrɨ wə̀d mɔʼ mɔʼ kwàʼ ɨchî chɔ̀m əne chwi ɨghaʼi bə̂d Kristo. Ŋwìə̀ naʼ əbɔrəbɔd əmbɨ ə mbə̀n mɨjìm mbe nɨ yeʼ ənɨ ɨfɔtɨ mbɨ Kristo.