1 Pità 4 - Meta’

Ɨchî nɨ bə̂d Ŋwiə̀ berɨ chubɨ

¹ Kristo nyaʼa zə ŋgəʼ ənɨ mbɨ nyaʼa kombɨ əməd, əne mbə berɨ bɨ berɨ tɨkwɨ rɨkɔndɨ te nɨ wɨ̀ nyaʼa berɨ, ɨmbə̀ʼ ɨghəm nɨ chəi wə̀d mɔʼɔ we nɨ fə zə ŋgəʼ bɨrɨ wɨrɨ berɨ ənû nɨ ghɨ̀ mbɨ ɨnû rɨbɔ̀ŋ.

² Əne mbə̀ nɨŋ nyùmə̀ we nɨ buʼ ɨ nən ɨgwɨ ə si ghɨ̀ ɨnû mbe nɨ Ŋwiə̀ kəbɨ, kaʼi mbe nɨ bə̂d rɨ ɨgwɨ ə si ə kə̀bə̀.

³ Nyùmə̀ we nɨ mbə kɨə kə̀ʼə̀ ghɨ̀ ɨnû mbe nɨ bə̂d mbe nɨ kaʼi mɨ̀Jû ghaʼ nɨ ghɨ̀ fə chè i. Mbə mbɨə nyaʼə ghɨ̀ ɨnyamnɨ-ɨnû. Mbə mbɨə nyaʼə feenɨ məyi kɨə mbaŋə̀. Mbə mbɨə nyaʼə nɔə beə. Mbə mbɨə nyaʼə jɨg əchwɨ̂ nɨ bə̂d ə nɔə bùùrɨ̀ə̀. Mbə mbɨə nyaʼə bə̀ wumnɨ mbɨ̀anèŋ nɨ chəi tɨkə rɨ Ŋwiə̀ ben ni mbə̀ ghɨ əne.

⁴ Tɨ̀nîn ɨ mbɨə yiirɨə ni chəi mbə̀ ə wɨrɨə fɔtɨ əbɔʼ mɨ̀mə̌d ɨmbə̀ʼ ghɨ ɨnû rɨbɔ̀ŋ mbe nɨ mbə nyaʼə beə ghɨ̀ə̀. Ɨchî nɨ chəi mbə̀ə wɨrɨə fɔtɨ əbɔʼ mɨ̀mə̌d, ɨ mbɨə sɨə zɔ̀m əwən.

⁵ Mbɨ bɨrɨ gha ɨnû mbe nɨ mbɨ fə ghɨ əmbɨ ə məd we nɨ fə tekɨ ɨnyod nɨ saʼ bə̂d mbe nɨ yeʼ ɨka mbɨ mbe nɨ fə kwɨ.

⁶ Əzɔ̂ yɨ əton nɨ mbɨ nyaʼa gha ɨkə̂n chɔ̀m fɔrɨ əmbɨ ɨvɨ bə̂d, ka à bè yeʼi ni mbɨ nyaʼa fə saʼ mɨ̀mə̌d ɨchî nɨ mbɨə saʼə bə̂d cherə. Əne yɨ ɨmbə̀ʼ ɨzwî mɨ̀mə̌d yeʼ ɨghabɨ Əzwî ə Ŋwiə̀.

Tɨ̀ faʼ ɨchî chɔ̀m mbɨ ɨneʼe we nɨ Ŋwiə̀ naʼ ɨ na

⁷ Ɨnwǐ ɨghɨjìm fə tiinɨ, əne mbə nuŋ mbə ɨtu mbɨ zeŋ bə̀ yimbɨ ə ɨnyod ɨmbə̀ʼ kyerɨ ɨchî nɨ kɔŋgɨ ə Ŋwiə̀.

⁸ Ənû nɨ chè ɨnû jìm yɨ ni mbə̀ ghaʼ ə ɨnyod mbənə mbənə kwàʼ rɨŋga fîŋ, ɨmbə̀ʼ ɨghəm nɨ ɨghaʼi wɨə kubrɨ ɨnû rɨbɔ̀ŋ nɔnɔʼ.

⁹ Mbə̀ nɨŋ mbə bɔŋgɔb ɨŋga tə nəb. Àyɨə mbə mɨ nɨŋ, tɨ mbə dumbɨ ə.

¹⁰ Mbə nɨŋ mɨneʼe mbe nɨ Ŋwìə̀ naʼ əmbɨ wə̀d mɔʼ mɔʼ rəbɔʼ nən wèèrɨ̀ mbə bɔŋgɔb əŋgu. Əne yɨ ɨchî ni Ŋwìə̀ ə chè ənɨ ə njìm ghɨ̀ə̀ tɨkwɨrɨ chɔ̀m jìm ənɨ ə bə̂d.

¹¹ Wə̀d mɔʼɔ mɨ yeʼə ghà ɨŋgam Ŋwiə̀, wɨ̀ gha àmei ənû ze nɨ Ŋwìə̀ gha ɨ bɔ. Wɨ̀ mɔʼɔ mɨ yeʼə fàʼə̀, wɨ̀ faʼ àmei ənɨ ɨka we nɨ Ŋwìə̀ naʼ ɨ bɔ, ɨmbə̀ʼ ənɨ ɨnû jìm, bə̂d mbe tɨ̀ mbɨ yiirɨ ə Ŋwiə̀ ənjìm ə Yeso Kristo. Ɨwumnɨ jìm mbɨ ɨka jìm yɨ wɨ məd koŋ koŋ. À yɨ əne.

Wə̀d Kristo berɨ zə ŋgəʼ

¹² Mbɨ bɔŋgɔb nɨ mə̀ ghaʼi kwàʼ rɨŋgəʼ, tɨ mbə̀ yiirɨ ə ni ɨ̀kwàʼnɨ̀ ka ka mbɨə yeʼe ɨgwɨ nən ɨmbə̀ʼ zweʼrɨ ə ɨbenɨ. Zɨə bɨrɨ yeʼ ɨghabɨ ni ɨnû rɨ̀sɔ̀ʼ mɔʼɔ mbɨə ghɨ̀ ənɨ ə nən.

¹³ Àyɨə mbə̀ ghaʼ ɨchî nɨ mbə̀ə zəə ŋgəʼ ɨchî nɨ Kristo nyaʼa bə zə. Ɨghaʼi bɨrɨ swi ɨŋga tə fîŋ ənɨ wɨ̀ wɨrɨ yeʼe ɨŋga ɨzeŋɨ zeŋɨ məd.

¹⁴ Bə̂d mɨ yeʼə zɔ̀m əwən ɨmbə̀ʼ ɨchî nɨ mbə̀ ben ə Kristo, Ŋwìə̀ bɨrɨ zɨ əbɔrəbɔd ɨgwɨ nən. Əne yɨ ni Əzwî ə Zeŋɨ ze nɨ yeʼ Əzwî ə Ŋwiə̀ ə fə sɨ i ɨgwɨ nən.

¹⁵ Wə̀d mɔʼɔ rəbɔʼ nən mɨ yeʼə zəə ŋgəʼ, tɨ wɨ̀ zə i ɨmbə̀ʼ ɨghəm nɨ wɨ̀ zwiirɨ wə̀d, kɨ̀ ɨmbə̀ʼ ɨghəm nɨ wɨ̀ jɨ̂, kɨ̀ ɨmbə̀ʼ ɨghəm nɨ wɨ̀ ghɨ ənû rɨbɔ̀ŋ, kɨ̀ ɨmbə̀ʼ ɨghəm nɨ wɨ̀ zɨ i ɨchû ɨŋga ɨnû bə̂d cherə.

¹⁶ Àyɨə wə̀d mɔʼɔ rəbɔʼ nən mɨ yeʼə zəə ŋgəʼ ɨmbə̀ʼ ɨghəm nɨ məd yɨə wə̀d Kristo, tɨ ətu ə məd ə nid i. Wɨ̀ yiirɨ ə Ŋwiə̀ ɨmbə̀ʼ ɨghəm nɨ wɨ̀ ben ɨkum Kristo.

¹⁷ Nyùmə̀ fə kuʼ nɨ Ŋwìə̀ bɨrɨ kɔ saʼ bə̂d. Wɨ̀ bɨrɨ kɔ mbɨ ɨnəbɨ Ŋwiə̀. Wɨ̀ mɨ nɨə kɔ mbɨ na, njɨ ɨnwǐ bə̂d mbe nɨ chəi mbɨə zuunɨ ɨkə̂n chɔ̀m ɨmbə̀ʼ ə Ŋwiə̀ kɨə wo yeʼ rɨ ye ə?

¹⁸ Ə zɨ ɨŋga Ə̀ŋwàʼnɨ̀ ə Ŋwiə̀ ni, “Zɨə mɨ yeʼe se əmbɨ ə bə̂d mbe nɨə ghɨ̀ ɨnû nɨ kuʼnɨ nɨ jwɨ rəŋgəʼ, njɨ zɨə kɨə wo yeʼ rɨ ye mbɨ mbe nɨ chəi mbɨə wumnɨ ə Ŋwiə̀ fɔrɨ mbe nɨə ghɨ̀ ɨnû rɨbɔ̀ŋ ə?”

¹⁹ Əne bə̂d mbe nɨə zəə ŋgəʼ ɨchî nɨ Ŋwiə̀ kəbɨ, chè ɨmbì ghɨ ɨnû nɨ kuʼnɨ. Mbɨ bə nàʼ ə ɨ̀tènɨ̀ əmbɨ Ŋwìə̀ we nɨ nyaʼa tekɨ mɨ̀mə̌d. Məd wɨə ghɨ̀ ɨnû jìm mbe nɨ wɨ̀ kaʼi.