1 Pità 3 - Meta’

Ənû ɨmbə̀ʼ məyi mbɨ mbə mɨnom

¹ À yɨ əndəŋ əndəŋ ni mbə̀n məyi berɨ zuunɨ mbə mɨnom, ɨmbə̀ʼ à mɨ yeʼ nɨ chəi wɨ mɔʼɔ rəbɔʼ mɨ̀mə̌d kɨrɨ ben ɨŋgam Ŋwiə̀, məyi mɨ̀mə̌d mbe tɨ mbɨ beŋ mɨ̀mə̌d ənɨ tə rɨghɨrɨ-ɨnû, nɨ chəi mbɨ gha ənû ə mɔʼɔ.

² Mbɨ bɨrɨ bèŋ ənɨ mbɨ zə ɨchî nɨ mbə̀n məyi ə wumnɨ mɨ̀mə̌d fɔrɨ ɨmbə̀ʼ ɨchî nɨ mbə̀ə ghɨ̀ ɨnû nɨ zeŋɨ.

³ Tɨ ɨchî nɨ mbə̀ təm yeʼe i rɨ əsaŋ. Tɨ zɨə yeʼe ənɨ ɨkwɨ ɨchî nɨ mbə̀ə tekɨ tə nyôŋ rɨ ətu kɨ̀ ənɨ ɨchî nɨ mbə̀ə tìŋ ɨghɨ mbe nɨ mbɨ tekɨ ənɨ gôl kɨ̀ ənɨ mbə̀ə zɨ̀ə̀ ngywɨ̌ rɨ chɔ̀m.

⁴ Ɨchî nɨ mbə̀ təm berɨ jwɨ̀ yeʼ rɨŋga fîŋ. Kaʼ ɨkwɨ ɨtəm wɔ̂ wɨə bəi. Wɨ yɨ rɨ ənɨ əzwî ze nɨə bɔtɨə. Əzwî ze nɨə bɔtɨə yɨ əghɨ əka ɨnùn əghə ə Ŋwiə̀.

⁵ À yɨ ənɨ ɨkwɨ ɨchî wɔ̂ nɨ məyi zeŋ mbe rəŋwe nyaʼə yèʼ ə ɨnyod. Ɨ mbɨə nyaʼə yèʼ àmei ɨchî nɨ mbɨ nyaʼə zuunɨə mbə mɨnom.

⁶ Sèra wɨə nyaʼa əne. Ɨ wɨə nyaʼə zuunɨ ə Abràham, əne ɨ wɨə nyaʼə tɔŋ əməd ənɨ ə masà. Mbə yɨə bɔn məd əwù ze nɨ mbə̀ə ghɨ ɨnû nɨ kuʼnɨ fɔrɨ ənɨ chəi mbə̀ə bɔ əghɨ ə mɔʼɔ.

⁷ Əndəŋ əndəŋ, mbə̀n mɨnom berɨ wumnɨ mbə məyi bə̀ chubɨ mbɨ mɨ̀mə̌d ɨchî nɨ kuʼnɨ. Mbə mɨə yeʼə ghɨ̀ əne, njɨ mbə̀ kyerɨ ni mɨ̀mə̌d ə bɔd chè əwən. Mbə ghɨ əne ɨmbə̀ʼ ɨghəm nɨ Ŋwiə̀ bɨrɨ naʼ ɨ̀tènɨ̀ əmbɨ mbə̀n mɨ̀jìm. Mbə ghɨ əne ɨmbə̀ʼ tɨ əghɨ ə mɔʼɔ ə kən i ə ə̀kɔ̀ŋgɨ̀.

Ənû nɨ zə ŋgəʼ ɨmbə̀ʼ tɨ̀gurɨ-ɨnû chɔ̀m

⁸ Ɨ nwìə̀, mbə̀n mɨjìm berɨ chub ənɨ ənû ə mɔʼ. Mbə̀ kən ənɨ mbə bɔŋgɔb, ghaʼ mbə bɔŋgɔb, ghɨ̀ ɨ̀chɔ̀m ənɨ bɔŋgɔb bə̀ swi ə ɨnyod ənɨ mbə̀ yeʼ əkaʼ bɔŋgɔb.

⁹ Tɨ mbə̀ wi ə ɨbə ɨgwɨ ɨbə. Tɨ mbə wi ə mɨzɔ̂m ɨgwɨ mɨzɔ̀m. Bə̂d mɨ ghɨ̀ ənû ənɨ ə nən, mbə̀ wi yeʼ ənɨ əbɔrəbɔd. Ŋwiə̀ nyaʼa tɔŋ əwən ni mbə ghɨ əne ɨmbə̀ʼ wɨ̀ zɨ əbɔrəbɔd ɨgwɨ nən.

¹⁰ Ə zɨ ɨŋga Ə̀ŋwàʼnɨ̀ ə Ŋwiə̀ ni, “Wə̀d we nɨ ghaʼ nɨ chub ɨchî chɔ̀m bə̀ zə ɨni chɔ̀m, berɨ yimbɨ i ɨnemɨ ɨmbə̀ʼ tɨ wɨ̀ gha i ɨŋgam rɨbɔ̀ŋ. Wɨ̀ bə yimbɨ i ɨchû ɨmbə̀ʼ tɨ wɨ̀ gha i mɨghab.

¹¹ Wɨ̀ berɨ waʼ ɨnû rɨbɔ̀ŋ əne bèŋ sɨə ghɨ̀ yeʼ ɨnû chɔ̀m. Wɨ̀ berɨ kywɨ ənywɨ ɨmbə̀ʼ chub ənɨ əbɔrəbɔd mbɨ wə̀d jìm.

¹² Əghə Ə̀nùŋɨ̀sɨg ə zɨ ɨgun ə bə̂d nɨə ghɨ̀ ɨnû chɔ̀m. Ɨ̀tǒŋ məd mbɨ əjə nɨ zu ə̀kɔ̀ŋgɨ̀ mɨ̀mə̌d. Àyɨə chəi wɨ̀ ghaʼ bə̂d mbe nɨə ghɨ̀ ɨnû rɨbɔ̀ŋ.”

¹³ À kɨə we nɨ tɨ̀ wɨ̀ ghɨ̀ əghəm ənɨ ə nən əwù ze nɨ mbə̀ zɨ ətu nɨ ghɨ ɨnû nɨ kuʼnɨ ə?

¹⁴ Àyɨə ka mbə bè yeʼə zəə ŋgəʼ ɨmbə̀ʼ ɨchî nɨ mbə̀ə ghɨ̀ ɨnû nɨ kuʼnɨ, Ŋwìə̀ bɨrɨ zɨ əbɔrəbɔd ɨgwɨ nən. Əne tɨ mbə̀ bɔ ə, kɨ̀ bè nwìʼ ə nyamnyod.

¹⁵ Àyɨə mbə wumnɨ ə Kristo ɨŋga tə fîŋ ni məd yɨ Ə̀nùŋɨ̀sɨg. Mbə̀ tekɨ ɨnyod ənɨ mɨ̀nyùmə̀ jìm nɨ wiirɨ ɨŋgam əmbɨ ə wə̀d jìm we nɨ biirɨ əton ɨmbə̀ʼ ɨkɔndɨ we nɨ mbə berɨ. Mbə̀ ghɨ əne mbɨ ɨbɔtɨ fîŋ fɔrɨ mbɨ ɨwumnɨ.

¹⁶ Mbə̀ berɨ fîŋ nɨ zeŋɨ, ɨmbə̀ʼ ɨtu nid bə̂d mbe nɨə ghà ɨnû rɨbɔ̀ŋ ɨmbə̀ʼ mɨchî chɔ̀m mbe nɨ mbə̀ berɨ ɨchî nɨ mbə̀ yeʼ bə̂d Kristo,

¹⁷ ɨmbə̀ʼ ɨghəm nɨ zɨə bɔ̀ŋ ni mbə zə ŋgəʼ ɨmbə̀ʼ ɨchî nɨ mbə̀ə ghɨ̀ ɨ̀chɔ̀m ɨchî nɨ Ŋwiə̀ kəbɨ, chè ɨchî nɨ zə ŋgəʼ ənɨ mbə̀ə ghɨ ɨnû rɨbɔ̀ŋ.

¹⁸ Kristo nyaʼa kwɨ ɨmbə̀ʼ ɨnû rɨbɔ̀ŋ fən ɨghəm mɔʼ. Wə̀d nɨ nyaʼə ghɨ̀ ɨnû nɨ kuʼnɨ nyaʼa kwɨ ɨgwɨ ətu ə bə̂d mbe nɨə ghɨ̀ ɨnû rɨbɔ̀ŋ, ɨmbə̀ʼ wɨ nɨŋ əwa wò əsɨ ə Ŋwiə̀. Mbɨ nyaʼa zwiirɨ nyamnyod məd, àyɨə Əzwî ə Ŋwiə̀ ə nyaʼa ghɨ̀ wɨ̀ wɨrɨ chub ɨka.

¹⁹ À yɨ Əzwî ze ə nyaʼa ghɨ ni wɨ̀ wo ghà ɨŋgam Ŋwiə̀ əmbɨ ɨzwî mbe nɨ nyaʼa ə ndəŋ.

²⁰ Mbɔ̂ yɨ ɨzwî bə̂d mbe rəŋwe nɨ chəi mbɨ nyaʼa zuunɨ ə Ŋwiə̀ ənɨ wɨ̀ nyaʼa yim fîŋ wom ənɨ ə nyùmə̀ we nɨ Noà nyaʼə kombɨ əbaŋ ɨgyɨ̀ ze. Àmei bə̂d rɨpiî, əne yɨə bə̂d famɨ nyaʼa jwɨ rəŋgəʼ ɨŋga əbaŋ ze.

²¹ Mɨnib mbɔ̂ nɨ mbɨ nyaʼə nəŋ ɨgun nyaʼa təm ənɨ ənû nɨ bə̂d ə nɨŋə mɨnib. À yɨ mɨnib mbe ə chɨ̀ əwən rəŋgəʼ tɨ̀nîn. Kaʼ ənû nɨ nɨŋ mɨnib yɨ i ənû nɨ chɨ rɨfiŋ tɨ ənɨ ɨnyod. À yɨ ənû nɨ mbə̀ kaʼ əmbɨ ə Ŋwiə̀ mbɨ ə fîŋ nɨ zeŋɨ. Ənû nɨ nɨŋ mɨnib ə zɨə chɨ̀ əwən rəŋgəʼ ənjìm ɨchî nɨ Yeso Kristo nyaʼa zwemə.

²² Wɨ̀ fə wo ɨkaŋ pè chub əbà əbɔ ə jɨgɨ ə Ŋwiə̀. Ɨ wɨə sɨə tùmbɨ̀ mbɨ̀aŋgɨrə̀ bə̀ tùmbɨ̀ ɨzwî jìm mbe nɨ yeʼ ɨkaŋ fɔrɨ ɨgwɨ ə si.