1 Pità 2 - Meta’

¹ Mbə waʼ ɨnû rɨbɔ̀ŋ jìm, waʼ ɨnû nɨ fɨg bə̂d, waʼ ɨbekɨ ɨnû, waʼ ɨnû nɨ ghɨ ə̀dìì bə̀ waʼ ɨnû nɨ ghɨ mɨniə.

² Ɨghabɨ ə bɔn bɔd nɨə kɨrɨ nyɔŋ ɨbən, mbə kəb yeʼ ɨbən zeŋɨ we nɨ əzwî ə nàʼə̀, ɨmbə̀ʼ mbə mɨ nyɔŋ, mbə bɨrɨ kwi kàànɨ̀, Ŋwìə̀ chɨ̀ əwən rəŋgəʼ.

³ Mbə fə zweʼrɨ zə ni Ə̀nùŋɨ̀sɨg ə bɔŋ.

Ɨti nɨ yeʼ ɨka mbɨ ə bə̂d nɨ Ŋwiə̀ chɔʼɔ

⁴ Mbə yeʼe əsɨ məd we nɨ yeʼ ɨti we nɨ yeʼ ɨka. Bə̂d nyaʼa ton əməd, àyɨə Ŋwiə̀ nyaʼa chɔʼ əməd. Məd ə bɔ̀ŋ kwàʼ rɨŋgəʼ ɨfě Ŋwiə̀.

⁵ Mbə yeʼe ɨghabɨ əti nɨ yeʼ ɨka ɨmbə̀ʼ mbɨ nɨŋ əwən bɔm nəb əzwî əŋgu. Mbə mɨ ghɨ̀ əne, mbə bɨrɨ yeʼ bə̂d mbàn Ŋwìə̀ zeŋɨ, əne chè ənjìm ə Yeso Kristo naʼ ɨghɨ ə̀fà əzwî mbe nɨ Ŋwiə̀ benɨ.

⁶ Ə zɨ ɨŋga Ə̀ŋwàʼnɨ̀ ə Ŋwiə̀ ni, “Mbə̀ zə, mə wɨə zi ɨti ə Zayɔ̀n. À yɨ ɨti ɨbu nəb nɨ mə nyaʼa chɔʼ nùŋ, wɨ bɔ̀ŋ kwàʼ rɨŋgəʼ. Chəi wə̀d we nɨ nuŋ fîŋ ɨgwɨ məd bɨrɨ nɔ berɨ tɨ̀nìd ətu.”

⁷ Əmbɨ mbə̀n mbe nɨ benɨ, ɨti we ə bɔ̀ŋ kwàʼ rɨŋgəʼ, àyɨə əmbɨ mbe nɨ chəi mbɨ benɨ, “Ɨti we nɨ məbɔmɨ nəb nyaʼa tonɨ, fə bèŋ ənɨ ɨti rɨ ɨbu nəb,”

⁸ fɔrɨ ni, “À yɨ ɨti nɨ bɨrɨ ghɨ ni bə̂d tɨ̀grə, bə̀ yeʼ ɨwɔ̌ nɨ bɨrɨ ghɨ ni bə̂d gu ə.” Ɨ mbɨə tɨ̀grə ɨmbə̀ʼ ɨghəm nɨ chəi mbɨə ghɨ̀ ɨnû mbe nɨ yeʼ ɨŋga ɨŋgam Ŋwiə̀. Əzɔ̂ yɨ ənû nɨ Ŋwìə̀ nyaʼa fə nuŋ əmbɨ mɨ̀mə̌d.

⁹ À yeʼ ɨmbə̀ʼ əwən, mbə̀ yɨ ɨnəbɨ nɨ Ŋwiə̀ nyaʼa chɔʼɔ. Mbə yɨə bə̂d mbàn Ŋwìə̀ nɨə fàʼ əmbɨ ɨfɔ̀n kyeŋ. Mbə yɨ əbeŋ nɨ zeŋɨ. Mbə yɨə bə̂d Ŋwiə̀ ɨmbə̀ʼ gha ɨnû yiirɨ mbe nɨ wɨ̀ fə ghɨ̌. À yɨə məd nyaʼa tɔŋ əwən rɨŋga ɨsɨ firɨ əne zɨ̀ ɨŋga əsɨ ə zeŋɨ ze nɨ wɨ̀ naʼ əmbɨ ə bə̂d.

¹⁰ À nyaʼa ənɨ ə nyùmə̀ mɔʼɔ, ka mbə yɨə nyaʼə əwən bə̂d Ŋwiə̀, àyɨə tɨ̀nîn mbə yɨə sɨə bə̂d ɨməd. À nyaʼa ənɨ ə nyùmə̀ mɔʼɔ, chəi Ŋwìə̀ nyaʼa kɨrɨ diirɨ əwən, àyɨə tɨ̀nîn wɨ̀ fə dììrɨ̀ əwən.

Mbə̀ chub ɨchî nɨ bə̂d ə̀fàʼì Ŋwiə̀ berɨ chubɨ

¹¹ Mbɨ bɔŋgɔb nɨ mə̀ ghaʼi kwàʼ rɨŋgəʼ, mbə̀ kyerɨ ni mbə yɨ ɨ̀nɔ̀ʼɔ̀ fɔrɨ ni mbə̀ yɨə bə̂d rɨ̀sɔ̀ʼɔ̀ ɨŋga ɨsɨg wɔ̂. Əne mə wɨə buʼ ɨbɔ ɨ nən ni tɨ mbə̀ ghɨ ə ɨnû rɨbɔ̀ŋ mbe nɨ tə nyamnyod ə feenɨə. Mbɔ̂ yɨ ɨnû mbe nɨə màʼə̀ bid ɨŋga tə fîŋ.

¹² Mbə mɨchî əkaʼ bə̂d mbe nɨ kaʼi mɨ̀Jû berɨ bɔ̀ŋ, ɨmbə̀ʼ ka mbɨ bè gha ə ni mbə yɨə bə̂d nɨə ghɨ̀ ɨnû rɨbɔ̀ŋ, mbɨ bɨrɨ zə ɨnû chɔ̀m mbe nɨ mbə̀ə ghɨ̀ əne yiirɨ ə Ŋwiə̀ əni ze nɨ wɨ̀ bɨrɨ wɨrɨ yeʼe.

¹³ Ɨchî nɨ mbə̀ ben Ə̀nùŋɨ̀sɨg, mbə̀ zuunɨ bə̂d mɨ̀jìm mbe nɨ mbɨ nuŋ ɨgwɨ nən ni mbɨ tumbɨ əwən, kɨ̀ à kɨ ɨfɔ̂n kyeŋ nɨ yeʼ ɨgwɨ mɨfɔ̀n cherə,

¹⁴ kɨ̀ mɨ̀gɔmnà mbe nɨ wɨ̀ chɔʼ nùŋ ni mbɨ chə bə̂d mbe nɨə ghɨ̀ ɨnû rɨbɔ̀ŋ, bə̀ wumnɨ mbe nɨə ghɨ̀ ɨnû nɨ kuʼnɨ.

¹⁵ Ŋwìə̀ nyaʼa kə̀b yeʼ ni mbə̀ ghɨ ɨnû nɨ kuʼnɨ ɨmbə̀ʼ kubrɨ mɨchû ɨneŋ bə̂d mbe nɨə ghà ɨnû nɨ chəi mbɨ kyerɨ.

¹⁶ Mbə̀ chub ɨghabɨ ə bə̂d mbe nɨ yeʼ ənɨ ə ɨghəm, àyɨə tɨ mbə nɨŋ əwən ɨchî nɨ mbə̀ə chub ənɨ ə ɨghəm ɨmbə̀ʼ ghɨ ɨnû rɨbɔ̀ŋ. Mbə̀ chub ɨchî nɨ bə̂d ə̀fàʼì Ŋwiə̀ berɨ chubɨ.

¹⁷ Mbə̀ wumnɨ bə̂d mɨjìm, ghaʼ bɔŋgɔb mbe nɨ ben ə Kristo, bɔ ə Ŋwiə̀ bə̀ wumnɨ ɨfɔ̂n kyeŋ.

Ənweenɨ nɨ kwembɨ rɨ ənɨ ɨchî nɨ Kristo nyaʼa zə ŋgəʼ

¹⁸ Bə̂d ə̀fàʼì, mbə zuunɨ mbə mɨ̀mbǎʼ ə̀fàʼì mbɨ ɨwumnɨ jìm. Tɨ mbə̀ wumnɨ ə àmei mbe nɨ berɨ fîŋ chɔ̀m bə̀ berɨ ɨbɔtɨ fîŋ. Mbə zuunɨ fɔrɨ mbe nɨə nyaə.

¹⁹ Ŋwiə̀ bɨrɨ zɨ əbɔrəbɔd ɨgun ə wə̀d we nɨə nyìʼə̀ fîŋ zuə rɨbuʼ bə̀ zəə ŋgəʼ ətu əko, ɨmbə̀ʼ ɨghəm nɨ wɨ̀ kyerɨ ni məd wɨ əŋgu.

²⁰ Njìm kɨə ye, nɨ à mɨ gu ənû, mbɨ som əwe, à nyìʼ ə? Àyɨə à mɨ ghɨ ənû nɨ kuʼnɨ, əne zə ŋgəʼ ɨmbə̀ʼ əzɨ əwən, Ŋwiə̀ bɨrɨ zɨ əbɔrəbɔd ɨgwɨ ne.

²¹ À yɨ ɨmbə̀ʼ ɨkwɨ ŋgəʼ wɔ̂ nɨ Ŋwiə̀ nyaʼa tɔŋ əwən ni mbə̀ yeʼ mbi bə̂d. Mbə̀ kyerɨ ni Kristo nyaʼa bə̀ zə ŋgəʼ ɨmbə̀ʼ əwən. Əne wɨ̀ nyaʼa chwi ənweenɨ ɨ nən ɨmbə̀ʼ mbə sɨə beenɨ əbɔʼ tɨkyerɨ-ɨwu ɨməd.

²² Chəi wɨ̀ nyaʼa ghɨ ənû rɨbɔ̀ŋ ə mɔʼɔ. Chəi mɨghab mɔʼɔ nyaʼa jwɨ̀ rɨŋga ɨchù məd.

²³ Ənɨ mbɨ nyaʼa zɔm əməd, chəi wɨ̀ nyaʼa bə̀ zɔ̀m bə̂d mbe nɨ nyaʼa zɔm əməd. Ənɨ wɨ̀ nyaʼə zə ŋgəʼ, chəi wɨ̀ nyaʼa gha ni tə bɨrɨ wì. Wɨ̀ nyaʼa nuŋ i fîŋ yeʼ ɨgun ə Ŋwiə̀ we nɨə saʼə bə̂d ɨchî nɨ kuʼnɨ.

²⁴ Kristo ziə nyaʼa beʼ mba ɨnû rɨbɔ̀ŋ ɨŋga i ɨnyod ənɨ wɨ̀ nyaʼa əzed ə baʼnɨ. Wɨ̀ nyaʼa ghɨ əne ɨmbə̀ʼ tɨ rɨ̀ wɨrɨ ghɨ a ɨnû rɨbɔ̀ŋ. Tɨ̀ sɨə chub àmei ɨchî nɨ kuʼnɨ. Ɨna mbe nɨ nyaʼa ɨgwɨ məd fə ghɨ mbə bɔtɨ.

²⁵ Mbə mbɨə nyaʼa ɨghabɨ ə njɨ̀g te nɨ nyaʼa febə, àyɨə tɨ̀nîn mbə fə wɨrɨ bə̀ndɨ̀ wo əsɨ Ənə̂ŋgɨ̀-njɨ̀g, nɨ yeʼ Wə̀d we nɨə nə̀m əwən.