1 Kɔrèn 6 - Meta’

Ənû nɨ bə̂d Kristo ə nɨŋə mbɨ cherə wò ə nəb ɨsaʼi

¹ Ənɨ wə̀d mɔʼɔ rəbɔʼ nən berɨ ɨsaʼi mbɨ wə̀d Kristo cherə, wɨ̀ kɨə nɨŋ ɨsaʼi we wò əsɨ ə bə̂d mbe nɨ chəi mbɨə wumnɨ ə Ŋwiə̀ ɨmbə̀ʼ ə ye ə? Njɨ ɨmbə̀ʼ wɨ̀ kə̀ʼ nɨŋ wò yeʼ əsɨ bə̂d Ŋwiə̀ ə?

² Chəi mbə̀ kyerɨ ni à yɨə bə̂d Ŋwiə̀ bɨrɨ saʼ ɨsɨg wɔ̂ ə? À mɨ yeʼ ni à yɨə mbə̀nə bɨrɨ saʼ ɨsɨg, njɨ mbə̀ rɨ wa kuʼ ə nɨ saʼ bɔn tɨ mɨsaʼi ə?

³ Chəi mbə̀ kyerɨ ni à yɨə mbǎ bɨrɨ saʼ mbɨ̀aŋgɨrə̀ ə? À nɨə yeʼ əne, njɨ tɨ̀ berɨ bɨ saʼ ɨnû nɨ dè ɨ̀tènɨ̀ wɔ̂!

⁴ Əne mbə mɨ berɨ mɨsaʼi ɨghabɨ mbɔ̂, mbə̀ kɨə chɔʼɔ bə̂d mbe nɨ chəi mbɨə nàʼ ɨwumnɨ əmbɨ mɨ̀mə̌d ɨŋga ɨfetɨ ni mbɨ saʼ ɨnû rəŋgu ɨmbə̀ʼ ə yè ə?

⁵ Mə wɨə ghà ənû zɔ̂ ɨmbə̀ʼ naʼ tɨ̀nìd ətu ɨ nən. Zɨə wa chwi ni chəi wə̀d mɔʼɔ əkaʼ nən nɨ kaŋ berɨ ɨwe nɨ tɨ̀ wɨ̀ saʼ bə̂d Kristo ə?

⁶ Àyɨə mə wɨə zəə yeʼ ni wə̀d Kristo wɨə nɨŋə wə̀d Kristo cherə mbɨ wò ɨfě bə̂d mbe nɨ chəi mbɨ ben ə Kristo ni mbɨ saʼ mɨ̀mə̌d!

⁷ Ənû nɨ berɨ mɨsaʼi əkaʼ nən ə chwi ni chəi mbə̀ə ghɨ̀ ɨnû ɨghabɨ ə bə̂d Kristo. Zɨ rɨ wa bɔŋ i ni mbɨ ghɨ ənû rɨbɔ̀ŋ yeʼ ənɨ ə nən ə? Zɨ rɨ wa bɔŋ ni mbɨ fɨg yeʼ əwən ə?

⁸ Àyɨə mbə mbɨə ghɨ̀ ɨnû rɨbɔ̀ŋ bə̀ fɨ̀gə̀ ka àbei mbə bɔŋgɔb ɨŋga ɨfetɨ.

⁹ Chəi mbə̀ kyerɨ ni chəi bə̂d mbe nɨə ghɨ̀ ɨnû rɨbɔ̀ŋ bɨrɨ jɨg ənû ɨfɔ̀n ə Ŋwiə̀ ə? Tɨ wə̀d mɔʼɔ tambɨ i əwən: chəi bə̂d mbe nɨə ghɨ̀ ɨfabrɨ-ɨnû bɨrɨ nɔ jɨg ənû ɨfɔ̀n ə Ŋwiə̀, kɨ̀ mbe nɨə wumnɨ mbɨ̀anèŋ, kɨ̀ mbe nɨə niirɨə məyi kɨ̀ mbaŋə̀, kɨ̀ mbaŋə̀ nɨə niə tɨ cherə,

¹⁰ kɨ̀ mɨjɨ, kɨ̀ bə̂d mbe nɨə ghɨ̀ əjə, kɨ̀ mbe nɨə nɔə beə, kɨ̀ mbe nɨə chə̀kɨ̀ rɨkum bə̂d, kɨ̀ mɨjɨ bagɨ.

¹¹ Bə̂d mɔʼɔ rəbɔʼ nən mbɨə nyaʼə ghɨ̀ ɨnû mbɔ̂. Àyɨə Ə̀nùŋɨ̀sɨg Yeso Kristo mbɨ Əzwî à Ŋwiə̀ fə sò əwən bə̀ zeŋnɨ əwən, ghɨ̀ mbə təm kùʼnɨ̀.

Mbə̀ nɨŋ tə nyamnyod wumnɨ ə Ŋwiə̀ əŋgu

¹² Wə̀d mɔʼɔ we tɨ̀ wɨ̀ ghà ni, “Mə we tɨ̀ mə ghɨ̀ ɨnû jìm.” À yɨ əne, àyɨə kaʼi ɨnû jìm bɨrɨ weerɨ əwe. Mə kyerɨ ni, “Mə we tɨ̀ mə ghɨ̀ ɨnû jìm,” àyɨə chəi mə bɨrɨ ben ə̀bòʼò əmbɨ ənû ə mɔʼɔ.

¹³ Wə̀d cherə we tɨ̀ wɨ̀ ghà ni, “Ɨghɨ mbe nɨ bə̂d jɨgɨ mbɨə chèə̀ wò ɨŋga ɨbum mbɨ ni ɨbum wɨ əŋgu ɨmbə̀ʼ yim ɨghɨjɨg.” À yɨ əne, àyɨə Ŋwìə̀ bɨrɨ zɨ ɨnwǐ ənɨ ɨnû mbɔ̂ be. Chəi tɨ̀ berɨ nɨ nɨŋ nyamnyod ghɨ̀ ɨfabrɨ-ɨnû əŋgu. Tɨ̀ berɨ nɨŋ fàʼ yeʼ əmbɨ ə Ŋwiə̀. À yɨ Ə̀nùŋɨ̀sɨg ə nəŋgɨə nyamnyod.

¹⁴ Ŋwìə̀ we nɨ nyaʼa zwemnɨ Ə̀nùŋɨ̀sɨg bɨrɨ bɨ zwemnɨ əwa ənɨ i ɨka.

¹⁵ Chəi mbə̀ kyerɨ ni tə nyamnyod yɨ ɨba rɨ ənɨ ə nyamnyod Kristo ə? Əne mə̀ wa nɨŋ ɨba rɨ ənɨ nyamnyod Kristo fɔtɨ mbɨ nyamnyod ə̀kùnɨ̀ ə? Chə̂!

¹⁶ Chəi mbə kyerɨ ni mbaŋə̀ ze nɨ fɔtɨ i ɨnyod mbɨ ə̀kùnɨ̀ fə bèŋ sɨə nyamnyod mɔʼ mbɨ məd ə? Ə zɨ ɨŋga Ə̀ŋwàʼnɨ̀ ə Ŋwiə̀ ni, “Mɨ̀mə̌d mbe mɨbe bɨrɨ fɔtɨ sɨə nyamnyod mɔʼ.”

¹⁷ Àyɨə wə̀d we nɨ fɔtɨ i ɨnyod mbɨ Ə̀nùŋɨ̀sɨg, əzwî əməd mbɨ Əzwî Ə̀nùŋɨ̀sɨg fə sɨ əzwî ə mɔʼ.

¹⁸ Mbə̀ ton ɨfabrɨ-ɨnû! Chəi ɨnû rɨbɔ̀ŋ jìm cherə mbe nɨ bə̂d ə ghɨ̀ ə bètɨ̀ə̀ nyamnyod, àyɨə wə̀d we nɨə ghɨ̀ ɨfabrɨ-ɨnû wɨə ghɨ̀ ɨnû rɨbɔ̀ŋ ənɨ i nyamnyod.

¹⁹ Chəi mbə̀ kyerɨ ni tə nyamnyod yɨə mbàn əmbɨ Əzwî ə Zeŋɨ ze nɨ yeʼ ɨŋga nən, nɨ Ŋwìə̀ nyaʼa naʼ ɨ nən ə? Ka tə nyamnyod yɨ i tən.

²⁰ Ŋwìə̀ nyaʼa fə zon əwən ənɨ ɨkab nɔnɔʼ. Əne mbə̀ nɨŋ ə ɨnyod wumnɨ ə Ŋwiə̀ əŋgu.