1 Kɔrèn 5 - Meta’

Əfabɨrɨ-ənû ze nɨ nyaʼa ɨŋga ɨfetɨ bə̂d Kristo we rɨ ə Kɔrèn

¹ Mə fə kàŋ zu ənɨ bə̂d ə ghàə̀ ni əfabɨrɨ-ənû ə zɨ əkaʼ nən, nɨ yeʼ ɨkwɨ mɔʼɔ we nɨ chə bei əkaʼ bə̂d mbe nɨ chəi mbɨə wumnɨ ə Ŋwiə̀. Mə fə zu ni mbaŋə̀ mɔʼɔ zɨə ni ɨwi i mbǎʼ.

² Àyɨə mbə mbɨə seenɨə! Njɨ ɨmbə̀ʼ ə̀kə̀nɨ̀ ə kə̀ʼ swi ɨŋga tə fîŋ mbə chɨ̀ mbaŋə̀ ze nɨ ghɨ̀ ənû zɔ̂ rəkaʼ nən ə?

³ Ka à bè yeʼi ni chəi əmɨ əkaʼ nən mɔ̌ mɔ̌, àyɨə mə əzwî ə zɨ i mbɨ nən. Mbə̀ nɨŋ ni mə wɨ əkaʼ nən, əne mə fə sob ɨsaʼi ɨgun ə mbaŋə̀ ze nɨ ghɨ ənû zɔ̂

⁴ ənɨ ɨkum Yeso Kristo. Ənɨ mbə̀ fetɨ, əne mɨ əzwî mbɨ ɨka we nɨ a Ə̀nùŋɨ̀sɨg Yeso nyaʼa naʼ ɨ nən ə yeʼ mbɨ nən,

⁵ mbə̀ saŋ mbaŋə̀ zɔ̂ ɨŋga tɨkyerɨ-ɨbɔ Satàn ni wɨ̀ chəkɨ nyamnyod məd, ɨmbə̀ʼ əzwî əməd ə jwɨ rəŋgəʼ əni ze nɨ Ə̀nùŋɨ̀sɨg Yeso bɨrɨ wɨrɨ yeʼe.

⁶ Ɨchî nɨ mbə̀ə goŋ ɨgɔ̂ rɨka bɔ̀ŋ i. Chəi mbə̀ kyerɨ ni àmei akə ɨfuʼ we nɨə ghɨ̀ ni ŋgə̀ŋ kɔʼ we ə nɔ̀ɔ̀rɨ̀ ŋgə̀ŋ jìm ə?

⁷ Mbə̀ chɨ ɨfuʼ ənun we nɨə ghɨ̀ ni ŋgə̀ŋ kɔʼ, ɨmbə̀ʼ mbə̀ yeʼ ɨghabɨ ə ŋgə̀ŋ fi nɨ chəi ɨfuʼ we nɨə ghɨ̀ ni ŋgə̀ŋ kɔʼ ɨŋga. Mə kyerɨ ni mbə yɨə kaŋ əne, ɨmbə̀ʼ ɨghəm nɨ mbɨ nyaʼa nàʼ ə Kristo ənɨ əghɨ ə̀fà ɨgwɨ mba ɨnû rɨbɔ̀ŋ. Məd yɨ ɨghabɨ ə wan njɨ̀g we nɨ mɨ̀Jû nyaʼə kyem əni Əchwɨ̂ ə Che-ɨgun.

⁸ Əne tɨ̀ jɨg əchwɨ̂ ze, kaʼi mbɨ ə ŋgə̀ŋ ze nɨ ɨfuʼ ənun we nɨə ghɨ̀ ni ŋgə̀ŋ kɔʼ yeʼ ɨŋga. Ɨfuʼ ənun we nɨə ghɨ̀ ni ŋgə̀ŋ kɔʼ yɨ ənû nɨ ghɨ̀ ɨnû rɨbɔ̀ŋ mbɨ ənû nɨ ghɨ ɨzɨg. Àyɨə tɨ̀ jɨg əchwɨ̂ ze yeʼ ənɨ ə ŋgə̀ŋ nɨ chəi ɨfuʼ we nɨə ghɨ̀ ni ŋgə̀ŋ kɔʼ ɨŋga. Tɨ̀ jɨg ənɨ ə fîŋ zeŋɨ zeŋɨ bə̀ sɨə ghà ɨnû mbe nɨ yeʼ mbɨ rəsìʼ.

⁹ Mə nyaʼa ŋwaʼnɨ ɨ nən ni tɨ mbə̀ jɨg ə̀sə̀ʼ mbɨ ə bə̂d mbe nɨə ghɨ̀ ɨfabrɨ-ɨnû.

¹⁰ Kaʼi mə̀ gha bə̂d rɨŋga ɨsɨg wɔ̂ nɨə ghɨ̀ ɨfabrɨ-ɨnû, kɨ̀ mbe nɨə ghɨ̀ əjə, kɨ̀ mbe nɨə jɨə, kɨ̀ mbe nɨə wumnɨ mbɨ̀anèŋ. Mbə mɨ kəb ghɨ əne, njɨ mbə berɨ jwɨ rɨŋga ɨsɨg wɔ̂.

¹¹ Àyɨə rɨ̀nîn, mə wɨə ŋwàʼnɨ̀ ɨ nən yeʼ ni tɨ mbə̀ jɨg ə̀sə̀ʼ mbɨ wə̀d mɔʼɔ we nɨ gha ni tə ben ə Kristo, àyɨə ɨ wɨə kɨrɨ ghɨ ɨfabrɨ-ɨnû, kɨ̀ ɨ wɨə ghɨ̀ əjə, kɨ̀ ɨ wɨə wumnɨ mbɨ̀anèŋ, kɨ̀ ɨ wɨə chə̀kɨ̀ rɨkum bə̂d, kɨ̀ ɨ wɨə nɔə beə, kɨ̀ ɨ wɨə jɨə. Tɨ mbə̀ be jɨg ə mbɨ ɨkwɨ wə̀d wɔ̂.

¹² À wa kɨ əzum rɨmbin nɨ saʼ bə̂d mbe nɨ chəi ɨŋga ɨfetɨ bə̂d Kristo ə? Ɨmbə̀ʼ mbə berɨ saʼ yeʼ bə̂d mbe nɨ yeʼ ɨŋga ɨfetɨ bə̂d Kristo ə?

¹³ À yɨə Ŋwìə̀ bɨrɨ saʼ bə̂d mbe nɨ chəi ɨŋga ɨfetɨ bə̂d Kristo. Ə zɨ ɨŋga Ə̀ŋwàʼnɨ̀ ə Ŋwiə̀ ni, “Mbə̀ fid ɨzɨg we nɨ yeʼ əkaʼ nən.”