1 Kɔrèn 16 - Meta’

Ənû nɨ chob ɨkab ɨmbə̀ʼ weerɨ bə̂d Ŋwiə̀ ə Jèrusalèm

¹ Tɨ̀nîn, mə kəb gha ɨmbə̀ʼ ənû nɨ chob ɨkab ɨmbə̀ʼ weerɨ bə̂d Ŋwiə̀. Mbə̀ ghɨ̀ ənû ze nɨ mə̀ nyaʼa ghǎ əmbɨ rɨfetɨ bə̂d Kristo te nɨ yeʼ ə Gàlesià.

² Ənû ze yɨ ni: ɨni Sɔndè jìm, wə̀d mɔʼ mɔʼ rəbɔʼ nən chɨ ɨnun ɨkab mɔʼɔ rəbɔʼ we nɨ wɨ̀ fàʼi, nùŋ, ɨmbə̀ʼ ənɨ mə̀ yeʼe, tɨ mbə̀ wɨrɨ chob ə ɨkab we.

³ Ənɨ mə̀ yeʼe, mə bɨrɨ ŋwaʼnɨ ɨmbə̀ʼ bə̂d mbe nɨ mbə̀ chɔʼɔ, əne tom mɨ̀mə̌d nɨ mbɨ wo nàʼ ɨkab we nɨ mbə̀ chob ə Jèrusalèm.

⁴ Zɨə mɨ chwi ni mə̀ bə wò, mbɨ bɨrɨ yen mbɨ num.

Pɔ̂l nyaʼa taŋ ni tə bɨrɨ wò ə Kɔrèn

⁵ Mə bɨrɨ yeʼe əsɨ nən ənɨ mə̀ fə che ə Màsèdonià, ɨmbə̀ʼ ɨghəm nɨ mə fə tekɨ ni mə bɨrɨ chè ə Màsèdonià.

⁶ Ɨghə̀m mə bɨrɨ chubɨ mbɨ nən ənɨ ɨkə nyùmə̀, kɨ̀ mə bè chub əwɔ ənɨ ə nyùmə̀ we nɨ ɨfə ə kɔ əku, ɨmbə̀ʼ mbə̀ weerɨ chà əmɨ əsɨ ze nɨ mɨə wòə̀.

⁷ Mɨ rɨka kə̀b əmɨ nɨ zə əwən tɨ̀nîn ənɨ mɨə chèə̀. Mə̀ kàŋ kə̀b chubɨ mbɨ nən ənɨ əgha nɨ tɔ saarɨ, əne yɨ əwù ze nɨ Ə̀nùŋɨ̀sɨg benɨ.

⁸ Àyɨə rɨ̀nîn, mə bɨrɨ kɨrɨ chub ə Efesùs pè əni ə Pentekɔ̀s,

⁹ ɨmbə̀ʼ ɨghəm nɨ əpan ə chɔ̀m ə fə jwɨ̀ ɨ num ni mə̀ faʼ ə̀fàʼì ə kyeŋ, àyɨə chəi bə̂d mɨ̀nɔnɔʼ kəbɨ ni mə faʼ ə̀fàʼì ze.

¹⁰ Timotì mɨ yeʼe, mbə̀ zə ni wɨ̀ chub ɨchî chɔ̀m əkaʼ nən. Məd wɨə fàʼ əmbɨ Ə̀nùŋɨ̀sɨg ɨchî nɨ mɔ̌ ə bə̀ fàʼə̀.

¹¹ Tɨ wə̀d mɔʼɔ təənɨ i əməd. Mbə̀ weerɨ əməd ni wɨ̀ yèn ənɨ əbɔrəbɔd ənɨ wɨə wɨrɨə bə̀ndɨ̀ə̀ yeʼe əsɨ num. Mə wɨə wòm əməd ni wɨ yeʼe mbɨ ə bɔŋgɔb cherə mbe nɨ ben ə Kristo.

¹² À yeʼ ɨmbə̀ʼ wa aŋgɔb Àpolòs, mə̀ wɨə nyaʼə kàŋə̀ ghà ɨ bɔ ni məd mbɨ ə bɔŋgɔb cherə yeʼe əsɨ nən. Chəi wɨ̀ kə̀b nɨ yeʼe tɨ̀nîn, àyɨə wɨ̀ bɨrɨ yeʼe ənɨ ə nyùmə̀ we nɨ wɨ̀ berɨ əpan.

¹³ Mbə̀ we əwən. Mbə̀ nùŋ fîŋ nɨ kaanɨ ɨgun ə Kristo. Tɨ mbə̀ bɔ ə. Mbə̀ təm kàànɨ̀.

¹⁴ Mbə̀ ghɨ ɨnû jìm ənɨ ɨghaʼi.

¹⁵ Mbɨ bɔŋgɔb, mbə̀ nyaʼa fə kyerɨ ə ni ɨnəbɨ Stefanàs yɨə nyaʼə ɨnəbɨ rɨtu nɨ nyaʼa ben ə Kristo ə Àkàiyà. Mɨ̀mə̌d nyaʼa fə sweŋ ə ɨnyod nɨ faʼ əmbɨ ə bə̂d Ŋwiə̀. Əne mə wɨə buʼ ɨ bɔ ɨ nən ni,

¹⁶ mbə̀ zuunɨ bə̂d ɨghabɨ mbɔ̂, bə̀ zuunɨ wə̀d jìm we nɨə fàʼə̀ bə̀ nwìʼ ɨnyod mbɨ na ənɨ ə̀fàʼì zɔ̂.

¹⁷ Mə nyaʼa kàŋ ghaʼ əku ənɨ Stefanàs mbɨ Fɔtunatùs fɔrɨ ə Àkàikùs nyaʼa yeʼe, ɨmbə̀ʼ ɨghəm nɨ mbɨ nyaʼa faʼ ə̀fàʼì ze nɨ, à kɨ nɨ mbə̀ nyaʼa əgha mbɨ num, njɨ mbə nyaʼa fàʼ.

¹⁸ Mbɨ nyaʼa ghɨ̀ mɨ fîŋ zùtɨ̀ ɨchî nɨ mbɨ nyaʼa bə̀ ghɨ tən zùtɨ̀. Zɨə bɔ̀ŋ ni bə̂d kyerɨ ni mɨ̀mə̌d mbɨə fàʼ ə̀fàʼ ə chɔ̀m.

¹⁹ Tɨfetɨ bə̂d Kristo te rɨ əbà əbeŋ ze rɨ ə Esià chàʼrɨ̀ əwən. Àkwilà mbɨ Priskà mbɨ ɨfetɨ bə̂d Kristo we nɨə nyɨ ɨŋga nəb mɨ̀mə̌d bə̀ chàʼrɨ̀ əwən kwàʼ ɨchî chɔ̀m ənɨ ɨkum Ə̀nùŋɨ̀sɨg.

²⁰ Bə̂d mɨjìm mbe nɨ ben ə Kristo chàʼrɨ̀ əwən. Mbə̀ chaʼrɨ wə̀d mɔʼ mɔʼ kwàʼ ɨchî chɔ̀m. Mbə̀ chaʼrɨ əne chwi ɨghaʼi we nɨ yeʼ əkaʼ bə̂d Kristo.

²¹ À yɨə mɔ̌ Pɔ̂l kaŋ ŋwaʼnɨ ə̀chàʼrɨ̀ zɔ̂ ənɨ mɨ əbɔ.

²² À mɨ yeʼ nɨ chəi wə̀d mɔʼɔ ghaʼ Ə̀nùŋɨ̀sɨg, ndɔ̀n yɨ zɨ məd. A Ə̀nùŋɨ̀sɨg, yeʼe!

²³ Ə̀nùŋɨ̀sɨg Yeso ghɨ ɨ̀chɔ̀m ənɨ ə nən.

²⁴ Mə ghaʼ mbə̀n mɨ̀jìm ɨchî nɨ tɨ̀ yeʼ ənɨ ɨfɔtɨ mbɨ Kristo Yeso. À yɨ əne.