San Mateo 17 - Mayo

Jesústa täbuiasi ä tahuakäihui

¹ Búsan taahuarim simsuko, Jesús am nüka, Perota, Jacobota, entok Juan ä sailahua. Huanäi am nuk siika, júya káhuit jikahui bempolaim.

² Huanäi bem bíchäpo täbuiasi áu yáuhuak. Ä pújbahua täata bénasi bélojkosi bíttuy; ä sánkohua éntok tósalisi aayuk, machiriata bénasi.

³ Ímïri Moisés entok Elías ámeu yeu machiak, áamak ettejhuaka.

⁴ Huanäi Peero Jesústau ínel jiaahua: —Señor, ¡türi ito béchïbo jü ímï anhuame! Enchi ínel éayo, báij jötamte ímï yáanake: huépülak emo béchïbo, senuk entok Moiséjta béchïbo, entok senuk Elíasta béchïbo.

⁵ Ketune áapörik ä nokayo, namu machiriaka am róptiak. Huanäi jíahui namupo jíkkaijtuk, ínel jíaka: —Ïri ájäria jü ín Üusi ín nákëhui. Áamakne al‑leiya; áapörikem jíkkaja.

⁶ Jume discíipulom íkäi jíkkajakam tónommey jáptek. Huanärim buíau tájti kom kóbatek, tüisi májhueka.

⁷ Huanäi Jesús ámeu rúkteka ámet mámtek, ínel jíaka: —Jáptëem; entok katem májhue.

⁸ Huanäi bempo jikau remteka, kaabetam bitchak, Jesústa áapolaik jíbba.

⁹ Të chúkula júya káhuit kömam sájako, Jesús ám sáhueka ínel ámeu jiaahua: —Juka enchim bíchakäu, kaabetem ä téttejhua, ál‑la chúkula béja kókkolam násuk juka Yoremta Üusi jíabiteko.

¹⁰ Huanäi ä discíipulom ä nátemajek, ínel jíaka: —¿Jatchiaka júntuk jume escriibam ä úttiä tíiya, jüka Elíasta bát yebijnakëhui?

¹¹ Jesús am yómmiak, ínel jíaka: —Lútüriapo, Elías bát yebijnake; huanäi sïmeta bemelasi yánake.

¹² Tëne ínel enchimmeu jiaahua, Elías béja yebissuk, të katim ä täyak, ál‑lam sïmeta bem yáa bárëu áu yáuhuak. Ínëli kétchi jü Yoremta Üusi áme bétana jiokot yáana.

¹³ Huanäi jume discíipulom huitti jünëiak, Juan Bautistata bétana ä nokaïhui.

Jesús táij mukërata tütek

¹⁴ Juka genteta yún anëu am yájako, senu yoreme áu yepsaka tónommey áu kíkteka ínel jiaahua:

¹⁵ —Señor, ín üusi táij múmukemtë nák jiokolë, tüisi jiokot áu bíbicha; bueïtuk juebénasi táijpo huehueche, entok juebénasi bäapo.

¹⁶ Huanäine jume em discíipulommeu ä nüpak, të ímëri én tájtim kara ä tüte.

¹⁷ Jesús ä yómmiaka ínel jiaahua: —¡Eme nat tómti kat‑riam kaita súalëram, entok sïmekut kaa türik joame! ¿Jauhuey tájtisune ikäi enchimmet ayukamta enchimmet bit yáatinake jäni? Inohuem ä huéria.

¹⁸ Jesús kuttílasi át nésahuek, jü lemooniotachi. Huanäi ïri át yeu siika, jü usitachi. Huanäi naateka türilataka taahuak.

¹⁹ Huanäi ä discíipulom bempola sékäna Jesústau yájaka, ínel áu jiaahua: —¿Jatchiaka ítapo kara yeu ä béebak?

²⁰ Jesús ínel ámeu jiaahua: —Diostat éehuame ilikkik enchim jípure béchïbo. Lútüriapone ínel enchimmeu jiaahua, eme mojtaasa báchiata béechisi Diostat éätek, ïri júya káhuittau ínel jíätek: “Sékänë emo yetcha”, huanäi sékäna áu yécha éiyey. Ínëli enchim béchïbo kaita kara yáataka tahua éiyey.

²¹ Të jü ilë béna kökoa lemoonio, ayuunopo entok oraciónimmaki jíba yeu sisime.

Jesús ä mënäu bétana júchi nookak

²² Galiléa buiärapo bempörim aneyo, Jesús ínel ámeu jiaahua: —Ínapo jü Yoremta Üusi yóremem mámpo tóijna.

²³ Huanärim ä mënake; të báij taahuarim huéy jíabitenake. Huanäi bempo tüisi sirokoka taahuak.

Tiöpo impuestom béjtuahuame

²⁴ Capernaum pueblou am yájako, Perotahuim yájjak, jume impuesto tómita náu totojame, ínel jíaka: —¿Jü enchim Maestro kaa am bébejtua, jume guoy dracmam?

²⁵ Áapo am yómmiak: —Jeehui. Huanäi jóapo ä kibakek, Jesús bát au nookak, ínel jíaka: —¿Jáchisë ä bitcha, Simmom? Jume ímï buíapo réyesim, ¿jábetasum ä úuhua, juka impuesto tómita: jume bem jóapo uusim, ö jume kaa áma joomem?

²⁶ Peero ä yómmiak, ínel jíaka: —Jume kaa jóapo joomem. Huanäi Jesús ínel áu jiaahua: —Júnëli jume usim jóapo joome béja kaita béjtua.

²⁷ Júnentaka junne, kaa am omtinakë béchïbo, bahuehuë sika anzuelota áman jímma. Huanäi juka kúchuta bát em yeu huíkekäu, Akë ä nüye huanäi ä tem étapokätek. Huanäre áma ä téunake, tómi estaterota. Íkäre nüka am mákka, íno béchïbo entok émo béchïbo.