Gav. 49 - Wakita á Dadaamiya (wandala)

Yakubu ankwa á gaterar barka ge egdzara‐aura kelaawa ju buwa

¹ Yakubu a ɗetaa egdzara‐aara baɗemme, a ba ŋane á elvan ge itare: Sawmbare baɗemme jawammeje ázerwa, Nawa yá ɓalakurse nazu watse á magava ate kure á katafke.

² Jawammeje, cenaucena nazu yá bakuma ya ba shagera, kwa egdzara‐aaruwa ya Yakubu. Cenaucena nazu yá ndaakura ya, ya eddekure Iserayiila:

³ Ekka Ruubain wá, ka makaji‐aaruwa, ka hakuma‐aaruwa ba ka arge egdzara mama‐aha á ŋa baɗemme, aɗaba ka ndzeɗa‐aaruwa zuŋŋwe ba ka am sarte na yá an ndzeɗa á dawalire‐aaruwa baɗemme.

⁴ Ká puwa sem aha seke ba yawe, ama wá, ká tsa iceka ire. Aɗaba ekka ka naba magiya nazena zlayeka ge iya, kwa naba nja amara palle á ŋwasha‐aha‐aaruwa.

⁵ Tara Simaun amara egdze a emmeoara Laiwi, itare ye‐aatare pane, ta emnde a garɗa.

⁶ Ƴanaaƴa ervauŋɗe‐aaruwa sawari‐aatare, á ekseka ire-aaruwa dem jahava‐aatare ɗekiɗeki. Am ica ervauŋɗe‐aatare, ta ceɓa shifa á zaala kwakya. An sunu‐aatare ta badzanve shifa á dalau‐aha kwakya.

⁷ A nyainyainvenyainye Dadaamiya ervauŋde‐aatare ŋanna, aɗaba kwakya kelaadire am huɗe‐aara, baaka zevarzire ázetare. Yá de tegese egdzara-aatare gergere kwakya am haha á Yakubu, yá de zaɗaxarvezaɗe an palpale am dagave á Iserayiila‐aha.

⁸ Ekka Yahuuda maa, ekka wá, egdzara mama‐aha a ŋa baɗemme tá de gala ba zhera á ŋa. Ká de gateraga ba ka an erva á ŋa kelaade‐aha á ŋa é katafke á na. Dete ba egdzara mama‐aha a ŋa keni, tá de gana ba itare ire á katafke á na ge ekka.

⁹ Ekka Yahuuda‐aaruwa wá, ka egdze‐aamwa. Ka ba seke ervare na ni a sa am tate a tsagwaɗa dabba a kaamba, hyanhya hyuwa na. Ka egdze‐aaruwa ge iya! Má kezlakkezla ugje am haha seke áza ervare zlavakzlava, seke ba mukse á ervare, ware edda‐aara á de egjekja ge tsantetse na?

¹⁰ Zade á sleksire wá, á degasheka am huɗe á ha á Yahuuda ɗekiɗeki, hakuma á de nja á ba am erva á emnde‐aara, dem sarte na ma samsa edda á zade ŋanna an jirire, eddawna m larde baɗemme á de fansarfe na.

¹¹ Ŋane watse a se ŋguda ezzeŋwa‐aara an egdzere am inabauhi. Watse a reva kacakaca‐aara an mbazla á egdze a inabauhi, zane‐aara watse a revana an yawe á egdze a inabauhi ŋanna.

¹² Ice‐aha‐aara á de nja á ba an deva kyaŋŋe ge mbazla á inabauhi, sera‐aha‐aara á de geva dzayye telle aɗaba uɓa.

¹³ Jabulaun maa, ŋane á de nja ate we á haye, tate á tsekwa pare á yawe-aha. Nakwe á haha‐aara ge ŋane á de shanaasha Sidaun.

¹⁴ Isakar wá, ŋane ezzeŋwa na ni ndzendzeɗa jipu na, á zlava am dale‐aha.

¹⁵ Be a naa tate ŋanna emtake ge puwansepuwe am huɗe‐aara, haha ŋanna keni snagera jipu wá, a naba gaa nahyapaihyape‐aara, ge sepa gwatame, a ganve ire‐aara nave.

¹⁶ Dan maa, ŋana wá, á de kwaratera ba ŋane emnde‐aara ba seke jeba‐aha umele am Iserayiila.

¹⁷ Dan, ŋane á garava an zahe na á zlava ate baráma, seke ba pushe na ni á zlava ate we á uŋŋule, a waa belse ate sera, a naba kezletaare ge eddawna ate iga a belsa ŋanna, an iga an iga, á sete haha na.

¹⁸ Saksage‐aaruwa, yá aŋkwa á fetare ate ka geni watse ká lyilyire.

¹⁹ Gada maa, watse tá gwargwe emnde a za baráma, amá waîse á bakatera ba ŋane, tá de enzla ba zlahhe.

²⁰ Amba á Asair wá, watse ɓaaka zlakta á ɗafa ɗekiɗeki. Haha ŋanna a de geɗeta emnde, watse ta ba seke slekse‐aha.

²¹ Naiftalim maa, ŋane á garava an kaamba na ni gelgela jipu, zara‐aha na ta am huɗe á kaamba ŋanna ta zariya‐aha jipu na.

²² Yusufa keni maa, ŋana á garava an nafa na ni an dzeɓa ate we á haye, a ya egdzere shagera, á vala erva‐aha‐aara átarge riya bademme na.

²³ Kelaade‐aha‐aara tá naba kata elva‐aara, ta naba danaa wava ta puwa gurme ate ŋane,

²⁴ amá ŋane tsatse degdege an gurme‐aara, erva‐aara á gyaigyaika ɗekiɗeki, aɗaba aŋkwa á melanumele suni na ŋane palaha á Iserayiila na, Dadaamiya Slekse na aŋkwa á kezlan ugje Yakubu.

²⁵ A melakumele Dadaamiya na aŋkwa á fansarfe eddeŋa na. A vakteva Dadaamiya Slekse barka na á hyana ŋane am yawe á sawa am huɗe á samaya antara barka na am yawe na á segashe am huɗe á haha na, antara barka na ni á vaterte ya ge ŋwasha na, amara uɓa na ta fateru ge egdzera.

²⁶ Barka‐aha na á vakta eddeŋa wá, jauje ge barka‐aha na am huɗe á wa‐aha saɗaɗɗe na a zleka na antara am egdzar wa‐aha bademme. A tsekwanaatsekwa Dadaamiya barka‐aha ŋanna á setarge ekka Yusufa, ekka na jakateruje ge egdzar mama‐aha a ŋa baɗemme an malire na.

²⁷ Bainjamaiŋ wá, ŋane á garave an indale na á ceɓa dabba‐aha. An eŋlya, á za dabba‐aha na á ceɓanaa ŋane, an icawaya á tega nazena a shanaa ŋane.

²⁸ Kwaya ŋane emnde na watse tá gev jeba‐aha á Iserayiila kelaawa ju buwa. Eddetare a tsakaterse elva‐aha ŋanna, a gaterar barka. Barka ŋanna maa, a gater an palpale, ma ware‐aatare keni á ba an barka‐aara.

Emtsa á Yakubu

²⁹ Am iga á una ŋanna baɗemme, Yakubu a ndaterse elva na ge egdzara-aara, a ba ŋane: Má emtsanemtsa ya, zlalanzlala ádeza eggy‐aha‐aaruwa wá, kwa de heɗiya am hwalakwa na am fahe á Aifruna ura Haiti.

³⁰ am Makpaila, á dam gedi‐aara ge Mamre na. Hwalakwa ŋanna, kwaye ndza a shekwanaa Ibrahiima antara fahe ŋanna baɗemme ge heɗa emtsa am huɗe‐aara.

³¹ Tara Ibrahiima ŋanna antara mukse‐aara Saraatu, tara Isiyaaku antara mukse‐aara Raibaika, baɗemme ta heɗatera á ba am tate ŋanna, ira Lee’a keni, ya heɗanaa ba iya an erva‐aaruwa á ba am tate ŋanna.

³² Fahe ŋanna antara hwalakwa na am huɗe‐aara na baɗemme an shekwa, ta shekwanaa am erva á Haiti‐aha.

³³ Zlauzle am tsakatera elva na Yakubu ge egdzara‐aara, teŋelemme a zlavehe ate egdera‐aara, haaffe a puwese shifa wá, ɓaaka zlaazlala ádeza eggye‐aha‐ŋara á faya.