Mata 4 - Wakità Zəzagəla Wakità Aŋa Makəs Vok Slawda Mawga (Cameroun)

Seteni apapat Yesu

¹ Kiya uwaga Masasəɗok Zəzagəla adàla Yesu à fəta à abà kà seteni aŋa mapa­patay.

² Mok uwana Yesu adaɗàh mavakay dzik ufaɗ, la mahənay dzik ufaɗ kà, may akə̀s masla.

³ Kiya uwaga seteni azà vok à slaka aŋha la magoɗal: “Baŋa kak Kona aŋa Zəzagəla ndzer kà, ‘Pàk kaf!’, gòɗ à akur uwanay.”

⁴ Yesu awùlla à uda: “Uwaga kà matse­tse­rayga: ˈDza adzadzar vok kà la kaf pəra aw, ama la kəla gay gesina uwana atsa à waŋ la paŋaw aŋa Zəzagəla la awtày.ˈ”

⁵ Kiya uwaga seteni adàla masla à Uru­sa­lima, à gudəŋ tsi­ɗa­ŋaga à abà, adàla à gəl aŋa məŋ gày Zəzagəla à afik,

⁶ agòɗal: “Baŋa kak Kona aŋa Zəzagəla ndzer kà: Vàl à ahəŋ la abanay, kà uwana uwaga kà matse­tse­rayga: ˈ‘Dàw!’, Zəzagəla adàgoɗ à azla­ma­lika aŋha lakəl aŋak kà mazlak ka Ŋgaha tadàkəs ka la matsaw ka kà, kà akur aŋa mazləl ka asik aw.ˈ”

⁷ Yesu awulàlla: “Tatsetsèr à wakità à abà la slaka anik babay kà: ˈKa­pa­pata Sufəl Zəzagəla aŋak aw.ˈ”

⁸ La lig la ahəŋ seteni adàla à gəl gudəŋ matsəka­ka­ɗayga à afik aya, apə̀halla makoray aŋa gudəŋ à vok gesina la mazləɓay aŋha.

⁹ “Gədàvà à ka uwaga gesina, à baŋa kakəɗeɗ à gi à ahəŋ kasləkaw gi”, agòɗal.

¹⁰ Yesu agòɗal: “Zà vok, kak seteni! Haɗay, tatsetsèr à wakità Zəzagəla à abà kà: ˈZlə̀ɓà Sufəl Zəzagəla aŋak, ŋgaha ɗàhalla sləray kà masla kokuɗa gəl aŋha pəra.ˈ”

¹¹ La abatà seteni asàkal à ahəŋ. Azla­ma­lika tasà à waŋ à slaka Yesu kà mazla­kəŋ.

Yesu adzəka sləray aŋha la kutso Galili

¹² Mok uwana Yesu atsənàŋ tadùw Yuhana à daŋay kà, atsìzlla ala, adà aŋha à Galili.

¹³ Asàk à madz à ahəŋ la Nazaret, ahàd kà madz à ahəŋ la Kaper­nahum, gudəŋ uwana la gay dərəv aŋa Galili, la makoray aŋa Zabulon la Neftali la abà.

¹⁴ Apakà vok kiya uwaga kà, kà gay aŋa masla mapəhal gay à ahàl Yesayya aŋa magəɗ à afik:

¹⁵ ˈKutso aŋa Zabulon la aŋa Neftali, Uwana la gay mukwà, la kutso uwana la dərəv à uda anik aŋa mukwà Urdun, Ŋgaha la Galili uwana azladza uwana azla Yahu­diya aw, tadz à ahəŋ la abà.

¹⁶ Tsəhay uwana adz à ahəŋ la mələs la abà, Adànəŋ magol uɗaka. Azla­uwana tadz à ahəŋ la dzəgay aŋa mamətsay la abà bay, Uɗaka adàpəhatàla vok.ˈ

¹⁷ Dagay la kaslà uwatà, Yesu adzəkà mapəh gay Zəzagəla, agòɗ à atà: “Pə̀hàw gay la ləv ala kà uwana makoray aŋha kà nekwa.”

Yesu azal azlaməna matapla matera la slaka aŋha

¹⁸ Mok uwana Yesu augu­zahay la gay mukwà aŋa Galili kà, anəŋà Səmon uwana tazallala Piyer atà la deda aŋha Andəre, uwana tadàw dzarawa aŋatà à iyaw à abà; kà uwana atà azlaməna makas kilfi.

¹⁹ Yesu agòɗ à atà: “Nəfàw gi, ŋgaha gədàpakakulla kà azlaməna makas azladza.”

²⁰ Katskats tasàk à dzarawa aŋatà à ahəŋ ŋgaha tanəfà masla.

²¹ Adà à huma à gay kərkər zwek, tanəŋà Yakuba atà la Yuhana deda aŋha, azla­kona aŋa Zebede. Tagà la kəslah iyaw aŋatà la afik la baba aŋatà Zebede, taɗàh dzarawa aŋatà, Yesu azàl atà.

²² La katskats tasàk à kəslah iyaw aŋatà à ahəŋ la baba aŋatà gà, tanəfà Yesu.

²³ Yesu auguzàh la kutso Galili gesina, ata­pàhla azladza la azlagày madəv kuɗa la aku, azahà à ata gay marabəŋ lakəl aŋa makoray Zəzagəla, ŋgaha awarà azladza ala la azlatsəhay ɗuvats anik anik, la azla­deri gesina.

²⁴ Azladza tatsənàŋ tapəhay lakəl aŋha la makoray aŋa Səriya gesina, ŋgaha tasàhla azlaməna ɗuvats anik anik à waŋ gesina uwana tas ŋgərpa, la azla­ma­sasəɗok mawi­siga, la azla­deri ŋgaha awarà atà ala.

²⁵ Maham à ahəŋ dza aŋuvaw anəfà masla, tasà à waŋ la kutso Galili, la makoray aŋa gudəŋ kulo, la Uru­sa­lima, la Yahu­diya ŋgaha la gay makwi aŋa dərəv à uda aŋa mukwà Urdun.