Kolosəya 2 - Wakità Zəzagəla Wakità Aŋa Makəs Vok Slawda Mawga (Cameroun)

¹ Asa à gi, kà kasəlaw kà, gədaɗah sləray məŋga kà aŋkul azla Kolosəya, ŋgaha kà aŋa azla Lawo­di­kiya babay, ŋgaha kà aŋa azladza anik gesina, uwana tanə̀ŋ gi la yewdi aw bay.

² Gəɗehəŋ kiya uwanay, kà ləv aŋkul aŋa magay la ndzəɗa, ŋgaha kà akul aŋa mawoy vok akul à akul, la ləv tekula. Asa à gi babay kà, kasəlaw dziriga uwana Zəzagəla afə̀tal à ama ala, lakəl aŋa Kristu, kà akul aŋa madz à ahəŋ la abà lela, ŋgaha Zəzagəla aŋa mapi­sa­kulla gay à vok kà aŋa uwaga. Tatak uwana Zəzagəla afə̀ta­nula à ama ala kà, kà Yesu Kristu.

³ Yesu Kristu uwaga kà apə̀zl à anu tetəvi, kà anu aŋa magay anu azla­ma­tsi­hi­laga, ŋgaha kà anu aŋa matsən tatak uwaga. Matsi­hila uwaga kà bokuba ləmana.

⁴ Gəpəh à akul kiya uwanay kà, kà dza aŋa mavavar akul la azlagay namnamga aw.

⁵ Baməraka gədagay kərkər la akul, koksi­koksi gədzugway kà akul. Gi la marabay kà uwana à uwana kaɗa­hàwwàŋ gesina kà la tetəvi aŋha, ŋgaha la uwana kavàw ləv aŋkul à Kristu, kadzàw à ahəŋ lela.

Sifa aŋa azlauwana tahamà gay à vok la Yesu Kristu

⁶ Lagonay kà, kakə̀sàw kà Yesu Kristu kà Sufəl aŋkul. Kiya uwaga kà, dàw la maham gay à vok la abà la masla.

⁷ Dzàw à ahəŋ la ahàl aŋha bokuba ahàf uwana adàla slilih à kutso à agu kərkər. Dàw kà à huma à gay. Gəɗàwàŋ à afik à maval ləv aŋkul bokuba uwana tatà­pa­kulla. Kikay gòɗàw à Zəzagəla koksi­koksi babay.

⁸ Ɗahàw haŋkəli kà dza aŋa mavavar akul la matsi­hila dey­dayga aw. Matsi­hila uwaga kà, asa à uda kà la madzugway aŋa dza la abà, ŋgaha la azla­ma­sasəɗok mawi­siga, uwana atà la vəɗah la gudəŋ uwanay à vok. Asa à waŋ kà la slaka Kristu aw.

⁹ Katsəɓaw à atà sləm aw, kà uwana madz à ahəŋ aŋa Zəzagəla kà, aga la Yesu Kristu la abà gesina. Ndzer madz à ahəŋ aŋa Zəzagəla gesina, Yesu Kristu adzà à ahəŋ kiya uwaga babay haɗay.

¹⁰ Tsa akul kahamàw gay à vok la masla kà, akul kaɓəzaw sifa aŋha la dziriga babay. Masla kà, aga lakəl aŋa tatak gesina, la azla­ma­sasəɗok uwana atà la maslay bay.

¹¹ La maham gay à vok la masla la abà kà, Zəzagəla adafa à akul masəlay aŋha à vok, uwana apəhla à azladza kà akul azlaaŋha. La zamana uwarà kà, agòɗ à azla Yahu­diya kà takadav vok à uda, kà masəlay kà azlaaŋa Zəzagəla. Ama kà aŋkul kà, masəlay uwana afà à akul à vok kà, asa à uda kà la ahàl aŋa dza aw, asa à uda kà la ahàl aŋa Yesu Kristu, sə̀làw kà, masla la uwana azə̀ɓ à akul à vok ala madz à ahəŋ aŋa uwarà.

¹² Mok uwana taɗa­hà­kulla batem, uwaga apəhla ala kà talà akul, akul la Kristu la slaka gà. Mok uwana kasàw à uda la iyaw la abà, uwaga apə̀hla ala, kà akul la Kristu, akul kawùllaw à uda la slaka gà la masla aya, kà uwana kadì­ŋàwwal gəl à vok, kà Zəzagəla à uwana awùlla Yesu à uda la mamətsay, kà masla la maslay kà mawulla akul à uda babay.

¹³ Dagay uwarà kà, kagàw bokuba azla­ma­zim­nekiɗ kà uwana kaɗa­hàhàw tsakana, kà uwana kagàw azladza aŋa Zəzagəla aw. Lagonay kà, Zəzagəla adavà à akul sifa mawga la Yesu Kristu, ŋgaha ada­matsan tsakana ala, ada­ma­tsa­kullaŋ ala, ŋgaha ada­ma­tsanuŋ ala suwaŋ.

¹⁴ Uwarà kà, seriya akə̀s anu, kà uwana məɗahà uwana ‘Ɗa­hàwwàŋ’, Zəzagəla agòɗ aw, la lig la ahəŋ Zəzagəla azə̀ɓ anu tsakana lakəl ala. Apə̀l guma, uwana agà la anu lakəl, afà uwaga à gəl aŋa Yesu Kristu, à mok uwana amə̀ts à ahàf à adi.

¹⁵ Mok uwana Yesu Kristu amə̀ts à ahàf à adi kà, azəɓà maslay aŋa azla­ma­sasəɗok mawi­siga ala, ŋgaha la azla­su­fəl aŋatà gesina babay, akəɗàsl atà, ahahay atà à tsəh, apàhla atà ala la slaka azladza, la paraka kà, aɗuwa atà gesina.

¹⁶ Tsa baŋa kiya uwaga kà, dza asləha à akul à vok lakəl aŋa azla­tatak uwana kazuwaw la uwana kasaw aw, dza aslaha à akul à vok aya bay la magoɗay: ‘Sləkàwàw madəvaday la azla­ma­vakay anik anik, ŋgaha la azla­ma­nəŋla təla la azlavuɗ maduw ləv aw.’

¹⁷ Azla­tatak uwaga kà maftsa à vok aŋa uwana apahàh à azladza tatak uwana adàpaka vok. Ama dziriga aŋa tatak uwaga kà Yesu Kristu la gəl aŋha.

¹⁸ Kavàw tetəvi à azladza kà maɗukw akul à uda la masik aŋkul la abà aw. Azladza uwaga tagòɗ kà, say mawoy mas ŋgərpa, ŋgaha la masləkaw azla­ma­lika. Atà tapəhay kà azla­tatak uwana tanəŋàŋ la masa­siŋay la abà. Azlatsəhay dza uwaga kà azla­zlapay deyday, tadzugw lakəl aŋa azla­tatak aŋa gudəŋ à vok uwanay pəra.

¹⁹ Atà la maham à gay à vok la abà la Sufəl Kristu aw. Kà uwana masla kà gəl gà, ŋgaha maham à ahəŋ məna gay Zəzagəla la uwana vok aŋha. Azla­uwana tahamà gay à vok la masla, avà à atà azla­tatak uwana tanàkuɗa aŋha, kà masla la uwana tahamà gay à vok tekula, kiya uwaga tazigənay la tetəvi aŋha la tsəh, bokuba uwana asa à Zəzagəla. Masla ahamà gay azladza uwaga à vok la slaka gà, kà masla la atà aŋa magay tekula, bokuba vok aŋa dza, uwana tadza à ahəŋ la slaka gà la azlaamil ŋgaha la sləɓ vok.

Mamətsay la Kristu

²⁰ Kasəlaw kà, akul gesina kamatsàw la Kristu. Kiya uwaga kà akul la tsəh aŋa azla­ma­sasəɗok uwana la gudəŋ la vok aw. Kayyà, tsa baŋa kiya uwanay kà, kakay à maday aŋkul ma? Kiya aŋa azladza uwana tasəl Yesu Kristu dadàŋ aw takay? Kay, kà mana kanəfaw mapəhay aŋatà uwana apəhay:

²¹ ‘Katap ahàl à azlatsəhay tatak uwaga à abà aw, katap tatak uwaga aw, kadəɓani tatak uwaga aw’, ma?

²² Tsəhay mapəhay uwaga kà matapla deyday aŋa azladza, azla­tatak uwaga gesina azladza taɗàhla sləray kà tadàzahla.

²³ La madzəka, say madəv kuɗa à Zəzagəla, la manəf maslhay aŋha, ŋgaha la mawoy sləɓ vok aw, ŋgaha la mas ŋgərpa à vok. Ama bà la uwaga manəfay aŋa mapəhay uwatà, azlaka dza tetuwa aw, kà dza aŋa magay la maslay lakəl aŋa azla­tatak mawi­siga uwana abiy dza aw.