2 Piyer 1 - Wakità Zəzagəla Wakità Aŋa Makəs Vok Slawda Mawga (Cameroun)

Ayyi

¹ Gi Səmon Piyer, gi uwana gi mayà aŋa Yesu Kristu, gi masla matapla la slaka aŋha bay, à uwana gətsetser à akul wakità uwanay, akul uwana kadiŋaw gəl à Yesu à vok kalkal bokuba uwana mədiŋal gəl à vok babay, anu gesina məɓəzà à tatak uwaga la slaka gà. Yesu Kristu aɗahà uwaga kà aŋami gesina, kà uwana masla kà dziriga. Masla kà Zəzagəla la gəl aŋha, ŋgaha masla maɓəl anu babay.

² Awoyàŋ kà mapis gay à vok aŋa Zəzagəla agay la akul kaykay, la lapiya, kà akul aŋa masəlay kaykay Zəzagəla la Yesu, Sufəl gami.

Maday aŋa azlaməna madiŋal gəl à vok

³ Yesu Kristu apə̀ha­nula Zəzagəla uwana azàlla anu, kà anu aŋa maham à mazləɓay aŋha à abà, ŋgaha kà anu aŋa manəf maday aŋha, uwana aɗuwa gesina, kiya uwaga masla avà à anu ndzəɗa aŋa maslay aŋha, azla­tatak gesina uwana anu mənəkuɗa aŋha, kà anu aŋa maɓəzal sifa mawga, ŋgaha kà anu aŋa manəf maday uwana ahəɗ à Zəzagəla à adi.

⁴ La azlatsəhay tetəvi uwanay à uwana avà à anu azla­tatak uwanay, uwana apə̀h à ahəŋ uwarà kà aŋa mav à anu azla­tatak uwana dzəɓa aŋha səla aw kà aŋami. Aɗahàŋ kiya uwanay kà, kà made­golay azla­tatak uwanay, kà azla­tatak mawi­siga aŋa gudəŋ à vok uwana akəɗ à adi aŋa mabiy akul aw, kà akul aŋa maf gəl à azla­ma­dzugway aŋa Zəzagəla.

⁵ Lakəl aŋa azla­tatak uwanay, gəgoɗ akul kà: Wàɗàw vok à uda! Dìŋàw gəl à Yesu Kristu à vok lagonay, kanəfaw maday delga! Dàw à huma la maday delga! Yàhàw kà masəl azla­tatak babay!

⁶ Kà uwana kasəlaw azla­tatak uwanay, dzàw à ahəŋ titi babay, kà uwana kada­fahaw akur à vok aŋkul à lig, tsìzllàw à ahəŋ la ndzəɗa la azla­matərəɓay la abà la mawaɗàh vok à uda. Nəfàw bokuba uwana ahəɗ à Zəzagəla à adi.

⁷ Kà madla vok kà akul à akul bokuba uwana ahəɗ à Zəzagəla à adi. La madz à ahəŋ uwana bokuba akul la azla­deda, wòyàw azladza gesina babay.

⁸ Baŋa kaɗahaw azla­tatak uwanay koksi­koksi kà, masəl Yesu Kristu aŋkul ada­kəsa­kulla vok, ŋgaha maday aŋkul adavà mayyay lela.

⁹ Ama kà aŋa azladza uwana taɗah uwaga aw kà, tapa­kahay bokuba azla­gu­ləf. Adavika atà à tsakana uwana taɗa­hàhàŋ uwarà, Zəzagəla amà­tsatàŋ ala.

¹⁰ Azla­deda, tsa baŋa kiya uwanay kà, wàɗàhàw vok à uda, kà uwana Zəzagəla azalà akul, ŋgaha atsa­tsà­mànì akul kà maɗehəŋ kiya uwanay. Baŋa kaɗa­hawwaŋ kiya uwanay, tetuwa tetəvi aŋa Zəzagəla adàvika akul aw.

¹¹ Kiya uwanay la kokuɗa matsigay, Zəzagəla adàpəzlla akul gamagày, kà akul aŋa mad à makoray aŋa Sufəl gami Yesu Kristu à abà, uwana aɓə̀l anu. Makoray uwatà adà­dze­həŋ aŋa koksi­koksi.

¹² Kà uwaga kà, gədà­wu­la­kulla à gəl koksi­koksi, te­ke­ɗika kà, sə̀làw nəma kà akul aŋa matsizl à ahəŋ la ndzəɗa la azlagay dziriga uwanay la abà, kata­pawla.

¹³ La mok uwana gi la ahəŋ la sifa dadàŋ la gudəŋ la vok, gəsəl kà dzəɓa aŋha səla aw kà gi aŋa mawu­la­kulla tatak uwanay à gəl, kà akul aŋa madz à ahəŋ la adi.

¹⁴ Gəzlàmətsay à dagay, bokuba uwana Sufəl Yesu Kristu apə̀h à gi à vok à abà.

¹⁵ Uwana gəwaɗ vok à uda lagwa, kà baŋa gədamətsay kà, kadàɓəzaw à tetəvi aŋa mawul akul à gəl aŋa azlagay uwanay.

Azlauwana tanəŋà mazləɓay aŋa Kristu

¹⁶ Dagay uwarà məpə̀h à akul mas à waŋ aŋa Yesu Kristu la maslay aŋha à gudəŋ à vok. La mapəh à akul kiya uwanay, məpə̀h à akul azlagay mavi­yaga, uwana asàhàh à uda la madzugway aŋa azladza la abà aw. Ama mənəŋàŋ ndzəɗa aŋa mazləɓay aŋha, la yewdi gami.

¹⁷ La kaslà uwana aɓəzà à masləkaway ŋgaha la mazləɓay la ahàl aŋa Zəzagəla, məgà la abatà, mətsənàŋ kà Zəzagəla uwana aɗuwaŋ gesina la mazləɓay, apə̀h gay uwanay: ˈUwaga kà bəzi gay ləv gulo, uwana gəwoyaŋ kaykayˈ, Zəzagəla agòɗ.

¹⁸ La mok uwana məgà la gudəŋ tsi­ka­slaga la afik, la Sufəl gami Yesu Kristu, à uwana mətsənà azlagay uwanay, atsə̀n à ahəŋ la zagəla

¹⁹ Uwana azlaməna mapəh à atà gay à ahàl aŋa Zəzagəla tapàh kà, apakà vok la huma yewdi gami babay, kà uwaga mədiŋ gəl à mapəhay aŋatà à vok. Delga kà kaɗahaw haŋkəli la mapəhay aŋatà, kà uwana sayda aŋatà kà, aga bokuba fənəs, uwana auɗay la mələs la abà. Dàw à huma à gay la matsəɓal sləm, tsəràh à kaslà mavakay uwana adàpəhla vok ala la paraka. La mavakay uwatà kà, ŋuzla bebəŋ, uwana Kristu, adàpəhla vok ala, ŋgaha kadànəŋaw azla­tatak gesina la paraka.

²⁰ Azla­tatak uwana aɗuwa vok gesina, à uwana gəpə̀h à akul, kà gay aŋa azlaməna mapəh à atà gay à ahàl uwarà tapàh, ŋgaha tatsetsèr à wakità Zəzagəla à abà babay, gay uwaga kà matsi­hila aŋa azladza aw.

²¹ Gay aŋa azlaməna mapəh à atà gay à ahàl uwaga kà matsi­hila aŋa azladza aw, Masasəɗok tsi­ka­slaga la uwana avà à atà maslay, kà atà aŋa mapàh paŋaw aŋa Zəzagəla, uwana apə̀h à atà.