Yayqqooba 1 - Oroth Caaqo

¹ Xoossa Goda Yesuus Kiristtoosa ayllay, Yayqqooba, alame ubbayil laalintteez taphpho nam77ii sheeshitayis kiitteez kiita. Saro, yinttis maaqqo.

Ammanonnee ecettith

² Ta ishuntho, yinttan duma duma paace helliza wode yi lo77o baz denggeezay garkk udii kunth ufayssar ekkoytta.

³ Yi ammanay paacinttay yinttis garzho inggizana yi eriza.

⁴ Yi wurssith hellodayis yibatar danda7iko abikka paccekka yinttan polonnee kunth maho.

⁵ Yinttapp ooskka eccettithii dhabiko Xooss woosso. E yinttis inggoda. Xoossay oonakka borekazar ubbayis keehatithar inggiza Xooss.

⁶ Zin woossittar ammanor se7ekkazar Xoossa woosso. Se77iza oonkka carkko eni7isin eni7iza abba zulo garkke.

^7-8 Nam77ii qofa yezaynne fa ogayil eqqooya oonkka Godaypp abkka demmada aazippe.

Manqqotithinnee duretis

⁹ Ammaniza manqqo asay, Xoossay unttan dhoqqi udod gisho ufaytto.

¹⁰ As duretithii fudhe garkk dhabiza gishos ammaniza dure asay Xoossay unttan ziqqi udikokka ufaytto.

¹¹ Away fa mishar kezii maata melisiza, fudha gufisiza; e lo77otithaykka dhabiza. Yey garkkekka, dure asay fa oosor daaburittar dhaboda.

Ase helliza paace

¹² Meto gamii aadheezaypp guye, Xoossay fana qaadhizitayis immad gi qaala caaqo geleez de7o zawude ekkod gishos metor garzhiza as anjjintteezaya.

¹³ Oonkka paacinttiza wode «Tana Xoossay paacceeza» giippe. Xoossay iitar paacinttooya; ma E oonakka paaccooya.

¹⁴ Zin pettii pettii as fa iita amotithar gooshinttittaranne dooshinttittar paacinttiza.

¹⁵ Yeyppe guye, amotith wodexxii nagara yeliza; ma nagara diccii yhayiqo yeliza.

¹⁶ Ta siiqo ishuntho, doshinttippate.

¹⁷ Lo77o imonnee kunthi anjjo ubbitay saloppennee salopp yi7iza. Yeykka kuya garkk ubba wode wutoowa woy laaminttoowa poo7itay aday Xoossaypp yi7iza.

¹⁸ Nuunii, e medhetithis bayira maaqqad garkk nuna tuma qaalar fa shener yeleeza.

Si7eezanna oosol afa peesho

¹⁹ Ta siiqo ishuntho, yhaya dogippate. As ubbay si7odayis elliso, zin odinttodayisnee kaccinttodayis ellisippe.

²⁰ As kachchii Xoossay xillotitha ko7ooya.

²¹ Yey gishos, tuna hanonnee iitatith ubba dhabisii, Xoossay yi wozina gancce tukkeez yi shemppo ashshodayis danda7iza qaala haayotithar ekkoytta.

²² Zin Xooss qaala oosol peeshshoyttapp attin si7ith aaddar yinttan dooshippatte.

²³ Qaala si7ii oothowa asii, E fana masttooter bi7iz asgarkke.

²⁴ E fana bi7ii maaqqii qitiza, zin e ab aazizako ellis dogiza.

²⁵ Zin oonkka wallo kessiza folo higge akaakar bi7ii, kaallii naagizay, si7eezana dogekka oosol peeshshiza athay, fa ooso ubbayir anjjinttoda.

²⁶ Fa irantha naagekkazar goynniza giz athay fana dooshiza; e goynnay cere.

²⁷ Xooss Aday tiina boro baa geesh goynnay yhaya: zhi7o na7itannee am7ita u metayid maadennee alame tunapp fana naago.